yuwana 12 - ŋuɽun ŋun ŋiya ŋun ŋikaiilo elo 1966

asa 12 mariam gweḏi beṯiniya gwuwɩrṯi yecuŋ ŋwara ŋila ŋe

¹ na gwerre gɩmuri ge ḏouwɩrico gate gɩmete no ŋwamon nyəɽɩl, na yecu wila beṯiniya kalo gun gijɩn liasar gwun gwudiɽu gi ḏaiya.

² nalgico ŋɩnəwei ŋɩdio ŋe ḏiṯa garage, na marṯa gwijo gi ḏapa ŋɩru ŋe ḏiṯa, namɩni liasar gwiro gwete lagin gwun gwiṯɩlle.

³ na mariam ape ŋila ŋun ŋiro ŋɩḏini, ŋəṯi rotl gwetɩdo ŋutu jilɩnya, nuwɩrṯi ŋwara ŋweḏi yecu ki numuje ŋwara əɽu ye yuŋun, na dunu enyeḏe ŋɩḏini ŋe ŋun ŋiro ŋila ŋun ŋəmɩ.

⁴ na gwete gweḏi calɩmis gwun gwan yauḏa iskariyuṯi, gwun gwar gwuliḏəḏə alɽinye, arno,

⁵ gwudaro gəko na ŋila ŋeno ŋate ŋiḏɩlini jɩnei di nulḏəḏə liji lun late ləṯi ŋɩdio no?

⁶ nuar dino, gwədu gi gwune gwəmɩnyu liji lun late ləṯi ŋɩdio no, namɩni gi gwune gwiro gwuɽam na gwaṯɩḏɩme gwurəḏo geḏi əlgɩrucu naṯunəbɩri gworo nanu.

⁷ na yecu arno, ouwɩricil; gwuldɩme kəbe lamon leḏi ḏikwurno ḏinyi;

⁸ gi gwune nyalaṯɩje liji le lun late ləṯi ŋɩdio no ŋwamon wei, namɩni nyi ilate laṯɩje ŋwamon wei no.

⁹ na liju lutu lilɩŋiḏi ŋu gwo ŋɩnəwei, nalwila namɩni late lɩweləḏi ḏi yecu kuwei no, namɩni lar laŋəḏa liasarŋ dino gwun gwədiɽiŋu gi ḏaiya.

¹⁰ na jɩsis jun jɩbuḏo naluməḏəṯe nalarno, laɽinye liasarŋ dino,

¹¹ gi gwune gwan ŋu lutu lun liro liju laṯɩlwele naləmɩnyi yecuŋ.

ḏobena ḏeḏi yecu urucəlim ḏiḏamɩḏa ḏe

¹² na giləganu na liji diŋɩni lutu lun lɩweləḏi kɩmuri yecu gwo gwuwiḏi urucəlim,

¹³ nalapa ḏɩrna deḏi ṯamɩr naltu gwalobeḏe. na luŋa naṯɩləri gwula, ḏɩkədəḏɩnə ga, ḏɩbuḏia ḏaje kwele gweḏi isreiyil gwun gwuwiḏi jiri je jeḏi gwele gwun gwiro elo.

¹⁴ na yecu buje ŋəɽigə ŋun ŋoga nunabo elo gi gwune ŋulinu,

¹⁵ ŋaḏonyɩḏa ŋaɽe ŋun ŋiro gwa ŋeḏi amɩrɩgen yun yan siʼun no, eʼe gwelɩnya gwuŋa gwo gwuwiḏi gwijiga ŋəɽigo elo ŋun ŋoga.

¹⁶ na ŋuɽun ŋeno ŋate ŋilɩŋiḏɩlo calɩmis juŋun gwerre no, namɩni gwune na yecu əḏi gi ḏoɽeḏa ḏuŋun nalaḏɩŋane ŋuɽuna ŋeno ŋulinu ŋan ŋu na lɩgelijulo ŋɩdio ŋeno.

¹⁷ na liji lun lutu lun lijille naṯɩlteije ga nalarno ŋu gworniḏo liasarŋ kil nuḏiɽio gi ḏaiya.

¹⁸ na ŋuɽun ŋeno na liji tu gwalobeḏe gi gwune nalḏiŋɩni gwapo ŋuɽuna ŋeno ŋun ŋɩbuḏo.

¹⁹ na lɩbarɩsi uməḏəṯe laginŋu, nalarno, nyalaŋu nya late landuji gwaŋ gwədi no. eʼe gɩḏilio wei malgwujane.

ḏiɽoṯeḏa ḏeḏi ligrigi

²⁰ na kworo lun lɩmabo gi ḏorṯeḏa kɩmuri liro ligrigi.

²¹ na leno nalwila ḏi bilibus gweḏi beṯsaida kamɩrɩgen yun yan jalil, nalɽoṯəḏɩjo naleicɩno, gwele gwəri, anbunyu andɩrnaŋu yecuŋ.

²² na bilibus wila nuuməḏɩjo anḏarawusŋ; na anḏarawusŋa bilibus gwe nalwila ḏi yecu naluməḏɩjo.

²³ nalmɩni yecu wɩlijo ŋuɽuna nuleicɩno, sa jɩmila jun jaji ŋaɽe ŋeḏi liji buḏɩni.

²⁴ gwerkwe, gwerkwe ganu, nyi gweiceijɩno, ḏa lon late lɩmideḏe ga kwɩnyəm ki lɩmai no, numɩni nujiga letido; namɩni ḏa lɩmai lalɩŋeḏa nyaɽe nyutu.

²⁵ gwun gwəmɩnyu ḏɩmiḏa ḏuŋun ḏuḏuji, namɩni gwun gwadonye ḏɩmiḏa ḏuŋun kɩḏilio keno ḏudɩme gi ḏɩmiḏa gi gɩḏilio.

²⁶ ḏa gwiji gwate minyinəpijo ŋɩri ouwɩricil ŋigwujane, na galo gun ginɩje na ŋinəwei gaḏam ginyi gaje dino. ḏa gwete minyinəpijo ŋɩru, gwa baba gwinyi nəji.

²⁷ na gwunnɩno ḏugwor ḏinyi ḏo ḏouwci ganu na nyi gwar gwarau? baba, əbɩriŋi gi sa ceno. namɩni gwan ŋuɽun ŋeno niwila gi sa ceno.

²⁸ baba, buḏi jiri juŋa. na ŋwal gwulo kanyin, nalarno, jimilbuḏi na jaje jilbuḏi mina.

²⁹ na liji lun lutu lun lɩḏuḏɩnu ga naldiŋɩni nalamo gau giro gipinu ganu; na liro kaja arno, gwiji gweḏi kanyin gwiro gwun gwuməḏɩju.

³⁰ nal yecu wɩrlijo ŋuɽuna nuleicɩno, ŋuɽun ŋate ŋan nyi gəko na ŋwal gwulo no, namɩni ŋan nyaŋa.

³¹ gwunnɩno ḏakɩmiḏa ḏo ḏeḏi gɩḏilio keno; na gwunnɩno gwele gweḏi gɩḏilio keno gwirəḏɩni kɩluḏo.

³² na nyi, na ḏa nyi mabuḏɩni elo ŋɩne kwmyəm na nyi gwogwuloḏa liji lugwi wei.

³³ ŋu gwar dino kani ŋuaŋiḏi ḏaiya ḏuŋun ḏar ḏaro galakwe.

³⁴ na liji wɩrlijo ŋuɽuna naleicɩno, andiŋɩnu ŋuɽuna ŋun ŋigelijɩlo elo musaŋ ŋarno, kɩrisṯo gwajaḏaṯa gi gɩḏilio, namɩni galakwe na ŋarŋano, ŋaɽe ŋeḏi liji ŋaje ŋabuḏɩni elo? əḏi gwiro ŋaɽe ŋeḏi liji?

³⁵ nal yecu uməḏɩjo nuleicɩno, bure gwore gwijo lagalo ŋwamon ŋwouwɩrio, aṯanyawele gwune na bure je lagalo kani ate ŋwajɩn girɩm darane no; na gwun gwawele kirɩm gwate gwilɩŋiḏi gwuweləḏi ne no.

³⁶ gi gwune nya ləṯi bure, əmɩnyil bure gwe, kani nyaro nyaɽe nyeḏi bure. na yecu umə ŋuɽuna ŋeno ki nuwele nulɩbe.

ḏiməṯo ḏate yauḏia, namɩni calɩmis kworo jimaməṯi ŋuɽuna nyɩkwom

³⁷ naṯuape ŋuɽuna ŋutu ŋun ŋɩbuḏo gi jei ganu jagin nalmɩni ate nalgwəmɩnyi no,

³⁸ kani a ŋuɽun ṯɩmi ŋeḏi nebi gwun gwan isaia, ŋun ŋaruŋe no, gwele gwun gwiro elo, əḏi gwiro gwiməmɩnyi ŋuɽuna ŋəri? na ḏi ḏeḏi gwele gwun gwiro elo ḏɩmaŋini ḏi əḏi?

³⁹ ŋuɽun ŋeno late ləṯi ŋɩma ləmɩnyi no gi gwune isaia gwuməḏi mɩna,

⁴⁰ ŋu gwərimi jei ganu jagin, na gwabɩɽi dugwor dagin nanu kani ate aldaŋaga jei je no, nalɩŋe gi dugwor ganu dagin, nalaɽuwe na lilgele muma.

⁴¹ na isaia umə ŋuɽuna ŋeno gi gwune nuaŋu ḏoɽeḏa ḏuŋun nuumə ŋu gwe.

⁴² namɩni ŋadaṯi ŋeno nalgwəmɩnyi lutu lun liro lele namɩni gwan ŋuɽun ŋeḏi lɩbarɩsi nate naṯɩlgwiteije ga no, naṯɩldonye gi ləḏiḏio kwu dunu gweḏi elo;

⁴³ gi gwune ləmɩnyeno ḏɩbuḏia dedi liji gi ḏɩbuḏia ḏeḏi elo.

ŋuɽun ŋun ŋaŋijo liji ḏalɩmia gworo gweḏi yecu

⁴⁴ na yecu əri gwula nuleicɩno, gwun gwinyiəmɩnyi gwate gwinyiəmɩnyi no namɩni gwuəmɩnyi gwun gwuwəjɩŋi;

⁴⁵ na gwun gwinyiaŋu gwuaŋu gwun gwuwəjɩŋi.

⁴⁶ nyi gwiro bure gwuwiḏi kɩḏilio, kani gwun gwinyiəmɩnyi gwate gwajaḏaṯa kirɩm no.

⁴⁷ na ḏa gwete madiŋɩni ŋuɽuna ŋinyi na ŋate ŋɩmuldɩme no, nyi gwate gwiakɩmi no; gi gwune nyi gwate gweləḏi gi ḏakɩmia gɩḏilio no, namɩni nyi gwuwiḏi gwəkədə liji ga leḏi gɩḏilio.

⁴⁸ gwun gwinyidonye nate numəṯo ŋuɽuna ŋinyi no, gwəṯi gwete gwun gwuakɩmi. ŋuɽun ŋun ŋuməḏɩjilo ŋiro ŋar ŋakɩmi gi lamon leḏi gɩdo;

⁴⁹ gi gwune ŋate ŋaṯilumə ŋele ŋe ŋinyi no, namɩni baba gwun gwuwəjɩŋi, ŋu gwiro gwiḏəḏɩnyi ŋuɽuna ŋɩrṯa ŋiro ŋar ŋiŋare na ŋɩrṯa ŋiro ŋar ŋiŋumə.

⁵⁰ na nyi gwilɩŋiḏi ŋuɽuna ŋuŋun ŋun ŋiḏəḏɩnyilo ŋiro ḏɩmiḏa gi gɩḏilio. na ŋiro dino ŋuɽun ŋun ŋaṯilumə, ŋaṯilumə gi gwune uməḏɩjiŋine baba.