maṯa 3 - ŋuɽun ŋun ŋiya ŋun ŋikaiilo elo 1966

asa 3 yuwana mamadan na ŋuɽun ŋuŋun

¹ na ŋwamon ŋwono na yuwana mamadan wila gi ḏuməḏɩjo liji kiḏɩwer ḏeḏi yauḏia,

² nuleicɩno, wɩrlal galo ŋuɽun ŋalo ŋun ŋɩki, gi gwune ŋele ŋeḏi kanyin ŋo gɩṯo.

³ kweno gwiro gwun gwuməḏugwe nebi gwun gwan isaia, nuarno; ŋwal ŋweḏi gwiji gwete gwun gwaṯornɩḏe galo uro kiḏɩwer, nuarno, ṯuḏɩnil ṯaṯ galo ḏeḏi gwele gwun gwiro elo, nyaṯuḏɩni daṯ duŋun muma.

⁴ na yuwana gwaṯɩkani giria ŋun ŋiro jola jeḏi gamɩla, na gwaṯɩkani ŋɩma gi lɩbuɽi, na gwaṯeʼe jama na laiya leḏi geḏo.

⁵ na liji leḏi urucəlim lɩmətuḏo lugwun, na leḏi yauḏia wei na lun luwəɽeico ḏɩrawe galo ḏun ḏan urḏun.

⁶ nulbabṯaije gi ḏɩrawe ḏun ḏan urdun, nalteije ŋuɽuna ŋagin ga ŋun ŋɩki.

⁷ nuaŋu liji lutu lun liro lɩbarɩsi na lun liro lisadugi nalwila gi ḏibabṯajɩno, nuleicɩno, nyaɽe nye nyeḏi juŋə, əḏi gwiro gwaŋɩjaje nuarno nyalabɩre gi ḏɩɽeḏa ganu ḏun ḏila?

⁸ ɽil nyaɽe nyun nyajilnyilɩŋe nyalmouwɩrla ga muma;

⁹ na nya lo luməḏɩni nyalanarno, anəṯi babaŋ gwun gwan ibraim, gi gwune nyi gweiceijɩno elo gwəṯi ŋɩma gwədiɽijo ibraimŋ nyaɽe gi nyɩdol nyeno.

¹⁰ na gwunnɩno ŋuɽi ŋo gɩṯo kalo ge dro de jaɽe. na jaɽe wei jun jate jaṯɩɽe nyaɽe nyiŋir no gwouɽəne ga na gwagelini kigo.

¹¹ gwerkwe nyi gwajibabṯaije ŋau ŋe ŋeḏi ḏuwɩrla ga ŋuɽun ŋun ŋɩki. namɩni gwun gwila gɩdo lugwi ŋu gwətəno ŋɩma lugwi; na nyi gwate gwɩdeleḏo gwaɽe jɩwɩḏe juŋun no. ŋu gwajibabṯaije gwuɽɩwə gwe gwun gwɩpiḏo pɽul na igo.

¹² na jɩrda juŋun jo gi ḏi ḏuŋun, jujumuje gaɽa muma, nuwəɽeice ŋwona ŋwuŋun ldu ŋuɽulo ŋuŋun namɩni dɩrda dalnuni igo ye yun ŋate yaṯai no.

ḏibabṯaijɩno ḏeḏi yeau

¹³ na yecu wila jalil ḏi yuwana gwun gwijo gi ḏɩrawe ḏun ḏan urdun, gwar gwəbabṯaijɩno lugwun.

¹⁴ namɩni yuwana akajo nueicɩno, nyi gwiro gwun gwibunyaŋa, ŋa gwinyibabṯaije namɩni ŋa ŋawila lugwi a?

¹⁵ na yecu wɩrlijo ŋuɽuna nueicɩno, ouwɩrico mino, gi gwune ŋiŋir lage ilṯɩmi ŋuɽuna wei ŋun ŋiŋir. nuouwɩrico.

¹⁶ gwune nubabṯaijɩni, na yecu diɽeḏelo ŋau ganu; na kanyin iḏinijo nuaŋu gwuɽɩwə gweḏi elo nugwulə gwiro gi gɩɽidir nujaḏaṯa lugwun,

¹⁷ na ŋwal gwulə kanyin nalarno, kweno gwiro ŋaɽe ŋinyi ŋun ŋaṯiəmɩnyi, na ŋaṯɩnyiŋiri ḏugwore.