DEUTERONOMY 17 - Ottawa New Testament Penteteuch and Psalms 1874

¹ Kahween kegahsahsahgewenahse Jehovah keKesha‐Muhnedoom uhwud uhyahba‐pezheke, gamah kuhya mahnishtahnish, muhyahkezid, gamah kuhya muhyahnahdezid: owh mah Jehovah keKesha‐Muhnedoom ookuhgwahnesuhgandaun ewh.

² Kishpin mekuhwind emuh uhyahyag, peenjuhyeëe kedoodanaung ewh Jehovah keKesha‐Muhnedoom mahnik, enene gamuh kuhya equa, kahmujjeëzhechegad anahsuhmeed Jehovah keKesha‐Muhnedoom, ewh buhnahjetood oowahweenduhmahgawin,

³ Kuhya kahuhwebuhmetuhwaud bakahnezenejin muhnedoon, kuhya kahahnuhmeätuhwaud, enewh keezisoon, gamah enewh tebik‐keezisoon, gamah ahweyah egewh kezhigoong agoojingig, kahezhekuhgaundwasewaun;

⁴ Weenduhmahgooyun dush, kuhya kenoonduhmun, kuhya wawane kekuhgwadwayun, benuh dush dabwamuhguk, kuhya quuhyukwandahgwuk, oo‐oo kagwahnesuhgandahgwuk keëzhechegang emuh Israeling:

⁵ Me dush kedishquaundaming cheëzhewenud owh enene gamuh kuhya owh equa, kahezhechegad ewh majeühyeëewishewung, kegahpemwuhsenuhaug dush, peenish egoo neboowaud.

⁶ Neezh debahjemegood, gamah kuhya neswe debahjemegood, owh anandahgoozid chenebood tahnesah; pazhig dush ween debahjemegood kahween tahnesahse.

⁷ Egewh dabahjemoojig netum oogahoomhenahnahwaun ooninjewaun wenesahwaud, bahmah dush kuhkenuh egewh ahnishenahbag enewh ooninjewaun. Me suh oo‐oo kaëzheëkoonuhmun ewh mujje‐uhyeëewish emuh uhyahyag.

⁸ ¶ Kishpin kekan luhmun gagoo tebahkoonegawining oonzaum sanuhganduhmun, nesuhwuhyeëe uhtag pazhig misque menuhwah pazhig misque, nesuhwuhyeëe uhtag pazhig tebahkoonedewin menuhwah pazhig tebahkoonedewin, kuhya nesuhwuhyeëe pazhig puhketaëgawin menuhwah pazhig puhketaëgawin, papuhkaun ekedoong peenjuhyeëe kedoodanaung: me dush chepuhsegweyun, kuhya cheëzhahyun emuh ewh kawuhwanahbundung Jehovah keKesha‐Muhnedoom;

⁹ Kegahezhahnug dush egewh sahsahgewejega‐wenenewug egewh Levitug, kuhya owh tebahkoonega‐wenene kaühyaud ewh uhpe, kegahkuhgwadwa dush; kegahwahbunduhegoog dush azhesing tebahkoonegawin:

¹⁰ Kegahezhechega dush akedoowaud egewh ayahjig emuh ewh kawuhwanahbundung Jehovah; kegahaungwahmiz dush cheëzhechegayun kuhkenuh azheweenduhmookwah:

¹¹ Kegahezhechega akedoomuhguk ewh tebahkoonegawin kaëzhekekenooühmookwah, kuhya azhesing ewh tebahkoonegawin kaweenduhmookwah: kahween kegahwabenunseen kaëkedoowaud, ewede ookekechenekahmaung, gamah kuhya oonuhmunjenekahmaung cheëzhepuhkayunbun.

¹² Owh dush enene uhwunjish kaëzhechegad, kuhya kabezinduhwahsig enewh sahsahgewejega‐wenenewun nahbuhwenid webuhmetahganid emuh anahsuhmeed Jehovah keKesha‐Muhnedoom, gamah kuhya enewh tebahkoonega‐wenenewun, owh suh goo enene tahneboo: kegahekoonaun dush ewh mujjeühyeëewish emuh Israeling.

¹³ Kuhkenuh dush egewh ahnishenahbag tahnoondahgawug, kuhya tahsagezewug, kahween kuhya menuhwah uhwunjish tahezhechegasewug.

¹⁴ ¶ Uhpe ketuhgwishenun ewede uhkeeng ewh mahnik Jehovah keKesha‐Muhnedoom, tebanduhmun dush, kuhya duhnuhkeyun ewede, oo‐oo dush ekedooyun, Ningahookecheöogemaum, debishkoo kuhkenuh egewh ahnishenahbag uhnooj azheweenzoojig kewetahuhyeëe uhyahyaun ayahjig;

¹⁵ Kegahookecheöogemaumenun enewh Jehovah keKesha‐Muhnedoom kawuhwanahbuhmahjin: pazhig egewh kekahnesug kegahenahkoonah cheöogemahkundook: kahween kedahwuhwanahbuhmahse owh mayuggezid cheöogemahkundook, kekahnis uhyahwesig.

¹⁶ Kah dush ween ooguhbahtuhyenooähseen oopahpazhigoogunzheemin, kahween kuhya nayaub ooguhezhekewawenahseen ewede Egypting enewh ahnishenahban, oonje ewh webahtuhyenooäud papazhigoogunzheen: oo‐oo mah kegeëgoowah Jehovah, Kah wekah menuhwah ewede kegahezhekewaseem.

¹⁷ Kahween kuhya oogahbahtuhyenooähseen oowedegamahgunun, cheöonjequakesamuhgussenoog ooda: kahween kuhya oogahkechebahtuhyenooähseen ooshooneyahmun kuhya oozahweshooneyahmun.

¹⁸ Uhpe dush nuhmuhduhbid oodoogemah‐wuhbewining, tahnahsaubebeühmahzoo oo‐oo tebahkoonegawin muzzenuheguning, uhyood ewh muzzeneëgun atag anahsuhmewaud egewh sahsahgewejega‐wenewug egewh Levitug:

¹⁹ Oogahuhyaun dush, oogahuhgindaun kuhya menik kabemahdezid: chekekandung dush kaëzhekoosaud enewh Jehovahun ooKesha‐Muhnedoomun, chekuhnuhwandung kuhkenuh akedoomuhguk oo‐oo tebahkoonegawin kuhya oonoo enahkoonegawinun, cheëzhechegad:

²⁰ Ewh ooda cheöombenegahdasenoog nuhwuj ishpeming enewh dush ween wekahnesun, kuhya emuh kuhgequawining cheöonjequaketahsig, ookechenekahmaung enuhguhkayah, gamah kuhya oonuhmunjekahmaung: chekinwahtood dush nah ookezhigudoomun emuh oodoogemahwewining, ween, kuhya enewh oonejahnesun, nahwuhyeëe Israeling.