yagub 5 - ŋuɽun ŋun ŋiya ŋun ŋikaiilo elo 1966

asa 5 ŋuɽun ŋun ŋɩbɩɽe ŋan ḏolenelo ḏeḏi liji lun lutu ŋɩdio gi ḏabɩlaṯa liji lun late ləṯi ŋɩdio no

¹ gelɩl ŋwuɽa muma, nyaŋa lun lutu ŋɩdio, ərɩl gwula nyupe ganu gi ḏɩrona ḏalo ḏun ḏaje ḏila.

² ḏutɩḏo ŋɩdio ŋalo ŋɩmadigɩɽe, na jiria jalo jɩmal nyaṯirɩma muni.

³ ḏab ḏalo na əlgɩrucu yalo yɩmayeḏɩni, na ḏɩyəḏɩno ḏagin ḏajinjaje, nalʼe jiŋɩno jalo gi igo. nyalwəɽəṯɩjo ḏɩbona ḏalo ldu ŋwamon ŋwun ŋwaje ŋwila gɩdo ganu.

⁴ diŋɩnɩl, ŋɩdi ŋeḏi lun laṯape ŋɩru gi dɩri ganu dalo ŋun ŋɩmanyaliməṯeḏo ŋwəri gwula; na ḏərio gwula ḏeḏi lun laṯape ŋɩru ŋuməḏi gi nəni neḏi gwele gweḏi wei.

⁵ nyaljiga kɩḏilio na nyuti ŋɩdio nanyanidonyeḏeṯe, na nyaʼi dugwor galo gi lamon le ḏiḏuga.

⁶ gwakɩmianya gwun gwiŋir na nyaɽinye; na ŋu gwate gwajupəḏeice kaja no.

ŋuɽun ŋe dibɩɽia nanu ŋan ḏɩməṯo ḏugwore

⁷ na dino məṯɩl dugwore lɩmagəri, kəbe nan gwele gwun gwiro elo aɽuwa. gwiji gwe ḏɩri gwaṯeṯejo nyaɽe nyeḏi gwɩnyəm nyun nyiŋir, nulḏuḏɩnɩjo gworki kəbe nan gau naḏe gun giro lɽa kəbe nunete.

⁸ nyaŋa dino məṯɩl dugwor; nyaməṯo dugwor didir, gi gwune ḏaɽuwa ḏeḏi gwele gwun gwiro elo ḏo gɩṯo.

⁹ lɩmagəri, aṯanyinijo gworo ganu ŋɩmaga no, kani nyate nyakɩmini no; eʼe, gaḏi gɩḏuḏɩnu kouwɩr elo.

¹⁰ nyaŋa lɩmagəri, apɩlo ḏərnino ŋwuɽede ŋwe na ḏɩməṯo dugwore ḏeḏi nebɩŋa lun luməḏi jiri je jeḏi gwele gwun gwiro elo.

¹¹ liŋə lilḏuɽo lun lɩməṯi dugwore naliŋir dugwore. nyaldiŋɩnu ḏɩməṯo ḏugwore ḏeḏi ayub nanyaŋu ḏibunya ḏeḏi gwele gwun gwiro elo, galakwe na gwele uti ŋino gworki.

¹² namɩni gwerre ganu ŋɩdi wei lɩmagəri, aṯanyərɩmeḏeico kanyin, kwɩnyəm, gi ḏərɩmio ḏun ḏiro kaja no; nyamɩni ouwɩrico iŋ gwalo nuro i, na awe gwalo nuro awe, na nya late lideḏe gi ḏakɩmino no.

ŋɩma ŋe ḏuməḏɩjo eloŋu

¹³ gwo gwete lagalo gwiḏe a? ouwɩricil ŋuuməḏɩjo eloŋu. gwo gwete gwidilo ganu a? ouwɩricil ŋwelɩŋi delɩŋa deḏi elo.

¹⁴ gwo gwete lagalo gweḏeḏo nanu a? ouwɩricil nuornɩḏa lelɩnya leḏi kɩniso aluməḏəṯɩjo eloŋu lugwun, alwɩrṯi ŋila ŋe jiri je jeḏi gwele gwun gwiro elo,

¹⁵ na ḏuməḏɩjo eloŋu ḏɩməṯo ḏe ḏaṯɩmiḏi gwun gweḏeḏo nanu, na gwa gwele diɽi; na ḏa mape ŋuɽuna ŋɩki ŋwunḏuḏɩjo ganu.

¹⁶ diteijɩl ŋuɽuna ŋalo galo lagaloŋu ŋun ŋɩki, nyuməḏəṯɩjo eloŋu kworo kani nyamɩḏe. ḏiɽoṯeḏa eloŋu ḏeḏi gwiji gwun gwiŋir ḏəṯi ŋɩma gworki ŋɩru ŋuŋun.

¹⁷ iliya gwiro gwiji gwiro gi liŋə, nuuməḏɩjo eloŋu gworki nuarno gau gate ganni no; na gau ate nunni kwɩnyəm jɩḏilio ṯəɽɩl na luwəŋe nyəɽɩl no;

¹⁸ nuuməḏɩjo eloŋu mɩna na gau gwulə kanyin, na gwɩnyəm dio nyaɽe nyuŋun.

¹⁹ nyaŋa lɩmagəri, ḏa maḏuḏe gwete lagalo ŋuɽun ŋun ŋiro gwerkwe, na ma gwete wəɽio,

²⁰ ouwɩricil ŋwulɩŋe ŋuarno gwun gwuwəɽi gwiji gwun gwɩki gi ṯaṯ ḏuŋun makədə gwula ga gi ḏaiya, na gwəkɩɽɩbo ŋuɽuna ga ŋun ŋɩki ŋutu.