yuwana 8 - ŋuɽun ŋun ŋiya ŋun ŋikaiilo elo 1966

asa 8 gwa gwun gwuməṯɩnu kalo ge ḏuriḏa

¹ namɩni yecu wele gi lɩrgwom lun lan seitun.

² na giləganu mimmi gilio nuəḏi mɩna kwu dunu gweḏi elo gwun gwubuḏo, na liji wei nalwila lugwun; nujiga nulalɩmi.

³ na jalgaṯɩm na lɩbarɩsi nalgwuloḏa gwa gwete lugwun gwun gwuriḏilo gwiji gwe gwiro kaja, na gwune nalgele kɩlɩgi ganu,

⁴ naleicɩno, mualim gwəri, eʼe gwa kweno gwɩmanaboḏeica kalo ge ḏuriḏa.

⁵ musa gwuməḏɩjije ŋuɽun ŋun ŋigelijɩlo elo nuarno, arram liji leno lun laṯarre dino lilauce nyɩdol nye, namɩni ŋa gwarau ga?

⁶ nalar dino, gwaliḏeije kani alɩbuje ŋun ŋalŋicɩgiŋuŋu. namɩni yecu nuriḏe nuuli kwɩnyəm lamon le.

⁷ gwune naljɩre gwuməḏɩjilo, nudiɽio lɽa ganu nuleicɩno, ŋu gwun gwate gwəṯi ŋuɽuna ŋɩki lagalo no, ŋuau gɩdol ge gwerre.

⁸ nuaɽu nuriḏe nuuli ga kwɩnyəm.

⁹ namɩni gwune naldiŋɩni dino naṯudu gwun gwuɽun gwetɩdo gwetɩdo kəbe naldu wei, na yecu ṯani gwetɩdo na gwa gwuḏuḏɩnu ga kɩlɩgi ganu.

¹⁰ gwune na yecu diɽejo lɽa elo, nueico gwa no, gwa, luŋa laḏa lun lar laŋacɩgi? gwate gwetɩdo gwun gwaŋanakɩmi na?

¹¹ nueicɩno, gwatɩn gwetɩdo gwele gwi no. na yecu eicɩno, nyi dino nyi gwate gwaŋanakɩmi no, wiḏi ki ŋa gwo gwanape ŋuɽuna ŋɩki mɩna.

bure gweḏi gɩḏilio

¹² nuaɽu nal yecu uməḏɩjo naleicɩno, nyi gwiro bure gweḏi gɩḏilio. gwun gwigwujane gwate gwele kirɩm no, namɩni gwəṯi bure gwe ḏɩmiḏa.

¹³ na lɩbarɩsi uməḏɩjo naleicɩno, ŋa gwateije ŋuɽuna ga ŋan gwulo gwuŋa. na ŋuɽun ŋuŋa ŋate ŋiro gwerkwe no.

¹⁴ nal yecu wɩrlijo ŋuɽuna nuleicɩno, ḏa nyi mateije ga ŋan gwulo gwi, na ŋuɽun ŋiro gwerkwe gi gwune nyi gwilɩŋiḏi nyi gwuwiḏi ne na nyi gwele ne; namɩni nyaŋa late lilɩŋiḏi nyi gwuwiḏi ne no, na nyi gwele ne no.

¹⁵ nyaŋa laṯakɩmi liji; namɩni nyi gwate gwinakɩmi gwetɩdo no.

¹⁶ ḏa nyi gwaṯakɩmiḏe na ḏakɩmiḏa ḏinyi ḏaŋaro gwerkwe, gi gwune nyi gwədu gwetɩdo no, namɩni nyi gwiro na baba gwun gwuwəjɩŋi.

¹⁷ ŋulinu kɩḏam ŋeḏi ŋuɽun ŋalo ŋun ŋigelijɩlo elo musaŋ ŋuɽun ŋeḏi liji lɩttən ŋun ŋaŋiḏulo ŋiro gwerkwe.

¹⁸ nyi gwiro gwun gwiteijo ga ŋan gwulo gwi, na baba gwun gwuwəjɩŋi gwigwiteije ga.

¹⁹ naleicɩno, baba gwuŋa gwo ka? nal yecu wɩrlijo əuɽuna nuleicɩno, nyaŋa late lilɩŋiḏiŋi i babaŋ gwinyi no. ḏa nyalilɩŋiḏiŋi nyalaŋalɩŋe babaŋ gwinyi dino.

²⁰ nal yecu uməḏɩjo ŋuɽuna ŋeno kalo ge ḏigela əlgɩrucə gwune alɩmiŋwulo kwu dunu gweḏi elo gwun gwubuḏo. nate nan ŋwiji məṯo gwetɩdo no, gi gwune sa juŋun jore jate jɩmila no.

yecu gwuḏɩmini calɩmis ga gi ḏikeḏa ḏun ḏila

²¹ nuaɽu nal yecu uməḏɩjo nuleicɩno, nyi gwele na nyalibunyi, nanyalai ŋuɽun ganu ŋalo ŋun ŋɩki. na galo gun ginele nya late ləṯi ŋɩma ganyanwila no.

²² na liju arno, gwar gwaɽinyini gi gwune aruno, galo gun ginele nya late ləṯi ŋɩma ganyanwila no?

²³ nuleicɩno, nyaŋa leḏi kwɩnyəm liro; namɩni nyi gweḏi kanyin gwiro. nyaŋa leḏi gɩḏilio keno liro, namɩni nyi gwədu gweḏi gɩḏilio keno no.

²⁴ na dino, najeicɩno, nyalai ŋuɽun ganu ŋalo ŋun ŋɩki; gi gwune ḏa nya late lɩməmɩnyi nyalmarno, nyi gwiro no, nyalai ŋuɽun ganu ŋalo ŋun ŋɩki.

²⁵ naleicɩno, ŋa gwiro gwan əḏi? nal yecu eicɩno, nyi gwiro gwun gwuməḏɩjaje uro gwerre.

²⁶ nyi gwəṯi ŋuɽuna ŋutu ŋilumə naŋiŋakɩmiḏe ŋan ŋyaŋa; namɩni ŋu gwun gwuwəjɩŋi gwiro gwerkwe, na ŋun ŋidiŋɩnilo lugwun, niluməḏɩjo gɩḏilio.

²⁷ nate nallɩŋe ŋu gwuməḏəṯi ḏi baba no.

²⁸ nal yecu eicɩno, ḏa nyalmabuje ŋaɽe elo ŋeḏi liji, na kaja kono nyalalɩŋe nyi gwiro, na nyi gwate gwanduji ŋuɽuna ŋəḏi ŋele ŋe ŋinyi no, namɩni ŋaṯiŋumə gi gwune alɩminyi baba gwi,

²⁹ na gwun gwuwəjɩŋi gwaṯanagwije. na ŋu gwate gwaṯiŋinwalane gwetɩdo no, gi gwune nyi gwaṯɩduji ŋuɽuna ŋun ŋəmɩnyulo bubruṯ.

³⁰ gwune uməḏu ŋuɽuna ŋeno, naləmɩnyi lutu.

yecu gwəṯi ŋuɽuna ŋiro kaja gi liju

³¹ na yecu eico liju leno lun ləmɩnyu no, ḏa nyalmamaṯaḏe ŋuɽuna ŋinyi, na gwerkwe ganu nyalro calɩmis jinyi;

³² na nyalalɩŋe ŋuɽuna ŋun ŋiro gwerkwe, na ŋuɽun ŋun ŋiro gwerkwe ŋajikədə ga.

³³ nalwɩrlijo ŋuɽuna naleicɩno, andro nyaɽe nyeḏi ibraim, nanate lɩmandro lɩwainy kwiji gwədi ḏuṯ no, namɩni galakwe naŋarno, nya laje ləkədəḏɩni ga?

³⁴ nal yecu wɩrlijo ŋuɽuna nuleicɩno, gwerkwe, gwerkwe ganu, nyi gweiceijɩno, gwun gwaṯape ŋuɽuna ŋun ŋɩki gwiro wainy gweḏi ŋuɽun ŋun ŋɩki.

³⁵ na wainy gwate gwajaḏaṯa kwu dunu gi gɩḏilio no; namɩni ŋaɽe ŋajaḏaṯa gi gɩḏilio.

³⁶ na dino ḏa ŋaɽe ŋɩmajikəḏə ga nyalmakəḏəḏɩni ga wutiwuti.

³⁷ nyi gwilɩŋiḏi nyalro nyaɽe nyeḏi ibraim; namɩni nyalar nyaliŋiɽinye, gi gwune ŋuɽun ŋinyi ŋate ŋəṯi gala lagalo no.

³⁸ ŋaṯiŋumə ŋun ŋaŋəḏɩlo ḏi baba gwi; namɩni nyaŋa ŋaṯanyaŋape ŋɩru ŋun ŋaŋəḏənyalo ḏi baba gwalo.

³⁹ nalwɩrlijo ŋuɽuna naleicɩno, ibraim gwiro gwurnəri gwəri. nal yecu eicɩno, ḏa nyalro nyaɽe nyeḏi ibraim, nyalaṯaŋape ŋɩru ŋeḏi ibraim.

⁴⁰ namɩi gwunnɩno nyalar nyaliŋiɽinye, namɩni nyi gwiro gwiji gwun gwuməḏɩjaje ŋuɽuna ŋun ŋiro gwerkwe ŋun ŋiḏiŋɩnili ḏi elo. namɩni ŋuɽun ŋalo ŋeno ŋate ŋaṯɩl ibraim ape no.

⁴¹ nyalaṯape ŋɩru ŋeḏi baba gwalo. naleicɩno, anaŋa late liro nyaɽe nye ḏuriḏa no; anəṯi babaŋ gwetɩdo na ŋu gwiro elo.

⁴² na yecu eicɩno, ḏa elo gwiro baba gwalo nyaŋa laṯɩnyiəmɩnyi, gi gwune nyi gwutuḏi ḏi elo niwiia. gi gwune nyi gwate gwaŋila ŋele ŋe ŋinyi no, namɩni ŋu gwuwəjɩŋi.

⁴³ gwudaro gəko nate nanyalɩŋe ŋuɽuna ŋinyi no? gi gwune nya late ləṯi ŋɩma nanyadiŋɩni ŋuɽuna ŋinyi no.

⁴⁴ nyaŋa leḏi baba gwalo gwun gwan iblis, na nya lar lape ḏɩbunya ḏun ḏɩki ḏedi baba gwalo. ŋu gwiro gwun gwaṯɩɽinyɩḏe uro gwerre, nate numaṯaḏe ŋuɽun ŋun ŋiro gwerkwe no, gi gwune ŋuɽun ŋun ŋiro gwerkwe ŋate lugwun no. na ḏa mumə ŋɩwɩɽigala naṯulumə ŋan ŋuɽun ŋuŋun, gi gwune gwiro gwuwɩɽɩgal na baba gweḏi ŋɩwɩɽɩgal.

⁴⁵ namɩni nyi gaṯɩluməḏo ŋun ŋiro gwerkwe, namɩni nya late laṯɩnyiəmɩnyi no.

⁴⁶ əḏi gwiro gwete lagalo gwinyiaŋijo ŋuɽuna ŋun ŋapɩlo ŋun ŋɩki? namɩni ḏa nyi majuməḏɩjo ŋuɽuna ŋun ŋiro gwerkwe namɩni gwudaro gəko nate nanyəmɩnyi no?

⁴⁷ gwiji gwun gweḏi elo gwaṯɩdiŋɩni ŋuɽuna ŋeḏi elo. na ŋiro dino nya late ladiŋɩni no gi gwune nyaŋa lədu leḏi elo no.

⁴⁸ na liju wɩrlijo ŋuɽuna naleicɩno, anate numəḏi muma nanarno, ŋa gwiro gwusamɩra na ŋa gwəṯi ḏiŋeroma na?

⁴⁹ nal yecu wɩrlijo ŋuɽuna nuleicɩno, nyi gwate gwəṯi ḏiŋeroma no, namɩni nyi gwaṯɩnəji babaŋ gwinyi, namɩni nyalaṯɩŋiapi ḏare.

⁵⁰ namɩni nyi gwate gwubunyu ḏɩbuḏia kwulo gwi no, gwo gwete gwun ḏaṯubunyi na gwiro gwun gwaṯakɩmiḏe.

⁵¹ gwerkwe, gwerkwe ganu, nyi gweiceijɩno, ḏa gwiji gwete madɩme ŋuɽuna ŋinyi gwate gwanaŋu ḏaiya gi gɩḏilio no.

⁵² na liju eicɩno, gwunne nanalɩŋe ŋa gwəṯi ḏiŋeroma. ibraim gwɩmai na nebɩŋa dino, namɩni ŋa gwarno, ḏa gwiji gwimaḏɩme ŋuɽuna ŋuŋa gwate gwai gi gɩdilio no.

⁵³ ŋa gwiro gwubuṯano ḏi baba gwəri gwun gwan ibraim gwun gwɩmai a? na nebɩŋa lɩmai dino. ŋa gwiduji gwula gwuŋa əḏi?

⁵⁴ na yecu wɩrlijo ŋuɽuna nuleicɩno, ḏa nyi mabuḏi gwula gwi, namɩni ḏɩbuḏia ḏinyi ḏate ḏəṯi jei ganu no. baba gwi gwiro gwun gwatɩnyibuḏi, gwun gwaṯanyagwarno gwiro elo gwalo.

⁵⁵ namɩni gwate gwilɩŋiḏanya no, namɩni nyi gwilɩŋiḏi; na ḏa nyi marno nyi gwate gwilɩŋiḏi no, nyi gwiro wɩɽɩgal gi nyaŋa; namɩni nyi gwilɩŋiḏi nɩdɩme ŋuɽuna ŋuŋun.

⁵⁶ baba gwalo gwun gwan ibraim gwadile ganu gwaŋu lamon linyi; nuaŋu nuiŋir ganu.

⁵⁷ na liju eicɩno, ŋa gwore gwate gwumaro jɩḏilio ḏuɽi ṯoḏine no, namɩni arno ŋamaŋu ɩbraim ye?

⁵⁸ nal yecu eicɩno, gwerkwe, gwerkwe ganu, nyi gweiceijɩno. gwerre ganu ibraim gwate gwilɩŋinu no, nyi gwijo.

⁵⁹ nalmɩni ape nyɩdolia nalar gwalauce, namɩni yecu gwulɩbo, nutu kwu dunu gweḏi elo gwun gwubuḏo.