యోబు 30 - Biblica® ఉచిత తెలుగు సమకాలీన అనువాదం

¹ “అయితే ఇప్పుడు నన్ను చూసి ఎగతాళి చేస్తున్నారు, నాకన్నా చిన్నవారు, ఎవరి తండ్రులను నేను నా గొర్రెలు కాసే కుక్కలతో పెట్టడానికి అసహ్యించుకునేవాన్ని.

² వారి చేతుల బలం వల్ల నాకేమి ఉపయోగం? వారు బలం నశించిపోయిన పురుషులు.

³ లేమితో ఆకలితో బక్కచిక్కినవారై, పొడిగా ఉన్న భూమిపై తిరుగులాడారు రాత్రివేళ నిర్జనమైన బంజరు భూములలో.

⁴ ఆకుల పొదల్లో ఉప్పు మూలికలు సేకరించారు, బదరీ వేర్లు వారికి ఆహారము.

⁵ వారు మానవ సమాజం మధ్య నుండి వెళ్లగొట్టబడ్డారు, వారు దొంగలైనట్టు వారిపై కేకలు వేశారు.

⁶ కాబట్టి ఇప్పుడు వారు భయపెట్టే లోయల్లో, బండల మధ్య గుహల్లో నివసిస్తున్నారు.

⁷ వారు పొదల మధ్య విరుచుకుపడ్డారు ముండ్లకంపల క్రింద ఒక్కటిగా పోగయ్యారు.

⁸ పేరు లేని బుద్ధిహీనుల కుమారులు వారు దేశం నుండి తరిమివేయబడ్డారు.

⁹ “అలాంటి వారికి నేను హేళన పాట అయ్యాను; వారికి నేను ఓ సామెతను అయ్యాను.

¹⁰ వారు నన్ను చూసి అసహ్యించుకుని దూరంగా జరుగుతున్నారు; నా ముఖం మీద ఉమ్మివేయడానికి కూడా వెనుకాడరు.

¹¹ దేవుడు నా విల్లును విప్పి నన్ను బాధపెట్టారు, వారు నా సమక్షంలో సంయమనాన్ని వదిలేశారు.

¹² నా కుడి వైపున తెగ దాడులు; వారు నా పాదాలకు వలలు వేస్తారు, నాకు వ్యతిరేకంగా తమ నాశన ప్రయత్నాలను చేస్తున్నారు.

¹³ నా మార్గాన్ని పాడుచేస్తున్నారు; నన్ను నాశనం చేయడంలో వారు విజయం సాధించారు. వారిని అడ్డుకునేవారు లేరు.

¹⁴ గండిపడిన పెద్ద ప్రవాహంవలె వారు వస్తారు; పతనంలా వారు దొర్లుతూ వస్తారు.

¹⁵ భయాలు నన్ను ముంచెత్తుతాయి; నా గౌరవం గాలిలా తరిమివేయబడింది, నా భద్రత మేఘంలా అదృశ్యమవుతుంది.

¹⁶ “ఇప్పుడు నా జీవితం దూరమవుతుంది; శ్రమ దినాలు నన్ను పట్టుకున్నాయి.

¹⁷ రాత్రి నా ఎముకలను పొడుస్తూ ఉంది; నన్ను కొరికివేస్తున్న నొప్పి ఆగడమే లేదు.

¹⁸ తన గొప్ప శక్తితో దేవుడు నాకు దుస్తుల్లా అవుతాడు; నా చొక్కా మెడవలె ఆయన నన్ను బంధిస్తారు.

¹⁹ ఆయన నన్ను బురదలో పడవేశారు, నేను దుమ్ము బూడిదగా అయ్యాను.

²⁰ “దేవా, నేను మీకు మొరపెడతాను, కాని మీరు జవాబు ఇవ్వరు; నేను నిలబడతాను అయినా మీరు నన్ను ఊర్కెనే చూస్తారు.

²¹ నా పట్ల మీరు కఠినంగా మారారు; మీ బాహువు బలం చేత నా మీద దాడి చేస్తావు.

²² నీవు నన్ను లాక్కుని గాలి ముందు నడిపిస్తావు; నీవు తుఫానులో నన్ను విసిరివేస్తావు.

²³ సజీవులందరి కోసం నియమించబడిన స్థలమైన, మరణానికి నీవు నన్ను రప్పిస్తావని నాకు తెలుసు.

²⁴ “విరిగిన వ్యక్తి తన బాధలో సహాయం కోసం కేకలు వేసినప్పుడు ఖచ్చితంగా ఎవరూ చేయి వేయరు.

²⁵ ఇబ్బందుల్లో ఉన్న వారి కోసం నేను ఏడవలేదా? పేదవారిని చూసి నా ప్రాణం దుఃఖపడలేదా?

²⁶ అయినాసరే నేను మేలు జరుగుతుందని ఆశిస్తే, కీడు జరిగింది; నేను వెలుగు కోసం చూస్తే, చీకటి వచ్చింది.

²⁷ నా లోపల చిందరవందర ఎప్పుడూ ఆగదు; శ్రమ దినాలు నాకెదురయ్యాయి.

²⁸ నేను నల్లబడతాను, కాని సూర్యుని ద్వారా కాదు; నేను సమాజంలో నిలబడి సహాయం కోసం మొరపెడతాను.

²⁹ నేను నక్కలకు సోదరుడనయ్యాను, గుడ్లగూబలకు సహచరుడనయ్యాను.

³⁰ నా చర్మం నల్లబడి రాలిపోతుంది; నా శరీరం జ్వరంతో కాలిపోతుంది.

³¹ నా వీణ దుఃఖానికి, నా పిల్లనగ్రోవి రోదన ధ్వనికి శ్రుతి చేయబడింది.