EXODUS 13 - Ottawa New Testament Penteteuch and Psalms 1874

¹ Jehovah dush oogeguhnoonaun Mosesun, oo‐oo keë naud.

² Penetuhmuhweshin kuhkenuh egewh netumoonzhahnug, ahwagwan suh goo puhyahkahkooshkumoogwan ewh oopuhyowhemah emah uhyahwaud Israel oonejahnesun, oonetumoonzhahuun enene kuhya uhwuhkaun; neen owh nindebanemah.

³ ¶ Moses dush oo‐oo oogeënaun enewh ahneshenahban, Mequanduhmook oo‐oo kezhigud, uhpe kahsahguhuhmag emah Egypting, emah kahduhzhe‐koodugge‐uhnookeeyag; kemushkuhwenekad mahween owh Jehovah oomah kegeöonjesahgejewenegoowah; kahween ahweyah buhquazhegun‐wambesejegahzood tahaumwahse.

⁴ Noongoom kezhiguk kegesahguhaum, magwah uhgoojing owh kezis Abib.

⁵ ¶ Tahpuhgummeähyahmuhgud dush uhpe owh Jehovah peendeguhnik emah ooduhkeemewaung egewh Canaanitug, kuhya egewh Hittitug, kuhya egewh Amoritug, kuhya egewh Hivitug, kuhya egewh Jebusitug, ewh kahmushkuhwewahweenduhmuhwahpun koosebuneen chemeenik, ewh uhke emah anduhnejewung doodooshahboo kuhya ahmoo‐sinzebahquud, cheguhnuhwanduhmun oo‐oo ezhetwahwin uhpe uhgoojing wuhowh kezis.

⁶ Neenzhwahsoogoon kegahaumwah owh buhquazhegun wambesejegahzoong, uhpe dush neenzhwahsoo‐kezhiguk tahahnuhmeä‐wekoondim emah anahsuhmeed Jehovah.

⁷ Owh wambesejegahzoosig buhquazhegun neenzhwahsoogoon tahaumwah; kah dush kegahuhyahwahse owh wambesejegahzood buhquazhegun, kahween kegahuhyaunseen oombesejegun anegookoosing kewegewaum.

⁸ ¶ Kegahweenduhmuhwah dush kegwis ewh kezheguk, oo‐oo cheënud, Oo‐oo ezhechegam oonje ewh kahdooduhwid Jehovah, uhpe suhyahguhuhmaun emah Egypting.

⁹ Kegahookekenuhwahjechegunin dush emah keninjeeng, kuhya tuhahwun ewh kamequanduhmun nesuhwuhyeëe kishkeenzhegoong cheühyahmun dush Jehovah oodenahkoonegawin kedooning: kemushkuhwenekad mah Jehovah, kegesahgejewenig emah Egypting.

¹⁰ Kegahguhnuhwandaun suh dush oo‐oo enahkoonegawin ewh goo uhpe azhesing cheguhnuhwanduhming andussoopepoonuhguk.

¹¹ ¶ Tuhpuhgummeähyahmuhgud dush uhpe owh Jehovah peendeguhnik emah ooduhkeemewaung egewh Canaanitug, kahezhemushkuhwe‐wahweenduhmauk egoo kuhya enewh koosebuneen, kemeenik edush.

¹² Chepuhgedenuhmuhwud Jehovah kuhkenuh enewh puhyahkishkummenid ewh oopuhyowemah, kuhya anduhchewaud egewh uhwuhkaunug oonetumoozhahewaun ayahwahjig; enewh nahbaühyuhaun oogahdebanemaun Jehovah.

¹³ Anduhchewaud dush ween egewh mamaungeshayug oonetumoonzhahnewaun kegahkeeshpenuhnaug, mahnishtahnesheens mashquud chepuhgedenud; kishpin dush ween wekeeshpenuhnahsewudwah, kegahbookoogwuhyuhwaguhnahmaug: kuhya kuhkenuh enene oonetumoonzhahnun ayahjig emah uhyahwaud kenejahnesug kegahkeeshpenuhnaug.

¹⁴ ¶ Tahpuhgummeähyahmuhgud dush uhpe kegwis kuhgwajemik ningooding egoo, oo‐oo enik, Wagoonan suh oo‐oo? cheënud, kemushkuhwenekad Jehovah ningesahgejewenegoonaun emah Egypting, emuh kahduhzhe‐koodugge‐ahnookeyaung:

¹⁵ Kepuhgummeähyahmuhgud dush uhpe Pharaoh uhgahwuh anandunsegoobun chepuhgedeneyungid, Jehovah kenesaud kuhkenuh netumoozhahnun emah Egypt duhzhe uhkeeng, enewh enene oonetumoozhahnun, kuhya dush egoo ahwuhkaun oonetumoozhahnun: me dush ewh wanjesahsahgewenug Jehovah, sahsahgewechegayaun kuhkenuh egewh puhyahkahkooshkungig ewh oopahyowhwemah, egewh nahbaühyuhaug; kuhkenuh dush ween nenejahnesug natumoozhahnewejig nekeeshpenuhnaug.

¹⁶ Kegahookekenuhwahjechegunim dush ewh emah keninjeeng, kuhya emah nissuhwishkeenzhig; kemushkuhweneka nid mah Jehovah negesahgejewenenegoonaun emah Egypting.

¹⁷ ¶ Kepuhgummeähyahmuhgud dush uhpe Pharaoh kahpuhgedenaud enewh ahnishenahban, ewh Kesha‐Muhnedoo keëzhewenuhsig emah enuhka ooduhkeemewaung egewh Philistinug, ahnoo ween goo pashoowuk ewede; Kesha‐Muhnedoo mah oo‐oo keëkedoo, Koonemah tahminjenuhwazewug egewh ahnishenahbag uhpe wahbunduhmoowaud megahdewin, chekewawahpun dush nayaub Egypting:

¹⁸ Kesha‐Muhnedoo dush oogeëzhewenaun enewh ahnishenahban emuh enuhka anduhgoog ewh Misquahgumme‐kechegumme duhzhe buhgwuhduhkummig: Israel dush oonejahnesun wuhwanuhpenedezoonid kesahgahwuhnedewun emuh Egypt duhzhe uhkeeng.

¹⁹ Moses dush oogemahjewedoonun Josephun: ookununoogeäungwahme‐mushkuhwe‐kegedooähnebun mah enewh Israel oonejahnesun, oo‐oo keënahnid, Ahbedakummig Kesha‐Muhnedoo kegahmuhwuhdesegoowah; oomah dush kegahoonjemahjeduhwim nekunun.

²⁰ ¶ Succothing dush keöonjegoosewug, kekuhbashewug dush Ethaming, emah mahje‐buhquuhduhkummegaug.

²¹ Jehovah dush keënenegaune, kezhigudenig kenegahnemuhgedenig emah uhyahwaud ewh paduhkesing ahnuhquud, chekekenoowezhewamuhgudenig; kuhya tebikudenig ewh paduhkesing ishkooda, chewahsuhkoonaühmahgoowaud; chepemoosamuhgudenig kezhigudenig kuhya tebikudenig:

²² Kahween oogeëkoonunseen ewh paduhkesing ahnuhquud kezhigudenig, kahween kuhya ewh paduhkesing ishkoodah tebikudenig; emah anahsuhmenid enewh ahnishenahban.