maṯa 7 - ŋuɽun ŋun ŋiya ŋun ŋikaiilo elo 1966

asa 7 ḏakɩmia liji lun liro kaja

¹ lo laṯanyalakɩmi kani ate aṯajilakɩmi no;

² na ŋiro gi gwune aṯanyakɩmide na nyalakɩmi dino, na əlmɩḏ yun yaṯanyayuni ŋɩdio yaje yajilwəɽəṯijo.

³ gwudaro gəko aṯaŋalade kacɩder gun gijo kei geḏi magalo, namɩni ḏuɽi dun dijo kei ŋuŋa nate naŋaŋu no?

⁴ namɩni gələkwe ŋəṯi ŋɩma ŋeico magalo no, ouwɩrɩcinyi ŋaŋawala ŋacɩdera kei ŋuŋa? eʼe na ḏuɽi do kei ŋuŋa.

⁵ ŋa kwe gwun gwəṯi ŋuɽuna ŋanu ŋɩttən, di gwerre ganu ḏuɽi dun dijo kei ŋuŋa, kəbe na ŋadaŋaga muma ŋa gwəṯi ŋɩma ŋa gwawala magalo gacɩdera gun gijo kei guŋun.

⁶ aṯanyanḏəḏə nyino ŋɩdio ŋun ŋaṯanyalo ŋun ŋɩpiḏo pɽul di elo no, na aṯanyawinijo juḏurə nyida nye nyalo nyun nyiro ŋwoiny ŋwun ŋwiro bibɩɽŋal no, kani ate alɩnḏuṯe ŋwara ŋwe ŋwagin nalwɩrla ŋalo nanyalḏuge no.

ḏibɩɽeḏa nanu gi ḏuməḏɩjo eloŋu

⁷ ɽoṯeḏɩl nalajiḏəḏə; bunyil nyalabuje; piḏɩl naləjiḏɩjo;

⁸ ŋi gwune gwun gwaṯɩɽoṯeḏe gwaɽe, na gwun gwaṯɩbunyi ŋwulbuje, na gwun gwaṯɩpi gɩburə gwaliḏɩjo.

⁹ gwiji gwo gwura lagalo ḏa ma ŋaɽe ŋuŋun ɽoṯəḏɩjo ŋia ŋe, ŋuḏəḏə gɩḏolia?

¹⁰ na da ŋɩmaɽoṯəḏɩjo lumi le, ŋwuḏəḏə ḏuŋɩnyaŋe a?

¹¹ na dino nyaŋa lun lɩki na ḏa nyalmalɩŋe nyaləḏəḏə nyaɽe nyalo ŋɩdio ŋun ŋiŋir, namɩni ŋiro ŋaḏa ŋutəno baba gwalo gwe kanyin lulḏəḏə lun lɩɽoṯeḏo lugwun ŋidio ŋiŋir?

ŋuɽun ŋiŋir gworki

¹² na ŋiro dino ŋuɽun wei ŋun ŋɩbunyalo ŋaŋal liji ərrɩjo lagalo, dujɩlo nyaŋa dino; gi gwune ŋeno ŋiro ŋuɽun ŋun ŋigelijɩlo elo musaŋ na nebɩŋa.

daṯ dɩttən

¹³ əḏɩl kouwɩr yun yɩmə ganu, gi gwune ouwɩr yiwɩra ganu na ṯat ḏiwɩra ganu ḏun ḏaṯele gi ḏaiya, na luŋa luti lun ləḏi kouwir yono;

¹⁴ namɩni ouwɩr yun yɩmə ganu na ṯaṯ ḏun ḏɩmə ganu ḏun ḏaṯele gi ḏɩmiḏa, na luŋa louwɩrio lun labuje.

ŋuɽun ŋun ŋiro gwerkwe na ŋun ŋiro ŋɩwɩɽɩgal

¹⁵ jil muma di nebəŋa lun liro lɩwɩɽɩgal lun lɩwidi lagalo lɩkanu jiria jeḏi joŋol namɩni gi dugwor ganu nalro jamɽainy jun jiṯɩlo lun liṯɩlo jaŋu.

¹⁶ nyalilɩŋiḏi nyaɽe nye nyagin. liji laṯɩwone nyaɽe gi ŋwuɽuṯ gi jugi a? i ŋwuwɩḏa gi ŋiɽebeny a?

¹⁷ na ŋiro dino gwaɽe wei gwun gwiŋir gwaṯɩɽe nyaɽe nyun nyiŋɩr, namɩni gwaɽe gwun gwɩki gwaṯɩɽe nyaɽe nyun nŋɩki.

¹⁸ gwaɽe gwun gwiŋir gwate gwəṯi ŋɩma gwaṯɩɽe nyaɽe nyun nŋɩki no, na dino gwaɽe gwun gwɩki gwate gwəṯi ŋɩma gwaṯɩɽe nyaɽe nyun nyiŋir no.

¹⁹ na jaɽe wei jun jate jaṯɩɽe nyaɽe nyiŋir no, gwouɽəne ga na gwagelini kigo.

²⁰ na dino nyaɽe nye nyagin nyalɩŋine.

ŋuɽun na ŋɩru

²¹ na lədu wei lun laṯɩnyieicɩno, gwele, gwele, ləḏi ŋele ŋeḏi kanyin no, namɩni gwun gwaṯɩlduji ŋuɽuna ŋun ŋɩbunyɩlo baba gwi gwun gwaṯɩje kanyin.

²² na gi lamon leno lutu linyieicɩno, gwele, gwele, anate naṯaŋiḏi ŋuɽuna jiri je juŋa ŋun ŋaŋijijɩlo elo na? na jiri je juŋa naṯanəṯi ḏiŋeroma, na jiri je juŋa nate naṯape ŋɩru ŋɩbuḏo ŋutu na?

²³ na nyiluməḏɩjo, nyileicɩno, nyi gwate gwilɩŋidaje no, abɩrɩl lugwi nyaŋa lun laṯape ŋuɽuna ŋɩki.

jama jɩttən

²⁴ na ŋiro dino gwun gwatɩḏiŋɩni ŋuɽuna ŋeno ŋinyi, ŋularre, gwaro gi gwiji gwun gwəṯi ŋadɩgɩɽenya gwun gwuṯo duno gwuŋun gi loɽi elo.

²⁵ na ŋau ni, na gwəri wila na ḏɩron mɩɽi duno kweno, nate nuiḏi no gi gwune gwəṯi jama gi loɽi elo.

²⁶ na gwun gwatɩḏiŋɩni ŋuɽuna ŋeno ŋinyi nate nunɩmɩni arre no, gwaro gi gɩɽilo, gwun gwuṯo duno gwuŋun kəmuɽ elo,

²⁷ na ŋau ni, na gwəri wila na ḏɩron mɩɽi duno kweno, nuiḏi ḏido ḏɩki gworki.

²⁸ gwune na yecu ṯɩmi ŋuɽuna ŋeno, na liji obaga ṯuṯ gi ḏalɩmia ḏuŋun,

²⁹ gi gwune nulalɩmi gwiro gi gwiji gwun gwəṯi ŋelɩnya, na gwate gwiro gi jalgaṯɩm jagin no.