DEUTERONOMY 32 - Ottawa New Testament Penteteuch and Psalms 1874

¹ Bezinduhmook, O kezhigoon, ningahkekid dush; noondun kuhya O uhke, akedoomuhguk nindoon.

² Ninkuhgequawin tahpungegahmuhgud nindegoo kamewungin, ninkekedoowin tahnaunzhesamuhgud debishkoo ewh mindookud, debishkoo azhepungesing kamewunahboo emuh ewh nwahkebugaug, kuhya emuh manzhushkoong uhpe bamebesahgin:

³ Ningahbebahgindaun mah Jehovah oodezhenekahzoowin: meenik kechetwahwandahgoozewin owh keKesha‐Muhnedoomenaun.

⁴ Me suh owh Ahzhebik, ahpeje oonesheshenene ooduhnookewin: kuhkenuh mah oomeekunun quuhyukezhewabudenewun: Kesha‐Muhnedoo duhyabwad kuhya majeëzhewabezesig, quuhyukezhewabeze kuhya oonesheshe.

⁵ Kebuhnahjeëdezoowug, ookeduhgezewinewah kahween enandahgwussenene azhekeduhgezenid oonejahnesun: natah‐kuhgaunzetungig kuhya majeëzhewabezejig bamahdezejig ahwewug.

⁶ Me nuh oo‐oo mashquud ayindooduhwag owh Jehovah, O kakebahdezeyag kuhya nabwahkahsewag ahnishenahbadoog? kah nuh ween ahwese koos owh kahkeeshpenuhnik? kah nuh ween kegeöozhegoose, kuhya kegeöonuhdenegoose?

⁷ ¶ Mequandun enewh kezhigudoon kuhyut, nahnahguhduhwandun kekenoonoowinun nebewuh duhching kebeëzheähneka‐bemahdezing: kuhgwahjim koos, kegahwahbunduhik dush; egewh keduhkewanzeyemug, kegahweenduhmahgoog edush.

⁸ Uhpe owh Muhyahmuhwe‐ishpandahgoozid kahmahduh-oonaud enewh ahnishenahban uhnooj azheweenzoonejin oodebandahsoowinewah, uhpe papuhkaäud Adam oogwissun, oogekekenuhwahjetuhmuhwaun menik kadebanduhmenid enewh ahnishenahban nahsaub egoo anduhchenid Israel oonejahnesun.

⁹ Oodahnishenahbamun me mah ewh Jehovah dabandung; Jacobun me ewh oodebandahsoowin.

¹⁰ Oogemekuhwaun emuh buhgwuhduhkummig, kuhya emuh uhkeeng gagoo duhgoosenoog woonoowin koo noonduhming; oogebuhbahbemewenaun, oogekekenooühmuhwaun, oogekuhnuhwanemaun debishkoo ewh ooshkeenzhig.

¹¹ Debishkoo megeze azhemuhmaujewabenung oozooswun, azhepuhpahmesad ishpeming emuh uhyahnid oobuhnuhjah-yemun, azhedunzhwageningwegunid, azheöodahpenaud, azhebemoowaud ooningweguning:

¹² Me suh Jehovah nezheka kahezhebemewenaud, kahween kuhya ahweyah mayuhgezenejin muhnedoon oogeweejewegooseen.

¹³ Oogeühsaun emuh uhyishpuhkummegahnig, chemejenid ewh natahwegenenig ketegauning; oogeënanemaun kuhya ahmoo‐seenzebahquud emuh azhebikoong cheöonjewekoon-duhmenid, kuhya pemeda emuh pewahnuhgoo‐azhebikoong;

¹⁴ Pezhekewug oodoodooshahboo‐pemedamewah, kuhya mahnishtahnishug oodoodooshahboomewah, kuhya ooweninewah mahnishtahnisheensug, kuhya uhyahba‐mahnishtahnishug ewede Bashaning wanjenindjig, kuhya meshahboozoog, kuhya ewh wahnenoowung mezeminansing ahpeje wanezheshing; kuhya kegemenequan ewh wanesheshing shoowemining wandenegahdag misqueeng azhenahgwuk.

¹⁵ ¶ Jeshurun dush kewenenoo, kuhya kedungishkega: kewenin, kemungahbawiz, kedoonzaumoogaum; me dush kenuhguhnaud Kesha‐Muhnedoon kazhoozheëgoojin, kuhya kahween oogebuhbahmanemahseen enewh Oobemahjeëwa‐ahzhebikoon.

¹⁶ Oogekezhahwanduhmeähwaun oonje mayuhgezenejin muhnedoon, ookuhgwahnesuhgandahgoozewinewaun oogeöonjenishkeähwaun.

¹⁷ Oogesahsahgewenahwaun mujje‐muhnedoom, kahween ween enewh Kesha‐Muhnedoon; muhnedoon kakekanemah-sigwahbun, ooshke‐muhnedoon pejenug kahbeühyahnid, koosewahbuneeg kahkoosasigwah.

¹⁸ Owh Ahzhebik kahoogwissemik kahween kebuhbahmanemahse kuhya kegewuhnanemah Kesha‐Muhnedoo kahoozheïk.

¹⁹ Uhpe dush owh Jehovah kahwahbundung ewh, oogekuhgwahnesuhganemaun, oonje ewh nishkeëgood enewh oogwissun, kuhya oodaunun.

²⁰ Owh dush keëkedoo, Ningahkahduhwaug nindangwuhy, ningahnahnahguhduhwandaun ishquahyauj kaëzhewabezewaud: ahpeje emuh goo netah‐kuhgaunzetuhmoog, ahbenoojeyug duhyabwayandunzegoog ahwewug.

²¹ Ningekezhahwanduhmeëgoog oonje ewh Kesha‐Muhnedoo ahyahwunsewung; ningenishkeëgoog oonje enewh ookuhkebahdezewinewaun: ningahkezhahwanduhmeäug suh oonje enewh ahnishenahban uhyahwesenegoon; ningahenahkoonega kuhya chenishkanemahwaud enewh kakebahdezenid ahnishenahban uhnooj azheweenzoonid.

²² Ishkooda nah biskuhnamuhgud nenishkahdezewining, kuhya peenish egoo ewede ahpeje duhbuhzheesh ahnaumuhkummig tahenahkeda, tahchahgedamuhgud dush uhke kegeketegaun, kuhya tahsuhkedawun enewh wuhjewun ooduhshoojesejegunewaun.

²³ Ningahooqueseduhmuhwaug mujjeühyeëewishun wuhgijuhyeëe ooweyowewaung; ningahchahgeënuhanun ninkenwaukwuneen emuh enuhka uhyahwaud.

²⁴ Oogahchahgezoogoonahwah puhkuhdawin, kuhya oogahkedumoogoonahwuh kechekezhedawin, kuhya keche‐nishwuhnahdezewin: ningahezhenezhuhuhmuhwaug kuhya oowebid-ahwaun uhwaseyag, kuhya oomujjemushkekeemewah kenabegoog uhkeeng babahmoodajig.

²⁵ Ewh uhshuhwashk uhgwuhjeeng, kuhya sagezewin peendig, oogahbuhnahjeëgoonahwaun owh ooshkenuhwa kuhya owh ooshkenegequa, owh kuhya nwahnid kuhya owh enene wuhyahbequad.

²⁶ Ningeëkid ewh chesuswashkuhwugwah wuhwequayahmuhguk, cheënanemugwah chewuhnanemindwah emuh uhyahwaud enenewug:

²⁷ Ahneshah suh quatuhmaun oomushkuhwezewinewah egewh shaunganjegajig, koonemah gooshuh enewh mahgahnegoowahjin tahmuhyuhgeëzhechegawun, koonemah kuhya oo‐oo tahekedoowun, Keninjenaun ishpahmuhgud, kah kuhya owh Jehovah kuhkenuh oo‐oo keëzhechegase.

²⁸ Ahnishenahbag nuhyahnahguhduhwandunsegoog me suh ewh uhyahwewaud, kah kuhya gagoo nesedootummoowin ooduhyaunsenahwah.

²⁹ O ah pazhig nebwahkahwahpun, nesedootummoowahpun dush oo‐oo, nahnahguhduhwanduhmoowahpun ishquauj kaëzhewabezewaud!

³⁰ Ahneen pazhig kaëzhenoopenuhnahpun medahswauk, kuhya ahneen neezh kaëzheöozhemegoowahpun medahching medahswauk, kishpin enewh Oodahzhebikoomewaun uhdahwasenegoobun ooweyowewaun, kishpin kuhya enewh Jehovahun kebahquuhoogoosigwahbun?

³¹ Ewh mah oodahzhebikoomewah kahween debishkoo enandahgwussenoon owh dush ween Kedahzhebikoomenaun, pooshka egewh shaunganemenungoog me oo‐oo ananduhmoowaud.

³² Enewh mah ooshooweminuhgahwunzheemewaun Sodoming duhzhe shooweminungahwunzh ahwewun, kuhya emuh Gomorrah ketegauning oondenegahzoowun: enewh ooshooweminemewaun weenzoobing epoogoozewun, enewh ayuhquuhgoodagin wesuhgepoogwuhnoon:

³³ Ewh ooshooweminahboomewah oomujjemushkekeemewah egewh dragonug ahwun, kuhya ewh kagwahnesuhgandahgwuk oomujjemushkekeemewah mujjekenahbigoog.

³⁴ Kah nuh ween oo oo uhchegahdasenoon emuh uhyahyaun chekuhnuhwanduhmaun, kah nuh kuhya uhkookewuhsechegahdasenoon emuh uhyaug ninduhnewin?

³⁵ Neen nindebandaun ahzheduhwahedewin, kuhya tebuhuhmahgawin; ningooding egoo tahshooshkoosawug: ewh mah ookezhigudoomewah uhpe chekooduggezewaud pashoo uhyahne, enewh kuhya kabuhgummishkahgoowahjin waweebetahmuhgudenewun.

³⁶ Jehovah mah oogahtebahkoonaun oodahnishenahbamun, kuhya tahminjenuhwaze oonje enewh oobuhmeetahgunun, uhpe suh wahbundung oomushkuhwezewinene mahjahmuhgudenig, uhyahsig kuhya ahweyah kabahquuhegahzood, gamah kuhya ashkoonad.

³⁷ Oo‐oo dush tahekedeo, Ahneende suh enewh oomuhnedoomewaun, enewh oodahzhebikoomewaun kahuhpanemahwahjin,

³⁸ Kahmejenid azheweninoowunenig oosahsahgewejegunewaun, kuhya kahmenequanid ewh shooweminahboo dabandahgwudenig emuh oomenequa‐puhgedenegawinewaung? mahnoo tahpuhsegwewug cheweedookoonenagwah, kuhya chekuhnuhwanemenenagwah.

³⁹ Benuh suh neen, neen egoo, nindowh, kah kuhya ahweyah muhnedoo uhyahse neen atuh goo: neneshewa, kuhya nimbemahjeëwa; nemahkekuhnaunga, kuhya ninkegaëwa: kah kuhya ahweyah uhyahse kakediskeninjenepun.

⁴⁰ Ishpeming mah nindezheöombeninje, oo‐oo kuhya nindekid, Kahgenig nimbemahdiz.

⁴¹ Kishpin keneboodooyaun ewh wuhyahsequahbekuk ninduhshuhwashkoom, kuhya minjemenuhmaun tebahkoongawin; ningahahzheduhwuhaug egewh mahgahzhejig, kuhya ningahtebuhuhmuhwaug egewh shauneganemejig.

⁴² Ningahenahkoonega enewh nekenaukwuneen misqueeng cheöonjekewushquabemuhgukkin, ninduhshuhwashkoom oogahmejin weyaus; kuhya oomisqueemewah egewh kahnesindjig kuhya egewh takoonindjig, ewh uhpe muhyahjeähzheduhwuhewawaud egewh shaunganjegajig.

⁴³ Weejmoojegezemik oodahnishenahbamun, O kenuhwah ahnishenahbadoog uhnooj azheweenzooyag: tahahzheduhwuhega mah oonje oomisqueemene enewh oobuhmeetahgunun, kuhya ooahahzheduhwuhaun enewh mahgahnegoojin, oogahshahwandaun kuhya ooduhkeem, kuhya enewh oodahnishenahbamun.

⁴⁴ Moses dush kebeëkedoo kuhkenuh akedoomuhguk oo‐oo nuhguhmoowin emuh ootuhwugahning enewh ahnishenahban, ween, kuhya Hoshea oogwissun owh Nun.

⁴⁵ Moses dush oogeïshquuhkuhnoonaun kuhkenuh enewh Israelun kuhkenuh oonoo ekedoowinun keëkedood:

⁴⁶ Oo‐oo dush oogeënaun, Minjemanduhmook kuhkenuh enewh ekedoowinun noongoom kezhiguk ayenahjemootoone-nuhgoog, enewh kakuhgaunzoomagwah kenejahnesewaug cheäungwahmeëzhechegawaud, kuhkenuh akedoomuhguk oo‐oo tebahkoonegawin.

⁴⁷ Kah mah ewh gagoo anahbuhduhsenoog kedahenandun-senahwah; me mah ewh kebemahdezewinewah: oonje kuhya oo‐oo kegahkinwahtoonahwaun kekezhigudoomewaun emuh uhkeeng, ewh awedebanduhmag keähzhuhwuhuhmag ewh Jordan.

⁴⁸ Jehovah dush oogekuhnoonaun Mosesun ewh goo kezhiguk, oo‐oo keënaud,

⁴⁹ Wuhgedahke oo‐oo wuhjewh Abarim ezhaun, ewh wuhjewh Nebo, Moab uhkeeng ayaug, debishkoo emuh Jerichoïng; wahbundun dush ewh Canaan uhke, ewh mahnugwah Israel oonejahnesun chedebanduhmoowaud:

⁵⁰ Neboon dush emuh wuhjewing ewede wahwuhgedah-kewayun, ezhewenegoozin kuhya emuh uhyahwaud kedahnishenahbamug; debishkoo Aaron kekahnis kahezhenebood emuh Hor wuhjewing, kuhya kahezhemahjewenind emuh uhyahnid oodahnishenahbamun:

⁵¹ Kegemujjedooduhwim mah emuh uhyahwaud Israel oonejahnesun ewede nebeeng Meribah‐Kadeshing, ewede Zin buhgwuhduhkummig; kah mah kegekechetwahwanemeseem nahwuhyeëe emuh uhyahwaud Israel oonejahnesun.

⁵² Pooch edush ween egoo kegahwahbundaun ewh uhke anahsuhmeyun; kah dush ween kegahezhahse ewede uhkeeng ewh mahnugwah Israel oonejahnesun.