yuwana 1 - ŋuɽun ŋun ŋiya ŋun ŋikaiilo elo 1966

asa 1 ŋuɽun ŋun ŋidərəḏi galo

¹ uro kili ŋuɽun ŋijo, ŋijil elo gwe, ŋiro elo.

² namɩni ŋuɽun nalɩje elo gwe uro kili.

³ ŋɩdi wei ŋigelɩnu ŋu gwe na gwaŋ gwetɩdo gwate gwun gwugelɩnu kaja guŋun no.

⁴ na ḏɩmiḏa ḏijo lugwun na ḏɩmiḏa nuro bure gweḏi liji.

⁵ na bure oɽa galo kirɩm, nate naṯi girɩm ḏami no.

⁶ gwəmɩnyo gwijo gwun gwuwəjo elo gwun gwan yuwana.

⁷ gwuwiḏi gi ḏɩteijo ḏe ga, gwəteije ga bure gwe kani a liji wei əmɩnyi ŋuɽun ŋe ŋuŋun.

⁸ ŋu gwate gwiro bure gwəwei no, namɩni gwuwiḏi gi ḏɩteijo ga bure gwe kweno.

⁹ bure kweno gwiro gwerkwe, gwun gwoɽejo liji galo wei lun lɩwiḏi kɩḏilio.

¹⁰ ŋu gwijo kɩḏilio, na gɩḏilio gelini ŋu gwe, naṯi liji leḏi gɩḏilio ḏɩme.

¹¹ gwuləḏi ŋɩdi ŋuŋun namɩni liji luŋun gwate gwaləmɩnyi no.

¹² namɩni wei lun ləmɩnyu, nulḏəḏə ŋelɩnya nalro nyaɽe nyeḏi elo, wei lun ləmɩnyu jiri juŋun.

¹³ luŋa late lilɩŋinu ŋuwən ŋe i ŋuɽun ŋe ŋeḏi jiŋɩno i ŋuɽun ŋun ŋɩbunyɩlo gwiji no, namɩni lilɩŋinu ḏi elo.

¹⁴ na ŋuɽun ro aŋɩnu, naṯilɩje lagəri, nanaŋu ḏoɽeḏa ḏuŋun ḏiro gi ḏoɽeḏa ḏeḏi ŋaɽe ŋetɩdo ŋeḏi baba, ŋenyeḏo ḏiŋiriḏa ganu na ŋuɽun ŋun ŋiro gwerkwe.

¹⁵ yuwana gwiteijo ga ŋu gwe, nuəri gwula nuarno, kweno gwiro gwun gwuməḏi gwe, ŋu gwun gwar gwila gɩdo lugwi gwinyidara gi gwune, gwijo uro gwerre lugwi.

¹⁶ na gi ḏenyeḏa ḏuŋun liŋə wei lɩmape ḏiŋiriḏa, na ḏiŋiriḏa ḏilbaḏaice kworo elo.

¹⁷ gi gwune ŋuɽun ŋun ŋigelɩlo elo ŋɩwiḏi ḏi musa gwe; namɩni ḏiŋiriḏa na ŋuɽun ŋun ŋiro gwerkwe ŋɩwiḏi ḏi yecu kɩrisṯo gwe.

¹⁸ gwiji gwate gwete gwun manaŋu eloŋu no, ŋaɽe ŋuŋun ŋun ŋiro ŋetido ŋun ŋijo gi jabba ganu jeḏi baba ŋiro ŋun ŋɩmijaŋinijo.

ḏiteijo ga ḏeḏi yuwana mamadan ḏan yecu

¹⁹ na ŋuɽun ŋeno ŋiro ḏɩteijo ga ḏeḏi yuwana. na ḏa liju leḏi urucəlim lɩmawəjo jɩsis na lilawi gwalɽoṯəḏɩjo, naleicɩno, ŋa gwan əḏi?

²⁰ nuteije ga nate nuŋiŋiɽini no numɩni arno, nyi gwədu gwan kɩrisṯo no.

²¹ nalmɩni ɽoṯeḏe naleicɩno, namɩni ŋa gwiro aŋe? ŋa gwan iliya a? nuleicɩno, nyi gwədu no. naleicɩno, ŋa gwiro nebi a? nuleicɩno, awe.

²² naluməḏɩjo naleicɩno, ŋa gwan əḏi kani analwɩrlijo ŋuɽuna luŋa lun lɩwəjije? ŋɩrṯa ŋiro ŋanalumə ŋan gwulo gwuŋa?

²³ nuleicɩno, nyi gwiro ŋwal ŋweḏi gwete gwun gwaṯorniḏe galo uro kiḏɩwer, nuarno, ṯuḏɩnil ṯaṯ galo ḏeḏi gwele gwun gwiro elo, gi gwune arne isaia gwun gwiro nebi.

²⁴ na lun liwəjo liji lono liro lɩbarɩsi.

²⁵ nalɽoṯəḏɩjo naleicɩno, gwudaro gəko naṯababṯaijiḏi ḏa ŋa gwate maro kɩrisṯo, i iliya i nebi no?

²⁶ nal yuwana wɩrlijo ŋuɽuna nuleicɩno, nyi gwaṯibabṯaijiḏi ŋau ŋe. gwete gwo gwuḏuḏɩnu kɩlɩgi ganu lagalo gwun gwate gwilɩŋiḏanyalo no,

²⁷ gwun gwar gwila gɩdo lugwi, na nyi gwate gwɩdeleḏo gwikədə gɩrna geḏi gɩwɩḏe guŋun no.

²⁸ ŋuɽun ŋeno ŋɩwiḏi beṯabra gwun gwijo gi ḏuɽo ganu ḏeḏi urdun, kalo gun gaṯɩn yuwana babṯaijiḏi.

²⁹ na giləganu nuaŋu yecuŋ meləḏa lugwun, nuarno, eʼe lrəmə leḏi elo lun loga lun laṯəbiri ŋuɽuna ŋɩki ŋeḏi gɩḏilio.

³⁰ gwəwei gwiro gwun gwuməḏi gwe, ŋu gwun gwar gwila gɩdo lugwi gwinyidara gi gwune gwijo uro gwerre lugwi.

³¹ na nyi gwate gwilɩŋiḏi no, namɩni nyi gwuwiḏi nyi babṯaijiḏi ŋau ŋe kani ŋaŋini gi liji leḏi isreiyil.

³² na yuwana gwiteijo ga nuarno, nyi gwaŋəḏi gwuɽɩwə gwun gwɩpiḏo pɽul gwugwulu gwiro gi gɩɽiḏir kanyin nujaḏaṯa lugwun.

³³ na nyi gwate gwilɩŋiḏi no namɩni gwun gwuwəjɩŋi nibabṯaijiḏi ŋau ŋe, nuŋwieicɩno, ŋu gwun gwaŋəḏi gwuɽɩwə gwun gwɩpiḏo pɽul gwugwulu nujaḏaṯa lugwun, gwiro gwun gwibabṯaijiḏi gwuɽɩwə gwe gwun gwɩpiḏo pɽul.

³⁴ na nyi gwaŋəḏi, na gwiteijo ga niarno, kweno gwiro ŋaɽe ŋeḏi elo.

calɩmis jeḏi yuwana mamadan na yecu

³⁵ na ŋɩno giləganu mɩna yuwana gwuḏuḏɩnəḏelo na calɩmis juŋun jɩttən.

³⁶ nuŋalaḏe ḏi yecu gwune wiḏu, nuarno, eʼe lrəmə leḏi elo lun loga.

³⁷ na calɩmis juŋun diŋɩni jun jiro jɩttən gwune uməḏu, nalgwujane yecuŋ.

³⁸ na yecu wɩrla ganu na gwune nulaŋu gwugwujanɩlo, nuleicɩno, nyalbunyaŋe? naleicɩno, rabbi, ŋuɽun ŋeno ŋarno, mualɩm gwəri, ŋa gwaṯɩje ne?

³⁹ nuleicɩno, wilal nyaŋaḏa. nalwila nalaŋaḏa gala gun gijune, nalijaḏaṯa gi lamon lono. galo gijo gɩṯo garo garage.

⁴⁰ na anḏarawus, gwun gwiro megin gweḏi simian buṯrus, gwiro gwete gweḏi calɩmis jun jiro jɩttən jun jiḏiŋɩnu yuwanaŋ nalgwujane yecuŋ.

⁴¹ na anḏarawus buje gwerre megin gwun gwan simian, nueicɩno, anmabuja gwun gwuwɩrṯi elo, ŋuɽun ŋeno ŋarno, kɩrisṯo.

⁴² nugwuloḏa ḏi yecu. nan yecu ŋalaḏe, nueicɩno, ŋa gwiro simian ŋaɽe ŋeḏi yuwana; ŋa gwaje gwani sapa, jiri ceno na buṯrus jiro jetɩḏo.

⁴³ na giləganu na yecu ar gwele jalil, nubuje bilibusŋ, nueicɩno, gwujani.

⁴⁴ na bilibus gweḏi amɩrɩgen yun yan beṯsaiḏa yun yiro amɩrɩgen yeḏi anḏarawus na buṯrus.

⁴⁵ bilibus gwubujo naṯanailŋ nueicɩno, anmabuja ŋu gwun gwuli gwe musa kɩḏam geḏi ŋuɽun ŋun ŋigelijɩlo elo, na nebɩŋa, yecu gweḏi nasɩra gwun gwiro ŋaɽe ŋeḏi yusib.

⁴⁶ na naṯanail eicɩno, ŋɩdi ŋəḏi ŋun ŋiŋir ŋəḏu nasɩra a? na bilibus eicɩno, wila ŋaŋaḏa.

⁴⁷ na yecu aŋu naṯanailŋ nuwila lugwun, nuuməḏəṯə lugwun, eʼe, gwiji gweḏi isreiyil gwerkwe, gwun gwate gwəṯi ḏirḏeijo ganu no.

⁴⁸ na naṯanail eicɩno, ŋa gwilɩŋəḏəṯiŋi ne? na yecu wɩrlijo ŋuɽuna nueicɩno, gwerre bilibus gwate gwimaŋorniḏa no, gwune jaga kwuwɩḏa ganu, nyi gwaŋəḏaŋa.

⁴⁹ na naṯanail wɩrlijo ŋuɽuna nueicɩno, mualɩm gwəri, ŋa gwiro ŋaɽe ŋeḏi elo; ŋa gwiro gwele gweḏi isreiyil.

⁵⁰ na yecu wɩrlijo ŋuɽuna nueicɩno, ŋa gwəmɩnyu gi gwune eicaŋano nyi gwaŋəḏaŋa kwuwɩḏa ganu a? ŋa gwaje gwaŋu ŋɩḏio ŋɩbuṯano kworo kweno.

⁵¹ nueicɩno, gwerkwe, gwerkwe ganu, nyi gweiceijɩno, nyaŋa laje laŋu kanyinŋ miḏini, na liji leḏi kanyin leḏi elo laṯababubo na lagwugwulo kɩɽelo ŋaɽe ŋeḏi liji.