rumiya 3 - ŋuɽun ŋun ŋiya ŋun ŋikaiilo elo 1966

asa 3

¹ na ḏa ŋɩmaro dino ŋɩrṯa ŋiŋirano ŋun ŋəṯɩlo gwiju? na ŋɩrṯa ŋiro ŋiŋirano gi ḏuɽəno?

² ŋutu ganu ŋuɽun wei. gwerre ganu gi gwune lɩmal elo ḏəḏə ŋuɽuna ŋuŋun alɩdɩme.

³ na aŋ gwiro ḏa lɩmaje kworo lun late lɩməṯi ḏɩməṯo no? ḏa lɩmete ḏɩməṯo ŋeno ŋaki ŋɩma ŋeḏi ḏɩŋiriḏa ḏun ḏɩḏuḏɩnu ga ḏeḏi elo a?

⁴ awe, ŋate ŋiro dino ḏuṯ no. namɩni ouwɩrico eloŋu ŋuro gwerkwe, na liji wei nalro lɩwɩɽɩgal, gi gwune ŋulinu, kani ŋədu ŋiŋir ŋuɽun ŋe ŋuŋa na ŋalḏami ḏa ŋamakɩmini.

⁵ namɩni ḏa ŋuɽun ŋage ŋun ŋɩki ŋɩmaŋini ŋuɽun ŋe ŋun ŋiŋir ŋɩḏuḏɩnu ga ŋeḏi elo na ilarau? ilarno elo gwate gwiŋir ḏa magwulio ḏɩɽeḏa ganu ḏuŋun kwiji na? ŋaṯɩlumə gi gwiji.

⁶ awe, ŋate ŋiro dino ḏuṯ no. na ḏa ŋɩmaro dino na galakwe elo gwakɩmi gɩḏilio?

⁷ na ḏa ŋuɽun ŋeḏi elo ŋun ŋiro gwerkwe ŋɩmabaḏaṯe ŋɩwɩɽɩgal ŋe ŋinyi ŋi ḏɩbuḏia ḏuŋun, namɩni gwudaro gəko nijɩre gwakɩminu gi gwiji gwun gwɩki?

⁸ na gwudaro gəko nate nananduji ŋuɽuna ŋun ŋɩki kani aŋi gworo wila gwun gwiŋir no? ŋiro gi liji kworo lun luməḏəṯijɩn elo nalarno anaro dino. na ḏakɩmiḏa ḏagin ḏiḏuḏɩnu ga.

liji wei lɩki

⁹ na ŋɩrṯa ŋiro dino? anaŋa andono a? awe, anate andono ŋuɽun ŋe ŋədi no, gi gwune gwerre ganu anaŋa ŋicɩgianaŋe anarno liju na ligrigi wei lo ŋuɽun ganu ŋun ŋɩki,

¹⁰ gi gwune ŋulinu, gwiji gwate gwetɩdo gwiŋir, i gwetɩdo no;

¹¹ gwate gwetɩdo gwun gwilɩŋiḏi no, na gwate gwetɩdo gwun gwubunyu eloŋu no.

¹² liji wei lɩmədu ṯəṯ ganu na lɩmaro jai wei. gwate gwetɩdo gwun ŋuniduji ŋun ŋiŋir no, i gwate gwetɩdo no.

¹³ lulo lagin liro gil gun gijiga kiḏɩnu, na diŋɩla de dagin laṯumə ḏirdeijo ḏe ganu, na ŋinya ŋeḏi juŋə ŋo ŋwinyu ganu ŋwagin.

¹⁴ na ŋwinyu ŋwagin enyeḏe ḏɩḏenɩḏia ganu na ŋuɽun ŋe ŋiɽi cicer;

¹⁵ na ŋwara ŋwagin oɽe coucou nalireje ŋuwəno ga,

¹⁶ na gi daṯ ganu dagin ḏɩkeḏa ḏo na ḏiḏɩmiḏɩno.

¹⁷ na ṯaṯ ḏe ḏouwɩɽiḏa ḏate ḏilɩŋiḏɩlo no,

¹⁸ na late liḏe eloŋu gi jei ganu jagin no.

¹⁹ na ililɩŋiḏi muma ilarno, ŋuɽun ŋun ŋigelijɩlo elo musaŋ ŋaṯɩluməḏɩjo liji lun laṯɩje ŋwara ganu ŋweḏi ŋuɽun ŋun ŋigelijɩlo elo musaŋ, kani a ŋwinyu laŋiṯini wei na gɩḏilio wei gaje ga gi ḏakɩmino ḏeḏi elo,

²⁰ gi gwune ŋɩru ŋe ŋeḏi ŋuɽun ŋun ŋigelijɩlo elo musaŋ gwatɩn gwetɩdo gwidujɩnu gwiŋir gi jei ganu jeḏi elo no, gi gwune ŋuɽun ŋun ŋigelijɩlo elo musaŋ ŋaṯape ḏilɩŋeḏa ḏe gworo gwun gwɩki.

ḏɩpiḏa pɽul ḏɩməṯo ḏe ḏeḏi kɩrisṯo

²¹ namɩni gwunnɩno ŋuɽun ŋun ŋiŋir ŋeḏi elo ŋimaŋino ŋun ŋate ŋiro ŋuɽun ŋe ŋun ŋigelijulo musaŋ no, namɩni ŋun ŋigelijulo musaŋ na ŋeḏi nebɩŋa ŋiteijɩlo galo,

²² na ŋeno ŋiro ŋuɽun ŋun ŋiŋir ŋeḏi elo ŋun ŋaṯila ḏɩməṯo ḏe ḏi yecu kɩrisṯo gi liji wei lun ləmɩnyu, gi gwune gwatɩn gwetɩdo gwiro kaja no,

²³ gi gwune liji wei lɩmape ŋuɽuna ŋɩki na limobɩlṯeḏe gi ḏoɽeḏa ḏeḏi elo,

²⁴ na luŋa lɩmaḏujini liŋir gi jei ganu lugwun ga dino ḏiŋiriḏa ḏe ḏuŋun, ḏɩkədəḏɩnə ga jili je ḏun ḏaṯɩje ḏi yecu kɩrisṯo,

²⁵ gwun gelo elo kɩɽelo nuro gi ŋɩdi ŋe ḏouwɩɽiḏa ŋuwən ŋe ŋuŋun, ŋun ŋijiməṯo ḏɩməṯo ḏe, na ŋuɽun ŋeno ŋo kani ŋaŋiḏi ŋuɽuna ŋun ŋiŋir ŋeḏi elo gi gwune gi ḏɩməṯo ḏugwor ḏuŋun elo maḏuḏe ŋuɽun ganu ŋun ŋɩki ŋeḏi gwerre;

²⁶ nuar gwaŋiḏi gwunnɩno ŋu gwiŋir, na gwetɩdo gwun gwiduji gwiji gwiŋir gi jei ganu jeḏi elo gwun gwəmɩnyu yecuŋ.

²⁷ na dino ḏabupaḏa ganu ḏaḏa? ḏɩmete. ŋuɽun ŋe ŋɩrṯa? ŋuɽun ŋe ŋeḏi ŋɩru a? awe, namɩni ŋuɽun ŋe ŋeḏi ḏɩməṯo.

²⁸ gi gwune iləḏuɽə ilarno gwiji gwidujɩnu gwiŋir gi jei ganu jeḏi elo ḏɩməṯo ḏe, ŋədu ŋeḏi ŋɩru ŋeḏi ŋuɽun ŋun ŋigelijɩlo elo musaŋ no.

²⁹ elo gwiro elo gweḏi liju kuwei a? gwədu gweḏi liji lun liro ga dino, dino na? yɩti, gweḏi liji lun liro ga dino dino,

³⁰ gi gwune elo gwiro gwetɩdo; na ŋu gwar lulduji lun luɽəno liŋir gi jei ganu lugwun ḏɩməṯo ḏe, na lulduji lun late luɽəno no liŋir gi jei ganu lugwun ḏɩməṯo ḏe ḏagin.

³¹ na ilki dino ŋɩma ŋeḏi ŋuɽun ŋun ŋigelijɩlo elo musaŋ ḏɩməṯo ḏe ṯeno a? awe, ŋate ŋiro dino duṯ no. nilmɩni maṯaji ŋuɽuna ga ŋun ŋigelijɩlo elo musaŋ.