GENESIS 22 - Ottawa New Testament Penteteuch and Psalms 1874

¹ Kepuggummeähyah suh kahishquahezhewabuk oonoo, Kesha‐Muhnedoo kekuhgwatebanemaud enewh Abrahamun, oo‐oo dush keënaud, Abraham: oo‐oo dush oogeëgoon enewh, Benuh oomah nindahyah.

² Oo‐oo dush keëkedoo, Oodahpin suh kegwis, puhwazhegood suhyahgeüd Isaac azhenekahzood, ezhaun edush ewede Moriah duhzhe uhkeeng; puggedin dush ewede cheähwid chahgeda‐puggedenegawin emuh pazhig wahjewing kaweenduhmoonaun.

³ ¶ Abraham dush keöonishkah kekezhab, kuhya oogeähtuhwaun ahpuhbewin enewh oomamaungeshaëmun, kuhya oogeöodahpenaun neezh oodooshkenegemun, kuhya oogwissun Isaacun, kuhya oogetaushkeguhaunun mesun kaöonje-chahgetag ewh chahgeda‐puggedenegawin, kepuhsegwe dush, keëzhah dush emuh ewh kahduhzhinduhmenepun Kesha‐Muhnedoon.

⁴ Nasoogoonugudenig dush Abraham keöombishkinzhegwane, oogewahbundaun dush azhaud wahsuh.

⁵ Abraham dush oo‐oo oogeënaun enewh oodooshkenegemun, Oomah kenuhwah guhnuhwanemik mamaungesha, neen edush kuhya owh ooshkenegish ewede‐ningahezhahmin chenuhkuhwa‐ahnuhmeähyaung, bahmah dush kegahpenaunzekahgoom.

⁶ Abraham dush oogeöodahpenaunun enewh missun kaöonje chahgetag chahgeda‐puggedenegawin, kuhya oogeöomboondahaun enewh Isaacun oogwissun; oogetuhkoonaun dush ween ishkooda, kuhya mookoomaun; nahyazh edush keühneweejindewug.

⁷ Isaac dush oogeguhnoonaun enewh oosun Abrahamun, oo‐oo dush keënaud, Noosa; oo‐oo dush keëkedoowun, Benuh, oomah nindahyah, ningwissa. Oo‐oo dush keëkedoo, Benuh ewh ishkoota kuhya enewh missun: ahneende dush ween owh mahnishtahnisheens kachahgezoond uhpe puggedenegayung?

⁸ Abraham dush oo‐oo keëkedoo, Ningwissa, Kesha‐Muhnedoo tahoondenuhmahzoo mahnishtahnisheensun kachahgeda puggedenemind; medush nuhyazh keühneweejindewaud.

⁹ Ketuhgwishenoog dush ewede kahwahweenduhmahgood Kesha‐Muhhedoon; Abraham dush oogeöozhetoon sahsahgewejegun‐ahbik emuh, oogeëogwissetoonun dush wawane missun, kuhya oogetuhkoobenaun Isaacun oogwissun, kuhya oogeähsaun emuh sahsahgewejegun‐ahbikoong emuh oogij-misheeng.

¹⁰ Abraham dush keshebenikane kuhya oogetuhkoonaun ewh mookoomaun chenesaud enewh oogwissun.

¹¹ Owh dush Jehovah oodangemun oogepepahgemegoon oonje ishpeming kezhigoong, oo‐oo dush oogeëgoon, Abraham, Abraham: oo‐oo dush keëkedoo, Oomah suh nindahyah.

¹² Oo‐oo dush keëkedoowun, Kagoo taungenahkan owh ooshkenegish, kagoo kuhya ningood doodahwahkan: noongoom mah kekekanemin koosud Kesha‐Muhnedoo, oonje kesahgetuhmahwesewun kegwis, puhyazhegood kegwis.

¹³ Abraham dush keöombishkinzhegwane, keënahbid dush, oogewahbuhmaun dush oopequunaung enuhkuhkayah pazhig ahyahba‐mahnishtahnishun bezoowenajenenid oodashkuning emuh magwakoob. Abraham dush oogeähweöodahpenaun enewh mahnishtahnishun, oogesahsahgewejeganun dush kechahgeda puggedenegad dush wesahsahgewejegapun enewh oogwissun.

¹⁴ Jehovah Jireh dush Abraham oogeezhenekahdaun ewede; debishkoo akedoong peenish noongoom kezheguk, Emuh Jehovah oowahjewing tahwahbunjegahda.

¹⁵ ¶ Jehovah dush oodangenemun oogepepahgemaun Abrahamun ishpeming gezhigoong oonje, me dush neezhing.

¹⁶ Oo‐oo dush keëkedoo; ningetuhgoo‐weendaun tebenuhwa nindenoozoowin mushkahwe‐wahweendahmahgayaun, ekedoo Jehovah, oonje oo‐oo keëzhechegayun, kah dush kegesahgetuhmahwese kegwis, puhyazhegood kegwis:

¹⁷ Shahwanemenaun kegahshahwanemin, kuhya meshenooënaun ningahmeshenooäug kenejahnesug debishkoo ishpeming duhzhe ahnungoog, kuhya ashenuk nagow tetebaoo kechegummeeng; kenejahnesug dush oogahdebandahnahwah oodishquaundamene enewh shaunganemegoowahjin;

¹⁸ Keen dush kaöonejahneseyun tahoonjeshahwandahgoozewug ahnooj azheweenzoojig; oonje kebezinduhmun nindinwawin.

¹⁹ Abraham dush nayaub oogenaunzekahwaun enewh oodooshkenegemun, kepuhsegwewug dush kuhya keühneweejindewug keëzhahwaud ewede Beershebaïng; Abraham dush keduhnuhke ewede Beershebaïng.

²⁰ ¶ Kepuhgummeähyahmahgud dush kahishquahahyaug oonoo, keweenduhmahwah Abraham, oo‐oo keënind, Benuh Milcah, kuhya ween oogenegetuhmahwaun ahbenoojeün enewh Nahorun kekahnisun:

²¹ Huz oonetummoozhahnun, kuhya wekahnesenene Buz, kuhya Kemuelun enewh wayoosemegoojin Aram,

²² Kuhya Chesedun, kuhya Hazoün, kuhya Pildashun, kuhya Jidlaphun, kuhya Bethuelun.

²³ Kuhya Bethuel oogeöonejahnesenun Rebeccaün: mesuh oonoo ishwahswe Milcah kahnegetuhmahwahjin Nahorun, Abraham wekahnisun.

²⁴ Kuhya oodequamun noondaush apeetandahgoozenejin Reumah azhenekahzoonejin, oogenegetahmahgoon Tebah, kuhya Gaham, kuhya Thahash, kuhya Maachah.