EXODUS 21 - Ottawa New Testament Penteteuch and Psalms 1874

¹ Me suh oonoo tebahkoonegawinun kapuhgedenuhmuhwudwah anahsuhmewaud.

² Kishpin kishpenuhnud Hebrew buhmeetahgun, ningoodwahsoopepoon tuhbuhmeetahga: uhpe dush weneenzhwahsoopepoonuhguk tuhpeneshemahjah chedebanindezood dush.

³ Kishpin ween atuh goo kahbeëzhahgoobunan, tuhnezhekamahjah: kishpin wahdegagoobunan, me suh wewun cheweejewegood uhpe mahjaud.

⁴ Kishpin oodoogemaumun kahmenegoopuneen enewh wewun, oonoo dush kenegetuhmahgood quewezansun kuhya equazansun: owh equa kuhya egewh wanejahnesemindjig oogahdebanemegoowaun enewh oodoogemaumun, tahnezhekamahjah dush ween.

⁵ Kishpin dush owh buhmeetahgun wawane oo‐oo ekedood, Ninsahgeäh nindoogemaum, neweedegamahgun, kuhya nenejahnesug; kahween ningahmahjahse chedebanindezooyaun:

⁶ Me suh dush enewh oodoogemaumun chëezhewenegood emah uhyahnid enewh tebahkoonega‐wenenewun; oogahezhewenegoon dush kuhya ishquaundaming, gamah kuhya emah puhduhkezoonid ishquaundamahtigoon; oodoogemahmun dush oogahbuhgoonahtuhwugaäoogoon uhyoonid megoos; kahgenig dush oogahbuhmeetuhwaun.

⁷ ¶ Kishpin kuhya ahweyah enene uhdahwad oodahnun chebuhmeetahgunequawenid, kahween tuhmahjahsewun debishkoo azhemahjahwaud egewh buhmeetahga‐wenenewug.

⁸ Kishpin minwanduhmeähsig oodoogemahmun, kahwahweenduhmahgoojin cheweedegamegood, me dush chepuhgedenegood chekeeshpenuhnind: kahween tuhkushkeäwezesewun cheühdahmahnid enewh muhyug‐ahnishenahban ooweyowh, wayazhengangin mah oogedoodahgoon.

⁹ Kishpin dush kahwahweenduhmahgoogwan cheweedegamaud enewh oogwissene, oogahuhyindoodahgoon debishkoo koo ayindooduhwindwah oodahnesemaug.

¹⁰ Kishpin oodahpenahnid bakahnezenid equawun; ewh oomeejim, ooduhgwewin, kuhya ewh kaühyindoodahwindebun keweedegad, kahween oogahoodahpenuhmahgooseen.

¹¹ Kishpin dush oonoo neswe uhyindoodahgoosig, me suh chepeeneshemahjaud shooneyah chemeegewasig.

¹² ¶ Owh paketawaud enenewun, neboonid e‐dush, ahbedakummig tahnesah.

¹³ Kishpin dush ahweyah uhkundoosig, Kesha‐Muhnedoon dush ween puhgedenuhmahgood enewh; me suh cheënahkoonuhmoonaun ewh emah kaëzhenezhemood.

¹⁴ Kishpin dush ween ahweyah oonjeduh naunzekuhwaud weej‐duhnuhkeewamahgunun, wegeemenuhnaud; nesahsahgewejegun‐ahbikooming kegahoonjeëkoonah, chenebood dush.

¹⁵ ¶ Owh kuhya paketawaud enewh oosun, gamah kuhya enewh oogeen, ahbedakummig tahnesah.

¹⁶ ¶ Owh kuhya kamoodid enenewun; adahwad dush enewh, gamah kuhya kishpin mekuhwemind emah uhyaud, ahbedakummig tahnesah.

¹⁷ ¶ Owh kuhya maje‐guhnoonaud enewh oosun, gamah kuhya enewh oogeen, ahbedakummig tahnesah.

¹⁸ ¶ Kishpin kuhya enenewug megahdewaud, pazhig dush uhsineen puhketawaud enewh pazhig, gamah kuhya pekwah-kooninjetuhwaud, neboosenid dush, shingeshenenid atuh oonebahguning;

¹⁹ Kishpin menuhwah oonishkahnid, kuhya puhpahmoosanid suhkuhoonid, me suh dush owh kahpuhketaöowad chepuhgedenind: tahtebuhuhmahga dush ween egoo ewh menik kahwuhnetahsoonid keühnookesenid, kuhya tahuhnooke wawane chenuhnaunduhweëmind.

²⁰ ¶ Kishpin kuhya ahweyah puhketawaud; oobuhmeetahga‐wenenemun, gamah guhya oobuhmeetahgun‐equamun, metigoons uhyood, neboonid dush magwah puhketawaud; ahbedakummig tahpuhshunzhawah.

²¹ Kishpin dush ween bemahdezenid ningookezhig gamuh kuhya neenzhoogoon, kahween tahpuhshunzhawahse: ooshooneyahmun mahween enewh.

²² ¶ Kishpin enenewug megahdewaud, gezhikuhwahwaud dush equawun uhbenoojeeyun kagishkuhwahnejin, wuhneähnid dush enewh, ningoodenoo dush ween ezheühyahsenid; ahbedakummig tahtebuhuhmahga, menik egoo kanunduhwanduhmahgood enewh equawun oonahbamene; tahtebuhuhmahga dush menik akedoonid enewh tebahkoonewa‐wenenewun.

²³ Kishpin dush ningoodenoo ezhewabezing, me suh bemahdezewin chemeegewayun mashquud bemahdezewin.

²⁴ Ooshkeenzhegoomah mashquud ooshkeenzhegoomah, webedahmah mashquud webedahmah, ooninjemah mashquud ooninjemah, oosidahmah mashquud oosidahmah.

²⁵ Chahgezoowin mashquud chahgezoowin, mahkegunaungawin mashquud mahkegunaungawin, puhshunzhaöowawin mashquud puhshunzhaöowawin.

²⁶ ¶ Kishpin kuhya ahweyah puhketaühmuhwaud oobuhmeetahga‐wenenemun ooshkeenzhigoone, gamuh kuhya oobuhmeetahgun‐equamun ooshkeenzhigoone, buhnahduhdenig dush; oogahpuhgedenaun chedebanindezoonid ooshkeenzhegoone oonje.

²⁷ Kishpin kuhya puhquahbedagunahmaud oobuhmeetahga‐wenenemun, gamuh kuhya oobuhmeetahgun‐equamun; ooguhpuhgedenaun chedebanindezoonid, oowebedahne oonje.

²⁸ ¶ Kishpin uhnooke‐pezheke puhzhebuhwaud enenewun gamah kuhya equawun, neboonid e‐dush: me suh owh uhnooke‐pezheke ahbedakummig chepemwussenuhind, ewh dush ooweyaus kahween tuhmeejeseem; enewh dush ween kahtebanemegoojin tahpuhgedenahwaun.

²⁹ Kishpin dush ween owh uhnooke‐pezheke natahpuhzhe-buhoowagoobunan wuhyashkud, kuhya keweenduhmuhwemindebun enewh dabanemegoojin, kekebahquuhoogoosig dush, kenesaud dush egoo enenewun gamah kuhya equawun; owh uhnooke‐pezheke tuhpemwuhsenuhah, kuhya dush enewh dabanemegoojin tuhnesahwun.

³⁰ Kishpin nunduhwandahgoozid chetebuhuhmahgad, mesuh chemegewad menik azhenunduhwanemahwindan cheöonjekeeshpenuhtood oobemahdezewin.

³¹ Kepuhzhebuhwahnegwan kwewezansun, gamah kuhya equazansun, nahsaub azhesing oo‐oo tebahkoonegawin tahdooduhwah.

³² Kïshpin enewh uhnooke‐pezhekewun puhzhebuhwahnid buhmeetahga wenenewun gamah kuhya buhmeetahgunequan; oogahmeenaun enewh oodoogemahmene nesemeduhnuh duswahbik shooneyah, owh kuhya uhnooke‐pezheke tuhpemwuhsenuhah.

³³ ¶ Kïshpin kuhya ahweyah pahkesedood wahnekaun, gamah kuhya kishpin ahweyah wahnekad, kepuhunjig dush ewh, uhnooke‐pezheke dush gamah kuhya mamaungesha peenjesad emah;

³⁴ Owh dabandung ewh wahnekaun tahtebuhuhmahga, oogahmeenaun shooneyaun enewh dabanemahnejin enewh: enewh dush kahneboonejin ween oogahdebanemaun.

³⁵ ¶ Kïshpin kuhya ahweyah enene ooduhnooke‐pezhekemun puhzhebuhwahnid bakahnezenejin uhnooke‐pezhekewun, neboonid e‐dush, me dush cheühdahwawaud enewh bamahdezenejin uhnooke‐pezhekewun, kuhya chenanahwenuhmahdewaud enewh shooneyaun kashkeähwaud; enewh dush kuhya naboonejin uhnooke‐pezhekewun tuhnanahwenuhmahdewug.

³⁶ Gamah kïshpin kekanememind enewh uhnooke‐pezhekewun netahpuhzhebuhoowanepun wuhyashkud, owh kuhya dabanemaud enewh kekebahquuhwahsigoobun; ahbedakummig tuhtebahuhmahga uhnooke‐pezhekewun mashquud uhnooke‐pezhekewun; enewh dush naboonejin ween oogahdebanemaun.