COLOSSIANUN 4 - Ottawa New Testament Penteteuch and Psalms 1874

¹ Oogemahwedoog, meenik kebuhmeetahgunewaug ewh wanesheshing kuhya quuhyukwuk; kekanduhmag kuhya kenuhwah ahyahwag kedoogemahmewah ewede keche‐kezhegoong.

² Aunwahjeyook ewh ahnuhmeähyag, kuhya ahkahwahbeyook emuh mahmahwe chemahmooyahwayag;

³ Bakish dush anuhmeätuhmahweshig Kesha‐Muhnedoo chenesahkoonuhmahweyungid ewh kekedoowine ishquaundam, chedebahdooduhmaun Christ ookeche‐kekandahsoowin, mesuh wanje‐minjemahpenegahzooyaun:

⁴ Cheöonje‐mezheshuhwissittooyaun, ewh kaëzhekekedooyaunbaun cheëzhekekedooyaun.

⁵ Emuh nebwahkahwining ezhebemoosayoog emuh anahsuhme‐ahyahwaud egewh ahgwahjeeng ahyahjig, nayaub kishpinetooyag enewh kezhegudoon.

⁶ Mahnoo kekahkekedoowinewah tahmenoo‐ezhewabud, tahnuhsug egoo shewetahgunegahdag, chekekanduhmag ewh kanuhquatuhwagwah kuhkenuh kagwajemenagoog.

⁷ Kuhkenuh nindezhewabezewin kegahweenduhmaug Tychicus, suhyahgeïnd wejekewaëmah, kuhya ahyaungwahmezid makuhdawekoonuhya kuhya owh wahdookahwid buhmeetahwug owh Tabaningad.

⁸ Owh kahezhenahzhahahmoonuhgoog oonje oo‐oo uhyeëe chekekanemenag azhewabezeyag, kuhya chemenoo-daäënag;

⁹ Kuhya Onesimus, ahyaungwahmezid kuhya suhyahgeïnd wejekewaëmah, dabandahgoozid kenuhwah anduhzhe‐ahyahyag. Kuhkenuh kegahweenduhmahgoowaug enewh uhyeëen azhechegahdagin oomah.

¹⁰ Aristarchus neeje‐kebahquahegahzood kedahnemekaugoowah, kuhya Marcus, wenemooshaün owh Barnabas, (owh kahduhzhemind kuhgaundwawin keöodissegooyag: kishpin penaunzekoonag oodahpenik;)

¹¹ Kuhya Jesus Justus azhenekahzood, egewh dabandahgoozejig emuh kekenoowahje‐kishkezhegahzoowining. Me suh egewh atuh wahdookahwejig emuh oodoogemahwewining Kesha‐Muhnedoo, kuhya kahmenoodaäëjig.

¹² Epaphras kejekewaëwah, wabuhmeetahgunemegood enewh Christun kedahnemikaugoowah, anegook anuhmeätuhmoonag chenebahweyag, quuhyukwandahgoozeyag kuhya guhnuhwanduhmag oodenanduhmoowin Kesha‐Muhnedoo.

¹³ Nindebahjemah suh owh kagate keche‐sahgeënag, kuhya keche‐sahgeäud enewh ayahnejin emuh Laodiceäïng, kuhya enewh ayahnejin emuh Hierapolising.

¹⁴ Kedahnemikahgoowaug Lucas suhyahgeïnd mushkeke‐wenene kuhya Demas.

¹⁵ Ahnemekahwik egewh wejekewaëmaug emuh Laödiceäïng ayahjig, kuhya Nymphas kuhya egewh anuhmeähjig andahjig emuh oowegewauming.

¹⁶ Uhpe keïshquah‐ahginjegahdag maunduh mahjebeegun anduhzhe‐ahyahyag, ahnookeeg cheähginjegahdag emuh oodahnuhmeä‐weguhmigoowaung egewh Laodiceänug; kuhya kenuhwah cheähginduhmag ewh mahjebeëgun kahoonjeemahguk ewede Laödiceäïng.

¹⁷ Kuhya oo‐oo enik Archippus, Guhnuhwandun ewh kuhgequawin kahpuggedenuhmook owh Tabaningad chetebedooduhmun.

¹⁸ Neen Paul kedahnemikoonenim tebenuhwa neneenj ahyooyaun. Mequanduhmook neminjemahpenegahzoowin. Mahnoo shahwanjegawin kegahweejewegoonahwah. Amen.