yuwana 14 - ŋuɽun ŋun ŋiya ŋun ŋikaiilo elo 1966

asa 14 ṯaṯ ḏeḏi baba

¹ aṯaji dugwor mɩɽiḏo no. əmɩnyil eloŋu, nyiləmɩnyi dino.

² kalo geḏi baba gwi lɩdunu lo lutu, ḏa late lijo no nyi gwajuməḏɩjo, gwunnɩno nyi mele nyi gwajigelijo gala muma.

³ namɩni ḏa nyi mele nyi gwajigelijo gala muma, na nyi gwaje gwaɽuwa mɩna, na nyi gwajapa lugwi, na galo gun ginɩje gwanyanje dino.

⁴ na nyalalɩŋe gala gun ginwele na nyalalɩŋe ṯaṯ.

⁵ na ṯoma uməḏɩjo nueicɩno, gwele gwəri, anate analɩŋe gala gun gar ganwele no; namɩni galakwe anəṯi ŋɩma analɩŋe ṯaṯ?

⁶ na yecu eicɩno, nyi gwiro ṯaṯ, na ŋuɽun ŋun ŋiro gwerkwe, na ḏɩmiḏa. gwiji gwate gwun gwele ḏi baba gwi no, ḏa gwate gwumila lugwi no.

⁷ ḏa nya lilɩŋiḏɩnyi nanyalaŋalɩŋe babaŋ gwi dino, na uro gwunnɩnno gwanyalɩŋe; na gwaŋəḏanya.

⁸ na bilibus eicɩno, gwele gwəri, aŋijije babaŋ na ŋedaḏaṯo lagəri.

⁹ na yecu eicɩno, ilijo ŋwamon ŋwutu dino na ŋa gwate milɩŋe, bilibus na? gwun gwaŋəḏi na gwimaŋu babaŋ dino namɩni galakwe gəko na ŋarno, aŋɩjije babaŋ?

¹⁰ ŋa gwate gwəmɩnyu naŋarno nyi gwajaḏaṯa ḏi baba na baba gwajaḏaṯa lugwi na? ŋuɽun ŋun ŋaṯajiŋuməḏɩjo ŋate ŋaṯilumə ŋele ŋe ŋinyi no, namɩni baba gwun gwajaḏaṯa lugwi gwiro gwun gwaṯape ŋɩru ŋuŋun.

¹¹ əmɩnyil nyi gwajaḏaṯa ḏi baba na baba gwajaḏaṯa lugwi i nyəmɩnyi ŋuɽun ŋe ŋeḏi ŋɩru.

¹² gwerkwe, gwerkwe ganu, nyi gweiceijɩno, gwun gwəmɩnyi na ŋɩru ŋun ŋaṯilape ŋulape dino, na ŋu ŋape gworo gwubuṯano gi gwune nyi gwar gwele ḏi baba gwi.

¹³ na ŋuɽun wei ŋun ŋanyalɽoṯəḏɩjo jɩrɩ je jinyi ŋilarre, kani a ŋi ŋaɽe buḏi babaŋ.

¹⁴ ḏa manyaɽoṯəḏɩjo gwaŋ gwe gwədi jiri je jinyi na ŋilarre.

yecu gwuməḏɩjo calɩmis jal elo ḏəḏə gwuɽɩwə gwun gwɩpiḏo pɽul

¹⁵ ḏa nyalmɩnyiəmɩnyi nyamɩni dɩme ŋuɽuna ŋinyi;

¹⁶ na nyi gwaṯuməḏəṯɩjo babaŋu lagalo, na ŋu gwajiḏəḏə gwun gwaṯɩmoɽe ganu, gwun gwiro kaja gwaṯanyalijaḏaṯa gi gɩḏilio.

¹⁷ gwun gwiro gwuɽɩwə gweḏi ŋuɽun ŋun ŋiro gwerkwe gwun gwate gwəṯi ŋɩma gwa liji leḏi gɩḏilio əmɩnyi no, gi gwune gwate gwaŋəḏɩlo no, na gwate gwilɩŋiḏɩlo no. namɩni nyaŋa gwilɩŋiḏanya gɩ gwune aṯanyalijaḏaṯa na gwaṯɩje lagalo.

¹⁸ nyi gwate gwəjouwɩrico nya laro leḏol cucun no, nyi gwo gwuwiḏi lagalo.

¹⁹ ŋwamon ŋwouwɩrio na liji leḏi gɩḏilio late linyinaŋu minu no, namɩni nyaŋa nyalɩnyiaŋu, na gi gwune nyi məmɩḏe na nya ləmɩḏe dino.

²⁰ na gi lamon lono nalalɩŋe nyi gwo ḏi baba gwi, na nyaŋa lo lugwi, na nyi gwo lagalo.

²¹ gwun gwəṯi ŋuɽuna ŋinyi nuldɩme, gwiro gwun gwəmɩnyi; na gwun gwəmɩnyi na gwa baba gwi əmɩnyi, na nyi gwiəmɩnyi na nyi gwiaŋinijo.

²² na yauḏa uməḏɩjo gwun gwate gwan iskariyuṯi no, nueicɩno, gwele gwəri, galakwe ŋa gwijaŋinijo namɩni ate naŋinijo gɩḏilio no?

²³ na yecu wɩrlijo ŋuɽuna nueicɩno, na ḏa gwete mɩnyiəmɩnyi gwadɩme ŋɩɩɽuna ŋinyi, na gwa baba gwi əmɩnyi, na anila lugwun gwanalijaḏaṯa.

²⁴ na gwun gwate gwəmɩnyinyi no gwate gwadɩme ŋuɽuna ŋinyi no; na ŋuɽun ŋun ŋaṯanyaldiŋɩni lugwi ŋinyi ŋədu no namɩni ŋeḏi baba gwun gwuwəjɩŋi.

²⁵ na nyi gwuməḏɩjaje ŋuɽuna ŋeno gi gwune nyi gwijɩre lagalo;

²⁶ namɩni gwun gwaṯɩmoɽe ganu, gwun gwiro gwuɽɩwə gwun gwɩpiḏo pɽul, gwun gwaji baba wəḏɩjo jiri je jinyi, gwajalɩmi ŋɩdi wei na gwaṯajaḏɩŋani ŋuɽuna wei, ŋun ŋuməḏɩjejɩlo.

²⁷ ḏouwɩɽiḏa ḏajɩnwelijene; ḏouwɩɽiḏa ḏinyi ḏimajiḏəḏə; ḏate ḏiro gi ḏun ḏiḏəḏi gɩḏilio no namɩni ḏajiḏəḏə nyaŋa. aṯaji dugwor mɩɽiḏo no i nyaḏonyɩḏa no.

²⁸ nyalmaḏiŋɩni nyi gweiceijɩno, nyi gwawele namɩni nyi gwaɽuwa laglo. na ḏa nya ləmɩnyinyi nyaladile ganu gi gwune arne nyi gwele ḏi baba, gi gwune baba gwi gwubuṯano lugwi.

²⁹ na nyi gwuməḏɩjaje gwunnɩno ŋore ŋate ŋɩmila no, kəbe ḏa ŋɩmar ŋɩmila nyaləmɩnyi.

³⁰ ilate lar lumə gɩtten mɩna no, gi gwune gwele gweḏi gɩḏilio keno gwila. na gwate gwəṯi ŋuɽuna ŋədi lugwi no;

³¹ kani a gɩḏilio lɩŋe nyi gwəmɩnyu babaŋ, na gi gwune ḏəḏi baba ŋuɽuna na dino ŋilarre. diɽil, ilwele ŋɩnəwei.