GENESIS 23 - Ottawa New Testament Penteteuch and Psalms 1874

¹ Sarah dush keningoodwauk duhsoo‐pepoon‐uhgeze ahshe neezhtuhnuh ahshe neezhwahswe; me suh oo‐oo menik kahbemahdezid Sarah.

² Sarah dush keduhpena emuh Kirjath‐Arbaing; mesuh ewh Hebron ahyahwung emuh Canaan uhkeeng: Abraham dush keëzhah chenuhneenuhwandung oonje Sarah, kuhya chemuhwemaud.

³ ¶ Abraham dush kepuhsegwe oonje ahyahnid naboonejin oowedegamahgunebuneen, oogeguhnoonaun dush oogwissun owh Heth, oo‐oo keëkedood.

⁴ Nemuhyuggiz kuhya nepahbahduhniz emuh keduhkeemewaung: meezheshin chebagummiggoo‐uhkeens anduhzhe‐ahyahyag, chepuggedanemug kahnebood newedegamahgun chewahbuhmahsewug dush.

⁵ Oonejahnesun dush owh Heth oogenuhquatuhwahwaun enewh Abrahamun, oo‐oo keënahwaud.

⁶ Bezinduhweshenaum, nindoogemaum: kekeche‐oogemow suh emuh ninduhkeemenaung: ewh kawuhwanahbunduhmun chebaguhmig andussing nechebaguhmigoonahnin me emuh kapuggedanemud owh kewedegamahgunebun; kah ween ahweyah menik anduhcheyaung kegahsahgetuhmahgoose oochebaguhmig, chepuggedanemud kahnebood kewedegamahgunebun.

⁷ Abraham dush kepuhsegwe, keshahgushketuhwaud dush enewh ewede uhkeeng duhzhe ahnishenahban, oonejahnesun owh Heth.

⁸ Oogeguhnoonaun dush, oo‐oo keëkedood, Kishpin ananduhmoowagwan chepuggedanemug newedegamahgunebun chewahbuhmahsewug dush; bezinduhweshig, kuhya kuhnooduhmahweshig owh Ephron oogwissun owh Zoar.

⁹ Chemeezhid ewh waumbahbikaug emuh Machpelahing, ewh dabandung, emuh wahyaquahahyahnig ooketegaun; menik shooneyah apeetandahgwudoogwan me menik kameenug kishpin meezhid chedebanduhmaun cheöochebagummigooyaun emuh anduhnuhkeeyag.

¹⁰ Ephron dush oogeweejduhnuhkeemaun enewh oonejahnesun owh Heth: Ephron dush owh Hittite oogenuhquatuhwaun Abrahamun emuh kenoondahgood oonejahnesun owh Heth, kuhkenuh paundeganejin emuh ishquaundamewung oodanah, oo‐oo keëkedood.

¹¹ Kahween, nindoogemaum, bezinduhweshin: Kemeenin ewh ketegaun, kuhya waumbahbekaug emuh kemeenin; anahsuhmuhbewaud nindahnishenahbamug kemeenin: puggedanim kewedegamahgunebun.

¹² Abraham dush oogeshahgushketuhwaun enewh ewede uhkeeng duhzhe ahnishenahban.

¹³ Oogeguhnoonaun dush Ephronun kenoondahgood enewh ewede uhkeeng duhzhe ahnishenahban, Kishpin suh wahmeezhewunan, bezinduhweshin kepahgoosanemin: Shooneyah kegahtebahahmoon ewh ketegaun; oodahpenuhmahweshin, ningahpuggedanemah dush newedegamahgunebun emuh.

¹⁴ Ephron dush oogenuhquatuhwaun Abrahamun, oo‐oo keënaud.

¹⁵ Nindoogemaum bezinduhweshin; newauk duswahbik shooneyah ahpetandahgwud ewh uhkee; wagoonan suh ewh menik kaöonjepahbahmanduhmung keen kuhya neen? puggedanim suh kewedegamahgunebun.

¹⁶ Abraham dush oogebezinduhwaun enewh Ephronun; Abraham dush oogetebahbishkooduhmoowaun Ephronun enewh shooneyaun, kahweënahpuneen kenoonduhmenid oonejahnesun owh Heth, newauk duswahbik shooneyaun, ewh tabahahmahganid ahtahwa‐wenenewun.

¹⁷ ¶ Ooketegaun dush owh Ephron emuh Macpelahing anduhgoog, debishkoo Mamreïng, ewh ketegaun, kuhya ewh waumbahbikaug emuh, kuhya kuhkenuh metigoog emuh padukkezoojig, kuhya kuhkenuh uhkee kewetuhyeëe anduhgoog, keähpeche puggedenuhmahwah,

¹⁸ Abraham chedebandung emuh anahsuhmeähyahnid oonejahnesun owh Heth, kuhya anahsuhmenid kuhkenuh paundeganejin emuh ishquandamewunenig oodoodanowh.

¹⁹ Kahishquah‐ahyahnig dush oonoo uhyeëen, Abraham oogepuggedanemaun Sarahun wahdegamahpuneen emuh waumbahbekahnig emuh Machpelahing duhzhe ketegauning debishkoo Mamreïng anduhgoog: me suh ewh Hebron emuh Canaan duhzhe uhkeeng anduhgoog.

²⁰ Ewh dush ketegaun, kuhya ewh waumbahbekaug emuh oogeähpeche puggedenuhmahgoon Abraham chedebandung ewh chebaguhmigoo‐uhkee enewh oonejahnesun owh Heth.