yuwana 11 - ŋuɽun ŋun ŋiya ŋun ŋikaiilo elo 1966

asa 11 ḏiḏiɽo gi ḏaiya ḏeḏi liasar

¹ na gwiji je gwun gweḏeḏo nanu gwan liasar gweḏi beṯiniya gwun gwiro lɩrgwom leḏi mariam na megin gwun gwiro gwa gwan marṯa.

² na liasar gwun gweḏeḏo nanu gwiro megin gweḏi mariam kweno gwun gwuwɩrṯi gwelɩnya gwun gwiro elo ŋɩḏini ŋe, ki numuje ŋwara ŋwuŋun əɽu ye yuŋun.

³ na lɩmegin leno lɩttən lun liro la nalwəje ŋuɽuna lugwun, naleicɩno, gwele gwəri, ŋu gwun gwaṯaŋəmɩnyi gwo gweḏeḏo nanu.

⁴ gwune na yecu diŋɩni nuarno, ḏeḏeḏa nanu ṯeno ḏədu ḏe ḏaiya no, namɩni gwan ḏɩbuḏia ḏeḏi elo, kani alḏibuḏi ŋaɽe ŋeḏi elo.

⁵ na yecu gwaṯəmɩnyi marṯaŋ na megin gwun gwiro gwa na liasar.

⁶ gwune nudiŋɩni gwo gweḏeḏo nanu nujanaga kalo gun gijune ŋwamon ŋwɩttən;

⁷ na ŋɩno gɩdo wɽi nueico calɩmis juŋun no, ilwele yauḏia mɩna.

⁸ na calɩmis juŋun eicɩno, mualɩm gwəri, gwunnɩno liju lar laŋauce nyɩdol nye, namɩni ar gwaɽuwe ŋɩnəwei mɩna a?

⁹ nal yecu wɩrlijo ŋuɽuna nuleicɩno, lamon late ləṯi sa di na gwuttən na? ḏa gwiji maṯuwele anyine gwate gwobɩlkəḏɩni no, gi gwune gwaṯaŋu bure gweḏi gɩḏilio keno.

¹⁰ namɩni ḏa gwiji maṯele gilio gwobɩlkəḏɩni gi gwune bure gwate lugwun no.

¹¹ nuluməḏɩjo ŋuɽuna ŋeno, kɩnadi gɩdo nuleicɩno, liasar gwun gwiro maḏəri maḏɩre; namɩni nyi gwele gwidiɽio gwar.

¹² na calɩmis juŋun eicɩno, gwele gwəri, ḏa ŋu maḏɩre ŋu gwaje gwadone kaja.

¹³ namɩni yecu gwuməḏəṯi gi ḏaiya ḏuŋun. namɩni luŋa nalarno gwuməḏəṯi gi diḏɩra ŋwar.

¹⁴ nal yecu ḏəḏɩjo ŋuɽuna ga muma nuleicɩno, liasar mai.

¹⁵ na nyi gwadile ganu gwan nyaŋa nyi gwate gwijo ŋɩnəwei no kani nyəmɩnyi. namɩni ilwele lugwun.

¹⁶ na ŋiro dino ṯoma gwun gwan gwərɩḏɩnu, nueico calɩmis jun jaṯɩljije no, ilwele liŋə dino kani ilai kal gete.

¹⁷ na yecu wila nudiŋɩnno maje ŋwamon kwoɽo kil.

¹⁸ na beṯɩniya gwijo gɩṯo urucəlim gwaro mil gwuttən.

¹⁹ na lutu lun liro liju lɩmila ḏi marṯaŋa mariam gwe nalimoɽe ganu kalo ge ḏaiya ḏeḏi megin gwagin.

²⁰ gwune na marṯa diŋɩni yecu gwar gwila nutu nalgwobeḏa; namɩni mariam nujɩre gwijiga dunu.

²¹ na ŋiro dino na marṯa uməḏɩjo yecuŋ nueicɩno, gwele gwi, ḏa ŋa gwijo ŋɩne magəri gwate gwaŋai no.

²² namɩni gwunnɩno dino nyi gwilɩŋiḏi wei ŋun ŋɩɽoṯeḏalo ḏi elo ŋaŋal elo ḏəḏə.

²³ na yecu eicɩno, magalo gwediɽi.

²⁴ na marṯa eicɩno, nyi gwilɩŋiḏi gwediɽi gi ḏidiɽo gi lamon leḏi gɩdo.

²⁵ na yecu eicɩno, nyi gwiro ḏidiɽo gi ḏaiya na ḏɩmiḏa, gwun gwinyiəmɩnyi na ḏa gwimai na gwəmɩḏe,

²⁶ na wei lun lɩmiḏo naliəmɩnyi late lanai minu no. ŋa gwəmɩnyu ŋuɽuna ŋeno a?

²⁷ nueicɩno, i gwele gwi, nyi gwiməmɩnyi niarno, ŋa gwiro kɩrisṯo, ŋaɽe ŋeḏi elo ŋun ŋɩwiḏi kɩḏilio.

²⁸ gwune nuuməḏɩjo dino, nuwele nuorniḏaṯe megin gwan mariam ga kaja, nueicɩno, mualɩm gwo ŋɩne na gwo gworniḏaŋa.

²⁹ gwune nudiŋɩni dino nudiɽo cou nuwele lugwun.

³⁰ namɩni yecu gwore gwate gwumila gi lɩrgwom lono no, namɩni gwijɩre kalo gun gobeḏeṯɩne marṯa gwe.

³¹ na dino liju lun lijiliŋə dunu nalmoɽe ganu, gwune nalaŋu mariamŋ mədiɽo cou nudu, nalgwujane nalarno gwar gwele kil ŋwərio gwula ŋɩnəwei.

³² gwune na mariam wila kalo gun gijɩne yecu, nuaŋu nuaici ga ŋwara ganu ŋwuŋun nueicɩno, gwele gwi, da ga gwijo ŋɩne magəri gwate gwaŋai no.

³³ gwune na yecu aŋu gwəri gwula na liju lun lɩwiḏɩle ləri gwula dino nuubega nuəri gwula gi ḏugwor ganu ḏuŋun.

³⁴ nuleicɩno, galo giro gaḏa gɩmanyankwuro? naleicɩno, gwele gwəri, wila ŋaŋaḏa.

³⁵ na yecu əri gwula.

³⁶ na liju arno, aŋəḏɩl galakwe ŋu gwəmɩnyu.

³⁷ nalmɩni ar kworo lagin no, gwiji kweno gwun gwuɽi jei ganu jeḏi gwiji gwun gwɩrimə gi jei gwate gwəṯi ŋɩma gwaŋakajo gwiji kweno gi ḏaiya na?

³⁸ na yecu aɽu nuəri gwula kwulo gwuŋun nuwila kil. na gil kono giro gɩmu na gɩdol gijo kouwɩr.

³⁹ nal yecu eicɩno, əbɩril gɩḏolia. na marṯa gwun gwiro megin gwun gwiro gwa gweḏi ŋu gwun gwaiyo, nueicɩno, gwele gwəri, ŋu gwowi wɽi; gi gwune maje ŋwamon kwoɽo.

⁴⁰ na yecu eicɩno, nyi gwate gweicaŋa no, ḏa ŋa gwiməmɩnyi ŋa gwaŋu ḏoɽeḏa ḏeḏi elo na?

⁴¹ naləbɩri gɩḏolia kalo gun gijɩne gwun gwaiyo, na yecu baŋelo nuarno, baba, nyi gweicaŋa sukran gi gwune ŋa gwiminyideŋɩnejo.

⁴² na nyi malɩŋe ŋa gwatɩnyɩḏeŋɩnejo, namɩni gwan liji lun lɩḏuḏɩnu ŋɩne nyi gwar dino, kani aləmɩnyi alarno ŋa gwiro gwun gwuwəjɩŋi.

⁴³ gwune nuar dino, nuəri gwula ŋwal ŋwɩbuḏo, liasar tuḏa.

⁴⁴ nuduḏa gwun gwaiyo na di duŋun na ŋwara ŋwuŋun ŋukanu jiria je jeḏi gil, na jei juŋun jimɩɽinu nanu giria ge. nal yecu eicɩno, kədəḏɩl ga nyouwɩrico ŋwuwele.

⁴⁵ na ŋiro dino, lutu lun liro liju lun lɩweləḏi ḏi mariam nalaŋu ŋun ŋapɩlo yecu, nalgwəmɩnyi.

⁴⁶ namɩni kworo lagin nalwele gi lɩbarɩsi nalunəḏɩjo ŋuɽuna ŋun ŋapɩlo yecu.

jɩsis jun jɩbuḏo jikaii ŋuɽuna ŋe ḏaiya ḏeḏi yecu

⁴⁷ na dino jɩsis jun jɩbuḏo na lɩbarɩsi nalaɽuwaḏa ldu nalgele əcərio nalarno, ilarra? gi gwune gwiji kweno gwaṯape ŋuɽuna ŋutu ŋun ŋɩbuḏo.

⁴⁸ na ḏa milouwɩrico dino liji wei gwaləmɩnyi na liji leḏi rumiya lila laki gala gage na ŋelɩnya ŋage.

⁴⁹ na gwete lagin gwan kaiyaba gwun gwiro gwele gweḏi jɩsis kɩḏilio kono nuleicɩno, nya late lilɩŋiḏi ŋuɽuna ŋədi no,

⁵⁰ na nya late laniri jei galo nyalanarno, gwiŋir lagalo gwiji gwete gwai gwan liji kani a liji wei ate alai no.

⁵¹ numɩni ate nunumə ŋuɽuna ŋeno ŋele ŋe ŋuŋun no, namɩni gwiro gwele gweḏi jɩsis kɩḏɩlio kono. nulaŋijo ŋuɽuna yecu gwar gwai gwan liji leḏi amɩrɩgen yeno;

⁵² namɩni gwate gwaiyo gwan liji leḏi amɩrɩgen yeno kuwei no, namɩni dino kani nuwəɽeico nyaɽe ldu nyeḏi elo wei nyun nyuwɩreḏelo.

⁵³ na gi lamon lono naluməḏəṯe gwalɽinye.

⁵⁴ na ŋiro dino na yecu wele nate nunaŋini gi jei ganu jeḏi liju no, numɩni wele kalo gun gijo gɩṯo kiḏɩwer, kamɩrɩgen yun yan abraum, na lijoga ŋɩnəwei calɩmis je juŋun.

⁵⁵ na gɩmuri ge ḏouwɩrico geḏi liju gijo gɩṯo, nalabo lutu lun lijo kalo kono urucəlim gwerre gɩmuri ge ḏouwɩrico gate gɩmaje no, algela lula lagin muma.

⁵⁶ naṯɩlbunyi yecuŋ, naṯɩluməḏəṯe laginŋu gwune nalɩḏuḏɩni ga kwu dunu gweḏi elo gwun gwubuḏo, nalarno, nyaŋa larau? ŋu gwate gwila kɩmuri na?

⁵⁷ na jɩsis jun jɩbuḏo na lɩbarɩsi nalgele ŋuɽuna nalarno, ḏa gwilɩŋiḏi gwe gwiji gala, gwaŋaŋiḏi gala kono kani alməṯo.