yauḏa 1 - ŋuɽun ŋun ŋiya ŋun ŋikaiilo elo 1966

ḏisalɩmia

¹ nyi gwan yauḏa gwun gwiro wainy gweḏi yecu kɩrisṯo na megin gweḏi yagub, nyi gwulijo liji lun lornɩḏɩnu lun ləmɩnyɩnu ḏi elo gwun gwiro baba na lɩdɩmijilo yecu kɩrisṯo.

² ŋino ŋajibədəṯɩjo na ḏouwɩɽiḏa na ḏəmɩnyo.

dɩminu ga gwan limualɩm lun liro lɩwɩɽɩgal na ḏidigɩɽiḏa ḏeḏi liji

³ nyaŋa lun ləmɩnyɩnu, ḏa nyi mar gwiḏeije ŋɩma ŋe ŋinyi wei gwajilulijo ŋan ḏɩkədəḏɩno ga ilro ŋɩmaga, nyi gwɩreməṯəḏəṯɩnu nuarno nyi gwajulijo ŋuɽuna kani gajibɩɽi nanu nyalrraḏo kworo gi ḏɩməṯo ḏun ḏiḏəḏu liji lun lɩpiḏo pɽul lamtɩdo.

⁴ gi gwune liji lɩmədio lilɩbo, lulinu uro kili lan ḏakɩmino ṯeno lun late ləṯɩḏonye eloŋu no, ləṯɩbi ḏiŋiriḏa ganu ḏeḏi elo gwage alduji ŋuɽun ŋun ŋɩki geḏi jiŋɩno, naldonye eloŋu gwun gwiro gwetɩdo na gwele gwage gwun gwan yecu kɩrisṯo.

⁵ na nyi gwubunyu nyi gwajaḏɩŋəni namɩni nyalmalɩŋe ŋeno wei gwerre, na elo əbɩri liji kamɩrɩgen yeḏi masɩr nulɽinye lun late ləmɩnyu no.

⁶ na liji leḏi kanyin lun late lɩmadɩme gala gagin geḏi ŋele ŋagin no, namɩni lɩmouwɩrico gala gagin galo, na lɩdɩmiḏɩlo elo kani alakɩmini lamon lun lɩbuḏo ḏigakinaḏe galo gi gɩḏilio kirɩm ganu.

⁷ na gi ŋeno sadum na amura na jɩmɩrɩgen jun juɽeicɩlo galo jumagwujane ṯaṯ ḏeḏi ŋeḏor nalgwujane aŋɩna yiro kaja, limaro ḏaŋiḏio ḏeḏi igo gi gɩḏilio ḏakɩmiḏa ḏe ṯe ḏimalape.

⁸ na ŋiro gi ŋeno leno lun laṯil ŋwumə e dino laduji jiŋɩno ŋɩrleḏ, naṯilabɩlate ŋelɩnya, naluməḏəṯo gi liji elo lun ləṯi ḏoɽeḏa dutu.

⁹ namɩni makaʼil gwun gwiro gwele gweḏi liji leḏi kanyin, gwune na iblis nalpiḏeṯe kaŋɩnu yeḏi musa ŋwate gwəṯi ḏibɩɽeḏa nanu nugele ḏicɩgio lugwun jigwulo je no, numɩni arno elo gwaŋakɩrinya.

¹⁰ namɩni liji leno laṯuməḏəṯo ŋuɽun elo ŋun ŋate ŋilɩŋiḏɩlo no, namɩni ŋun ŋilɩŋiḏɩlo gi almal yun yate yaṯumə no namɩni lilɩŋidi, nalkini ŋuɽun ŋeno.

¹¹ ŋabɩɽe lagin, gi gwune limagwujane ṯaṯ ḏeḏi keiyin, naleneḏe gi ḏiḏuḏa ḏeḏi balam gwan ḏɩbona, namɩni lɩmai ḏuməḏɩno ḏe liro gi gwiji gwan kura.

¹² leno liro nyɩdol kɩmuri galo ge ḏəmɩnyo, nalʼe late lɩdonyo no, liʼi lula lagin; nalro jəbɩɽu jeḏi ŋau na ŋau ŋate, jal ḏɩron uri, na jaɽe jeḏi ko jate jəṯi nyaɽe no, judu gwerkwe, jɩmawino.

¹³ nalro gwəri gwe ḏɩrawe gwun gwaṯɩpi gworo na jɩwɩḏa jɩmaro ḏare ḏagin, na ŋwudum ŋwidɩrkəḏi. na girɩm ge ḏirimiḏo ganu gɩdɩmiḏu ganu liji leno gi gɩḏilio.

¹⁴ na akunuk dino, gwun gwiro gwurnɩnyo nimɩro kwoɽoṯəɽɩl gi lɩgwurnən leḏi adam, nuuməḏɩjʼo ŋuɽuna ŋun ŋaŋijilo elo ŋan liji leno, nuarno, eʼe gwele gwun gwiro elo lɩmila liji le luŋun gɩɽɩpi lun lɩpiḏo pɽul,

¹⁵ nalakɩmi liji wei, nalḏami liji wei lagin lun late laṯɩḏonye eloŋu no ŋan ŋɩru ŋagin ŋun ŋaṯilape late lɩḏonyo eloŋu no, na ŋan ŋuɽun wei ŋun lɩpiḏo ŋeḏi liji lun lɩki naṯilumoḏəṯo lugwun lun late eloŋu no.

¹⁶ leno laṯuməḏɩni ganu ŋuɽun ŋe ŋutu ŋiro ŋirəkwəno, nalgwujane ŋuɽuna ŋun ŋəmɩnyɩlo jigino jagin, na diŋɩla dagin daṯumə ŋuɽuna ŋadimuga, naṯiləmɩnyene gwiji gwan lulo lagin.

¹⁷ namɩni nyaŋa lun ləmɩnyɩnu, aḏɩŋanɩl ŋuɽuna ŋun ŋuməḏɩjajɩlo gwerre ganu lun liwəjɩnu leḏi gwele gwage gwun gwan yecu kɩrisṯo.

¹⁸ luŋa luməḏɩjaje, lamon leḏi gɩdo liji laje kworo lun laṯaki jumo lugwujano ŋuɽuna ŋun ŋəmɩnyɩlo ŋeḏi jiŋɩno jagin ŋun ŋate ŋəṯi eloŋu no.

¹⁹ leno liro luŋa lun lagele lula lagin kaja lɩkenyɩḏiḏi ganu, leḏi jiŋino, late ləṯi gwuɽɩwə gwun gwɩpiḏo pɽul no.

²⁰ namɩni nyaŋa lun ləmɩnyɩnu, kaɽujɩl ula lalo gi ḏiməṯo ḏalo ḏun ḏɩpiḏo pɽul, nyuməḏɩjo eloŋu gwuɽɩwə gwe gwun gwɩpiḏo pɽul.

²¹ dɩmiḏɩl lula lalo gi ḏəmɩnyo ḏeḏi elo, nyaleṯeijo ŋino ŋeḏi gwele gwage gwun gwan yecu kɩrisṯo gi ḏɩmiḏa gi gɩḏilio.

²² inəḏi liji kworo kworo, ḏidadɩŋaḏa ḏe gworo ŋɩmaga.

²³ kədəḏɩl liji ga kworo kworo ŋɩḏe ŋe, gwuloḏalo kigo; nyadonye kəbe nyadonye giria ŋun ŋiro ŋwuṯo kalo geḏi jiŋɩno.

baraka

²⁴ na gwun gwəṯi ŋɩma gwajidɩme dɩm nya late lanobɩlkəḏɩni no, na gwajiḏuḏɩni gi jei ganu juŋun jeḏi ḏoɽeḏa ḏare ḏate no, ḏidila ḏe ganu gworki,

²⁵ ḏoɽeḏa na ḏɩbuḏia na ŋɩma na ŋele ŋaje lugwun gwun gwiro elo gwetɩdo na gwun gwukədije ga, yecu kɩrisṯo gwe gwun gwiro gwele gwage, uro gwerre, na gwunnɩno na gi gɩḏilio. gwerkwe.