EXODUS 33 - Ottawa New Testament Penteteuch and Psalms 1874

¹ Jehovah dush oo‐oo oogeënaun enewh Mosesun, Mahjaunsuh, oomah oonjemahjaun, keen kuhya egewh ahnishenahbag kahsahgejewenudjig Egypt duhzhe uhkeeng, ezhaug dush ewede uhkeeng ewh kahmushkuhwe‐wahweenduhmuhwugebun, Abraham, Isaac, kuhya Jacob, oo‐oo keëkedooyaun, Kenejahnesug ewh ningahmeenaug:

² Ningahuhnoonah dush angen cheühnenegahneed emah kaneezhahyun; ningahsahgejenaunzhuhwah dush owh Canaanite owh Amorite, kuhya owh Hittite, kuhya owh Perizzite, owh Hivite, kuhya owh Jebusite:

³ Kegahpeendeguhnin dush emah uhkeeng emah anduhnejewung doodooshahboo kuhya ahmoo‐seenzebahquud: kah dush neen kegahweejewesenoonim mashkuhwindebajig ahnishenahbag mah kedahwim: chenishwuhnahjeësenen uhgoog dush nah emah kaneëzhahyag.

⁴ ¶ Uhpe dush egewh ahnishenahbag kahnoonduhmoowaud oo‐oo mahnahjemoowin, kemuhwewug: kah dush uhweyuh enene oogeühyoosenun enewh oozuhzagahchegunun.

⁵ Jehovah mahween oo‐oo oogeënahbuneen enewh Mosesun, Oo‐oo ezhe Israel oonejahnesun, Kamushkuhwindebam kenuhwah anishenahbaweyag: chuhyuhsekah ningahpeëzhah nahwuhyeëe emah uhyahyag, kegahnishwuhnahjeënim dush: umbasuhnoo dush kesekuhmook enewh kesuhzagahchegunewaun, chekekanduhmaun dush nah kadoodoonuhgoog.

⁶ Israel dush oonejahnesun oogekesekoonahwah enewh oosuhzagahchegunewaun cheguhyeëe emah Horeb wuhjewing.

⁷ Moses dush oogeöodahpenaun ewh puhpuhgewuhyahne‐ahnuhmeä‐wegummig, oogepuhduhkesedoon dush uhgwuhjeeng kuhbashewining, wahsuh emah uhtag ewh kuhbashe win, kuhya ewh oo‐Puhpuhgewuhyahne ahnuhmeäwegummegoowah egewh muhyahwunjeëdejig oogeëzhenekahdaun. Kepuhgummeähyahmuhgud dush, anduhchewaud egewh kahnunduhwandungig gagoo chekuhgwajemahwaud enewh Jehovahun, kenaunzekuhmoowaud ewh oopuhpuhgewuhyahne‐ahnuhmeä‐wegummigoowah egewh muhyahwuhjeëdejig, uhgwuhjeeng kuhbashewining atag.

⁸ Kepuhgummeähyahmuhgud dush, uhpe Moses azhaud emah puhpuhgewuhyahne‐ahnuhmeä‐wegummigoong, ewh kuhkenuh enewh ahnishenahban kepuhsegwenid, kuhya kenebuhwenid anduhchenid egoo emah ishquaundamewunenig oowegewaumewaun, kenooswahbuhmahwaud dush enewh Mosesun, nuhnaunzh egoo kepeendeganid emah puhpuhgewuhyahne‐ahnuhmeä‐wegummegoong.

⁹ Kepuhgummeähyahmuhgud dush, Moses anepeendegad emah puhpuhgewuhyahne‐ahnuhmeä‐wegummegoong, ewh kenaunzhesag ewh ahnuhquud, kuhya kenebuhwemahguk emah ishquaundamewung ewh puhpuhgewuhyahne‐ahnuhmeä‐wegummig, Jehovah dush oogeguhnoonaun enewh Mosesun.

¹⁰ Kuhkenuh dush egewh ahnishenahbag oogewahbundahnahwah ewh ahnuhquud‐nebuhwemuhgudenig emah ishquaundamewung ewh puhpuhgewuhyahne‐ahnuhmea‐wegummig: kuhkenuh dush egewh ahnishenahbag kepuhsegwewug, kuhya keshuhgushketahwug, anduhchewaud emah ishquaundamewunenig oowegewaumewaun.

¹¹ Jehovah oogeguhnoonaun enewh Mosesun, mezheshuh kewahbuhmegood, azheguhnoonaud owh bamahdezid enewh weëjekewayun. Nayaub dush keëzhegewawun emah kuhbashewining: enewh dush ween oobuhmeetahgunene Joshuaün, oogwissun owh Nun, ooshkenuhwa, kahween keöonje-mahjahsewun emah puhpuhgewuhyahne‐ahnuhmeä‐wegummegoong.

¹² ¶ Moses dush oo‐oo oogeënaun enewh Jehovahun, Benuh, oo‐oo kedizh, Pemewizh oogoo ahnishenahbag: kah dush kekeweenduhmuhwese ahwagwan wahuhnoonahwudan cheweedookuhwid. Oo‐oo dush ween kegeëkid, Kekekanemin azhenekahzooyun, kuhya dush keminwandahgooz emah anahsuhmishkeenzhegwayaun.

¹³ Umbasuhnoo dush, kepuhgoosanemin, kishpin manwandahgoozewaunan emah anahsuhmishkeenzhegwayun, wahbunduheshin noongoom kemeekun, chekekanemenaun dush, cheminwandahgoozeyaun emah anahsuhmishkeenzhegwayun; kuhya nahnahguhduhwanim oogoo ahnishenahbag ahwewaud kedahnishenahbamug.

¹⁴ Oo‐oo dush oogeëgoon, Newejeëwawin kegahwejewegoon, kuhya kegahmeenin unwabewin.

¹⁵ Oo‐oo dush oogeënaun, Kishpin ewh kewejeëwawin wejewegoosewaung, kagoo ween oomah oonjemahjewezheshekaungan.

¹⁶ Ahneen gooduh goo kaëzhekekanduhming oomah ewh neen kuhya egewh kedahnishenahbamug keminwandahgoozewaud emah anahsuhmishkeenzhegwayun? kah nah ween emah wejeweyaung? me suh dush puhkaühyeëe cheühyahyaung, neen kuhya egewh kedahnishenahbamug, emah dush ween uhyahwaud kuhkenuh egewh ahnishenahbag anegookookummegaug uhkeeng ayahjig.

¹⁷ Jehovah dush oo‐oo oogeënaun enewh Mosesun, Ningahezhechega suh kuhya oo‐oo kahekedooyun: keminwandahgooz mahween emah anahsuhmeyaun, kuhya kekekanemin azhenekahzooyun.

¹⁸ Oo‐oo dush oogeëgoon, Kepuhgoosanemin, wahbunduheshin kepeshegandahgoozewin.

¹⁹ Oo‐oo dush oogeënaun, Ningahenahkoonega kuhkenuh nindoonezheshewin chepemesamuhguk anahsuhmeyun, kuhya ningahweendaun ewh oodezhenekahzoowin owh Jehovah anahsuhmeyun, ningahshahwanemaug dush egewh kaënanemuggig cheshahwanemindwah, kuhya ningahketemahganemaug egewh kaenanemuggig cheketemahganemindwah.

²⁰ Oo‐oo dush oogeënaun, Kahween kedahkushketooseen chewahbunduhmun nindangwuhy: kah mahween uhweyuh bemahdezid ningahwahbuhmegoose, chebemahdezid dush.

²¹ Jehovah dush oo‐oo keëkedoo, Benuh, tuhweühyahmuhgud pashoo emah uhyahyaun, oogedahbik dush kegahnebowh:

²² Tahpuhgummeähyahmuhgud dush, magwah pemesag nimpeshegandahgoozewin, ewh cheühsenaun emah daushkahbekaug, kuhya cheühgwuhnnhoonaun neninj magwah pemesayaun:

²³ Ningahekooninjeen dush, kegahwahbum dush nimbequuhnaung: ewh dush ween nindangwuhy kahween tahwahbunjegahdasenoon.