yuwana 15 - ŋuɽun ŋun ŋiya ŋun ŋikaiilo elo 1966

asa 15 gwaɽe gwun gwiro gi ḏuɽuṯ na dɩrna

¹ nyi gwiro gwaɽe gwerkwe gwun gwiro gi ḏuɽuṯ, na baba gwinyi gwiro gwun gwaṯɩkade gi jaɽe.

² na dɩrna wei dun daṯɩje lugwi dun date daṯɩɽe no, duɽəga, na ḏɩrna wei dun ḏaṯiɽe dulmuje, kani ŋwuɽe nyaɽe nyutəno.

³ nya liŋir nanu gwunnɩno ŋuɽun ŋe ŋun ŋuməḏɩjejɩŋe.

⁴ jəḏəṯɩl lugwi, namɩni nyi gwajaḏaṯa lagalo. gwiro gi ḏɩrna ḏate ḏəṯi ŋɩma ḏaɽe kaja guŋun no, ḏa ḏate ḏimajaḏaṯa kwaɽe no, na nyaŋa dino ḏa nya late lɩmajaḏaṯa lugwi no.

⁵ nyi gwiro gwaɽe gwun gwiro gi ḏuɽuṯ; na nyaŋa liro ḏɩrna. gwun gwajaḏaṯa lugwi na nyi gwajaḏaṯa lugwun, kweno gwaṯɩɽe nyaɽe nyutu, gi gwune ḏa nyalmouɽuni lugwi nya late ləṯi ŋɩma lape ŋɩdio ŋədi no.

⁶ ḏa gwiji gwate majaḏaṯa lugwi no, ŋu gwawinini kaja gi ḏɩrna na gwuḏe; nalɩwəɽeice ldu nalɩgele kigo nalnuni.

⁷ ḏa nyalmajaḏaṯa lugwi, na ŋuɽun ŋinyi ŋajaḏaṯa lagalo, bunyil lugwi ŋɩdio ŋun ŋɩbunyanyalo ŋajilərrɩjo.

⁸ ḏa nyalmaṯɩɽe nyaɽe nyutu baba gwinyi mutəne ḏoɽeḏa ga, na dino nyalaro calɩmis jinyi.

⁹ gi gwune əmɩnyi baba gwi, na dino nyi gwajəmɩnyi. jəḏəṯɩl gi ḏəmɩnyo ḏinyi.

¹⁰ ḏa nyalmadɩme ŋuɽuna ŋinyi nyalajaḏaṯa gi ḏəmɩnyo ḏinyi, gwiro gi gwune nyi gwɩdɩmiḏi ŋuɽuna ŋeḏi baba gwinyi nijaḏaṯa gi ḏəmɩnyo ḏuŋun.

¹¹ nyi majuməḏɩjo ŋuɽuna ŋeno kani a ḏidila ganu ḏinyi je lagalo, na kani a ḏidila ganu ḏalo enyeḏe.

¹² ŋeno ŋiro ŋuɽun ŋinyi, nyaləmɩnyɩḏe lagaloŋu ŋɩmaga gi gwune əmɩnyeje.

¹³ gwiji gwate gwede gwəṯi ḏəmɩnyo ḏutəno kworo kwe ḏa gwete mai gwan lɩmeḏin no.

¹⁴ nyalaro lɩmaḏəri ḏa nyalmarre ŋuɽuna ŋun ŋuməḏɩjejɩŋe.

¹⁵ nyi gwate gwaɽeico lɩwainy mɩna gwunnɩno no, gi gwune wainy gwate gwilɩŋiḏi ŋuɽuna ŋun ŋapɩlo gwele gwuŋun no; namɩni nyi gwaɽeico lɩmaḏəri, gi gwune nyi majaŋijo ŋuɽuna wei ŋun ŋidiŋɩnɩlo ḏi baba gwinyi.

¹⁶ nyaŋa lədu liro lɩməṯɩnyi no, namɩni nyi gwiro gwun məṯaje na nyi gwajigɩḏi nyalwele nyalaɽe, na nyi məṯaje na nyi gwajigɩḏi kani a nyaɽe nyalo nyajaḏaṯa, na kani ŋuɽun wei ŋun ŋanyaŋɽoṯəḏɩjo babaŋ jiri je jinyi ŋajɩlḏəḏə.

¹⁷ nyi gwuməḏɩjaje ŋuɽuna ŋeno kani nyəmɩnyɩḏa lagaloŋu ŋɩmaga.

gɩḏilio na gwuɽɩwə gwun gwiro gwerkwe

¹⁸ ḏa gɩḏilio gɩmajidonye, nyamɩni lɩŋe gidonyiŋi gwerre gate gɩmajidonye no.

¹⁹ ḏa nya leḏi gɩḏilio liro, na ŋaŋal gɩḏilio əmɩnyi. namɩni gi gwune nyaŋa lədu leḏi gɩḏilio no, namɩni nyiməṯaje kɩḏilio na dino gɩḏilio gajidonye.

²⁰ aḏɩŋanɩl ŋuɽuna ŋun ŋuməḏɩjejɩlo, wainy gwate gwiro gwubuṯano kwele gwuŋun no. ḏa lɩmiŋinḏagɩɽini, na lajɩnḏagɩɽini dino; na ḏa lɩmadɩme ŋuɽuna ŋinyi, na ŋalɩdɩme ŋalo dino.

²¹ na ŋeno wei ŋajilərrɩjo gi jiri jinyi, gi gwune gwate gwilɩŋiḏɩlo gwun gwuwəjɩŋi no.

²² ḏa nyi gwate gwumila niluməḏɩjo no, late laŋəṯi ŋuɽuna ŋun ŋɩki no, namɩni gwunnɩno late ləṯi gwaŋ gwəkɩɽɩbə ŋuɽuna ŋagin ŋun ŋɩki no.

²³ gwun gwinyidonye gwadonye babaŋ gwinyi dino.

²⁴ na ḏa nyi gwate manduji ŋɩru kɩlɩgi ganu lagin ŋun ŋate ŋɩmani gwiji ape gwiro kaja no, late ləṯi ŋuɽuna ŋɩki no; namɩni gwunnɩno lɩmaŋu nalmɩnyidonye na baba gwinyi dino.

²⁵ namɩni kani a ŋuɽun ṯɩmi ŋun ŋulinu ŋuɽun ŋagin ŋun ŋigelijɩlo elo musaŋ, luŋa linyidonye jai ŋuɽun ŋate ŋədi no.

²⁶ namɩni gwune nuwila gwun gwaṯɩmoɽe ganu gwun gwajiwəḏɩjo ḏi baba, gwuɽɩwə gwun gwiro gwerkwe gwun gwəduḏa ḏi baba ŋu gwinyiteije ga;

²⁷ na nyilteijo ga nyaŋa dino gi gwune iljo uro gwerre.