ṯitusŋ 1 - ŋuɽun ŋun ŋiya ŋun ŋikaiilo elo 1966

asa i ḏisalɩmia

¹ nyi gwan bulus gwiro wainy gweḏi elo na ḏuwəjo ḏeḏi yecu kɩrisṯo, kani nyibɩɽi ḏɩməṯo nanu ḏeḏi liji lun lɩməṯɩnu ḏi elo, nyalgelejo uwə alɩŋe ŋuɽuna ŋun ŋiro gwerkwe ŋun ŋɩwiḏɩl kal gete gworo gwe gweḏi elo.

² na liŋə ilaḏuḏɩnɩjo ḏɩmiḏa ṯeno gi gɩḏilɩo ḏun ḏarḏe elo no ḏiḏəḏu liji luŋun gwerre ganu gwate magele gɩḏilio no, gwun gwate gwəṯi ŋɩma gwuma ŋɩwɩɽɩgala ḏuṯ no,

³ na kaja gun gɩməṯɩge elo nuaŋiḏi ŋuɽuna ŋuŋun ŋuɽun ŋiŋir ŋeḏi yecu kɩrisṯo ŋun ŋiḏəḏɩnyilo elo gwun gwukədəḏije ga.

⁴ nyi gwo gwulijo ṯɩtusŋ, gwun gwiro ŋaɽe ŋinyi gwerkwe ganu gi ḏɩməṯo ḏun ḏaṯɩnɩje wei; ḏiŋiriḏa ḏaje lugwuŋa na ḏouwɩɽɩḏa ḏedi elo gwun gwiro baba na yecu kɩrisṯo gwun mijikədə ga.

ŋuɽun ŋe ḏɩməṯo lelɩnya leḏi kɩniso

⁵ na ŋuɽun ŋiro ŋeno nuŋwaŋawalane kariṯ ŋəṯɩmi ŋuɽuna ŋun ŋore gɩṯo ganu, ŋalduji lele leḏi kɩniso gi jɩmɩrɩgen wei gi gwune uməḏɩjaŋa.

⁶ ḏa gwete gwate manəṯi ŋuɽuna ŋun ŋar ŋapi ḏare no, nuəṯi gwa gwetɩdo, na nyaɽe nyuŋun nyɩməmɩnyi eloŋu nyate nyalɩncigi ŋɩrəkwəno no na ḏɩkia ŋuɽuna ŋun ŋɩḏuḏɩnu ga no.

⁷ gi gwune arram gwele kweno gwo gwanəṯi ŋuɽuna ŋun ŋapi ḏare, na ŋu gwiro wəkil gweḏi elo, gwo gwangwuje ḏuməḏɩno ḏuŋun, gwo gwaṯɩɽe ganu cou, gwo gwaṯɩyu ŋau ŋutu ŋeḏi jaɽe jun jiro gi ḏuɽuṯ, gwo gwanpi liji na gwo gwanəmɩnyi ḏiḏienə ga ḏun ḏɩki.

⁸ numɩni əmɩnyi liḏa na ŋuɽun ŋun ŋiŋir, ŋuro gwele gweḏi gwulo gwuŋun, nuḏuḏɩni ga, ŋwupiḏe pɽul, nudɩme aŋɩna yuŋun.

⁹ arram ŋwumɩnməṯo ŋuɽuna muma ŋun ŋiro gwerkwe gi gwune aṯualɩmini, na gwəṯi ŋɩma lulbɩɽi nanu ŋuɽun ŋe muma ŋɩni, nalulakajo lun lɩkiḏiḏɩl ŋuɽun ŋe ŋeno.

limualɩm lun liro lɩwɩɽɩgal

¹⁰ gi gwune lo lutu lun late ləmɩnyu lagwuje ŋuɽuna ŋun ŋɩḏuḏɩnu ga no, lun laṯumə ŋuɽuna ŋun ŋiro ga jai nalirdeijo liji ganu na luŋa lun luɽəno.

¹¹ na arram na ŋwinyu ŋwagin laŋiṯi, gi gwune lalɩmiḏo ŋuɽun ŋe ŋun ŋate ŋiŋir ŋalumə no gi gwune ḏidieno ga ḏun ḏɩki, na ŋuɽun ŋe ŋeno nalḏami ḏəmɩnyo gi lɩdunu gi lɩdunu.

¹² gwete lagin gwun gwiro nebi gwagin nuarno, likariṯ bubruṯ liro lɩwɩɽɩgal, na lɩmanyanya na jəḏou jun jiro lɩduna.

¹³ na ḏɩteijo ga ṯeno ḏiro gwerkwe. na ŋuɽun ŋeno gɩreṯɩnyiḏɩlo gworki kani ŋalbɩɽi nanu ḏɩməṯo ḏe,

¹⁴ ate aldiŋɩni ŋuɽuna gi liju ŋun ŋiro ga dino no, na ŋuɽun ŋun ŋigelɩlo liji lun lɩwɩrlo ga ŋuɽun ŋun ŋiro gwerkwe.

¹⁵ ŋɩdi wei ŋiŋir gi liji lun liŋir, namɩni lun lɩki late ləmɩnyu no ŋɩdi ŋatɩn lagin ŋiŋir no, gi gwune ḏuməḏɩno ḏagin na dugwor dagin diro ŋɩrleḏ.

¹⁶ laṯarno lilɩŋiḏi eloŋu namɩni ŋɩru ŋe ŋagin gwidonyilo, namɩni luŋa lɩkeno gworki, ŋate ŋideŋɩnejɩlo no, namɩni lɩmaḏuji ŋɩru ŋe ŋiŋir wei.