yuwana 18 - ŋuɽun ŋun ŋiya ŋun ŋikaiilo elo 1966

asa 18 yecu malməṯo wɽi

¹ na yecu umə ŋuɽuna ŋeno, naldu calɩmis je juŋun nalmuri kwoi gwun gwan keradun, kalo gun gijo jɩneina nalinəḏi ganu ŋu na calɩmis juŋun.

² na yauḏa dino gwun gwiḏəḏulɩlo gwilɩŋiḏi gala keno, gi gwune yecuŋa laṯaɽuwaḏa ldu ŋɩnəwei ŋwamon ganu ŋwutu calɩmis je juŋun.

³ na yauḏa gwuloḏa ajana na jaḏam jeḏi jɩsis jun jɩbuḏo na lɩbarɩsi, na lɩwiḏi ŋɩnəwei ŋwambə ŋwe na igo ye na ŋɩdi ŋe ŋe ḏɩrra.

⁴ na yecu gwilɩŋiḏi ŋuɽuna wei ŋun ŋar ŋila lugwun, nudu nuleicɩno, əḏi gwiro gwubunyanya?

⁵ nalwɩrlijo ŋuɽuna naleicɩno, yecu gweḏi nasɩra. nal yecu eicɩno, nyi gwiro. na yauḏa gwun gwiḏəḏulɩlo gwuḏuḏɩnɩlle dino.

⁶ na gwune nuleicɩno, nyi gwiro, nalkwɩlane duɽo de nalaici ga kwɩnyəm.

⁷ nuaɽu nulɽoṯəḏɩjo mɩna nuleicɩno, əḏi gwiro gwubunyanya? naleicɩno, yecu gweḏi nasɩra.

⁸ nal yecu wɩrlijo ŋuɽuna nuleicɩno, nyi gwuməḏɩjaje, nyi gwiro. ḏa nyalmar lɩbunyiŋi ouwɩricɩlo leno alwele.

⁹ kani alṯɩmi ŋuɽuna ŋun ŋəruŋe ŋun ŋarno, gi liji leno lun lɩḏəḏɩnyilo aṯɩndujia gwetɩdo no.

¹⁰ na ŋiro dino simian buṯrus gwun gwəṯi kɩwiḏio, nuwala numɩɽi wainya gweḏi gwele gweḏi jɩsis nuɽə gəni galo ge ḏiŋir. na wainy kwono gwan malkus.

¹¹ na yecu eici buṯrusŋ no, əḏɩjo kɩwiḏio guŋa kəru ganu. kɩɽudo gun gɩḏəḏɩnyi baba ginyu, gate ginyu na?

¹² na ajana, na ḏabɩṯ na jaḏam jeḏi liju nalməṯo yecuŋ, nalgaki

¹³ nalgwuloḏa ḏi annan gwerre, gi gwune gwiro gwunən gweḏi kaiyaba gwun gwiro gwele gweḏi jɩsis kɩḏilio kono.

¹⁴ na kaiyaba gwiro gwun gwuməḏəṯɩl liju le, nuarno, gwiŋir ḏa gwiji gwete mai gwan liji.

ḏiḏonyɩḏa ḏeḏi buṯrus yecuŋ

¹⁵ na simian buṯrus na ṯalɩmis ḏun ḏiro kaja nalgwujane yecuŋ. na gwele gweḏi jɩsis gwilɩŋiḏi ṯalɩmis ṯeno na ṯalɩmis əḏi yecuŋale gi ḏɩgara ganu ḏeḏi gwele gweḏi jɩsis.

¹⁶ namɩni buṯrus gwuḏuḏɩnu kouwɩr kɩluḏo. na dino na ṯalɩmis duḏə ḏun ḏiro kaja ḏun ḏilɩŋiḏi gwele gweḏi jɩsis, nuuməḏijo ŋeria ŋun ŋaṯɩdɩme ouwɩr, nuəḏɩje buṯrusŋ.

¹⁷ na ŋera ŋun ŋaṯɩdɩme ouwɩr nueico buṯrusŋ no, ŋa gwiro ṯalɩmis ḏeḏi gwiji kweno ḏino a? nueicɩno, nyi gwate gwiro no.

¹⁸ na lɩwainy na jaḏam nalgele igo ga yun yiro ŋwura nalḏuḏɩnəḏelo naleneje gi gwune galo gɩnyidi. na buṯrus gwuḏuḏɩnəḏɩlelo gwenejo.

¹⁹ na gwele gweḏi jɩsis ɽoṯəḏɩjo yecuŋ gwan calɩmis juŋun na ḏalɩmia ḏuŋun.

²⁰ na yecu wɩrlijo ŋuɽuna nueicɩno, nyi gwuməḏi gi jei ganu jeḏi liji leḏi kɩḏilio naṯialɩmiḏe ŋwamon wei kwu dunu gweḏi elo na kwu dunu gweḏi elo gwun gwubuḏo, kalo gun gaṯɩn liju aɽuwaḏa ldu bubruṯ, na nyi gwate gwatɩnumə ŋuɽuna ŋəḏi nyɩkwom no.

²¹ gwudaro gəko aṯɩnyilɽoṯəḏɩjo? ɽoṯəḏɩjil liji lun lɩḏiginu gɩrɩa giro gun ŋuməḏɩjɩlo, luga ŋilɩŋiḏɩlo ŋɩrṯa ŋiro ŋun ŋuməḏilo.

²² na gwune nuumə dino, gwete gweḏi jaḏam gwun gwuḏuḏɩnu ga numɩɽi yecuŋ gi jei ganu ḏi ḏe nueicɩno, ŋa wɩrlijo gwelɩnya gweḏi jɩsis ŋuɽuna dino a?

²³ na yecu wɩrlijo ŋuɽuna nueicɩno, ḏa nyi mumə ŋuɽuna ŋɩki teijo ga, namɩni ḏa ŋɩmiŋir namɩni gwudaro gəko ŋɩnyimɩɽi?

²⁴ na annan nugaki nuwəḏɩjo kaiyabaŋ gwun gwiro gwele gweḏi jɩsis.

²⁵ na simian buṯrus gwuḏuḏɩnəḏelo gwenejo. naleicɩno, ŋa gwiro ṯalɩmis ḏuŋun dino a? nudonye nuarno, nyi gwate gwiro no.

²⁶ na wainy gwete gweḏi gwele gweḏi jɩsis gwun gwiro əriḏ yeḏi wainy gwun gwuɽəḏi buṯrus gəni ga, nuarno, nyi gwate gwaŋəḏaŋa luŋaŋale gi jɩneina ganu na?

²⁷ na buṯrus aɽu nudonye mɩna, na cou na lɩgwugɩɽe əri gwula.

yecu gwuḏuḏɩnu gi jei ganu jeḏi bilaṯus gwun gwiro mudir gwiro gwiji gweḏi rumiya

²⁸ naldu ḏi kaiyaba nalgwuloḏa yecuŋ kalo geḏi mudir, na galo giro mimmi gilio, namɩni luŋa nate naləḏi kalo geḏi mudir no late lɩbunyu laro ŋɩrleḏ no, gi gwune lar laʼe gɩmuri ge ḏouwɩrico.

²⁹ na bilaṯus du lagin nuarno, ŋɩrṯa ŋiro ŋun ŋicɩgianyaŋe gwiji kweno?

³⁰ nalwɩrlijo ŋuɽuna naleicɩno, ḏa ŋu gwate gwiro gwiji gwɩki no, anate gwaŋanagwuloḏeta lugwuŋa no.

³¹ nal bilaṯus eicɩno, apɩl nyaŋa nyakɩmi ŋuɽun ŋalo. na liju arno, anate nəṯi ŋelɩnya gwananɽinye gwetɩdo no.

³² kani a ŋuɽun ŋeḏi yecu ṯɩmi ŋun ŋəruŋeno gwune nuaŋiḏi ḏaiya ḏuŋun ḏar ḏaro galakwe.

³³ na bilaṯus əḏi mɩna kalo geḏi mudir nuorniḏe yecuŋ nueicɩno, ŋa gwiro gwele gweḏi liju a?

³⁴ na yecu wɩrlijo ŋuɽuna nueicɩno, ŋa gwuməḏi ŋuɽuna ŋeno kwulo gwuŋa, i liji liro kaja luməḏɩjaŋa ŋan nyi a?

³⁵ na bilaṯus wɩrlijo ŋuɽuna nueicɩno, nyi gwiro gwiju a? liji leḏi amɩrɩgen yuŋa na jɩsis jun jɩbuḏo ligwuloḏəṯaŋa lugwi, ŋɩrṯa ŋiro ŋapalo?

³⁶ na yecu wɩrlijo ŋuɽuna nueicɩno, ŋele ŋinyi ŋədu ŋeḏi gɩḏilio keno no, ḏa ŋele ŋinyi ŋiro ŋeḏi gɩḏilio keno jaḏam jinyi jaŋarre, kani nyate nyɩḏəḏini liju no, namɩni ŋele ŋinyi ŋədu ŋeḏi ŋɩne no.

³⁷ na bilaṯus eicɩno, na dino ŋa gwiro gwele a? na yecu wɩrlijo ŋuɽuna nueicɩno, ŋa gwarne nyi gwiro gwele, na ŋuɽun ŋeno ŋilɩŋanine na ŋuɽun ŋeno niŋiwila kɩḏilio ŋilteije ga ŋuɽun ŋe ŋun ŋiro gwerkwe. wei lun leḏi ŋuɽun ŋun ŋiro gwerkwe laṯɩḏiŋɩni ŋwal ŋwinyi.

³⁸ na bilaṯus eicɩno, ŋuɽun ŋun ŋiro gwerkwe ŋɩrṯa? gwune nuumə dino nudu mɩna gi liju nuleicɩno, nyi gwate manbuje ŋuɽuna ŋədi lugwun ŋun ŋɩki no;

³⁹ namɩni nya ləṯi ŋuɽuna ŋete ŋun ŋaṯajilɩŋkədəḏɩjo ga gwete kɩmuri ge ḏouwɩrico. nya ləmɩnyu nyalarno nyi gwajikədəḏɩjo gwelɩnya gweḏi liju ga a?

⁴⁰ naləri gwula luŋa wei naleicɩno, gwiji gwədu kweno no, namɩni barabas gwiro. na barabas gwiro gwɩdigin.