rumiya 1 - ŋuɽun ŋun ŋiya ŋun ŋikaiilo elo 1966

asa 1 ḏisalimia

¹ nyi gwan bulus gwun gwiro wainy gweḏi yecu kɩrisṯo, na nyi gworniḏɩnu niro ḏuwəjo, niduji kaja gwan ŋuɽun ŋun ŋiŋir geḏi elo,

² gun ŋaruŋe gwerre ŋwulḏəḏo liji nebɩŋa le luŋun kɩḏam geḏi elo gun gɩpiḏo pɽul,

³ ŋan ŋaɽe ŋuŋun, ŋun ŋiduḏi kərɩḏ yeḏi ḏauuḏŋa kalo geḏi aŋɩnu gwe,

⁴ namɩni gwuɽɩwə gwe gwun gwɩpiḏo pɽul ŋu gwaŋinu gwiro ŋaɽe ŋeḏi elo ŋɩma ŋe ḏidiɽo ḏe gi liji lun laiyo, gwun gwan yecu kɩrisṯo gwun gwiro gwele gwage.

⁵ na ŋu gwe anaməṯo ḏiŋiriḏa na ḏuwəja kani ḏideŋɩneja ḏe ḏɩməṯo je gi liji leḏi jɩmɩrɩgen wei gwan jiri juŋun,

⁶ na lagin nyaŋa dino liro lun lorniḏɩnu leḏi yecu kɩrisṯo.

⁷ nyi gwo gwulijaje nyaŋa wei lun lo rumiya lun ləmɩnyɩlo elo, lun lorniḏɩnu alro liji lun lɩpiḏo pɽul, ḏiŋiriḏa ḏaje lagaloŋu na ḏouwɩɽiḏa ḏeḏi elo gwun gwiro baba gwage, na gwele gwun gwan yecu kɩrisṯo.

bulus gwəṯi ḏugwor gwarno gwele rumiya

⁸ gwerre ganu, nyi gwaṯeico eloŋu gwi sukran yecu kɩrisṯo gwe gwan nyaŋa wei, gi gwune ḏɩməṯo ḏalo ḏima lyi umə kɩḏilio wei.

⁹ gi gwune elo gwun gwaṯiəpijo ŋɩru gwuɽɩwə gwe gwi ŋuɽun ŋun ŋiŋir ŋeḏi ŋaɽe ŋuŋun, gwiaŋiḏi galakwe nyi gwate gwatɩnḏuḏɩni no naṯajaḏɩŋane bubruṯ gi ḏuməḏɩjo eloŋu ḏinyi,

¹⁰ naṯiɽoṯeḏe eloŋu bubruṯ, na ḏa ṯaṯ ḏɩmaje ḏəḏi gwunnɩno gɩdo ḏimibuje ŋuɽun ŋe ŋun ŋəmɩnyɩlo elo na nyi gwila lagalo.

¹¹ gi gwune jei jiɽinyɩḏi kwururum na nyi gwar gwajaŋu, kani ŋwajiḏəḏə ḏiḏəḏo ḏədi ḏeḏi gwuɽɩwə ḏajimaṯaji galo;

¹² na ḏa ilmaje kal gete ilabɩɽe nanu ḏɩməṯo ḏe ḏalo na ḏinyi.

¹³ na lɩmagəri, nyi gwubunyaje nyalalɩŋe ŋwamoŋ ganu ŋutu nyi gwaṯarno nyi gwila lagalo, namɩni nyi mobɩlṯeḏe kəbe na gwunne, kani niəṯr nyaɽe lagalo dino gi gwune liji leḏi jɩmɩrɩgen jun jiro kaja.

¹⁴ nyi gwəṯi gəmɩju gi ligrigi na gi liji lun liro kaja dino, na gi liji lun lilɩŋiḏi ŋuɽuna ŋutu na lun liro jɩɽilo dino;

¹⁵ na ŋiro dino nyi ŋwəṯi ḏugwore gworki ŋɩma ŋe ŋinyi wei, nyi gwajuməḏɩjo ŋuɽuna ŋun ŋiŋir ŋeḏi yecu kɩrisṯo lun lo rumiya dino.

ŋuɽun ŋiŋir ŋeḏi yecu kɩrisṯo ŋiro ŋɩma ŋeḏi elo gi ḏɩkədəḏɩnə ga

¹⁶ gi gwune ḏare ḏate ḏapinyi gwan ŋuɽun ŋiŋir ŋeḏi yecu kɩrisṯo no, gi gwune ŋiro ŋɩma ŋeḏi elo gi ḏɩkədəḏɩnə ga gi liji wei lun ləmɩnyu; gi liju gwerre na gi ligrigi dino.

¹⁷ gi gwune ŋəṯulo ŋaŋinu ŋuɽuna ŋiŋir ŋeḏi elo gi ḏɩməṯo ḏun ḏibəḏəṯɩjo ḏɩməṯo, gi gwune ŋulinu, gwiji gwun gwidujɩnu gwiŋir gi jei ganu jeḏi elo gwəmɩḏe ḏɩməṯo ḏe.

ŋuɽun ŋun ŋɩki ŋeḏi liji lun liro ga dino

¹⁸ gi gwune ḏɩɽeḏa ganu ḏeḏi elo ḏaŋinu uro kanyin ŋuɽun wei ŋeḏi liji ŋun ŋədu ŋeḏi elo ŋiro no, na ŋun ŋɩki, lun laṯɩkwoma ŋuɽuna ganu ŋun ŋiro gwerkwe gworo gwe gwun gwɩki.

¹⁹ gi gwune ŋuɽun ŋun ŋɩmalɩŋini ŋan elo ŋaŋinu lagin muma, gi gwune ŋɩmal elo aŋijo.

²⁰ gi gwune uro kaja gun geluge gɩḏilio, ŋuɽun ŋeḏi elo ŋun ŋate ŋaŋəḏɩlo liji no namɩni ŋaŋinu muma, na ŋilɩŋiḏɩnu kworo ganu gwun gwugelu na gwərru, na ŋeno ŋiro ŋɩma ŋuŋun gi gɩḏilio na ŋuɽun ŋuŋun wei ŋun ŋiŋirano kworo gweḏi liji. na dino late ləṯi ŋuɽuna ŋədi no,

²¹ gi gwune ḏa lɩmalɩŋe eloŋu gwate malbuḏi gi elo no, na gwate gwaṯɩleico sukran no, nalmɩni ro jai gi ḏuməḏɩno ganu ḏagin, na dugwor dagin rimi ganu de diro jɩɽilo.

²² naṯɩlarno lilɩŋeḏeno nalmɩni ro jɩɽilo,

²³ nalbi ḏoɽeḏa ḏeḏi elo gwun gwate gwaṯɩdigɩɽe no ŋɩdi ŋe ŋun ŋɩkədɩnu gi aŋɩnu yeḏi gwiji gwun gwaṯɩdigɩɽe, na nyiɽuwə, na ŋɩdi ŋun ŋəṯi ŋwara gwukwoɽo, na juŋə.

²⁴ na ŋiro dino lɩmal elo gele dino ŋuɽun ganu ŋun ŋɩki ŋun ŋɩbunyɩlo dugwor dagin gworki ŋun ŋiro ŋeḏor, kani nalki jiŋɩno jagin ŋɩmaga laginŋu.

²⁵ gi gwune luŋa lɩməbi ŋuɽuna ganu ŋun ŋiro gwerkwe ŋeḏi elo ŋɩwɩɽɩgal ŋe, nalorṯeḏa ŋɩdio ŋun ŋigelijɩlo elo naləpijo ŋɩru naliŋide ŋuŋu gwun gwugelo ŋɩdio wei, gwun gwaṯɩbuḏɩni gi gɩḏilio. gwerkwe.

²⁶ na gwan ŋuɽun ŋeno lɩmal elo gele ŋuɽun ganu ŋun ŋɩki ŋeḏi jiŋɩno, na la lagin lɩməbi ŋuɽuna ganu ŋun ŋiḏəḏɩlo elo, gworo gwe gwun gwɩkiḏiḏɩlgwe,

²⁷ na ŋiro dino ləmɩnyo lɩmadonye ḏidujia ŋuɽuna gi la ḏun ḏigelɩlo elo na ḏɩbuḏə nanu ḏagin ḏun ḏɩki nalwɩwɩrlane kworo elo liro ləmɩnyo, nalgele ŋuɽuna ŋun ŋɩki gworki ləmɩnyo ləmɩnyo, nalape gi lulo lagin ḏakɩmiḏa ḏe ḏidujia ḏagin dun ḏɩdeleḏo.

²⁸ na gi gwune nate naləmɩnyi laməṯəḏə eloŋu gi ḏilɩŋeḏa ḏagin no, lɩmal elo ḏəḏə ŋadɩgɩɽenya ŋiro kaja ŋun ŋate ŋəṯi jei ganu no kani alɩduji ŋun ŋate ŋideleḏo no,

²⁹ lenyeḏo ŋuɽuna ganu wei ŋun ŋɩki, na ŋuɽun ŋun ŋɩki gworki, na ḏutɩḏa jei ganu, na ŋɩdigin; lenyeḏo ḏɩɽeḏidia ganu gi liji, na ḏiɽinyɩḏa ḏɩmar, na ḏikiḏiḏia, na ḏirdeijo ganu, na ḏikino maga, na liro liji lun laṯuməḏəṯə gi liji elo nyɩkwom,

³⁰ na lun luməḏəṯi gi liji elo, liɽi eloŋu ganu, na ḏirəno liji jai, na ḏɩbuḏia lula lagin, laṯuməḏəṯo gi lulo lagin, naṯɩluməḏɩni ga ŋwuɽa ganu ŋwagin ŋuɽun ŋun ŋɩki nalɩbunyi ŋɩkeno, late laṯɩləṯeijo nəni lun lilɩŋiḏɩlo no,

³¹ ŋate ŋilɩŋiḏɩlo ŋetɩdo ŋwuɽa ganu no, na ŋate ŋɩməṯɩlo ŋun ŋɩkaiilo no, late ləṯi ḏəmɩnyo ḏun ḏiro gi gworo gweḏi liji no, i ŋino no,

³² na luŋa lilɩŋiḏi muma ḏakɩmiḏa ḏeḏi elo ḏun ḏarno luŋa lun ŋaṯɩliduji ŋiro gi gworo kweno lɩdeledo lai, ŋate ŋaṯɩlinduji kuwei no, namɩni dino ladile ganu luŋa lun ŋaṯɩliduji.