yuwana 10 - ŋuɽun ŋun ŋiya ŋun ŋikaiilo elo 1966

asa 10 gwaɽa gwun gwiŋir

¹ gwerkwe, gwerkwe ganu, nyi gweiceijɩno, gwun gwate gwəḏi kouwɩr ye ḏɩgara no, numɩni abo gi ṯaṯ ḏiro kaja gwiro gwuɽam na gwɩdigin;

² namɩni gwun gwəḏi kouwɩr gwiro gwaɽa gweḏi joŋol.

³ na gwun gwaṯɩdɩme ouwɩr gwaṯiḏɩjo, na joŋol digɩni gwal gwugun; nuornide jogolia wei jugun jiri nuldərɩjo.

⁴ gwune nudi joŋolia juŋun nuldərɩjo, na joŋol gwuje gi gwune lɩŋiḏɩlo ŋwal gwuŋun.

⁵ jate jaṯɩgwujane gwiji gwiro kaja no, nalabɩre gi gwune jate jilɩŋiḏi ŋwal ŋweḏi gwiji gwiro kaja no.

⁶ luməḏɩjɩlo yecu ŋuɽuna ŋeno ŋun ŋɩlɩbo naṯɩlmɩni, lɩŋeḏa ŋuɽuna ŋun ŋuməḏɩjulɩlo no.

⁷ nuaɽu nal yecu uməḏɩjo mɩna, nuleicɩno, gwerkwe, gwerkwe ganu, nyi gweiceijɩno, nyi gwiro ouwɩr ye ḏigara.

⁸ wei lun lɩwiḏi gwerre lugwi liro luɽam na lɩdigin, namɩni nate naṯi joŋol diŋɩni ŋuɽuna ŋagin no.

⁹ nyi gwiro ouwɩr; na ḏa gwiji gwete gwuməḏi lugwi gwəkədəḏɩni ga, gwaṯəḏi na gwədu na gwabuje ḏiṯa.

¹⁰ gwuɽam gwila gi ḏapa ŋuɽama, na gi ḏiɽinyɩḏa na gi ḏɩkeḏa kuwei. nyi gwuwiḏi lilmiḏi na ḏɩmiḏa ḏagin miḏane.

¹¹ nyi gwiro gwaɽa gwiŋir. gwaɽa gwiŋir gwaiyo gwan joŋolia juŋun.

¹² namɩni gwun gwiro gaḏam gwate gwiro gwaɽa no na joŋol juŋun jate jiro no, nuaŋu gamɽainya nuwila, nuwalane gi joŋol nuabɩre, nal gamɽainy umi nuwɩri galo joŋol je.

¹³ gaḏam gabɩro gi gwune duḏu gaḏam, nate naṯugico joŋolia gei no.

¹⁴ nyi gwiro gwaɽa gwiŋir, nilɩŋe joŋolia jinyi, ni joŋol jinyi lɩŋe.

¹⁵ gwiro gi gwune lɩŋiḏinyi baba, dino nilɩŋe babaŋ, niai gwan joŋolia galo.

¹⁶ na nyi gwəṯi joŋolia jiro kaja jun jate jeḏi ḏɩgara ṯeno no, arram jilapa dino, na jaje jadiŋɩni ŋwal ŋwinyi na luiny laro letɩdo na gwaɽa gwetɩdo.

¹⁷ na gwan ŋuɽun ŋeno baba gwinyiəmɩnyi gwune əmɩnyi niai nimiḏe mɩna.

¹⁸ gwiji gwate gwinyiapa ḏɩmiḏa no, namɩni nyi gwəmɩnyu kaja gi niai. nyi gwəṯi ŋelɩnya gwai na nyi gwəṯi ŋelɩnya gwəmɩḏe mɩna. baba gwinyi gwiḏəḏi ŋuɽuna ŋeno.

¹⁹ na liju kenyɩḏiḏi ganu gwan ŋuɽun ŋeno mɩna.

²⁰ nalar lutu kworo lagin no, ŋu gwəṯi diŋeroma na gwiro gɩɽilo, gwudaro gəko naṯanyadiŋɩni ŋuɽuna ŋuŋun?

²¹ na liro kaja arno, ŋuɽun ŋeno ŋate ŋiro ŋuɽun ŋeḏi gwiji gwun gwəṯi ḏiŋeroma no. ḏiŋerom ḏəṯi ŋɩma ḏuɽi jei ganu jeḏi gwiji gwun gwɩrimə gi jei a?

yecu gwo kɩmuri geḏi takɩris urucəlim

²² na ŋɩmuri gijo geḏi takɩris deḏi dunu gweḏi elo gwun gwubuḏo urucəlim. na ḏoɽom ḏiro;

²³ na yecu wewele kwu dunu gweḏi elo gwun gwubuḏo karda ganu geḏi suliman.

²⁴ na liju aɽuwaḏa ldu lugwun naluɽeico galo, naleicɩno, jaḏo gwiro ŋa gwijuməḏɩjo ŋuɽuna. ŋeno? ḏa ŋa maro kɩrisṯo uməḏɩjije muma.

²⁵ nal yecu wɩrlijo ŋuɽuna nuleicɩno, nyi gwuməḏɩjaje nyamɩni ate nanyəmɩnyi no. na ŋɩru ŋun ŋapɩlo jiri je jeḏi baba gwinyi na ŋɩru ŋeno ŋaṯɩnyiaŋiḏi;

²⁶ namɩni nya late ləmɩnyu no gi gwune ate duḏanya joŋol jinyi no, gi gwune uməḏɩjijɩne.

²⁷ joŋol jinyi jaṯɩḏiŋɩni ŋwal ŋwinyi, nilɩŋe nilgwujane,

²⁸ nilmiḏi gi gɩḏilio na jate jai minu no, na gwiji gwate gwete juŋwilwala gəbu gi ḏi ḏinyi no.

²⁹ baba gwinyi gwun gwiḏəḏɩlo gwunəno wei, na gwiji gwate gwiro kaja gwəṯi ŋɩma julwala babaŋ gwinyi gi ḏi ganu gəbu no.

³⁰ nanaŋa baba gwe gwinyi andro letɩdo.

ḏikiḏiḏia ḏeḏi liji

³¹ na liju aɽu naluṯa nyɩdolia gwalauce.

³² nal yecu wɩrlijo ŋuɽuna nuleicɩno, nyi majaŋijo ŋɩru ŋutu ŋun ŋiŋir ḏi baba gwinyi. ŋɩru ŋiro ŋaḏa ŋeno iro ŋilɩŋauce nyɩdol nye?

³³ na liju wɩrlijo ŋuɽuna naleicɩno, anate laŋauce kalo geḏi ŋɩru ŋun ŋiŋir no, namɩni laŋauce gi gwune ga gwaṯɩḏenɩḏi na ŋa gwiro gwiji namɩni duji gwula gwuŋa elo.

³⁴ nal yecu wɩrlijo ŋuɽuna nuleicɩno, ŋate ŋulinu kɩḏam geḏi ŋuɽun ŋalo ŋun ŋigelijɩlo elo musaŋ, nyi gwarno, nyaŋa liro eloŋa na?

³⁵ na ḏa ŋu lɩmuleico eloŋa, luŋa lun lɩmani ŋuɽun ŋeḏi elo wila, na gɩḏam geḏi elo gate gake no,

³⁶ na gwun gwɩpiḏi baba pɽul nuwəjo kɩḏilio, nanyeicɩno, ŋa gwaṯɩḏenɩḏi, gi gwune nyi gwarno, nyi gwiro ŋaɽe ŋeḏi elo a?

³⁷ ḏa nyi gwate mape ŋɩru ŋeḏi baba gwinyi no, nya lo ligwəmɩnyi;

³⁸ namɩni ḏa ŋimilape na ḏa nya late lɩmɩnyiəmɩnyi no, nyamɩni əmɩnyi ŋɩru, kani nyalɩŋe nanyəmɩnyi nyarno baba gwo lugwi na nyi gwo lugwun.

³⁹ nalaɽu nalarno gwalməṯo; numɩni ubɩḏɩni gi di ganu dagin.

⁴⁰ nuwele numuri mɩna gi ḏuɽo ganu gi ḏɩrawe ḏun ḏan urdun kalo gun gaṯɩn yuwana babṯaijiḏi gwerre nujiga ŋɩnəwei.

⁴¹ nalwila lugwun lutu, naleicɩno, yuwana gwate manape ŋuɽuna ŋun ŋɩbuḏo no, namɩni wei ŋun ŋuməḏɩjilɩlo yuwana ŋan gwiji kweno ŋiro gwerkwe.

⁴² naləmɩnyi lutu ŋɩnəwei.