yagub 2 - ŋuɽun ŋun ŋiya ŋun ŋikaiilo elo 1966

asa 2 liji lun lutu ŋɩdio na lun late ləṯi ŋɩdio no, na luŋa lilarra

¹ lɩmagəri, aṯanyagakia ḏɩməṯo ḏalo ḏeḏi gwele gwage gwun gwan yecu kɩrisṯo, gwele gwe ḏoɽeḏa, kworo gwun gwaṯanyagwiəmɩnyene gwete kwiji no.

² na ḏa məḏio kalo gun guɽuwaḏanyalo ldu gwete gwəṯi kaṯɩm gun giro ḏab na jiria jiŋir gworki, na ḏa məḏio dino gwun gwate gwəṯi ŋɩdio no, jiria je jumɩno nanu,

³ na ḏa manyəmɩnyene gwun gwukanu jiria jun jiŋir gworki, gwanyeicɩno, jigaŋa ŋɩne; na dino gwanyeico gwun gwate gwəṯi ŋɩdio no, ḏuḏɩnuŋa ŋɩne, i ŋajiga ŋɩne kwɩnyəm ŋwara ganu lugwi,

⁴ nya late nyalkenyɩḏiḏi ganu na nya late nyalmaro jaḏi jun jəṯi ŋaḏɩgɩɽenya ŋɩki na?

⁵ diŋɩnɩl, lɩmagəri lun ləmɩnyɩlo, elo gwədu gwuməṯɩlo lun late ləṯi ŋɩdio no kɩḏilio almɩni əṯi ḏɩməṯo ḏutu, namɩni laje laɽenyeḏe gi ḏɩbona ḏeḏi kanyin ḏun ḏarḏe elo no ḏulɩḏəḏə lun gwəmɩnyɩlo na?

⁶ namɩni nyaŋa gwaṯanyanŋelədəṯɩni ganu gwun gwate gwəṯi ŋɩdio ŋutu no. lədu lun lutu ŋɩdio labɩlaṯaje nuajilgwuloḏa gi jɩḏoɽ je ḏakɩmiḏa na?

⁷ namɩni luŋa late laḏene jiri jun jorniḏajilje nyaŋa na?

⁸ ḏa nyalmaṯɩmi ŋuɽuna ŋun ŋigelijɩlo gwele, gi gwune arne gɩḏam geḏi elo, gwəmɩnyi gwun gwajaḏanyagwe ga gi gwulo gwuŋa, nyalmarro muma;

⁹ namɩni ḏa nyalmaṯəmɩnyene gwiji kworo nyalmarre ŋuɽuna ŋɩki, na ŋuɽun ŋajakɩmi na nyalaro lun lɩki ŋuɽun ŋeno.

¹⁰ namɩni gwun gwuməṯo ŋuɽuna wei nulmɩni ki ŋete ŋɩmulki wei.

¹¹ namɩni gwun gwarno, aṯaura no, gwar dino no, aṯaɽinyiḏa no. na ḏa ŋa gwate mure no nammi ga mapnyiḏe, ga maro maki ŋuɽuna.

¹² na dino nyalumə na dino ŋanyalarre gi liji lun laṯakɩmiḏe ŋuɽun ge ge ḏɩkədəḏɩnə ga.

¹³ ḏakɩmiḏa ḏaje ḏun ḏate ḏəṯi ŋino no kwiji gwun gwate gwəṯi ŋino no; namɩni ŋino ŋaṯɩḏami ḏakɩmiḏa.

ḏɩməṯo na ŋɩru

¹⁴ ŋɩrṯa limagəri, ḏa gwete marno gwəṯi ḏɩməṯo, namɩni gwate məṯi ŋɩru no? ḏɩməṯo ṯeno ḏiro ḏar ḏikədə ga?

¹⁵ ḏa mage gwun gwiro gwəmɩnyo i gwun gwiro gwa majiga dino lɩmuɽino gwubupo ŋɩdio ŋeḏi anyin,

¹⁶ na gwete lagalo limuleicɩno, wiḏɩl ḏiŋiriḏa ḏe nyeneje nyape, naṯulmɩni ḏəḏə ŋɩdio ŋe ḏɩmiḏia aŋɩna no, namɩni ŋɩrṯa ŋiro?

¹⁷ na dino ḏɩməṯo ḏa ḏate ḏɩməṯi ŋɩru no ḏaiyoŋu.

¹⁸ yɩti, na gwete gwarno, ŋa geəṯi ḏɩməṯo, namɩni nyi gwəṯi ŋɩru. aŋiji ḏɩməṯo ḏuŋa ḏun ḏate ḏəṯi ŋɩru ganu no, namɩni nyi gwaŋaŋijo ḏɩməṯo ḏinyi ŋɩru ŋe ŋinyi.

¹⁹ ŋa gwaṯəmɩnyi naŋarno elo gwiro gwetɩdo, ŋiŋir ŋa gwarre dino. na diŋerom ḏaṯəmɩnyi dino nalubega gworki.

²⁰ namɩni ŋa bupo ŋa gwalɩŋe, ŋa gwiji gwun gwiro gɩɽilo, naŋarno ḏɩməṯo ḏun ḏate ḏəṯi ŋɩru no ḏuḏu ganu a?

²¹ baba gwage gwani ibraim gwate gwudujɩnu gwiŋir gi jei ganu jeḏi elo ŋɩru ŋe ŋuŋun, gi gwune apu ŋaɽe ŋuŋun ŋan isak nugele gi lobo elo na?

²² nyalaŋəḏi galakwe ḏɩməṯo ḏimaduji ŋɩru ŋuŋun ŋe, na ŋɩru ṯɩmi ḏɩməṯo,

²³ na ŋuɽun ŋeḏi gɩḏam geḏi elo ṯɩmi ŋun ŋarno, ibraim gwəmɩnyu eloŋu, na elo ḏuɽəḏɩjo ŋuɽuna ŋun ŋiŋir, nuorniḏini meḏin gweḏi elo.

²⁴ nyalaŋəḏi galakwe gwiji gwimaḏujini gwiŋir gi jei ganu jeḏi elo ŋɩru ŋe, ḏɩməṯo ḏədu cucun no.

²⁵ na dino raʼab gwun gwimɩɽiḏi jei ganu dino gwate gwimadujini gwiŋir gi jei ganu jeḏi elo ŋɩru ŋe, gi gwune nuəmɩnyi duwəjo nuldi gi ṯaṯ ḏun ḏiro kaja na?

²⁶ na dino jiŋɩno jun jate jəṯi gwuɽɩwə no jaiyo, na dino ḏɩməṯo ḏun ḏate ḏəṯi ŋɩru no ḏaiyo.