yuwana 13 - ŋuɽun ŋun ŋiya ŋun ŋikaiilo elo 1966

asa 13 yecu gwuwei calɩmis ŋwara

¹ na gwerre gɩmuri ge ḏouwɩrico gate gɩmila no, na yecu gwilɩŋiḏi sa juŋun jɩmila jun jujiwalane kɩḏilio keno nuwele ḏi baba, gi gwune gwəmɩnyu liji luŋun lun lijo kɩḏilio, luləmɩnyi kəbe gi lamon leḏi gɩdo.

² gi gwune jil gi ḏiṯa gwune na iblis əḏɩjo ŋuɽuna gi ḏugwor ganu ḏeḏi yauḏa iskariyuṯi, gwun gwiro ŋaɽe ŋeḏi simian, gwar gwulɩḏəḏə,

³ na yecu gwilɩŋiḏi ŋu ma baba gele ŋɩdio wei gi di duŋun, na gwuwiḏi ḏi elo na gwaje gwaɽuwe ḏi elo.

⁴ na dino nudiɽo gi ḏiṯa, nuwal jiria juŋun ki nuape giria ge ḏimuja ŋau nukani gi dɩmi ganu;

⁵ nudoije ŋau kɩɽudo nuiḏeije ga gi ḏuweia calɩmis juŋun ŋwara nulmuje ŋau giria ge ge ḏimuja ŋau gun gikanu gi dɩmi ganu.

⁶ nuwila ḏi simian buṯrus, na buṯrus eicɩno, gwele gwəri, ŋa gwiro gwar gwowei ŋwara ŋwinyi a?

⁷ na yecu wɩrlijo ŋuɽuna nueicɩno, ate ŋalɩŋe gwunnɩno ŋun ŋar ŋilape no, namɩni ŋar ŋalɩŋe gɩdo.

⁸ na buṯrus eicɩno, ŋa gwate gwowei ŋwara ŋwinyi ḏuṯ no. na yecu wɩrlijo ŋuɽuna nueicɩno, ḏa nyi gwate maŋawei no, namɩni alate alaje kal gete no.

⁹ na simian buṯrus eiclɩno, gwele gwəri, ŋwara ŋwədu ŋwiro kuwei no namɩni di ḏinyi na lɽa dino.

¹⁰ na yecu eicɩno, gwun gwuwone gwate gwubunyu ḏuwona wei mɩna no namɩni ŋwara kuwei, na ŋu gwiŋir nanu wei; na nya liŋir nanu, namɩni nya late liŋir nanu wei no;

¹¹ gi gwune gwilɩŋiḏi gwiji gwun gwar gwalɩḏəḏə. na ŋiro dino nuarno, nya late liŋir nanu wei no.

¹² gwune nulwei ŋwara ŋwagin nukani jiria juŋun nuaɽu nujiga mɩna, nuleicɩno, nya lilɩŋiḏi nyi gwapaŋe lagalo a?

¹³ nyaŋa laṯɩyieico mualɩm na gwele, nyalarne muma, gi gwune nyi gwiro.

¹⁴ ḏa nyi gwun gwiro gwele na mualɩm mawei ŋwara ŋwalo, na arram nyaŋa dino aṯanyawei ŋwara ŋwalo ŋɩmaga.

¹⁵ gi gwune nyimajaŋijo ŋuɽuna kəbe ŋun ŋapine lagalo nanyanape dino nyaŋa.

¹⁶ gwerkwe, gwerkwe ganu, nyi gweiceijɩno, wainy gwate gwubuṯano kwele gwuŋun no, i gwete gwun gwuwəjɩnu gwubuṯano kworo gwun gwuwəju no.

¹⁷ da ŋɩmanyalɩŋe ŋeno nyalmore ḏa ŋɩmanyalape.

¹⁸ nyi gwate gwuməḏəṯi lagalo wei no. nyi lilɩŋiḏɩlo lun lɩməṯilo; namɩni kani alṯɩmi ŋuɽuna ŋeḏi gɩḏam geḏi elo, gwun gwanagwiʼe gia abuḏɩjo liḏɩgido luŋun elo.

¹⁹ na gwunnɩno nyi gwajuməḏɩjo ŋuɽuna gwerre ŋate ŋɩmila no, kani ḏa ŋɩmara ŋɩmila nyaləmɩnyi, nyi gwiro.

²⁰ gwerkwe, gwerkwe ganu, nyi gweiceijɩno, gwun gwəmɩnyi gwuməṯo gwun gwuwəjɩŋi gwinyiməṯo dino, na gwun gwinyiməṯo gwuməṯo gwun gwuwəjɩŋi dino.

yecu maŋiḏi gwuga

²¹ gwune na yecu umə ŋuɽuna ŋeno na ḏugwor ḏuŋun auce ganu, nuarno, gwerkwe, gwerkwe ganu, nyi gweiceijɩno, gwo gwete lagalo gwar gwilɩḏəḏə.

²² na calɩmis juŋun ŋalade kworo ŋɩmaga laginŋu gi gwune late lilɩŋiḏi əḏi gwiro gwuməḏu gwe no.

²³ na gwete gwiḏɩrəḏi yecuŋ gi jabba ganu, na gwiro ṯalɩmis ḏuŋun ḏun ḏaṯuəmɩnyi.

²⁴ na simian buṯrus uməḏɩjo ḏi ḏe, nueicɩno, ɽoṯəḏɩjo yecuŋ ədi gwiro gwun gwuməḏu gwe?

²⁵ na gwun gwiḏɩrəḏi yecuŋ gi jabba ganu nueicɩno, gwele gwəri, əḏi gwiro?

²⁶ na yecu wɩrlijo ŋuɽuna nueicɩno, ḏa nyi maṯiwaje gia gimiḏəḏə na ŋu gwiro. naṯuiwaje gia nuḏəḏə yauḏa iskariyuṯɩŋ, gwun gwiro ŋaɽe ŋeḏi simian.

²⁷ gwune nuape gia na seiṯan əḏi gi ḏugwor ganu ḏuŋun. na ŋiro dino na yecu eicɩno, ŋun ŋar ŋalape, apɩlo cou.

²⁸ namɩni gwate gwete lagin lun lijille gi ḏiṯa, manlɩŋe ŋɩrṯa ŋiro ŋun ŋuməḏulo no.

²⁹ na kworo arno, yauḏa gwiro gwun gwaṯɩdɩme gwurəḏo gweḏi əlgɩrucu na yecu arno, iḏili ŋɩdio ŋun ŋɩbunyɩlo ŋeḏi gɩmuri, i, nuarno ŋilɩḏəḏə liji lun late ləṯi ŋɩdio no.

³⁰ nuape gia nudu cou; na galo giro gilio.

ŋuɽun ŋun ŋiya ŋe ḏəmɩnyo

³¹ gwune nutu na yecu eicɩno, gwunnɩno ŋaɽe ŋeḏi liji ŋalbuḏi na ŋa elo buḏi ŋu gwe.

³² na ḏa elo mabuḏɩni ŋu gwe, na elo dino mubuḏi kwulo gwuŋun na ŋabuḏi cou.

³³ nyaɽe nyinyi, ilore lijoga ŋwamon ŋwouwɩrio kuwei. nya linyibunyi ŋiro gi gwune eici liju no, galo gun ginwele nya late ləṯi ŋɩma ganyanwila no, na nyi gweiceijɩne dino gwunnɩno.

³⁴ na nyi gwajiḏəḏə ŋuɽuna ŋun ŋiya, niarno, aṯanyəmɩnyi gworo; gi gwune əmɩnyejɩne, aṯanyəmɩnyi gworo nyaŋa ŋɩmaga dino.

³⁵ na ŋeno liji wei lalɩŋe nyalro calɩmis jinyi, ḏa nyalməṯi ḏaminyɩḏa ŋɩmaga laaaloŋu.

yecu gwuməḏi ŋuɽuna ŋan ḏidonyɩḏa ḏeḏi buṯrus yecuŋ gwerre ŋuɽun ŋate ŋɩmila no

³⁶ na simian buṯrus eicɩno, gwele gwəri, ga gwar gwene? na yecu wɩrlijo ŋuɽuna nueicɩno, gwunnɩno ŋa gwate gwəṯi ŋɩma ŋa gwigwujana kalo gun ginwele no, namɩni ŋa gwigwujana gi lamon lun laje lila.

³⁷ na buṯrus eicɩno, gwele gwəri, gwudaro gəko nate niəṯi ŋɩma aŋagwujana gwunnɩno no? nyi gwəmɩnyu nyi gwai gwan ŋa.

³⁸ na yecu wɩrlijo ŋuɽuna nueicɩno, ŋa gwəmɩnyu ŋa gwai gwan nyi a? gwerkwe, gwerkwe ganu, nyi gweicaŋano, lɩgwugɩɽe late ləri gwula no gwerre ŋa gwinyidonye ŋwamon ganu ṯəɽɩl.