yagub 1 - ŋuɽun ŋun ŋiya ŋun ŋikaiilo elo 1966

asa 1 yagub laŋijilo ŋuɽuna ŋun ŋiro kajakaja

¹ nyi gwan yagub gwun gwiro wainy gweḏi elo na gweḏi gwele gwun gwan yecu kɩrisṯo. nyi gwusalɩmi liji lun liro əriḏo di na gwuttən lun lɩwɩreḏelo kalo gun giro kajakaja.

² limagəri, ḏuɽəḏɩl ḏidilɩḏa ganu wei ḏa nyalmabuje lula lalo gi ḏɩḏeijo ḏun ḏiro kajakaja,

³ nyalilɩŋiḏi nanyarno ḏɩḏeijo ḏeḏi ḏɩməṯo ḏalo ḏaṯapa ḏɩməṯo ḏugwore.

⁴ nyamɩni ouwɩrico ḏɩməṯo ḏe dugwore dalo ŋwuṯɩmi ŋɩru ŋuŋun wɽi kani nyandro muma wutiwuti nya late lɩbɩɽəṯɩne gwaŋ gwədi no.

⁵ ḏa gwete lagalo mamɩrṯeḏe ḏilɩŋeḏa, ouwɩricil ŋwuɽoṯeḏe ḏi elo gwun gwaṯɩḏəḏə liji wei ŋɩdio gɩrɩpi na gwate gwaṯɩluḏe no; nulmɩni ḏəḏə.

⁶ nyamɩni ouwɩrico ŋwuɽoṯeḏe ḏɩməṯo ḏe, gwo gwanəṯi ŋɩḏe gi ḏugwor ganu ḏuṯ; namɩni gwun gwəṯi ŋɩḏe gwiro gi ŋau ŋe ḏɩrawe ŋun ŋaṯɩl ḏɩron uɽuḏi ganu.

⁷ aṯanyouwɩrico gwiji kweno gwanarno gwanbuje gwaŋ gwədi kwele gwun gwiro elo no;

⁸ ŋu gwəṯi ŋuɽuna ganu ŋɩttən ŋaṯuɽuḏi ganu gi daṯ duŋun wei.

⁹ ouwɩricil mage gwun gwobɩleno ganu ŋino ŋe nuabupəḏe ganu gwədiɽini,

¹⁰ namɩni gwun gwəṯi ŋɩdio ŋutu nuabupaḏe ganu gwune nudujini gwɩti, gi gwune ŋu gwaiyo gi lawur leḏi garom laṯete.

¹¹ na ḏa anyin yɩmabuḏa imoɽeḏa ga jaga je, na garom uḏe na ŋwawur bɩɽeṯeḏa ga, na ŋaḏumu ŋuŋun gikeḏa. na ŋiro dino gwiji gwun gwəṯi ŋɩdio ŋutu gwaṯaiyo gi daṯ duŋun.

¹² ḏimoreḏa ḏaje kwiji gwun gwaṯɩməṯo ḏugwore gi ḏɩḏeijo, namɩni ḏa ḏɩmete na elo gwiŋir ḏugwore lugwun, nuape laḏe le ḏɩmiḏa lun larle elo luḏəḏə liji lun gwəmɩnyɩlo.

¹³ aṯanyouwɩrico gwete ḏa maliḏeije aṯuarno ḏɩḏeijo ḏiwiḏi ḏi elo no, gi gwune elo gwate gwiḏeijune ŋuɽun ge gun giki no, na ŋu kwulo gwuŋun gwate gwaṯunɩḏeije gwetɩdo no,

¹⁴ namɩni gwete gwete gwiḏeijini ḏa magwuluḏɩni na magwujane ŋuɽuna ŋe ŋun ŋɩbunyulo ŋun ŋɩki.

¹⁵ na ŋuɽun ŋun ŋɩbunyulo ŋun ŋɩki ḏa ŋɩmagwuli ŋalɩŋe ŋuɽuna ŋun ŋɩki, na ŋuɽun ŋun ŋɩki ḏa ŋɩmabuḏe ŋapa ḏaiya.

¹⁶ aṯanyaḏuḏa lɩmagəri lun ləmɩnyɩlo no.

¹⁷ na ḏiḏəḏo wei ḏun ḏiŋir na ḏuwəḏɩnu wei ḏun ḏiro muma ḏeḏi kanyin ḏiro, ḏugwulu ḏi baba gweḏi lɩbure, gwun gwate gwəṯi ḏibino ganu no, na gwate gwəṯi gɩdidɩŋilo ge ḏiwɩwɩrla ga no.

¹⁸ ŋuɽun ŋun ŋɩbunyɩlo mijillɩŋe ŋuɽun ŋe ŋun ŋiro gwerkwe kani ilro ŋwuɽa ḏigelɩno ḏe ḏuŋun. ŋuɽun ŋeḏi ṯaṯ ḏeḏi elo ŋun ŋiro gwerkwe

¹⁹ na lɩŋiḏɩl ŋeno lɩmagəri lun ləmɩnyɩlo, ouwɩricil liji wei aldiŋɩni cou, almɩni məṯo jiŋɩno gi ḏuməḏo ki alməṯo jiŋɩno gi ḏɩɽeḏa ganu.

²⁰ gi gwune ḏɩɽeḏa ganu ḏeḏi gwiji ḏate ḏaṯapə ŋuɽuna ŋiŋir ŋeḏi elo no.

²¹ na dino donyɩl ŋɩdio wei ŋun ŋiro ŋɩrleḏ na ḏutɩḏo ganu ḏun ḏɩki, nyaməṯo ŋuɽuna ŋun ŋukwuḏɩnu ḏɩtieno ḏe ŋun ŋəṯi ŋɩma ŋanyaŋkədədə lula lalo ga.

²² nyamɩni ro lun lapo ŋuɽuna, nyaduḏa gi liji lun lɩdiŋɩnu kuwei no, nyalirdeijo lula lalo ganu.

²³ na ḏa gwiji madiŋɩni ŋuɽuna ki ŋate ŋumɩniduji no, gwiro gi gwiji gwun gwaŋɩnu gi jei ganu ḏigelɩno ḏe kwu maḏara,

²⁴ gwaŋəḏi aŋɩna yuŋun na gwune nuwele nuḏuḏe ganu cou nate nuaḏiŋane gwiro gi aŋe no.

²⁵ namɩni gwun gwaŋəḏi ŋuɽuna ŋun ŋiŋir ŋəkədə ga, na ŋumulməṯəḏo, nate nuro gi gwiji gwun gwuḏiŋɩnu numɩni ḏuḏe ganu no, nuro gwun gwapo ŋɩru ŋanmɩni duji ŋuɽuna; gwiji kweno gwanbuje ḏɩmoreḏa gi ḏapa ŋɩru ŋuŋun.

²⁶ na ḏa gwete lagalo manarno ŋuməṯulo, numɩni ate nugaki ḏiŋɩla no namɩni gwirdeijo ḏugwor ḏuŋun ganu, ḏɩməṯo ḏuŋun ḏuḏu ganu.

²⁷ na ŋuɽun ŋeḏi ṯaṯ ḏeḏi elo ŋun ŋiŋir ŋate ŋəṯɩn gwaŋ gwədi nanu no gi jei ganu jeḏi elo gwun gwiro baba, ŋiro dino: ḏidɩmeḏa leḏɩla na linino kalo geḏi ŋuɽun ŋagin ŋun ŋɩbɩɽe., na ŋiro ḏidɩmiḏo gwula gwiŋir ŋuɽun ŋeḏi gɩḏilio.