ṯitusŋ 2 - ŋuɽun ŋun ŋiya ŋun ŋikaiilo elo 1966

asa 2 ŋuɽun ŋeḏi lɩkɩrisṯin na gama guŋun

¹ aṯamɩni alɩmi ŋuɽuna ŋe ḏalɩmia ḏun ḏiro muma ḏɩni.

² uməḏɩjɩl ləmɩnyəŋe lun luɽano aṯilje muma ŋadɩgɩɽe ŋe ŋiŋir, alro lun lɩdeleḏo lalɩnəji, alro lele leḏi lulo lagin, albɩɽe nanu ḏɩməṯo ḏe na ḏəmɩnyo, na ḏɩməṯo dugwore.

³ na la lun luɽano alro dino, gi la lun lɩpiḏo pɽul, aṯɩlcɩgio ŋɩwɩɽɩgala no, na lo laro lɩwainy leḏi ŋɩmidiə almɩni ro liji lun laṯalɩmi ŋuɽuna ŋun ŋiŋir,

⁴ lɩtilɩti aləmɩnyi ləmɩnyəŋe lagin nyaɽe nye nyagin,

⁵ aldɩme jiŋɩno jagin, aṯɩlmɩni wiwila ga dino ŋuɽun ŋun ŋɩki no, aṯɩlape ŋɩru ŋiŋir gi lɩdunu lagin, almɩni iŋir ŋino ŋe, aldeŋɩna ləmɩnyəŋe lagin kani ate alɩnḏene ŋuɽuna ŋeḏi elo no.

⁶ na ŋiro dino bɩɽil jamɩlia nanu aṯilje muma aldɩme jiŋɩno jagin ŋadɩgɩɽe ŋe ŋiŋir.

⁷ na ŋuɽun wei ŋaŋiḏi gwula gwuŋa ŋwuro gi ŋɩru ŋun ŋiŋir, na ḏalɩmia ḏuŋa ŋwuro muma ḏɩni, ḏaṯe ḏəṯɩn ŋuɽuna ganu ŋede no,

⁸ na ŋuɽun ŋun ŋiro gwerkwe ŋun ŋate ŋəṯi ŋɩma ŋalmakɩmi no, na ŋu gwun gwudonyo gwaro ḏare gwate gwəṯi ŋuɽuna ŋɩki gwijɩnuməḏəṯo elo no.

⁹ ŋalɩmi lɩwainya aləṯeijo lelɩnya lagin nəni, aliŋiri ŋuɽuna wutiwuti, aṯilɩwɩrlijo ŋuɽuna ŋɩbɩɽe no,

¹⁰ lo lanape ŋɩdio ŋwuɽama, aṯɩlmɩni ape ŋɩru ŋiŋir ŋɩḏuḏɩnu ga, kani aṯɩlapa ŋuɽuna ŋun ŋiŋir gi ḏalɩmia ḏeḏi elo ŋuɽun ŋe wei gwun gwukədəḏije ga.

ŋuɽun ŋeḏi lɩkɩrisṯɩn ŋun ŋaṯɩlapi ŋɩru

¹¹ gi gwune ḏiŋiriḏa ḏeḏi elo ḏaŋino ḏun ḏɩmapa ḏɩkədəḏɩnə ga gi liji wutiwuti,

¹² ḏijalɩmi iladonye ŋuɽuna ŋun ŋɩki ŋədu ŋeḏi elo no, na ŋuɽun ŋun ŋɩbunyɩlo gɩḏilio, ilwewele ŋadɩgɩɽe ŋe ŋun ŋiŋir, na ŋuɽun ŋun ŋiŋir, na ḏɩpiḏa pɽul ḏun ḏibunyu elo kɩḏilio keno gijo gwunnɩno.

¹³ ileṯeijo ḏiḏuḏɩnɩjo ḏun ḏiŋir ḏun ḏɩro ḏəŋinio ḏe ḏoɽeḏa ḏeḏi elo gwun gwubuḏo na ḏeḏi gwun gwukədəḏije ga gwun gwan yecu kɩrisṯo,

¹⁴ gwun gwiḏəḏi gwula gwuŋun ḏaiya gwan liŋə nuŋwijeḏɩla ŋuɽuna ŋage ŋun ŋɩki wei, nuŋwijiwei nilro liji luŋun, ilɩɽijo ganu ilape ŋɩru ŋiŋir. o,

¹⁵ uməḏɩjɩlo ŋuɽuna ŋeno ŋalbɩɽi nanu, ŋalgireṯɩnye wei ŋelɩnya. gwo gwangele gwetɩdo gwanarno ŋa gwəṯɩn ŋuɽuna ŋɩrṯa ḏɩrr.