rumiya 15 - ŋuɽun ŋun ŋiya ŋun ŋikaiilo elo 1966

asa 15

¹ na dino liŋə lun libɩɽəno nanu iləṯi gəmɩju nanu ilape ḏɩmumɩḏa ḏagin lun lɩmumɩḏo na ilo liŋiri lula lage.

² naṯi gwete gwete ŋuŋiri gworo gwun gwijaḏiḏilgwe ga ŋuərrɩjo ŋuɽuna ŋun ŋiŋir kani ŋubɩɽi nanu ŋudɩrkaḏaice kɩɽelo dɩməṯo ḏe.

³ gi gwune kɩrisṯo dino gwate gwiŋiri gwula gwuŋun no, namɩni gi gwune ŋulinu, ḏɩḏenɩḏia ḏeḏi luŋa lun liḏenaŋa ḏɩmobɩliḏate lugwi.

⁴ gi gwune wei ŋun ŋimululi gwerre ŋulinu kani ŋijilaŋijo na kani ḏɩmaṯajia ḏe ga na ḏibɩɽeḏa ḏe nanu ḏun ḏijo kɩḏam geḏi elo iləṯi ḏɩḏuḏɩnɩjo.

⁵ na elo gwe ḏɩmaṯajia ga na ḏibɩɽeḏa ḏe nanu gwajiḏəḏə ŋuɽuna ŋetɩdo kal gete lagaloŋu gi ŋun ŋandro ḏi yecu kɩrisṯo,

⁶ kani nyabuḏi eloŋu gwun gwiro baba na gwele gwage gwun gwan yecu kɩrisṯo ḏugwor ḏe ḏetɩdo na ŋwal ŋwe ŋwetɩdo.

ḏuməḏɩjo liji ŋuɽuna ŋiŋir ŋeḏi yecu lun liro ga dino

⁷ na ŋiro dino əmɩnyil gworo gi gwune kɩrisṯo dino mijəmɩnyi gi ḏoɽeḏa ḏeḏi elo.

⁸ na nyi gwarno, kɩrisṯo maro gaḏarn geḏi liji lun luɽəno kani nuaŋiḏi ŋuɽuna ŋun ŋiro gwerkwe ŋeḏi elo, kani ŋwulmaṯaji ŋuɽuna ŋalo ŋun ŋiḏəḏilo elo lɩgwurninyo,

⁹ na kani a liji lun liro ga dino nalbuḏi eloŋu gwan ŋino ŋuŋun, gi gwune ŋulinu, na dino nyi gwar gwaŋorṯeḏa gi liji lun liro ga dino na nyi gwelɩŋi gwan jiri juŋa.

¹⁰ nuar dino, diliḏil ganu nyaŋa lun liro ga dino liji le luŋun.

¹¹ nuaɽu nuarno, orṯeḏɩl gwelɩnya nyaŋa wei gwun gwiro elo lun liro ga dino, aṯi liji wei elɩŋa delɩŋa de dorṯeḏa ŋuŋu.

¹² na isaia gwar dino no, ḏɩɽibu ḏaje ḏeḏi yisa, na ŋu gwun gwəḏiɽi gwaro gwele gweḏi liji lun liro ga dino, na liji lun liro ga dino lagele ḏiḏuḏɩnɩjo ḏagin lugwun.

¹³ na elo gwe ḏiḏuḏɩnɩjo gwajenyeje ḏidila ganu wei, na ḏouwɩɽiḏa gi gwune aṯanyəmɩnyi, kani nyenyeḏe ḏiḏuḏɩnɩjo ḏe ŋɩma ŋe ŋeḏi gwuɽɩwə gwun gwɩpiḏo pɽul.

bulus gwarno gwiṯi ḏugwor gi gwune gwuli jawab ḏugwor ḏe ḏiḏɩnu

¹⁴ na gwan nyaŋa lɩmagəri na nyi kwulo gwi ŋilɩŋiḏɩlo muma, nyalenyeḏo ḏiŋiriḏa ganu, nanyalenyeḏo ḏilɩŋeḏa ganu wei, nyaləṯi ŋɩma nyalouwɩɽio gworo lagaloŋu ḏalɩmia ḏe.

¹⁵ namɩni nyi ŋulijajilo ḏibɩɽeḏena ḏe nanu gworki ŋan ŋuɽun kworo kani ŋajaḏɩŋəni gi gwune ḏiŋiriḏa ḏun ḏiminyi elo ḏəḏə,

¹⁶ niro gaḏam geḏi yecu kɩrisṯo gi liji lun liro ga dino, na ŋɩru ŋun ŋɩpiḏo pɽul ŋun ŋaṯɩlapa ŋiro ḏuməḏɩjo liji ŋuɽuna ŋiŋir ŋeḏi elo, kani a liji lun liro ga dino alro ḏiḏuga ḏun ḏaminyɩnu ḏupiḏi pɽul gwuɽɩwə gwe gwun gwɩpiḏo pɽul.

¹⁷ na dino nyi gwəṯ iḏɩbuṯana ḏinyi ḏi yecu kɩrisṯo gwan ŋɩru ŋun ŋaṯɩləpijo eloŋu.

¹⁸ gi gwune nyi gwate gwəṯi ḏibɩɽeḏa nanu gwiumə gwan ŋuɽun ŋədi no, namɩni ŋiro ŋun ŋɩmal kɩrisṯo duji nyi gwe, kani a liji lun liro ga dino ləṯeijo nəni, na ŋun ŋulduji ŋuɽun ŋe na ŋɩru,

¹⁹ ŋɩma ŋe ŋun ŋəŋinu ŋɩru ŋe ŋɩbuḏo na ŋɩdi ŋun ŋɩmobeje liji ga ṯuṯ, ŋɩma ŋe ŋeḏi gwuɽɩwə gwun gwɩpiḏo pɽul, na dino ŋɩne urucəlim na kalo gun guwəɽeico ilirikuna galo, nyi məṯɩmi ḏuməḏɩjo liji ŋuɽuna ŋiŋir ŋeḏi kɩrisṯo.

²⁰ na dino nyi gwəṯi ḏugwor gworki ḏe ḏuməḏɩjo liji ŋuɽuna ŋun ŋiŋir ŋeḏi yecu kɩrisṯo, kalo gun gate gaŋɩne kɩrisṯo no, kani ate niuṯe kama elo geḏi gwun gwiro kaja no.

²¹ namɩni gi gwune ŋulinu, liji lun late lɩdiŋɩnu ŋu gwe no lar laŋu, na luŋa lun late lɩdiŋɩnu no na ŋara ŋalilɩŋe.

ḏuməḏɩno ḏeḏi bulus ḏeḏi ŋɩru ŋuŋun

²² na ŋuɽun ŋeno ŋimiḏuḏɩni ŋwamon ganu ŋutu nyi gwawila lagalo.

²³ namɩni gwunnɩno nyi gwate gwəṯi gala minu gi jɩmɩrɩgen ganu ceno no, na gi gwune nyi gwəṯi ḏugwor gworki nyi gwaṯar jɩḏilio jutu no, nyi gwaŋila lagalo,

²⁴ na ḏa nyi mele ŋɩne isbania nyi gwila lagalo gwe, gi gwune nyi gwuḏuḏɩnɩjo nyi gwajaŋu kwilo gwinyi nanyalinyigele gi ṯaṯ wɽi, ḏa nyi majiga gwɩti na nyi menyeḏe ḏidila ganu ḏalo gwerre.

²⁵ namɩni gwunnɩno nyi gwele urucəlim kani niəpijo liji ŋɩru lun lɩpiḏo pɽul.

²⁶ gi gwune liji leḏi makɩḏunia na akaia ləmɩnyu gworki ləḏəḏə liji ḏiḏəḏo ḏəḏi lun late ləṯi ŋɩdio no, luŋa lun lɩpiḏo pɽul lun lijo urucəlim.

²⁷ naliŋir dugwore gworki nalɩduji, na gwerkwe luŋa ləṯi gəmɩju lagin. gi gwune ḏa liji lun liro ga dino lɩmaməṯo ŋɩmaga ŋuɽun ganu ŋagin ŋeḏi gwuɽɩwə, na dino ləṯi gəmɩju naləpijo ŋɩru dino ŋɩdi ŋagin.

²⁸ na ŋiro dino na ḏa ŋɩmɩlṯɩmi ŋeno na ŋɩmɩlḏəḏə ŋɩdio ŋeno, nyi gwila lagalo gwe isbania.

²⁹ na nyi gwilɩŋiḏi ŋuɽuna muma ḏa nyi mila lagalo gwe nyi gwila nyi gwenyeḏo ḏɩmoreḏa ḏeḏi ŋuɽun ŋun ŋiŋir ŋeḏi kɩrisṯo.

³⁰ na nyi gwaɽoṯeḏo lagalo lɩmagəri, gwele gwe gwage gwun gwan yecu kɩrisṯo na ḏəmɩnyo ḏe ḏeḏi gwuɽɩwə gwun gwɩpiḏo pɽul, nyi gwarno ilabɩɽe nanu nyiŋale gi ḏuməḏɩjo eloŋu ḏalo gwan nyi,

³¹ kani nyi kədəḏɩnə ga gi liji lun laṯe ləmɩnyu eloŋu ŋɩne yauḏia no, kani a ŋɩru ŋinyi ŋɩne urucəlim əmɩnyini gi liji lun lɩpiḏo pɽul,

³² na dino nyi gwila lagalo ḏidila ḏe ganu ŋuɽun ŋe ŋun ŋɩbunyɩlo elo na ilajiga kal gete kani nyiawiḏiga ḏitɩwar.

³³ na elo gwe ḏouwɩɽiḏa gwanyalije wei. gwerkwe.