EPHESIANUN 1 - Ottawa New Testament Penteteuch and Psalms 1874

¹ Paul, oodapostleëmun owh Jesus Christ oonje oodenanduhmoowin Kesha‐Muhnedoo, oomahjebeühmah waun enewh anuhmeähnejin emuh Ephesusing ayahnejin, kuhya enewh duhyabwayanemahnejin enewh Christ Jesusun:

² Mahnoo kegahahyahnahwah shahwanjegawin, kuhya pezaunewawin, oonje Kesha‐Muhnedoo Koosenaun kuhya Tabaningad Jesus Christ.

³ Tahmahmooyahwahmah Kesha‐Muhnedoo oosun owh Tabanemenung Jesus Christ, owh kahshahwanemenung kuhkenuh wajechaugwandahgwukkin shahwandahgoozewinun ewede kezhegoong anduhgoogin emuh Christing:

⁴ Debishkookahezhewahwanahbuhmenung emuh Christing chepwah mahje‐oozhetoong ewh uhkee chemenoo‐ezhewabezeyung kuhya ningood wuhsittahwandahgoozesewung emuh anahsuhmid emuh sahgeëwawining:

⁵ Kezhah kegewuhwanahbuhmegoonaun cheöonje‐oonejahnesemenung, oonje Jesus Christ debishkoo ween kahminwandung emuh oodenanduhmoowining.

⁶ Cheöonje‐keche‐pezhegandahwudenig ewh ooshahwanjegawin, kahoonje‐ezheënung cheminwandahgoozeyung oonje owh kache‐sahgeïnd.

⁷ Mesuh owh wanje‐bemahjeëgooyung oonje oomisqueem, chewabenuhmahgooyung kemujje‐ezhewabezewinenahnin, debishkoo azhewahnuhdezemahgudenig ooshahwanjegawin;

⁸ Me ewh wanje‐keche‐wahnuhdezid kenuhwind enuhkuhkayah, emuh kuhkenuh nebwahkahwining kuhya kekandahsoowining;

⁹ Kekanduhmoonenung ewh kahkemoodudenig oodenanduhmoowin debishkoo ween tebenuhwa kahezheminwandung:

¹⁰ Uhpe dush tabishkoosanig pazhigwunoong oodahmahwundoosetoonun kuhkenuh uhyeëen emuh Christing, enewh kezhegoong ayaugin, kuhya enewh uhkeeng ayaugin; emuh suh Christing:

¹¹ Mesuh owh wanje‐meenegooyung ewh dabandahsoowin kuhyet kekuhgegenegooyung debishkoo ween kahenanduhmoogoobunan emuh tebenuhwa oodenanduhmoowining: wah‐owh moonzhug anuhnookeed debishkoo anandahgwudenig tebenuhwa oodenanduhmoowin.

¹² Ewh suh nenuhwind netum kahahpanemooyaung Christ cheöonje‐pezhegandahgoozid Kesha‐Muhnedoo.

¹³ Me suh owh kuhya kenuhwah kahahpanemooyag, uhpe kahnoonduhmag ewh dabwawine‐ekedoowin, ewh minwahjemoowin wanje‐bemahjeëgooyag: me suh owh uhpe kahdabwayanduhmag, kahoonje‐ahtahmahgooyag ewh ahkookuhwussegun mesuh owh pahnezid Oojechaug kahwahweendahmahgooyagoobun,

¹⁴ Me suh ewh tuhnuhsug kezhah tebahahmahgoowin cheöonje‐puggukanduhmung wedebandahsooyung nahnauzh petuhgwishenoomahguk ewh kahkishpenuhtahmahgooyung, cheöonje‐wahwezhanjegahdanig oopeshegandahgoozewin.

¹⁵ Kuhya neen, kahahkoo‐noonduhmaun anandahgwuk kedabwayanduhmoowinewah azhedabwayanemag owh Tabaningad Jesus, kuhya kesahgeëwawinewah azhesahgeägwah kuhkenuh egewh anuhmeähjig.

¹⁶ Kahween nepoonetahse mahmooyahwayaun kenuhwah oonje, guhnooduhmoonenuhgoog uhpe anuhmeähyaunin:

¹⁷ Owh waKesha‐Muhnedoomegood enewh Tabanemenung Jesus Christun, owh Wayoosemegood ewh pezhegandahgoozewin, chemeenenag owh nebwahkahwine kuhya wahbundahewawine Oojechaugoomah cheöonje‐puggukkanemag:

¹⁸ Chewahsayahmahguk enewh kenesittootumoowine-ooshkinzhegoomahwaun: cheöonje‐kekanduhmag anandahgwuk azheähpanemooyag oonundoongawin, kuhya azhewahnuhdezemahguk ewh pazhegandahgwuk debandahsoowaud egewh anuhmeähjig,

¹⁹ Kuhya azhekechetwahwandahgwudenig oomushkahwezewin, kenuhwind anuhkuhkayah duhyabwayanduhmung, debishkoo anuhnookeemahgudenig ookeche‐mushkahwezewin,

²⁰ Ewh kahenuhnookeed emuh Christing, uhpe keähbejebahaud oonje neboong, keähsaud emuh tebenuhwa ookechenikaung ewede keche‐kezhegoong.

²¹ Ahwahshema cheïshpandahgoozenid dush ween kuhkenuh oogemahwandahgoozewinun, kuhya kushkeäwezewin kuhya mushkahwezewin kuhya oogemahwewin kuhya kuhkenuh enewh oonoozoowinun wuhyahweenjegahdagin kahween atuh oomah uhkeeng, kuhya dush goo emuh kapetuhgwishenoomahguk uhkeeng;

²² Oogeähtuhwaun dush kuhkenuh enewh uhyeëen emuh ahnahmesit, oogepuggednuhmahwaun chemahmahwe‐negaunandahgoozenid emuh anuhmeähwining,

²³ Me suh ewh ooweyow ahyahwung, oomooshkenawin owh mwaushkenuhtood kuhkenuh uhyeëen emuh ooweyowining enewh kuhkenuh bamahdezenejin.