yagub 4 - ŋuɽun ŋun ŋiya ŋun ŋikaiilo elo 1966

asa 4 ŋuɽun ŋun ŋɩbɩɽe ŋan ḏɩkenyɩḏiḏio ganu

¹ dɩrra ḏiwiwiḏi ne na ḏɩbereḏa lagalo? date diduḏi ŋɩne lagalo ḏidila ḏe ganu ḏalo ḏun ḏaṯɩrre gɩdəno lagalo na?

² ŋaṯanyalbupe gworki ŋate ŋanyalbuje no; nyalaɽinyɩḏe, ŋajidela ganu, nya late ləṯi ŋɩma ŋanyalape no; nyalapiḏe ŋanyalarre; ŋate ŋanyalbuje no, gi gwune ŋate ŋiɽoṯeḏanyalo no.

³ ŋanyalɽoṯeḏa namɩni ŋate ŋanyalape no, gi gwune aṯanyalɽoṯeḏa ŋun ŋɩki kani nyalḏoḏeice ga gi ḏidila ganu ḏalo.

⁴ nyaŋa lun liro leḏor, nya late lilɩŋiḏi nanyarno ḏaminyiḏa ḏeḏi gɩḏilio ḏikiḏiḏɩlo elo gwe na? na dino gwun gwar gwaro meḏin gweḏi gɩḏilio namalkiḏiḏi elo gwe.

⁵ nyalaṯarno gɩḏam geḏi elo giro ga jai gun garno gwuɽɩwə gwun gwumaje lage bunyije gworki a?

⁶ namɩni gwaṯɩbaḏaicane ḏiŋiriḏa, na dino nuarno, laṯɩl elo upəḏeice kajakaja lun lɩbuḏi lula lagin, namɩni lun lɩtilɩti nalulḏəḏə ḏiŋiriḏa.

⁷ na ŋiro dino dɩtienɩjil eloŋu gi lulo lalo; akaḏaicɩl iblisuŋ kaja ŋwabɩre lagalo.

⁸ ḏikaḏaicɩl eloŋu na gwadikaḏa lagalo. mujil di dalo nyaŋa lun lɩki, nyawei dugwor dalo nyaŋa lun liro ŋuɽuna ganu ŋɩttən.

⁹ kiḏɩl dugwore nyupe ganu nyəri gwula; ouwɩricil ḏaiiḏa ga ḏalo ŋwiro ḏupa ganu, na ḏidilɩḏa ganu ḏalo ŋwiro ḏɩməru.

¹⁰ duḏɩl lɩtilɩti gi jei ganu jeḏi gwele gwun gwiro elo na ŋwajidiɽi ga.

¹¹ lɩmagəri, aṯanyauməḏəṯo gi lɩmagalo elo no. ŋu gwun gwaṯuməḏəṯo kwu megin elo nuakɩmi megin, nuuməḏəṯo ŋuɽun elo ŋun ŋigelijɩlo elo musaŋ nulakɩmi ŋeno. na ḏa ŋa maṯakɩmi ŋuɽuna ŋun ŋigelijɩlo elo musaŋ no ŋa gwate manape ŋuɽuna ŋeno no, ŋa maro gaḏi geḏi ŋuɽuna ŋeno.

¹² gwo gwete gwun gwaṯɩgele ŋuɽuna na gwiro gaḏi, na ŋu gwəṯi ŋɩma lulkədə ga nalulɽinye, namɩni əḏi gwiro ŋa gwaṯakɩmi gwun gwijaḏanyagwe ga?

ŋuɽun ŋun ŋɩbɩɽe ŋan ŋaḏimu liji lun lutu ŋɩdio

¹³ gelɩl ŋwuɽa muma, nyaŋa lun laṯarno, ilwele gwunnɩno i giləganu kamɩrɩgen yeno i yəwei, iljaga gɩḏilio getɩdo ileḏɩla ildiene ga.

¹⁴ namɩni nyaŋa late lilɩŋiḏi nanyarno ŋɩrṯa ŋaje giləganu no. ḏɩmiḏa ḏalo ḏɩrṯa? ḏiro gi jəbɩɽu jaṯaŋino mɩce, namɩni jete cou.

¹⁵ ŋiŋirano nyalarno, ḏa gwele məmɩnyi gwun gwiro elo ilamiḏe ŋilɩnduji ŋeno i ŋəwei.

¹⁶ namɩni gwunne nyaŋa la ṯumə ŋuɽuna ŋɩbuḏo ḏɩbuṯano ḏe ḏalo. ḏɩbuṯana wei ḏun ḏiro dino ḏɩki.

¹⁷ na dino gwun gwilɩŋiḏi nulduji ŋun ŋiŋir numɩni ate nulduji no, ŋeno məṯi ŋuɽuna ŋɩki lugwun.