rumiya 5 - ŋuɽun ŋun ŋiya ŋun ŋikaiilo elo 1966

asa 5 ŋuɽun ŋun ŋɩmaje gi ḏɩməṯo

¹ na dino gi gwune ilmadujini liŋir gi jei ganu jeḏi elo ḏɩməṯo ḏe, iləṯi ḏouwɩɽiḏa eloŋale gwele gwage gwe gwun gwan yecu kɩrisṯo;

² na dino ŋu gwe ilməṯi ḏəḏio ḏɩməṯo ḏe gi ḏiŋiriḏa ḏun ḏijɩne, niladile ganu gi ḏiḏuḏɩnɩjo ḏe ḏoɽeḏa ḏeḏi elo.

³ na ŋate ŋiro dino kuwei no, namɩni iladile ganu ḏɩḏia ḏe ḏage dino, ililɩŋiḏi ilarno ḏɩḏia ḏaṯapa ḏɩməṯo ḏugwore,

⁴ na ḏɩməṯo ḏugwore ḏaṯapa ḏɩməṯɩno ga, na ḏɩməṯɩno ga ḏaṯapa ḏiḏuḏɩnɩjo,

⁵ na ḏiḏuḏɩnɩjo ḏate ḏaṯape ḏare no, gi gwune ḏəmɩnyo ḏeḏi elo ḏimadoḏa gi dugwor ganu dage gwuɽɩwə gwe gwun gwɩpiḏo pɽul gwun gwiḏəḏije.

ḏəmɩnyo ḏeḏi elo ḏaŋinu gi ḏaiya ḏeḏi kɩrisṯo

⁶ gi gwune jilo gwerre ilmumɩḏo namɩni kaja gun gɩdeleḏo kɩrisṯo mai gwan liji lun lɩki,

⁷ gi gwune gwiji gwate gwete gwar gwai gwan gwiji gwun gwuḏuḏɩnu ga no, namɩni gwəṯi gwan gwiji gwun gwiŋir gworki gwete gwəṯi ḏibɩɽeḏa nanu gwai gwan ŋu.

⁸ namɩni elo maŋiḏi ḏəmɩnyo ḏuŋun lage gi gwune iljɩre lɩki kɩrisṯo mai gwan liŋə.

⁹ na dino gi gwune ilmadujini liŋir gi jei ganu jeḏi elo gwunnɩno ŋuwən ŋe ŋuŋun, ŋiliŋikədəḏɩni ga gi ḏɩɽeḏa ganu ŋu gwe.

¹⁰ gi gwune ilikiḏiḏi namɩni ilmouwɩɽiḏe eloŋale ḏaiya ḏe ḏeḏi ŋaɽe ŋuŋun, na ŋutəno kworo kweno na liŋə ilouwɩɽiḏe na iləkədəḏɩni ga ḏɩmiḏa ḏe ḏuŋun,

¹¹ na ŋate ŋiro dino kuwei no, nilmɩni dile ganu ḏi elo yecu kɩrisṯo gwe gwun gwiro gwele gwage, gwun gwimilgwape gwunnɩno ḏouwɩɽiḏa ḏage.

ḏaiya ḏi adam, na ḏɩmiḏa ḏi kɩrisṯo

¹² na ŋiro gi gwune gwiji gwe gwetɩdo ŋuɽun ŋəḏi kɩḏilio ŋun ŋɩki na ŋuɽun ŋun ŋɩki ŋapa ḏaiya, na dino ḏaiya ḏɩmouwɩriga gi liji wei gi gwune wei lɩmape ŋuɽuna ŋɩki.

¹³ na gwerkwe uro gwerre na elo gelijo musaŋ ŋuɽuna, ŋuɽun ŋun ŋɩki ŋijo kɩḏilio, namɩni ŋuɽun ŋun ŋɩki ŋate ŋiḏuɽəḏɩnu ḏa ŋate ŋɩmaje ŋuɽun ŋun ŋigelijɩlo elo musaŋ no.

¹⁴ namɩni ḏaiya ḏɩmape ŋelɩnya uro kaja geḏi adam kəbe na kaja geḏi musa, na gi liji lun late lɩmanape ŋuɽuna ŋun ŋɩki gi gworo gweḏi adam gwun gwiro sura jeḏi ŋu gwun gwar gwila no.

¹⁵ namɩni ḏiḏəḏo ga dino ḏe ḏiŋiriḏa ḏate ḏiro gi ŋuɽun ŋun ŋɩki ŋun ŋapɩlo gwiji gwetɩdo no, gi gwune ḏa ŋuɽun ŋe ŋun ŋɩki ŋeḏi gwetɩdo lutu lɩmai, na ŋutəno ḏiŋiriḏa ḏe ḏeḏi elo, na ḏiḏəḏə ḏe ḏiŋiriḏa ḏeḏi gwiji gwetɩdo gwun gwan yecu kɩrisṯo ḏiməbəḏəṯɩnijo liji lutu.

¹⁶ na ḏiḏəḏo ḏun ḏima elo ḏəḏə ga dino ḏate diro gi ḏapa ŋuɽuna ŋɩki ŋeḏi gwetɩdo no, gi gwune gwiji gwe gwetɩdo ŋuɽun ŋun ŋɩki ŋɩməḏi, na dino ḏakɩmiḏa ḏeḏi elo ḏɩmila gi liji lutu na dino wei lɩmalakɩmi, namɩni ḏiḏəḏo ga dino ḏeḏi ḏiŋiriḏa ḏun ḏɩmila ḏan ŋuɽun ŋutu ŋun ŋɩki ḏaṯɩḏuji liji lutu liŋir gi jei ganu jeḏi elo.

¹⁷ na ḏa ŋuɽun ŋe ŋun ŋɩki ŋeḏi gwiji gwetɩdo ḏaiya ḏɩmapa ŋelɩnya; na ŋutəno liji lun lɩməṯi ḏiŋiriḏa ḏun ḏutu na ḏiḏəḏo ga dino ḏeḏi ŋuɽun ŋun ŋiŋir aləṯi ŋelɩnya gi ḏɩmiḏa gwetɩdo gwe, na ŋu gwan yecu kɩrisṯo.

¹⁸ na gi gwune ŋuɽun ŋe ŋɩki ŋeḏi gwiji gwetɩdo ḏakɩmiḏa ḏɩmila gi liji wei nalakɩmini; na dino ŋɩru ŋe ŋun ŋiŋir ŋeḏi gwetɩdo liji wei ladujini liŋir gi jei ganu jeḏi elo nalmiḏe.

¹⁹ na gi gwune gwiji gwetɩdo gwate məṯeijo eloŋu gəni no liji lutu lɩmadujini lɩki, na ŋiro dino ḏideŋɩneja ḏe ḏeḏi gwetɩdo lutu ladujini liŋir gi jei ganu jeḏi elo.

²⁰ na dino ŋuɽun ŋun ŋigelijɩlo elo musaŋ ŋɩməḏio kani a ŋuɽun utəne ŋun ŋɩki, namɩni gi gwune na ŋuɽun utəne ŋun ŋɩki ḏiŋiriḏa ḏimutəne gworki,

²¹ kani ŋiro gi gwune ŋuɽun ŋun ŋɩki ŋəṯi ŋelɩnya gi ḏaiya, na dino ḏiŋiriḏa ḏəṯi ŋelɩnya ŋuɽun ŋe ŋun ŋiŋir gi ḏɩmiḏa gi gɩḏilio yecu kɩrisṯo gwe gwun gwiro gwele gwage.