EXODUS 32 - Ottawa New Testament Penteteuch and Psalms 1874

¹ Uhpe dush egewh ahnishenahbag wuhyahbunduhmoowaud Mosesun nuhnaunzh penesahkewasenid emah wuhjewing, egewh ahnishenahbag kemahwunjeëdewug emah Aaronun uhyahnid, oo‐oo dush oogeënahwaun, Howh, oozhetuhmuhweshenaum muhnedoog, kanegahnejig emah kaneëzhahyaung; wuhowh mah Moses, owh enene kahsahgejewezheyungid Egypt duhzhe uhkeeng, kehween ningekandunsemin nuhmunj kahdegwan.

² Aaron dush oo‐oo oogeënaun, Muhmebedoog enewh oozahwe‐shooneyah nahbeshabezoonun, agoodagin emah ootuhwuhgahwaung egewh kewedegamahgunewaug, kegwissewaug, kuhya kedaunewaug, peduhweshig dush.

³ Kuhkenuh dush egewh ahnishenahbag oogemuhmebedoonahwaun enewh oozahweshooneyah nahbeshabezoonun ootuhwuhgahwaung agoodagebuneen, oogeëzheweduhwahwaun dush Aaronun.

⁴ Oogeöodahpenuhmahgoowaun dush enewh ooninjewaung, oogeöozhekoonahne dush enewh munzenekoojegun keühyoonid, kahishquahoozheähnejin nangahbekezoonejin pezhekeensun, oo‐oo dush keëkedoowug. Me suh oogoo kemuhnedoomug, O Israel, kahsahgejewenekig Egypt duhzhe uhkeeng.

⁵ Uhpe dush Aaron wuhyahbuhmaud, oogeöozhetoon sahsahgewejegun‐ahbik emah anahsuhmenid; Aaron dush kepepahge, oo‐oo keëkedood, Wahbung suh tuhahnuhmeä‐wekoondim Jehovah oonje.

⁶ Kekezhab dush keöonishkahwug uhpe wuhyahbunenig, oogesahsahgewejeganahwaun dushchahgeda‐sahsahgewejegunun kuhya oogepedoonahwaun pezauneëwa‐puhgedenegawinun; egewh dush ahnishenahbag kewuhwanuhbewug chewesenewaud kuhya chemenequawaud, kuhya kepuhsegwewug cheöoduhmenoowaud.

⁷ ¶ Jehovah dush oo‐oo oogeënaun enewh Mosesun, Mahjaun, nesahkewan; egewh mahween kedahnishenahbamug kahsahgejewenudjig Egypt duhzhe uhkeeng, kenishwuhnahjeëdezoowug:

⁸ Bahbega kepuhkagahbuhwewug emah meekunaung, ewh kahkuhgaunzoomuggwahbun chenahguhdoowaud: keöozhetuhmahzoowug enewh kahningahbekezoonejin pezhekeensun, oogeöojecheengwuhnetuhwahwaun dush, kuhya oogesahsahgewenahwaun, oo‐oo dush keëkedoowaud, Me suh oogoo kemuhnedoomug, O Israel, Egypt duhzhe uhkeeng kahoonjesahgejewenikwah.

⁹ Jehovah dush oo‐oo oogeënaun enewh Mosesun, Ningewahbuhmaug oogoo ahnishenahbag, benuh dush ahwewug egewh mashkuhwindebajig ahnishenahbag:

¹⁰ Umba suhnoo poonemeshin, chepuhguhmishkahgoowaud nenishkahdezewin, chenishwuhnahjeügwah dush: kegahenahkoonin dush keen chebahtuhyenooyun.

¹¹ Moses dush oogepuhgoosanemaun enewh Jehovahun oo‐Kesha‐Muhnedoomun, oo‐oo keënaud, Jehovah, wagoonan suh wanje kechenishkanemudwah egewh kedahnishenahbamug, kahsahgejewenudjig Egypt duhzhe uhkeeng, emah keche mushkuhwezewining, kuhya kemushkuhwenekayun?

¹² Wagoonan egewh Egyptianug kaöonjekekedoowahpun, oo‐oo‐oo‐cheëkedoowahpun, Wemujjedooduhwaud oogeöonjesahgejewenaun, emah wuhjewing cheduhpenuhnaud, chegahsewaud uhkeeng dush cheühyahsenig? Poonegedahzoon noongoom kuhgwahnesuhgegedahzooyun, kuhya quakandun noongoom wemujjedooduhwudwahbun kedahnishenahbamug.

¹³ Mequanim Abraham, Isaac, kuhya Israel, kebuhmeetahgunug, egewh kahmushkuhwe‐wahweenduhmuhwudwah keduhgoowenedezooyun, oo‐oo keënudwah, Ningahkuhgwahnesuhgenooäug kenejahnesewaug azhenoowaud egoo egewh uhnungoog kezhigoong ayahjig me ewh kaëzhenoowaud kuhya kuhkenuh oo‐oo uhke kahduhzhinduhmaun ningahmeenaug kenejahnesewaug, oogahdebandahnahwah dush egoo kahgenig.

¹⁴ Jehovah dush kequakandum wemujjedooduhwahpun enewh oodahnishenahbamun.

¹⁵ ¶ Moses dush kequakegahbuhwe, kenesahkewad dush wuhjewing, enewh dush neezh debahjemoowine‐tasahbikoon ootuhkoonahnahbuneen: enewh tasahbikoon keöozhebeëgahdawun ayeduhwuhyeëe; emah oondausenuhka kuhya uhwus-enuhka keöozhebeëgahdawun.

¹⁶ Enewh dush tasahbikoon Kesha‐Muhnedoo oogeöozhetoonun, kuhya ewh oozhebeëgun keähwunene Kesha‐Muhnedoo oodoozhebeëgun, kemunzenekoojegahdane emah tasahbikoong.

¹⁷ Uhpe dush Joshua nwaundung noondahgoozenid enewh ahnishenahban magwah goo sahsahquanid, oo‐oo oogeënaun enewh Mosesun, Mahgahdingin enetahgwud emah kuhbashewining.

¹⁸ Oo‐oo dush keëkedoowun, Kah suh enetahgoozesewug anetahgoozewaud egewh suhyahsahquajig mamaunzhetwahjig, kahween kuhya enetahgoozesewaud, egewh uhyahshequajig mamaunzheïndjig: azhenoondahgoozewaud suh atuh egewh naguhmoojig me ewh anetuhmaun.

¹⁹ ¶ Kepuhgummeähyahmuhgud dush, bahbega goo uhpe pashoo aneduhnezid emah kuhbashewining, kewahbuhmaud enewh pezhekeensun, kuhya ewh nemeëdewin: kekuhgwahnesuhge‐gedahzoo dush Moses, oogepuhgejewabenaunun dush enewh tasahbikoon, kuhya oogebegwuhaunun emah nesahke.

²⁰ Oogeöodahpenaun dush enewh pezhekeensun kahoozheähnejin, oogechahgezwaun dush, kuhya oogebeseboonaun, oogesuhswawabenaun dush emah nebeeng, kuhya oogemeenuhaun ewh enewh Israel oonejahnesun.

²¹ Moses dush oo‐oo oogeënaun enewh Aaronun, Wagoonan suh kahdoodookwah oogoo ahnishenahbug, ewh dush kepeduhwudwah oo‐oo keche mujje‐ezhewabezewin?

²² Aaron dush oo‐oo keëkedoo, Kagoo ween tahguhgwahnesuhge‐gedahzoose owh nindoogemaum: kekekanemaug egewh ahnishenahbag ewh enanduhmoowaud uhwunjish chemujje‐ezhewabezewaud.

²³ Oo‐oo mahween ningeëgoog, Oozhetuhmuhweshenaum muhnedoog, kanegahnejig emah kaneëzhahyaung: wuhowh mahween Moses, owh enene kahsahgejewezheeyungid Egypt duhzhe uhkeeng, kahween ningekandunsemin nuhmunj kahdegwan.

²⁴ Oo‐oo dush ningeënaug, Ahwagwan oozahweshooneyaun ayahwahgwan, mahnoo oogahmuhmebenahwaun. Me suh kahezhemeenzhewaud: me dush kahezheühpuhgenug ishkoodang, wuhowh dush pezhekeens emah keöonjebah.

²⁵ ¶ Uhpe dush Moses wuhyahbundung ewh pingwahshahgedenid enewh ahnishenahban; (Aaron mahween oogepingwahshahgedeäun keühguhdanduhmenid dush magwaühyeëe emah uhyahnid enewh shaunganemegoowahjin:)

²⁶ Me dush Moses kenebuhwid emah ishquaundamewung ewh kuhbashewin, oo‐oo dush keëkedood, Ahwanan wahdookuhwaud Jehovahun? mahnoo ningahpenaunzekaug. Kuhkenuh dush enewh Levi oogwissun kemahwunjeëdewun emah uhyaud.

²⁷ Oo‐oo dush oogeënaun, Me suh oo‐oo akedood owh Jehovah Israel oo‐Kesha‐Muhnedoomun, Anduhcheyag uhtooyook keduhshuhwashkoomewaun emah oopema‐keyowewaung, pahpeendegayook dush kuhya sahsahguhuhmook emah uhyishquaundamewung ewh kuhbashewin, kuhya anduhcheyag nesik kekahnesewaug, kuhya anduhcheyag kewejewah-gunewaug, kuhya anduhcheyag keej‐ahnishenahbawaug.

²⁸ Egewh dush Levi oonejahnesun keëzhechegawug nahsaub kahekedoonid enewh Mosesun: egewh dush ahnishenahbag kahpungeshenoowaud ewh kezhiguk koonemah goo nesing medahswauk keduhchewug.

²⁹ Oo‐oo mahween keëkedoobun Moses, Puhgedenuhmuhwik noongoom enewh keyowewaun owh Jehovah, anduhcheyag egoo chenesagwah kegwissewaug, kuhya kekahnesewaug; chemenenag dush nah shahwandahgoozewin noongoom kezheguk.

³⁰ ¶ Kepuhguhmeühyahmuhgud dush uhpe wuhyahbung, Moses oo‐oo keënaud enewh ahnishenahban, Kegekechemujje-ezhewabezim suh; noongoom suh dush ningahezheoogedahkewa emah Jehovah uhyaud; koonemah gooshuh ningahkushketoon cheähbwayanemegooyag ewh kemujje‐ezhewabezewinewah.

³¹ Moses dush nayaub oogeëzhaunun enewh Jehovahun, oo‐oo dush keëkedood, Oh, oogoo ahnishenahbag kekechemujjeëzhewabezewug, keöozhetuhmahzoowaud dush oozahweshooneyah muhnedoon.

³² Benuh suh dush, kishpin weähbwayanemudwah kahezhemujjeëzhewabezewaud; kishpin dush ween kahween, kahsebeöoshin, kepuhgoosanemin, emah kemuzzenuheguning ewh kahoozhebeühmun.

³³ Jehovah dush oo‐oo oogeënaun enewh Mosesun, Ahwagwan suh owh kahmujjedooduhwegwan, me owh kakahsebewug emah nemuzzenuheguning.

³⁴ Umba suh dush mahjaun, ezheweezh egewh ahnishenahbag emah ewh kahwahweenduhmoonaun: benuh, nindangenim tuhnegaune emah kaneëzhahyun: ewh dush ween egoo kezheguk uhpe kamuhwudeshewayaun ningahmuhwudesaug oonje ewh oomujjeëzhewabezewinewah.

³⁵ Jehovah dush oogekooduhgeäun enewh ahnishenahban, oonje ewh keöozheähnid enewh pezhekeensun, enewh suh goo Aaron kahoozheähjin.