yuwana 4 - ŋuɽun ŋun ŋiya ŋun ŋikaiilo elo 1966

asa 4 yecu na gwa gweḏi samɩra

¹ na gwune na gwele gwun gwiro elo lɩŋe lɩbarɩsi lɩmadiŋɩni galakwe yecu gwumədiene calɩmis ga jutəno ḏi yuwana nulbabṯaije,

² —namɩni yecuŋu gwate gwiro gwibabṯaijiḏi no namɩni calɩmis juŋun jiro—

³ nuwalane yauḏia, nuaɽuwe jalil,

⁴ na arram ŋu gwele gi ṯaṯ kɩlɩgi ganu samɩra;

⁵ nuwila kamɩrɩgen yete yeḏi samɩra yun yan sukara, yun yijo gɩṯo gi ḏɩri ḏun ḏiḏəḏi yagub ŋaɽe ŋuŋun ŋun ŋan yɩɩsib,

⁶ na ŋɩnəwei lɩbir iijo leḏi yagub. na gi gwune yecu gwuwiḏi kalo gwola ganu nurtonyɩḏe nujiga gi lɩbir elo, na galo giro anyino ganu.

⁷ na gwa wila gweḏi samɩra gwar gwaŋɩɽe ŋau; na yecu eicɩno, ḏəḏiŋine ŋau ilyu,

⁸ gi gwune calɩmis juŋun jimele kamɩrɩgen jeḏɩla gia.

⁹ na gwa gweḏi samɩra eicɩno, gwuḏaro gəko ŋa gwun gwiro gwiju nuŋwiɽoṯəḏɩjo ŋau ŋe, namɩni nyi gwiro gwa gweḏi samɩra? gi gwune liju late laṯɩje kal gete lisamɩra le no.

¹⁰ na yecu wɩrlijo ŋuɽuna nueicɩno, ḏa ŋa gwilɩŋiḏi ḏiḏəḏo ḏeḏi elo na gwan əḏi ŋu gwun gweicaŋano, ḏəḏiŋi ŋau ilyu, gwaŋaɽoṯəḏɩjoŋa na gwaŋaḏəḏə ŋau ŋɩmiḏo.

¹¹ na gwa eicɩno, gwele gwi, ŋa gwate gwəṯi gwaŋ gwe ḏaŋɩɽa no, na lɩbir lola ganu, namɩni ŋa gwəṯi ŋau ne ŋun ŋɩmiḏo?

¹² ŋa gwiro gwubuṯano ḏi gwurninyo gwəri gwun gwan yagub gwun gwiḏəḏije lɩbirio, nananɩyu ganu ŋu na nyaɽe nyuŋun na almal yuŋun a?

¹³ na yecu wɩrlijo ŋuɽuna nueicɩno, liji wei lun leyu ŋau ŋeno lal ouḏo e mɩna;

¹⁴ namɩni gwun gweyu ŋau ŋun ŋiḏəḏɩlonyi gwate gwan ouḏo e minu no; namɩni ŋau ŋun ŋɩlḏəḏɩnyi ŋaro lugwun lroiny lun laṯabubuḏa gi ḏɩmiḏa gi gɩḏilio.

¹⁵ na gwa eicɩno, gwele gwi, ḏəḏiŋi ŋau ŋeno kani ate nyi ouḏo e minu no, i ate nyi eleḏa ŋɩne gi ḏaŋɩɽa no.

¹⁶ na yecu eicɩno, wiḏi ŋorniḏa gwəmɩnyəŋe gwuŋa nyagwila ŋɩne.

¹⁷ na gwa wɩrlijo ŋuɽuna nueicɩno, nyi gwate gwəṯi gwəmɩnyəŋe no. na yecu eicɩno, ŋa gwuməḏi muma, naŋarno ŋa gwate gwəṯi gwəmɩnyəŋe no,

¹⁸ gi gwune ləṯəlo gwerre ṯoḏɩne, na gwun gwəṯo gwunnɩno gwuŋa gwate gwiro no. ŋuɽun ŋeno ŋa gwuməḏi muma.

¹⁹ na gwa eicɩno, gwele gwi, nyi gwilɩŋiḏi niarno ŋa gwiro nebi.

²⁰ lɩgwurninyo ləri lorṯeḏi eloŋu gi lɩrgwom leno. namɩni nyaŋa laṯarno galo go urucəlim arram gaṯanyanorṯeḏa eloŋu.

²¹ na yecu eicɩno, gwa, əmɩnyəji, gaja gaje gila nya late lanorṯeḏa babaŋ gi lɩrgwom elo leno i urucəlim no.

²² nyaŋa ŋaṯanyalorṯeḏa ŋun ŋate ŋilɩŋiḏanyalo no, namɩni anaŋa gwaṯanorṯeḏa gwun gwilɩgiḏana, gi gwune ḏɩkəḏəḏɩnə ga ḏeḏi liju ḏiro.

²³ namɩni gaja gaje gila, na ke gijo gwunnɩno, na lun lorṯeḏi gwerkwe ganu lorṯeḏa babaŋ gwuɽɩwə gwe na ŋuɽun ŋe ŋun ŋiro gwerkwe, gi gwune libunyilo baba lun liro dino alorṯeḏa ŋuŋu.

²⁴ elo gwiro gwuɽɩwə; na lun lorṯeḏi arram gwalorṯeḏa gwuɽɩwə gwe na ŋuɽun ŋe ŋun ŋiro gwerkwe.

²⁵ na gwa eicɩno, nyi gwilɩŋiḏi gwun gwuwɩrṯɩnu gweḏi elo gwun gwaṯɩleico kɩrisṯo gwaje gwila, na ḏa gwɩmila gwijiuməḏɩjo ŋɩdi ŋe wei.

²⁶ na yecu eicɩno, nyi gwiro gwun gwuməḏɩjaŋa.

²⁷ na kaja kono na calɩmis juŋun wila, nalobaga ṯuṯ gi gwune gwuməḏɩlo gwa gwe; namɩni gwate gwete gwimaneicɩno, gwudaro gwubunya? i nuneicɩno, gwudaro nanyagwumə no?

²⁸ na gwa walane kiḏi guŋun, nuaɽuwe kamɩrɩgen nueico ləmɩnyəŋe no,

²⁹ wilal, nyaŋaḏa gwiji gwun gwuməḏɩji ŋuɽuna wei ŋun ŋidujiŋilo kweno gwil gwarno gwiro kɩrisṯo a?

³⁰ nalduḏo kamɩrɩgen nalwila lugwun.

³¹ na kaja kono na calɩmis eicɩno, mualɩm gwəri, iṯi.

³² nulmɩni eicɩno, nyi gwəṯi gia giʼe gun gate gilɩŋiḏanya no.

³³ na calɩmis uməḏəṯe laginŋu naleicɩno, gwiji gwete maŋanəpijo ŋɩdio ŋe ḏiṯa a?

³⁴ nal yecu eicɩno, gia ginyi giro ḏidujia ŋuɽuna ŋun ŋɩbunyɩlo gwun gwuwəjɩŋi, na ŋaṯɩmi ŋɩru ŋuŋun.

³⁵ nya late laṯarno, luwə lore kwoɽo kɩnadi ḏɩwona ḏila na? eʼe, nyi gweiceijɩno, baŋəḏɩl elo nyadaŋa dɩri; gi gwune nalro ŋwona nɩɽe gwunnɩno gi ḏɩwona.

³⁶ ŋu gwun gwaṯɩwone gwape əlgɩrucə, naṯuwəɽeice nyaɽe ldu gi ḏɩmiḏa gi gɩḏilio, kani ŋu gwun gwaṯɩkwoi na gwun gwaṯɩwone nalḏile ganu berene.

³⁷ na ḏuməḏo ḏun ḏiro gwerkwe ḏaṯarno, gwete gwaṯɩkwoi na gwiro kaja gwaṯɩwone.

³⁸ nyi gwuwəjaje nyalawele nyawona ḏɩwona ḏun ḏate ḏəpəḏənyəne ŋɩru no; namɩni liro kaja ŋapilo lɩbuḏu nanu, namɩni nyaŋa lawona ŋɩdio ŋeḏi ŋɩru ŋagin.

³⁹ na lisamɩra lutu leḏi amɩrɩgen yono naləmɩnyi gi gwune nalḏiŋɩni ŋuɽuna ŋeḏi gwa gi gwune teiju ga, nuarno, gwaŋiju ŋidio wei ŋun ŋidujiŋilo.

⁴⁰ gwune na lisamɩra wila lugwun, nalbunyi nalarno gwalijaḏaṯa ga lagin; nujiga ŋɩnəwei ŋwamon ŋwɩttən.

⁴¹ na liji əmɩnyi lutəno gworki gi gwune naldiŋɩni ŋuɽuna ŋuŋun,

⁴² naluməḏɩjo gwa naleicɩno, gwunnɩno anəmɩnyi, anate nəmɩnyu kalo geḏi ŋuɽun ŋuŋa no, nanalmɩni əmɩnyi gi gwune ḏiŋɩnanalo kaja gəri, nanalɩŋe gwerkwe, kweno gwiro gwun gwikəḏəḏi liji ga leḏi gɩḏilio.

yecu gwiŋiri ŋaɽe nanu ŋeḏi wəkil gweḏi gwele jalil

⁴³ gwune na ŋwamon ete ŋwɩttən nudu ŋɩnəwei nuwele jalil.

⁴⁴ gi gwune yecuŋu gwiteijo ga nuarno liji leḏi amɩrɩgen yuŋun late laṯɩnəji nebɩŋ no.

⁴⁵ gwune nuwila jalil na liji leḏi jalil naləmɩnyi nalgwuloḏa lagin; gi gwune aŋəḏɩlo ŋuɽuna wei ŋun ŋapulo urucəlim kɩmuri, gi gwune luŋa dino lɩmele kɩmuri.

⁴⁶ na yecu wila mɩna kana gweḏi jalil, kalo gun gimɩdinine ŋau nalro ŋau ŋeḏi jaɽe jun jiro gi ḏuɽuṯ. na wəkil gwijo gwete gweḏi gwele, na ŋaɽe ŋuŋun eḏeḏe nanu kamɩrɩgen yun yan kabranaum.

⁴⁷ gwune nudiŋɩni yecu gwumadiɽi yauḏia nuwila jalil, nuwele lugwun nuɽoṯəḏɩjo gwagwulo nugele ŋaɽe ŋuŋun muma; gi gwune ŋo gɩṯo ŋai.

⁴⁸ na yecu eicɩno, ḏa nya late limaŋu ḏəŋɩnio na ŋɩdi ŋun ŋɩmobeje liji ga ṯuṯ no, nya late ləmɩnyi no.

⁴⁹ na wəkil gweḏi gwele eicɩno, gwele gwi, gwulo cagi gwerre ŋaɽe ŋi ŋate ŋɩmai no.

⁵⁰ na yecu eicɩno, wiḏi mino, ŋaɽe ŋuŋa ŋiməmɩḏe. na gwəmɩnyo əminyi ŋuɽuna ŋun ŋuməḏɩjɩlo yecu nuwele.

⁵¹ na gi gwune ju gi ḏigwula, nalobeḏeṯe lɩwainy le luŋun naluməḏɩjo naleicɩno, ŋaɽe ŋuŋa ŋiməmɩḏe.

⁵² nulɽoṯəḏɩjo ŋaɽe ŋɩmadone kaja sa umɩnyo. naleicɩno, kilenyene əa jetɩdo anyino ganu ŋɩɽainy ŋɩmeɩe.

⁵³ na baba lɩŋe muma kaja kono giro gun gwuməḏɩjige yecu gwune nueicɩno, ŋaɽe ŋuŋa ŋiməmɩḏe; nuəmɩnyi, ŋu na liji leḏi dunu gwuŋun wei.

⁵⁴ na ŋuɽun ŋun ŋɩbuḏo ŋeno ŋiro ŋun ŋugwujano gworo ŋun ŋapɩlo yecu gi gwune nudu yauḏia nuweleḏa jalil.