GENESIS 2 - Ottawa New Testament Penteteuch and Psalms 1874

¹ Mesuh kahezhekezhechegahdag keezhig kuhya uhkee, kuhya kuhkenuh emuh ayahjig.

² Nauzhwahsoogoonahguk Kesha‐Muhnedoo oogepoonetoon oodahnookeewin kahoozhetoopun: Keäunwabe dush nauzhwahsoogoonahguk oonje kuhkenuh oodahnookeewinun kahoozhetoopuneen.

³ Kesha‐Muhnedoo dush oogeshahwandaun neezhwahsoo‐kezhegud, kuhya oogekechetwahwetoon oonje keäunwabid kahpooneähnookeed kuhkenuh oodahnookeewinun enewh Kesha‐Muhnedoo kahoozhetoopuneen kuhya kahkezhetoopuneen.

⁴ ¶ Mesuh kahezhewabuk uhpe keöozhechegahdag kezhig kuhya uhkee, ewh kezheguk uhpe Jehovah Kesha‐Muhnedoo keöozhetood kuhya kekezhetood uhkee kuhya kezhig.

⁵ Kuhkenuh nwahkushkukkin emuh ketegauning chepwah uhkeeng ähyahmahguk, kuhya kuhkenuh ketegauning duhzhe mushkoosewun chepwah majeging: Kah mah muhshe Jehovah Kesha‐Munedoo keëkedoosegoobun chekemewung emuh uhkeeng, kah dush ahweyah enene ahyahsebun cheketegahdungebun uhkee.

⁶ Uhkeeng dush keöonjeöombishkahmahgud uhwun, mesuh kahezhenesahbahwejegahdag anegookummegaug uhkee.

⁷ Jehovah Kesha‐Muhnedoo dush oögeoözheäun enenewun weyuggussaëwung uhkee kahahyood, kuhya oogenasanoodahwaun emuh oodanegoomening ewh bemahdezewine‐nasawin; mesuh kebemahdezenid enene oojechaugwun.

⁸ ¶ Jehovah Kesha‐Muhnedoodush oogeoözhetoon ketegaunans wahbunoong enuhkayah emuh Edening; ewede dush kahahsaud enenewun kahoozheähjin.

⁹ Uhkeeng dush Jehovah Kesha‐Muhnedoo oogeöonjesah-gukkeäun kuhkenuh anduhswahkoozenejin metigoon manwahbuhmenahgoozenejin, kuhya manoopoogoozenejin; kuhya bemahdezewine‐metigoon padukkezoonejin nahwuhyeëeng emuh ketegaunansing, kuhya enewh metigoon kahöonjekekanjegahdag ewh wanesheshing kuhya mujjeühyeëewish.

¹⁰ Seebe dush keönjeteguayah emuh Edening chenesahbahwejegahdag ketegaunans, ewede dush newing keöonjepukkate-guayah.

¹¹ Pazhig Pison keëzhenekahda: mesuh ewh kahwetahte-guayaug emuh anegookookummegaug Havilah aduhming uhkee, emuh anduhzhe oozahwah‐shooneyahkaug.

¹² Oonesheshin dush ewede ewh uhkeeng duhzhe oozahwah‐shooneyah: ewede dush ahtanoon Bdellium kuhya onyx ahsin.

¹³ Menuhwah dush pazhig seebe Gihon keëzhenekahda: me ewh kawetahteguayaug emuh anegookookummegaug Ethiopia aduhming uhkee.

¹⁴ Menuhwah dush pazhig seebe Hiddekel keëzhenekahda: mesuh ewh wahbunoong azheteguayaug Assyriaing enuhkuhkayah; Ewh dush newing seebe mesuh Euphrates.

¹⁵ Jehovah Kesha‐Muhnedoo dush oogeöodahpenaun enenewun keähsaud dush emuh ketegaunansing Eden azhenekahdag cheketegahduhmenid kuhya cheguhnuhwanduhmenid.

¹⁶ Jehovah Kesha‐Muhnedoo dush oogekenahahmahwaun enenewun, oo‐oo keënaud, Azhemenewewaud kuhkenuh anduhswahkoozewaud metigoog padukkezoojig emuh ketegaunansing mahnoo kegahaumwaug wahaumwudwah.

¹⁷ Azhemenewid atuh owh metig wanjekekanjegahdag wanesheshing kuhya mujjeühyeëewish, kahween kegahaumwahse: ewh mah kezheguk uhpe kaäumwud ahbetakummig kegahnib.

¹⁸ ¶ Jehovah Kesha‐Muhnedoo dush oo‐oo keëkedoo, Kahween oonesheshinsenoon chenezhekawezid enene; ningahoozhetuhmahwah weedegamahgunun kaweedookahgoojin.

¹⁹ Uhkeeng edush Jehovah Kesha‐Muhnedoo oogeöonjeöozheäun kuhkenuh mushkootang duhzhe ahwaseeün, kuhya kuhkenuh penasewun pabahmesanejin gezhigoong; kuhya oogepetuhmahwaun Adamun wewahbuhmaud kaëzhenekahnahnid enewh; nuhmunj edush Adam kahezhenekahnahgwan kuhkenuh bamahdezenejin, mesuh goo kahëzhenekahzoowaud.

²⁰ Adam dush oogeweenaun kuhkenuh ahwahkaunun, kuhya kuhkenuh penasewun babahmesanejin emuh gezhigoong kuhya kuhkenuh mushkootang duhzhe ahwaseeün; kah dush ahweyah kemekahwahse kaweedookahwaud Adamun.

²¹ Jehovah Kesha‐Muhnedoo dush keënahkoonega chekeche‐nebahnid Adamun, kenebahwun dush: magwah dush nebahnid oogeöodahpenuhmoowaun pazhig oopegagunun, kuhya nayaub oogekebahquahahmahwaun weyausine.

²² Jehovah Kesha‐Muhnedoo dush oogeähbujjetoon ewh oopegagun kahoodahpenahmahwaud enenewun cheöozheäud equawun, kuhya oogepetuhmahwaun enenewun.

²³ Adam dush oo‐oo keëkedoo, Mesuh oo‐oo ookunemah nekuning wandenegahdag, kuhya oo‐oo weyausemah neyausing wandenegahdag: equa suh tahezhenekahzoo, eneneeng mah keöondenegahzoo.

²⁴ Mesuh oo‐oo enene kaöonjenuhguhnaud enewh oosun kuhya enewh oogeen, oogahweejewaun dush enewh wewun; tahpazhigwunene dush weyausewah.

²⁵ Nuhyazh edush kepingwahshahgedewug, enene kuhya oodequamun, kah dush keähgujjesewug.