yuwana 17 - ŋuɽun ŋun ŋiya ŋun ŋikaiilo elo 1966

asa 17 ḏuməḏɩjo eloŋu ḏeḏi yecu

¹ na yecu umə ŋuɽuna ŋeno ki nuŋalaḏe kanyin, nuarno, baba gwi, sa jɩmila wɽi; buḏi ŋaɽe ŋuŋa kani ŋwa ŋaɽe ŋuŋa ŋwaŋabuḏi.

² ŋiro gi gwune ŋiḏəḏi ŋelɩnya gi liji wei nulḏəḏə ḏɩmiḏa gi gɩḏilio wei lun lɩḏəḏəlo.

³ na ṯeno ḏiro ḏɩmiḏa gi gɩḏilio kani aŋalɩŋe gwun gwiro elo gwetɩdo gwun gwiro gwerkwe, na yecu kɩrisṯo gwun gwuwəjo.

⁴ nyi gwaŋabuḏi kɩḏilio; na ŋɩru ŋun ŋiḏəḏɩnyilo ŋilape ŋilṯɩmi wɽi.

⁵ na gwunnɩno buḏɩŋi ŋa gwe, baba gwi, ḏoɽeḏa ḏe ḏun ḏəṯi lugwuŋa gwerre ganu gɩḏilio gate gɩmagelini no.

⁶ nyi maŋiḏi jiri juŋa gi liji lun lɩḏəḏɩnyilo kɩḏilio, luŋa liro ki nuŋwilḏəḏə, na lɩmaḏɩme ŋuɽuna ŋuŋa.

⁷ na gwunnɩno nallɩŋe ŋɩdio wei ŋun ŋiḏəḏɩnyilo ŋuŋa ŋiro;

⁸ gi gwune ŋuɽun ŋun ŋiḏəḏɩnyilo ŋɩmilɩḏəḏə; na luŋa ŋɩmalɩməṯo nallɩŋe muma nyi gwuduḏi lugwuŋa, naləmɩnyi nalarno ŋa gwuwəjɩŋi.

⁹ nyi gwuməḏɩjaga gwan luŋa; nyi gwate gwuməḏɩjaŋa gwan gɩḏilio no, namɩni gwan luŋa lun lɩḏəḏɩnyilo gi gwune luŋa liro;

¹⁰ na wei ŋun ŋəṯilo ŋuŋa ŋiro, na wei ŋun ŋəṯəlo ŋinyi ŋiro, na nyi mabuḏɩni lagin.

¹¹ na gwunnɩno nyi gwate kɩḏilio no, namɩni luŋa lo kɩḏilio, namɩni nyi gwila lugwuŋa. ŋa baba gwun gwɩpiḏo pɽul, dɩmiḏɩlo jiri je juŋa lun lɩḏəḏɩnyilo, alro letido gi gwune alaŋa.

¹² gwune lijanale laṯildɩme jiri je juŋa lun lɩḏəḏɩnyilo nildɩme ḏiḏir kəbe gwate manḏuḏe gwetido no, namɩni ŋaɽe ŋe ḏakɩmino ḏeḏi ḏaiya kani a ŋuɽun ŋeḏi gɩḏam geḏi elo ṯɩmini.

¹³ namɩni gwunnɩno nyi gwila lugwuŋa, na nyi gwumə ŋuɽuna ŋeno kɩḏilio kani alenyeḏe ḏidila ganu ḏinyi.

¹⁴ na nyi lɩmilḏəḏə ŋuɽuna ŋuŋa, nalmɩni liji leḏi gɩḏilio donye gi gwune lədu leḏi gɩḏilio no liro gi nyi. nyi gwədu gweḏi gɩḏilio no.

¹⁵ nyi gwate gwo gwuməḏɩjaŋa laləbɩri kɩḏilio no, namɩni laldɩme ŋuŋu gwun gwɩki.

¹⁶ luŋa lədu leḏi gɩḏilio no gi gwune nyi gwədu gweḏi gɩḏilio no.

¹⁷ piḏɩl pɽul ŋuɽun ŋuŋa ŋun ŋiro gwerkwe, ŋuɽun ŋuŋa ŋiro gwerkwe.

¹⁸ gi gwune ŋa wəjɩŋi kɩḏilio lɩmilwəjo dino kɩḏilio;

¹⁹ na nyi gwapiḏi gwula gwinyi pɽul gwan luŋa, kani luŋa dino alpiḏe pɽul ŋuɽun ŋun ŋiro gwerkwe.

²⁰ na nyi gwate gwo gwuməḏɩjaŋa gwan leno kuwei no, namɩni dino gwan luŋa lun ləmɩnyi ŋuɽun ŋe ŋagin.

²¹ kani a luŋa wei alro letɩdo, gi gwune ŋa baba gwaṯɩje lugwi na nyi gwaṯɩje lugwuŋa. alro luŋa dino letɩdo gi alaŋa, kani a liji leḏi gɩḏilio əmɩnyi alarno ŋa gwiro gwuwəjɩŋi.

²² na nyi lɩmilḏəḏə ḏoɽeḏa ḏun ḏɩḏəḏɩnyi kani alro letɩdo gi gwune alro letɩdo.

²³ nyi gwo lagin na ŋa gwo lugwi, kani alkani ldu letɩdo muma, na a gɩḏilio liŋe ŋa gwiro gwun gwuwəjɩŋi, naləmɩnyi gi gwune əmɩnyinyi.

²⁴ baba gwi, nyi gwubunyu lun lɩḏəḏɩnyilo analije kalo gun ginɩje, alaŋu ḏoɽeḏa ḏinyi ḏun ḏɩḏəḏɩnyi gi gwune ŋa gwəmɩnyinyi gwerre ganu gɩḏilio gate gɩmagelini no.

²⁵ baba gwun gwiŋir, liji leḏi gɩḏilio late lilɩŋiḏaŋa no, namɩni nyi gwilɩŋiḏaŋa, na leno lɩmalɩŋe ŋa gwiro gwun gwuwəjɩŋi,

²⁶ na nyi lɩmilaŋijo jiri juŋa, na jilaŋiḏi, kani a ḏəmɩnyo je lagin ḏun ḏaminyinyɩḏe, na nyi gwaje lagin.