yuwana 7 - ŋuɽun ŋun ŋiya ŋun ŋikaiilo elo 1966

asa 7 yecu na lɩmegin

¹ na ŋɩno na ŋuɽun ŋeno ete, naṯi yecu wewele jalil, gi gwune gwate gwəmɩnyu gwawele yauḏia no gi gwune liju lar gwalɽinye.

² na gɩmuri geḏi liju gun giro gɩmuri geḏi jupe gijo gɩṯo.

³ na lɩmegin eicɩno, walano kalo ŋɩne ŋele yauḏia, kani a calɩmis juŋa aŋu dino ŋɩru ŋun ŋaṯalape.

⁴ gi gwune gwiji gwatɩn gwun gwaṯape ŋɩru nyɩkwom ḏa marno gwar gwaŋiḏi gwula gwuŋun ŋi liji no. ḏa ŋa manduji ŋɩdio ŋeno namɩni aŋijo liji gwula gwuŋa.

⁵ gi gwune lɩmegin dino late gwaləmɩnyi no.

⁶ nal yecu eicɩno, gaja ginyi gore gate gɩmila no, namɩni galo gaṯɩje bubruṯ.

⁷ gɩḏilio gate gəṯi ŋɩma gajidonye no, namɩni gwinyidonye gi gwune nyi gwiteijo ga gwan ŋɩru ŋagin ŋun ŋɩki.

⁸ abuḏil nyaŋa kɩmuri. nyi gwate gwabo kɩmuri no, gi gwune gaja ginyi gore gate gɩməṯɩmi no.

⁹ gwune nuleico dino nujaḏaṯa ga jalil.

¹⁰ na gwune na lɩmegin abo nuɽinyeḏe nuabo dino kɩmuri, nate nunaŋini ganu no, nuabo nyɩkwom.

¹¹ na liju bunyi kɩmuri nalarno ŋu gwaḏa?

¹² na liji lutu anuməḏəṯelo gwan ŋu, na kworo arno, ŋu gwiro gwəmɩnyo gwiŋir, na liro kaja arno, awe, ŋu gwar gwaḏuji liji lutu.

¹³ namɩni ŋɩḏe ŋeḏi liju nate naṯɩn gwiji umə gi jei ganu jeḏi liji ŋan ŋu no.

yecu gwalɩmi urucəlim ŋu gwuwiḏi ḏi elo

¹⁴ gwune na ŋwamon ṯani ṯəɽɩl ŋweḏi gɩmuri, na yecu abo kwu dunu gweḏi elo gwun gwubuḏo nualɩmiḏe.

¹⁵ na liju obaga ṯuṯ, nalarno, galakwe gwiji kweno gwilɩŋiḏi jɩḏam namɩni ŋu gwate gwalimɩnu no?

¹⁶ nal yecu wɩrlijo ŋuɽuna nuleicɩno, ḏalɩmia ḏinyi ḏate ḏinyi ḏiro no, namɩni ḏeḏi ŋu gwun gwuwəjɩŋi

¹⁷ ḏa gwiji gwete gwiməmɩnyi gwaduji ŋuɽuna ŋuŋun ŋun ŋɩbunyulo, ŋu gwalɩŋe ḏalɩmia ḏa ḏɩmaro ḏeḏi elo, i ḏa ḏimiumə ŋele ŋe ŋinyi.

¹⁸ gwun gwaṯumə ŋele ŋe ŋuŋun gwar gwabuḏi gwula gwuŋun; namɩni ŋu gwun gwar gwabuḏi gwun gwuwəju, ŋu gwiro gwerkwe, na ŋuɽun ŋate lugwun ŋun ŋɩki no.

¹⁹ musa gwate gwiḏəḏəje ŋuɽun ŋun ŋigelɩlo elo na? namɩni gwatɩn gwetɩdo lagalo gwatɩnduji ŋuɽun ŋun ŋigelɩlo elo no. gwudaro gəko ninyilbunyi nanyarno nyaliɽinye?

²⁰ na liji lun lutu wɩrlijo ŋuɽuna naleicɩno, ŋa gwəṯi ḏigeroma, əḏi gwiro gwar gwaŋaɽinye?

²¹ nal yecu wɩrlijo ŋuɽuna nuleicɩno, nyi gwarro ŋɩru ŋete na nyobaga ṯuṯ nyaŋa wei.

²² na gwan ŋuɽun ŋeno ŋaji musa ḏəḏə ḏuɽəno—namɩni ŋate ŋeḏi musa ŋiro no, namɩni ŋeḏi lɩgwurninyo ŋiro—na gi lamon le sabiṯ nyalouɽo gwiji.

²³ na ḏa gwiji gwiməmɩnyi ḏuɽəno gi lamon le sabiṯ kani ŋwate ŋwuki ŋuɽuna ŋun ŋigelijɩlo elo musaŋ no, nyalɽiḏi ganu lugwi gi gwune nyigelo gwiji muma wutiwuti gi lamon le sabiṯ a?

²⁴ aṯanyakɩmiḏa ga jai no, nyamɩni akɩmiḏe ḏakɩmiḏa ḏun ḏɩḏuḏɩnu ga.

²⁵ na liji kworo leḏi urucəlim arno, gwədu gwiro kwe gwun gwar gwalɽinye a?

²⁶ eʼe gwiro gwəwei gwuməḏi gi jei ganu jeḏi liji, na luŋa late manuməḏɩjo ŋuɽuna ŋədi no. lele lilɩŋiḏi muma kweno gwiro kɩrisṯo gwerkwe a?

²⁷ namɩni analɩŋe gwiji kweno gweḏi ne gwiro; namɩni ḏa kɩrisṯo mila gwiji gwatɩn gwetɩdo gwilɩŋiḏi gwuwiḏi ne no.

²⁸ na yecu gwəri gwula gwune ju gi ḏalɩmia kwu dunu gweḏi elo gwun gwubuḏo nuleicɩno, nyaŋa lilɩŋiḏiŋi, nanyalɩŋe nyi gwuwiḏi ne. na nyi gwate gwuwiḏi ŋele ŋe ŋinyi no, namɩni gwun gwuwəjɩŋi gwiro gwerkwe gwun gwate gwilɩŋiḏanya no.

²⁹ nyi gwilɩŋiḏi, gi gwune nyi gwijo lugwun nuŋwiwəjo.

³⁰ nalar gwalməṯo, namɩni gwiji gwate gwəməṯo gi di, gi gwune sa juŋun jore jate jɩmila no.

³¹ na liji əmɩnyi lutu kworo nalarno, ḏa kɩrisṯo mila gwar gwape ŋuɽuna ŋutəno ŋun ŋɩbuḏo kworo gwun gwapɩlo gwiji kweno a?

³² na lɩbarɩsi ḏiŋɩni liji luməḏəṯelo ŋuɽuna ŋeno ŋan ŋu, na jɩsis jun jɩbuḏo na lɩbarɩsi nalwəje jalbuliḏa gwalməṯo.

³³ nal yecu eicɩno, gaja gɩṯanu gɩti ge gigijanaga ki nyi gwele ḏi gwun gwuwəjɩŋi.

³⁴ na nyalnyibunyi, nyamɩni nya late linyibuje no, na galo gun ginɩje nya late ləṯi ŋɩma ganyanwila no.

³⁵ na liju uməḏəṯe nalarno, gwiji kweno gwar gwene, kəbe ate ilbuje no? ŋu gwar gwele gi liju lun luwɩreḏelo gi ligrigi ŋualɩmi ligrigi ə?

³⁶ ŋuɽun ŋɩrṯa ŋeno ŋun ŋəruŋe, nyalinyibunyi namɩni nya late linyibuje no? na galo gun ginɩje nya late ləṯi ŋɩma ganyanwila no?

ŋau ŋɩmiḏo

³⁷ na gi lamon leḏi gɩdo lun lɩbuḏo leḏi gɩmuri na yecu diɽi nuəri gwula nuleicɩno, ḏa gwiji gwete ma ouḏo e, ouwɩricil ŋwila lugwi na gweyu.

³⁸ gwun gwiəmɩnyi, gi gwune arne gɩḏam geḏi elo, na kare ganu nuiro ḏɩrawe ḏun ḏiro ŋau ŋɩmiḏo.

³⁹ numɩni uməḏəṯo kwuɽɩwə gwun gwɩpiḏo pɽul gwun gwaje gwuliḏəḏə lun ləmɩnyu gi gwune gwuɽɩwə gwore gwate, gi gwune yecu gwore gwate gwiməḏi gi ḏoɽeḏa ḏuŋun no.

⁴⁰ gwune na liji lutu kworo diŋɩni ŋuɽuna ŋeno nalarno, gwerkwe ganu kweno gwiro nebi.

⁴¹ na liro kaja arno, kweno gwiro kɩrisṯo. namɩni liro kaja arno, kɩrisṯo gwuwiḏi jalil a?

⁴² gɩḏam geḏi elo gate garno, kɩrisṯo gwiro əriḏ yeḏi ḏauuḏ, na gwaje gwila gi lɩrgwom lun lan beṯlam lun lijɩne ḏauuḏ na?

⁴³ na dino na liji kenyɩḏiḏi ganu gwan ŋu.

⁴⁴ na kworo lagin gwalməṯo, namɩni gwate gwetɩdo gwun gwəməṯo gi di no.

⁴⁵ na jalbuliḏ nalwila gi jɩsis jun jɩbuḏo na lɩbarɩsi, naleico jalbuliḏa no, gwudaro gəko nate nanyagwuloḏa no?

⁴⁶ nal jalbuliḏ wɩrlijo ŋuɽuna naleicɩno, gwiji gwate gwetɩdo gwun gwanumə ŋuɽuna gwiro gi gwiji kweno no.

⁴⁷ nal lɩbarɩsi wɩrlijo ŋuɽuna naleicɩno, nyaŋa dino gwar gwajiḏuji a?

⁴⁸ gwete gi lele i gi lɩbarɩsi manigwəmɩnyi a?

⁴⁹ namɩni liji leno lun lutu lun late lilɩŋiḏi ŋuɽuna ŋun ŋigelijɩlo elo musaŋ no, luŋa liḏenɩnu.

⁵⁰ na nikudimus gwun gwuwiḏi gwerre ḏi yecu gilio, na gwiro gwete lagin, nuleicɩno,

⁵¹ ŋuɽun ŋage ŋun ŋigelijɩlo elo musaŋ ŋaṯakɩmi gwiji ḏa gwate madiŋɩni gwerre na malɩŋe ŋɩrṯa ŋiro ŋapulo na?

⁵² nalwɩrlijo ŋuɽuna naleicɩno, ŋa dino ŋa gweḏi jalil gwiro a? bunyu, ŋaŋu; nebi gwate gwun gwediɽi jalil no.

⁵³ nalwele gwete gwete gi lɩdunu lagin.