yuwana 19 - ŋuɽun ŋun ŋiya ŋun ŋikaiilo elo 1966

asa 19 liju lidijo bilaṯusŋ ganu

¹ na bilaṯus ape yecuŋ nanupi;

² na ajana ɽenyo jugi gi laḏe nalgaki gi lɽa elo luŋun, nalgaki giria gun gure gumɩno ganu.

³ naṯɩlwila lugwun, naṯɩleicɩno, ŋa gwiŋir ŋa gwele gweḏi liju a? naṯɩlpi gi jei ganu di de.

⁴ na bilaṯus du mɩna kɩluḏo nuleicɩno, eʼe nyi gwo gwidijeije kani nyalɩŋe nyi gwate manbuje ŋuɽuna ŋədi lugwun ŋun ŋɩki no.

⁵ na dino na yecu du kɩluḏo na ŋu gwukanu jugi jun jɩɽeḏɩnu gi laḏe na giria gun gure gumɩno ganu. nal bilaṯus eicɩno, eʼe gwiji gwiro kweno.

⁶ gwune na jɩsis jun jɩbuḏo na jaḏam aŋu, naləri gwula naleicɩno, ɽinyɩḏɩl, ɽinyɩḏɩl gi luɽi lun lɩmalɩḏo ganu. nal bilaṯus eicɩno, apɩl nyaŋa nyaɽinye gi luɽi lun lɩmaliḏo ganu gi gwune nyi gwate manbuje ŋuɽuna ŋədi lugwun ŋun ŋɩki no.

⁷ na liju wɩrlijo ŋuɽuna naleicɩno, anəṯi ŋuɽuna, na ŋuɽun ŋe ŋeno arram ŋu gwai, gi gwune gwiduji gwula gwuŋun ŋaɽe ŋeḏi elo.

⁸ gwune na bilaṯus diŋɩni ŋuɽuna ŋeno, nuḏonyene gworki.

⁹ nuəḏi mɩna kalo geḏi mudir nueico yecuŋ no, ŋa gweḏi ne gwiro? namɩni nate nan yecu wɩrlijo ŋuɽuna no.

¹⁰ na bilaṯus uməḏɩjo nueicɩno, ŋa gwate gwinyuməḏɩjo no? ŋa gwate gwilɩŋiḏi nyi gwəti ŋelɩnya gwaŋaɽinye gi luɽi lun lɩmalɩḏo ganu na nyi gwəṯi ŋelɩnya nyi gwaŋakədə ga na?

¹¹ na yecu wɩrlijo ŋuɽuna nueicɩno, ŋa gwate gwəṯi ŋelɩnya lugwi no ḏa ŋate ŋiḏəḏaŋalo kanyin no. na ŋiro dino ŋu gwun gwiḏəḏɩnyi ŋaŋu gwəṯi ŋuɽuna ŋun ŋɩkeno.

¹² na bilaṯus bunyi gwikədə ga namɩni liju laṯəri gwula naleicɩno, ḏa ŋa makədə gwiji ga kweno, ŋa gwate gwiro meḏin gweḏi gesar no, gwiji gwun gwaṯɩḏuji gwula gwuŋun gwele nuar gwape ŋelɩnya ŋeḏi gesar.

¹³ gwune na bilaṯus diŋɩni ŋuɽuna ŋeno, nudi yecuŋ ki nujiga kɩḏoɽ ge ḏakɩmiḏa kalo gun gan bulaṯ namɩni lɩbrani gaṯɩleico jubaṯa.

¹⁴ na kaja kono giro gun gigelɩlŋe ŋɩdɩo muma ŋeḏi gɩmuri ge ḏouwɩrico, na galo giro anyino ganu, nueico liju no, eʼe gwelɩnya gwalo.

¹⁵ naləri gwula naleicɩno, apɩl, apɩl, nyaɽinye gi luɽi lun lɩmalɩḏo ganu. nal bilaṯus eicɩno, nyi gwaɽinye gwelɩnya gwalo a? naleicɩno, anate nəṯi gwelɩnya no, gesar gwiro gwetɩdo.

¹⁶ nulɩḏəḏo gwalɽinye gi luɽi lun lɩmalɩḏo ganu. nalape yecuŋ nalgwulo.

diɽinyɩḏa ḏeḏi yecu gi luɽi lun lɩmalɩḏo ganu

¹⁷ nutu nuape luɽi luŋun lun lɩmalɩḏo ganu, lalwele kalo gun gan galo geḏi gwunə, na gaṯɩl lɩbrani eico, juljuṯa.

¹⁸ na ŋɩnəwei nalɽinye lijiŋale liro kaja lɩttən ŋwuɽi ŋwun ŋwɩmalɩḏo ganu, na luŋa nalɩje ŋwumere, na yecu je kɩlɩgi ganu.

¹⁹ na bilaṯus uli ŋuɽuna nulgele gi luɽi elo lun lɩmalɩḏo ganu, na ŋulinu, yecu gweḏi nasɩra, gwele gweḏi liju.

²⁰ na liju lutu əgɩri ŋuɽuna ŋeno, gi gwune galo gun giɽinyɩḏɩne yecuŋ go gɩṯo kamɩrɩgen, na ŋuɽun ŋeno ŋulinu ŋuɽun ŋeḏi lɩbrani, na ŋeḏi liji leḏi rumiya, na ŋeḏi ligrigi

²¹ na jɩsis jun jɩbuḏo jeḏi liju naleico bilaṯusŋ no, ŋa gwo gwuli, gwele gweḏi liju, ŋamɩni uli, ŋu gwarno, nyi gwiro gwele gweḏi liju.

²² nal bilaṯus wɩrlijo ŋuɽuna nuleicɩno, ŋun ŋimiluli, ŋimulini.

²³ gwune na ajana ɽinye yecuŋ nalape jiria juŋun nalɩkenyeḏe ganu luŋa gwoɽo, nalape dino giria gun gola gikədɩnu gate gukɩɽinu ŋwumeria no.

²⁴ na dino naluməḏəṯe laginŋu ŋɩmaga nalarno, ilouwɩrico ilwawalaḏa ganu no, ilgimɩnmɩɽi gwumara kani ilaŋu əḏi gwiro gwar gwape, kani a ŋuɽun ṯɩmi ŋeḏi gɩḏam geḏi elo ŋun ŋarno, nalkenyɩḏiḏi jiria jinyi ganu ŋɩmaga nalmɩɽi gwumara giria ge ginyi gun gola.

²⁵ na ajana yiro yikaḏo ŋɩdio ŋeno. na nana gweḏi yecu, na megin gweḏi nana gwuŋun gwun gwan mariam, gwun gwiro gwa gweḏi kuluba, na mariam majdaliya, nalḏuḏɩni ga gi luɽi lun lɩmalɩḏo ganu leḏi yecu.

²⁶ na yecu aŋu nanaŋ gwuŋun, na ṯalɩmis ḏun ḏaṯuəmɩnyi lɩḏuḏɩnu ga, nueico nanaŋ gwuŋun no, nana, eʼe ŋaɽe ŋuŋa.

²⁷ nueico ṯalɩmis ḏuŋun no, eʼe nanaŋ gwuŋa. na uro kaja kono ṯalɩmis ṯeno apa dunu lugwun.

ḏaiya ḏeḏi yecu

²⁸ na ŋɩno gɩdo na yecu lɩŋe ŋɩdio wei ŋɩmaṯɩmi wɽi, kani a ŋuɽun ṯɩmi ŋeḏi gɩḏam geḏi elo nuarno, ouḏo yo yiṯiŋi.

²⁹ na gwaŋ gwijo gwete gwenyeḏo ŋau ŋiɽi ŋan kal, nalenyeji sawinja jun jɩməṯi ŋau, nuləḏɩje gi jɩwɩra, nulgele yecuŋ gi linyi luŋun.

³⁰ na gwune na yecu ape kal nuarno, ŋɩməṯɩmi wɽi; nuriḏi lɽa luŋun nukuwa gwuɽɩwə gwuŋun.

ḏɩkwoḏa ḏeḏi ŋiɽe na ḏɩkwura

³¹ na gi gwune lamon liro le ḏigela ŋɩdio ŋe sabiṯ muma, na gi gwune jiŋɩno jate jaje ŋwuɽi ŋwun ŋwɩmalɩḏo ganu gi lamon le sabiṯ no, gi gwune lamon le sabiṯ leno liro lamon le lɩbuḏo, na lju ɽoṯəḏɩjo bilaṯusŋ ŋwulakɩra ŋwara ganu ki aləbɩri jiŋɩno.

³² na ajana wila nalakɩra ŋwara ganu ŋweḏi gwun gwiro lɽa, na gɩdo ŋweḏi gwun gwiro kaja lun lɩɽinyɩḏɩlo yecuŋale ŋwuɽi ŋwun ŋwɩmalɩḏo ganu,

³³ namɩni gwune nalwila ḏi yecu nate nalakɩra ŋwara ŋwuŋun ganu no gi gwune ŋumai,

³⁴ namɩni gwete kajana nuḏuge lɩmeria ŋire ŋe, na cou nuiro ŋuwəno na ŋau.

³⁵ na ŋu gwun gwaŋəḏi nuteije ga, na ḏɩteijo ḏuŋun ga ḏiro gwerkwe, na ŋu gwilɩŋiḏi gwuməḏi gwerkwe kani nyəmɩnyi nyaŋa dino.

³⁶ na ŋuɽun ŋeno ŋɩmila kani a ŋuɽun ṯɩmi ŋeḏi gɩḏam geḏi elo ŋun ŋarno, luya luŋun late lanakɩraḏe ganu no.

³⁷ na ŋuɽun ŋiro kaja ŋeḏi gɩḏam geḏi elo ŋun ŋarno, luŋa gwaniaŋalaḏe gwun gwiḏugo.

³⁸ na ŋɩno gɩdo na yusib gweḏi amɩrɩgen yun yan rama, gwun gwiro ṯalɩmis ḏeḏi yecu, namɩni nyɩkwom gi gwune nuḏonye liju, nuɽoṯəḏɩjo bilaṯusŋ gwar gwape aŋɩna yeḏi yecu, na bilaṯus ouwɩrico nuape. nalwele nalape aŋɩna yeḏi yecu.

³⁹ na nikudimus wila dino gwun gwuwiḏi ḏi yecu gwerre gilio, na ŋu gwapo ŋɩdio ŋun giro ŋɩḏini ŋan murr na auḏin, ŋaro gi rotl ḏuɽi kwoɽoṯəɽɩ na ṯoḏɩne.

⁴⁰ nalape aŋɩna yeḏi yecu, nalmɩɽi nanu jiria je jun jɩmɩde ganu na ŋɩdi ŋe ŋun ŋiro ŋɩḏini, ŋiro gi ŋuɽun ŋeḏi liju ŋe ḏɩkwurno.

⁴¹ na kalo kono giɽinyɩḏɩne gi luɽi lun lɩmalɩḏo ganu gəṯi jɩneina, na gi jɩneina ceno gil gijo giya gate gɩmanigele gwiji ganu gwerre no.

⁴² na ŋɩnəwei nangele yecuŋ ganu gi gwune gwiro lamon le ḏigela ŋɩdio muma ŋe sabiṯ leḏi liju; na gi gwune gil gijo gɩṯo.