yuwana 20 - ŋuɽun ŋun ŋiya ŋun ŋikaiilo elo 1966

asa 20 gil gwuḏu ganu

¹ na gi lamon lun liro lɽa lun laduji kwoɽoṯəɽɩl na marian majdaliya wila kil mimmi gilio girɩm gijɩre, nuaŋu gɩḏolia giməbɩrəḏɩni ga kil.

² nuaɽu nueneḏe, nuwele ḏi simian buṯrus na gi ṯalɩmis ḏiro kaja, ḏun ḏaṯi yecu əmɩnyi, nuleicɩno, lɩmape gwelɩnya gwun gwiro elo kil nanate nilɩŋiḏi gwəri malgele ne no.

³ na dino na buṯrus duḏa na ṯalɩmis ḏiro kaja nalwele kil.

⁴ naleneḏe berene; na ṯalɩmis ḏun ḏiro kaja darane ḏi buṯrus nuwele kil gwerre;

⁵ nuriḏe nuaŋu jiria jun jɩmɩḏe ganu jun jigakilje jijiga, numɩni ate nuəḏi no.

⁶ na simian buṯrus wila nugwujane nuəḏi kil; nuaŋu jiria jijoga jun jɩmɩde ganu,

⁷ na giria gun gijo gi lɽa luŋun gate gijilga jiria je jun jɩmɩḏe ganu no, namɩni girəmɩḏinu gijoga kaja.

⁸ na ṯalɩmis əḏi dino ḏun ḏɩwiḏi gwerre kil, nuaŋu nuəmɩnyi;

⁹ gi gwune lijɩre late ŋilɩŋiḏɩ ŋuɽuna ŋeḏi gɩḏam geḏi elo, arram ŋu gwediɽi gi ḏaiya no.

¹⁰ na dino calɩmis nalaɽuwe lagin.

yecu maŋini ḏi mariam

¹¹ namɩni mariam ḏuḏɩnəḏəṯo gil kɩluḏo nuəri gwula, na gi gwune ju gi ḏərio gwula, nuriḏe nuaŋalaḏe kil,

¹² nuaŋu liji leḏi kanyin lun liro lɩttən lɩkanu jiria jun jɩpiḏo lijoga, gwete gi lɽa, na gwiro kaja nuje ŋwara kalo gun gijɩne aŋɩnu yeḏi yecu.

¹³ naleicɩno, gwa, gwudaro na ŋəri gwula? nuleicɩno, lɩmape gwelɩnya gwi gwun gwiro elo, na nyi gwate gwilɩŋiḏi malgele ne no.

¹⁴ gwune nuluməḏɩjo dino nuwɩrla ga nuaŋu yecuŋ gwuḏuḏɩnu ga, namɩni gwate gwilɩŋiḏi yecu gwiro no.

¹⁵ na yecu eicɩno, gwa, gwuḏaro na ŋəri gwula? əḏi gwiro gwibunya? nuro gi gwarno gwiji gweḏi jɩneina gwiro, nueicɩno, gwele gwi, ḏa ŋa gwumaro gwumanape, uməḏɩjiŋi nyiaŋijo gala gun gɩmangele na nyi gwiape.

¹⁶ na yecu eicɩno, mariam. nuwɩrla ga, nuorniḏe jiri je jeḏi lɩbrani nuelcɩno, rabbuni, jun jarno, mualɩm.

¹⁷ na yecu eicɩno, ŋiḏɩmuma nanu no, gi gwune nyi gwore gwate gwɩmabo ḏi baba gwinyi no; ŋamɩni ele gi lɩmagəri ŋaleicɩno, nyi gwar gwabo ḏi baba gwinyi na baba gwalo, na elo gwinyi na elo gwalo.

¹⁸ na mariam majdaliya wila nuuməḏɩjo calɩmis ŋu gwaŋəḏi gwelɩnya, na dino ŋu gwiro gwun gwuməḏɩjo ŋuɽuna ŋeno.

yecu maŋini gi duwəjo

¹⁹ gi lamon leno lun liro lɽa lun laduji loro kwoɽoṯəɽɩl, na gɩbe gilaŋiṯinu kalo gun gaɽuwaḏɩne calɩmis ldu ŋɩḏe ŋeḏi liju, na yecu wila nuḏuḏɩni kɩlɩgi ganu lagin nuleicɩno, ḏouwɩɽiḏa ḏaje lagalo.

²⁰ gwune nuluməḏɩjo dino, nulaŋijo di duŋun na lɩmeria, na calɩmis dile ganu gwune nalaŋu gwelɩnya.

²¹ naɽu nal yecu eicɩno, ḏouwɩɽiḏa ḏaje lagalo. gi gwune wəjɩŋi baba ŋiro dino nyi gwajiwəje.

²² gwune nuluməḏɩjo ŋuɽuna ŋeno, nugele uwə gwubuḏo lagin nuleicɩno, məṯɩl gwuɽɩwə gwun gwɩpiḏo pɽul.

²³ ḏa nyalmaḏuḏɩjo gwiji ŋuɽun ganu ŋun ŋɩki, na ŋuɽun ŋuŋun ŋun ŋɩki ŋɩmalɩnḏuḏɩjo ganu; na ḏa nya late lɩmaḏuḏe ŋuɽun ganu ŋun ŋɩki ŋeḏi gwiji no, ŋate ŋɩmanɩnḏuḏɩjo ganu no gwore gwəṯi ŋuɽuna ŋun ŋɩki.

yecu maŋini ḏi ṯoma

²⁴ namɩni ṯoma, gwun gwiro gwete gweḏi calɩmis jun jiro di na gwuttən gwun gwan gwəriḏɩnu, gwate gwijille kaja gun giwiḏige yecu no.

²⁵ na calɩmis jun jiro kaja naleicɩno, anaŋəḏi gwelɩnya gwun gwiro elo. nuleicɩno, ḏa nyi gwate maŋu di duŋun jamrɩcilo jeḏi ŋwusmar, ki magele lamon linyi kamrɩcil geḏi ŋwusmar, na nyi magele ḏi ḏinyi gi lɩmere luŋun no, nyi gwate gwəmɩnyi no.

²⁶ gwune na ŋwamon ete dubə na calɩmis aɽu naləḏi kwu ḏunu, na ḏijɩlo ṯomaŋale; na yecu wila na gɩbe gilaŋiṯɩnu, nuḏuḏɩni kɩlɩgi ganu nuarno, ḏouwɩɽiḏa ḏaje lagalo.

²⁷ nueico ṯomaŋ no, wila lamon le luŋa ŋɩne ŋaŋu di ḏinyi; ŋila ḏi ḏe ḏuŋ a ŋagele gi lɩmere linyi, namɩni ŋa gwo gwete ḏɩməṯo, ŋamɩni əmɩnyi.

²⁸ na ṯoma wɩrlijo ŋuɽuna nueicɩno, gwele gwi na elo gwi.

²⁹ na yecu eicɩno, gi gwune niŋiaŋu ŋa məmɩnyi wɽi a? ḏɩmoreḏa ḏaje lagin lun late laŋəḏi no nalmɩni əmɩnyi. ŋuɽun ŋun ŋiŋir ŋeḏi yecu kɩrisṯo ŋulinu kani a liji əmɩnyi yecu gwe

³⁰ na yecu mape ŋuɽuna ŋutu ŋun ŋiro kaja ŋun ŋɩbuḏo gi jei ganu jeḏi calɩmis juŋun, ŋun ŋate ŋulinu kɩḏam keno no;

³¹ namɩni ŋeno ŋulinu kani nyəmɩnyi yecu gwiro kɩrisṯo gwun gwiro ŋaɽe ŋeḏi elo; na ḏa nyalməmɩnyi nyaləṯi ḏɩmiḏa jiri je juŋun.