EXODUS 6 - Ottawa New Testament Penteteuch and Psalms 1874

¹ Jehovah dush oo‐oo oogeënaun enewh Mosesun, Mesuh dush chewahbunduhmun ewh kadooduhwug Pharaoh: ahpeche mahween tahenandum chepuhgedenaud chemahjahnid, kuhya oogahbahzhegwahje‐sahgejenahzhuhwaun emah ooduhkeeming.

² Kesha‐Muhnedoo dush oogeguhnoonaun Mosesun, oo‐oo dush keënaud, Neen suh nindowh Jehovah:

³ Ningewahbuhmigoog dush Abraham, Isaac kuhya Jacob, Kesha‐Muhnedoo Muhyahmuhwe‐Mushkuhwezid keëzhenekahzooyaun, kah dush ween oogekekandunsenahwah Jehovah keëzhenekahzooyaun.

⁴ Ningeühyeenjesittoon dush kuhya newahweenduhmahgawin wahweenduhmuhwugwah, chemenugwah ewh Canaan duhzhe uhke, ewh uhke emah kebuhbahmahdezewaud, kuhya kahduhzhemuhyuhgezeyaun.

⁵ Ningenoondaun dush kuhya ooketemahgetahgoozewinewah Israel oonejahnesun, egewh quaduhge‐ühnookeëgoowaud enewh Egyptianun; ningemegwandaun dush newahweenduhmahgawin.

⁶ Oo‐oo suh dush ezhe Israel oonejahnesun, Neen nindowh Jehovah kegahsahgejewenenim dush emah anduhzhe‐kooduggeühnooketuhwagwah egewh Egyptianug, kuhya keguhekoonenim emah anduhzheunooketuhwagwah, kuhya kegahbemahjeënim shebenekaneyaun, kuhya keche‐tebahkoonegayaun:

⁷ Kegahoodahpenenim dush cheöodahneshenahbamme enuhgoog, neen dush kuhya ningahdowh ke‐Kesha‐Muhnedoomewah: kegahkekandahnahwah dush neen ahweyaun Jehovah ke‐Kesha‐Muhnedoomewah, suhyahgejewenenag emah anduhzhe‐koodugge‐ühnooketuhwagwah egewh Egyptianug.

⁸ Kegahpeendegunenim dush emah uhkeeng, ewh kahmushkuhwewahweenduhmahgayaumbaun chemeenugwah Abraham, Isaac kuhya Jacob; kegahmenenim dush ewh cheähpeche-tebanduhmag: neen suh nindowh Jehovah.

⁹ ¶ Medush oo‐oo Moses kahenaud enewh Israel oonejahnesun; kah dush oogahbezindahgooseen Moses, apeech koodugganduhmenid, kuhya apeech koodugge‐uhnookeëmind.

¹⁰ Jehovah dush oogeguhnoonaun enewh Mosesun, oo‐oo keënaud,

¹¹ Uhwepeendegan, guhnoonzh Pharaoh owh Egypt duhzhe keche‐oogemah, chepuhgedenaud Israel oonejahnesun chenuhguhduhmenid ooduhkeem.

¹² Moses dush kekekedoo emah anahsummeühyahnid Jehovahun, oo‐oo keëkedood, Benuh Israel oonejahnesun kahween ningebezindahgooseeg, ahneen dush Pharaoh kaëzhebezinduhwid, neen natah kekedoosewaun?

¹³ Jehovah dush oogeguhnoonaun Mosesun kuhya Aaronun, kemeenaud dush kuhgequawin kaëzhekuhgekemahnid Israel oonejahnesun, kuhya Pharaohun enewh Egypt duhzhe keche oogemaun, chesahgejewenahnid Israel oonejahnesun emah Egypt duhzhe uhkeeng.

¹⁴ ¶ Mesuh oogoo nahgahnezekundungig oosewaun oowegewaumene: Oogwissun owh Reuben, Israel oonetumoonzhahnun; Hanoch kuhya Pallu, Hezron kuhya Carmi: mesuh oogoo wandahdezejig Reuben oonejahnesun.

¹⁵ Oogwissun dush Simeon; Jemuel, kuhya Jamin, kuhya Ohad, kuhya Jachin, kuhya Zoar, kuhya Shaul kahoogwissemegoojin Canaan duhzhe equawun: mesuh oogoo wandahdezejig Simeon oonejahnesun.

¹⁶ ¶ Medush kuhya oonoo oodezhenekahzoowinewaun Levi oogwissun debishkoo kahezheähneka‐bemahdezewaud; Gershon, kuhya Kohath, kuhya Merari: enewh dush kekenoonoowinun menik kahbemahdezid Levi, ningoodwauk uhshe nesemeduhnuh uhshe neenzhwahswe keduhchenenewun.

¹⁷ Oogwissun owh Gershon; Libni, kuhya Shimi, debishkoo azhesenenig oodenoodawezewinewah.

¹⁸ Oogwissun dush Kohath; Amram, kuhya Izhar, kuhya Hebron, kuhya Uzziel: enewh dush kekenoonoowinun menik kahbemahdezid Kohath, ningoodwauk uhshe nesemeduhnuh uhshe neswe keduhchinenewun.

¹⁹ Oogwissun dush Merari; Mahali kuhya Mushi: mesuh oogoo wandahdezejig Levi oogwissun, debishkoo kahezheähneka‐bemahdezewaud.

²⁰ Amram dush oogeöodahpenaun Jochebedun oosigoosun chewedegamaud; oogenegetuhmahgoon dush Aaronun kuhya Mosesun: enewh dush kekenoonoowinun menik kahbemahdezid Amram, ningoodwauk uhshe nesemeduhnuh uhshe neenzhwahswe keduhchenenewun.

²¹ Oogwissun dush Izhar; Korah, kuhya Nepheg, kuhya Zithri.

²² Oogwissun dush Uzziel; Mishael, kuhya Elzaphan, kuhya Zithri.

²³ Aaron dush oogeöodahpenaun Elishebaün, Amminadabun oodahnene, Naashonun oodahwamahnene, chewedegamaud; oogenegetuhmahgoon dush Nadabun, kuhya Abihuün, Eleazarun, kuhya Ithamarun.

²⁴ Oogwissun dush Korah; Assir, kuhya Elkanah, kuhya Abiasaph; mesuh oogoo wandahdezejig enewh Korhitun.

²⁵ Eleazar dush Aaron oogwissun oogeöodahpenaun pazhig enewh oodahnesene Putiel, chewedegamaud; oogenegetuhmahgoon dush Phinehasun: mesuh oogoo nahgahnezekunduhwahjig enewh Levitun oosene, nahsaub egoo anandahgwudenig oodenoodawezewinewah.

²⁶ Mesuh oogoo Aaron kuhya Moses, Jehovahun kahegoowahjin, Sahgejewenik Israel oonejahnesun emah Egypt duhzhe uhkeeng, anduhswayuggezenid ooshemahgunishemewaun.

²⁷ Mesuh oogoo kahguhnoonahwaud Pharaohun, enewh Egypt duhzhe keche oogemaun, chesahgejewenahwaud Israel oonejahnesun emah Egypting mesuh oogoo Moses kuhya Aaron.

²⁸ ¶ Kepuhgummeühyahmuhgud dush ewh goo kezheguk Jehovah keguhnoonaud enewh Mosesun emuh Egypt duhzhe uhkeeng.

²⁹ Jehovah keguhnoonaud enewh Mosesun, oo‐oo keënaud, Neen nindowh Jehovah; weenduhmowh Pharaoh owh Egypt duhzhe keche oogemah kuhkenuh ewh anenaun.

³⁰ Moses dush oo‐oo keëkedoo emah anahsuhmenid Jehovahun, Benuh, kahween nenetahkekedoose, ahneen dush kaëzhebezinduhwid Pharaoh?