yuwana 2 - ŋuɽun ŋun ŋiya ŋun ŋikaiilo elo 1966

asa 2 ḏaga ḏun ḏijo kana

¹ na gi lamon lun laduji loro ṯəɽɩl ḏaga ḏijo kamɩrɩgen yun yan kana yeḏi jalil, na nana gweḏi yecu gwijo ŋɩnəwei.

² na yecuŋa calɩmis je juŋun nalorniḏe dino kɩmuri ge ḏaga.

³ gwune na ŋau ŋeḏi jaɽe jun jiro gi ḏuɽuṯ ete, na nana gweḏi yecu uməḏɩjo nueicɩno, luŋa late ləṯi ŋau ŋeḏi jaɽe jun jiro gi ḏuɽuṯ no.

⁴ na yecu eicɩno, nana, ŋa gwar i gwada? sa jinyi jore jate jɩmila no.

⁵ na nana gwuŋun eico jaḏama no, ŋun ŋajiŋeico nyaŋəjico.

⁶ na niḏi nijoga nyəɽɩl nun niro nyɩdol nun naṯɩro japiya ganu kwoɽo i nyəɽɩl, gi gwune ŋuɽun ŋijo ŋeḏi liju ŋe ḏuwona.

⁷ nal yecu eicɩno, enyejil ŋau gi niḏi, nalenyeji uro kanyin.

⁸ nuleicɩno, kɩrḏɩllo nyalapijo gwelɩnya gweḏi gɩmuri. nallape.

⁹ gwune na gwele gweḏi gɩmuri lɩŋaico ŋau ŋun ŋimɩdinu ŋau ŋeḏi jaɽe jun jiro gi ḏuɽuṯ, namɩni gwate gwilɩŋiḏi ŋəri ŋɩwiḏi ne no, namɩni jaḏam jun jikɩrḏi ŋau jilɩŋiḏi, na gwele gweḏi gɩmuri orniḏe gwiji gwe ḏaga,

¹⁰ nueicɩno, liji wei ligelo ŋau ŋeḏi jaɽe jun jiro gi ḏuɽuṯ ŋun ŋiŋir gwerre, na ḏa ŋɩmaliyu ŋutu na ŋaɽ ŋaligele ŋun ŋaicɩwa, namɩni ŋa madɩme ŋau ŋeḏi jaɽe jun jiro gi ḏuɽuṯ ŋun ŋiŋir bucu kəbe gwunne.

¹¹ ŋuɽun ŋeno ŋun ŋɩbuḏo ŋiro ŋun ŋiro lɽa ŋun ŋapɩlo yecu kana gweḏi jalil nuaŋiḏi ḏoɽeḏa ḏuŋun; na calɩmis juŋun əminyi.

¹² gwune na ŋuɽun ŋeno ete nugwulo kabranaum, ŋu na nana gwuŋun na lɩmegin na calɩmis juŋun, naljiga ŋɩnəwei ŋwamon ŋwouwɩrio.

ŋu gwudi ŋuɽuna ŋun ŋɩki kwu dunu gweḏi elo gwun gwubuḏo

¹³ na gɩmuri ge ḏouwɩrico geḏi liju gijo giṯo, na yecu abo urucəlim.

¹⁴ nubuje liji kwu dunu gweḏi elo gwun gwubuḏo lun laṯeḏɩla nyɩḏrio na joŋol na jɩɽiḏir, na liji lijoga lun laṯɩbi əlŋɩrucə ganu,

¹⁵ gwune nuukɩɽe laicala car je jun jɩtijɩti, nuirio joŋolia wei na nyɩḏri kwu dunu gweḏi elo gwun gwubuḏo. nudurce əlgɩrucə ga yun yaṯɩlbi ganu nuwɩrli darabesa galo.

¹⁶ nuleico lun liḏɩli jɩɽiḏira no, abɩril ŋɩdio ŋeno ŋɩne; aṯanyadujia duno gweḏi baba gwinyi dunu gwe ḏeḏila no.

¹⁷ na calɩmis juŋun aḏɩŋane gi gwune ŋulinu, ḏugwor ḏinyi ḏiɽijo ŋuɽuna ganu ŋeḏi dunu gwuŋa.

¹⁸ na liju wɩrlijo ŋuɽuna naleicɩno, ŋa jwar gwijaŋijo ḏəŋinio aŋe gi gwune apa ŋɩru ŋeno?

¹⁹ nal yecu wɩrlijo ŋuɽuna nuleicɩno, kil duno kweno gweḏi elo gwun gwubuḏo, na ŋwamon ṯəɽɩl nyi gwidiɽi.

²⁰ na liju arno, dunu kweno gwuṯinu jɩḏilio ḏuɽi kwoɽo na nyəɽɩl, namɩni ŋa narno gwediɽi ŋwamon ṯəɽɩl ye?

²¹ namɩni ŋu gwuməḏəṯi kwu dunu gweḏi elo gwun gwubuḏo gwun gwiro aŋɩnu yuŋun.

²² gwune nudiɽi gi ḏaiya na calɩmis juŋun aḏɩŋane ŋuɽuna ŋeno ŋun ŋuməḏɩjulɩlo; naləmɩnyi ŋuɽuna ŋeḏi gɩḏam geḏi elo na ŋun ŋuməḏɩjilɩlo yecu.

²³ na gi gwune ju urucəlim kɩmuri ge ḏouwɩrico naləmɩnyi lutu jiri je juŋun gwune nalaŋu ḏəŋinio ḏun ḏigelu.

²⁴ namɩni yecu gwate gwəmɩnyu gwagele gwula gwuŋun lagin no gi gwune gwilɩŋiḏi liji wei.

²⁵ na gwate gwubunyu gwiji gwete gwəteije ga gwan gwiji no, gi gwune gwilɩŋiḏi ŋuɽuna ŋun ŋijo kwei.