EXODUS 25 - Ottawa New Testament Penteteuch and Psalms 1874

¹ Jehovah dush oogeguhnoonaun enewh Mosesun, oo‐oo keënaud.

² Guhnoonzh suh Israel oonejahnesun, chepeduhwewaud puhgedenegawin: kegahoodahpenuhmuhwaug nepuhgedene-gawin anduhchewaud egewh wawane mahgewajig oodaëwaung.

³ Me suh dush oo‐oo puhgedenegawin kaöodahpenuhmuhwagwah; oozahwe‐shooneyah, kuhya shooneyah, kuhya oozahwahbik.

⁴ Kuhya wazhahwushquaug, kuhya mahnaundag, kuhya masquaug, kuhya wanesheshing puhpuhgewuhyahnegin, kuhya mesahboozoog oopewuhyewah.

⁵ Kuhya nahba‐mahnishtahnishewuhyahnug masquuhdesoonjig, kuhya missuhkuhquejeeshewuhyahnug, kuhya Shittim metig.

⁶ Pemeda kaöonjewahsuhkoonuhwang, menoomahgoochegunun kaöonjeöozhetoong ewh noomenega‐pemeda, kuhya ewh manoomahgwuk menoomahgwahkesegun.

⁷ Onyx uhsineensug kaühsinjig emah ephoding, kuhya emah asemeging.

⁸ Mahnoo kuhya ningahoozhetuhmahgoog ahnuhmeä‐wegummig: cheduhnuhkeyaun dush emah uhyahwaud.

⁹ Kuhkenuh goo azhewahbunduhenaun, azhenahgwuk ewh buhbuhgewuhyaune‐ahnuhmeä‐wegummig kaöokekenuhwah-bunjeguneyun, kuhya azhenahgwukkin kuhkenuh enewh ahbuhjechegunun emah dabandahgwuhkin, me goo ewh kaëzhetooyun.

¹⁰ ¶ Oogahoozhetoonahwah kuhya muhkuk shittim metig kaühwahwahjin: neezhoonik uhshe ahbetuh tahuhquahmuhgud, kuhya ningoodoonik uhshe ahbetuh tuhenegooquuhdayahmuhgud, kuhya ningoodoonik uhshe ahbetuh tuhuhpetahmuhgud.

¹¹ Kegahoozahweshooneyahkahdaun dush wanjeduh oozahweshooneyah cheühwud, peenjuheëe kuhya oogijuheëe kegahuhsah, kegahoozhetoon dush oozahweshooneyah suhsagahchegun oogejuheëe kaühtag kewetahuhyeëe.

¹² Kegahoozhetoonun kuhya newin oozahweshooneyahwahweyayahbekudoon ewh oonje, keaghuhtoonun dush emah nuhnayaug; neenzh dush wahweyayahbekudoon tuhuhtawun emah pazhig oopemaühyeëe, kuhya neenzh wahweyayahbekudoon emah menuhwah pazhig oopemaühyeëe.

¹³ Kegahoozhetoonun dush shittim metigoonsun, kegahoozahweshooneyahkahdahnun edush.

¹⁴ Kegahpeenjesedoonun dush enewh metigoonsun emah wahweyayahbekudoong ayeduhwuhyeëe ewh muhkuk, ewh muhkuk cheöonjebemewewedoong.

¹⁵ Enewh metigoonsun tuhuhtawun emah wahweyayahbekudoong dabandahgwuhkin emah muhkukoong: kahween emah enewh tahoonjeöodahpenegahdasenoon.

¹⁶ Kegahuhtoon dush emah peenj‐muhkukoong, ewh debahjemoowin kamenenaun.

¹⁷ Kegahoozhetoon kuhya shahwanjega‐uhgweduhbewin, wanjeduh oozahwe‐shooneyahwuhyeëe: neenzhoonik uhshe ahbetuh tuhuhquahmuhgud, kuhya ningoodoonik uhshe ahbetuh tuhenegooquuhdayahmuhgud.

¹⁸ Kegahoozheäug kuhya neezh oozahwe‐shooneyah cherubug, kegahoonuhduhwaug, emah neezhing wuhyaquahuhyaug ewh shahwanjega‐uhgweduhbewin.

¹⁹ Oozhe dush pazhig cherub emah wuhyaquahuhyaug, kuhya owh menuhwuh pazhig cherub emah nuhpauj enuhka: ewh shahwanjega‐uhgweduhbewin kegahoonjeöozheäug egewh cherubug emah neezhing wuhyaquahuhyahmuhguk.

²⁰ Egewh dush cherubug ishpeming enuhguhka tahezhe-duhzhwageningwewug, uhgwuhnuhuhmoowaud ewh shahwanjegauhgweduhbewin ooningwegunewaun, tahguhnuhwahbundewug dush kuhya; emah shahwanjega‐uhgweduhbewining enuhguhkayah tuhenahbewug egewh cherubug.

²¹ Kegahuhtoon dush ewh shahwanjega‐uhgweduhbewin oogejuhyeëe muhkukoong: peenj‐muhkukoong dush kegahuhtoon ewh debahjemoowin kamenenaun.

²² Emah dush kegahnuhquashkoon, kegahguhkuhnoonin edush emah oogij‐shahwanjega uhgweduhbewing, emah nesuhwuhyeëe uhyahwaud egewh neenzh cherubug, oogij‐debahjemoowine‐muhkuhkoong ayahjig, duhzhinduhmaun kuhkenuh enewh kapuhgedenuhmoonaun wahezhekuhgaunzoomuhgwah Israel oonejahnesun.

²³ ¶ Kegahoozhetoon dush kuhya uhdoopoowin shittimmetig kaühwud neenzhoo-nik tahuhquahmuhgud, kuhya ningoodoodik tahenegookquuhdayahmuhgud, kuhya ningoodoonik uhshe ahbetuh tahuhpetahmuhgud.

²⁴ Kegahoozahwe‐shooneyahkahdaun edush wanjeduh oozahwe shooneyah cheühwud, kegahoozhetoon kuhya oozahweshooneyahwuhyeëe ashuhshuhwayahbekuk kaëzhesing emah kewetahuhyeëe.

²⁵ Kegahoozhetoon dush ewh kewetahuhyeëe kaëzhesing emah anegookoodaninjeeng anegooquuhdayaug: kegahoozhetoon kuhya oozahwe‐shooneyah‐sahsagahchegun kewetahuhyeëe emah kaëzhesing.

²⁶ Kegahoozhetoonun dush newin oozahweshooneyah wahweyayahbekudoon, kegahuhtoonun dush enewh wahweyayahbekudoon emah newing nayaug, emah newing ookahdewung.

²⁷ Anahsuhmeühyahmuhguk ewh kahwetahsing tuhuhtawun enewh wahweyayahbekudoon emah kaühchegahdagin enewh metigoonsun kaöonjebemewedoong ewh uhdoopoowin.

²⁸ Shittim metig dush kegahuhwah cheöozhetooyun enewh metigoonsun, kuhya kegahoozahweshooneyahkahdahnun, enewh dush cheöonjebemewedoong ewh uhdoopoowin.

²⁹ Kegahoozhetoonun kuhya oonahgunun emah kadebandahgwukkin, kuhya oonahgaunsun, kuhya uhgwuhnuhegunun, ewh dush kaöonjeühgwuhnuhegahdag: wanjeduh oozahwe‐shooneyah kegahuhwah cheöozhetooyun.

³⁰ Kegahuhsah dush emah uhdoopoowining wahbunduhewawine‐buhquazhegun emah anahsuhmeyaun kahgenig.

³¹ ¶ Kegahoozhetoon kuhya wahsuhkoonanjegun‐ahbik wanjeduh oozahwe‐shooneyah cheühwud: tahoonuhduhegahda ewh wahsuhkoonanjegunahbik: ewh nahwuhyeëe baduhkesing, kuhya enewh buhkaühyeëe ayenahquuhmoogin, enewh oonahgaunsun, enewh bakoochemenuhgukkin, kuhya enewh wahwahsuhkoonang azhenahgwuhkin, nahsaub tahezhechegahdawun.

³² Ningoodwahching dush tahpuhkategwuhnuhgud enandahgwud emah uhyoopemaühyeëewung neswe wuhdikwunun dabanduhgwukkin emah wahsuhkoonanjegun‐ahbikoong emah pazhig oopemaühyeëewung, kuhya neswe wuhdikwuhnun debandahgwukkin emah menuhwah pazhig oopemaühyeëewung:

³³ Neswe oonahgaunsun keche buhgauning azhenahgoochegahdagin, pazhig pakoomenuhguk kuhya pazhig wahwahsuhkoona emah pazhig wuhdikwuhning; kuhya neswe oonahgaunsun keche buhgauning azhenahgoochegahdagin emah menuhwah pazhig wuhdikwuhning, kuhya dush egoo pazhig pakoominuhguk kuhya pazhig wahwahsuhkoona: me goo nahsaub emah wuhdikwuhning enewh nangoodwahchingin, wahsuhkoonanjegunahbikoong wanjesahgesingin.

³⁴ Emah kuhya wahsuhkoonanjegunahbikoong tuhuhyahwun newin oonahgaunsun keche buhgauning kaëzhenahgoochegahdagin, kuhya enewh bakoomenuhguhkin emah.

³⁵ Tuhuhtamuhgud kuhya pazhig bakoomenuhguk uhnaumuhyeëe neezh wuhdikwuhnun enewh goo nahsaub doowun, kuhya pazhig bakoomenuhguk uhnaumuhyeëe neezh wuhdikwuhnun goo nasaub doowun, kuhya pazhig bakoomenuhguk uhnaumuhyeëe neezh wuhdikwahnun enewh goo nahsaub doowun, nahsaub goo enewh ningoodwahswe wuhdikwahnun emah wahsuhkoonanjegunahbikoong wandahquuhmoogin.

³⁶ Enewh bakoomenuhgahgin kuhya enewh wuhdikwuhnun nahsaub tahoonjeöozhechegahdawun: kuhkenuh ewh tuhoonuhduhegahda, wanjeduh oozahweshooneyah cheühwind.

³⁷ Kegahoozhetoonun dush enewh neenzwahswe wahsuhkoonanjegunnun dabandahgwukkin emah: oogahsuhkuhahnahwaun dush enewh wahsuhkoonanjegunun, chewahsuhkoonag dush emah anahsuhmesing.

³⁸ Enewh kuhya duhquunjegunun emah dabandahgwukkin, kuhya enewh keeshkunzhakoojegune‐oonahgaunsun emah dabandahgwukkin, tahwanjeduh‐shooneyahwuhyeëewuhnoon.

³⁹ Pazhig talent menik wanjeduh oozahweshooneyah oogahuhwaun cheöozhetood ewh, kuhya kuhkenuh oonoo ahbuhjechegunun.

⁴⁰ Aungwahmezin suh dush cheëzhetooyun azhenahgwuk ewh kekenuhwahbunjegun kahwahbunduhegooyun emah wuhjewing.