maṯa 27 - ŋuɽun ŋun ŋiya ŋun ŋikaiilo elo 1966

asa 27 yecu gwuḏuḏɩnu gi jei ganu jeḏi bilaṯus gwun gwiro muḏir gwiro gwiji gweḏi rumiya

¹ gwune na gal uɽe jɩsis wei jun jɩbuḏo na liji lun luɽun uməḏəṯe laginŋu ḏi yecu gwalɽinye;

² nalgaki nalgwuloḏa nalḏəḏə bilaṯusŋ gwun gwiro mudir.

ḏaiya ḏeḏi yauḏa

³ gwune na yauḏa gwun gwiḏəḏɩlo nuaŋu yecuŋ gwakɩminu, nuwɩrla ga ŋuɽun ŋuŋun ŋun ŋərrulo nuwəɽɩjo jɩsis jɩbuḏo na liji lun luɽun əlŋɩrucə ŋiro gi kaiyiri ḏuɽi ṯəɽɩl,

⁴ nuleicɩno, nyi mape ŋuɽuna ŋɩki ŋi gwune nyi mugɩḏi ŋuwən ŋun ŋate ŋapo ŋuɽuna ŋɩki no. nabicɩno, aŋ gwiro lagəri? apɩloŋa.

⁵ nuwini əlŋɩrucə ye yun iro gi kaiyiri kwu dunu gweḏi elo gwun gwubuḏo ki nuwele, nuiḏeije gwula gwuŋun.

⁶ na jɩsis jun jɩbuḏo ape əlŋɩrucə yeŋiro gi kaiyiri naleicɩno, ŋate ŋiŋir ŋiliŋele kalo geḏi əlŋɩrucuyeḏi dunu gweḏi elo no, gi gwune ŋiro jili jeḏi ŋuwən.

⁷ nauməḏəṯe laginŋu naleḏɩla ḏɩri ḏeḏi lɩbarṯo leḏi niḏi, ki naṯɩlakwuro liji leḏi jɩmɩrɩgen jiro kaja.

⁸ na dino ḏɩri ṯeno ḏan ɩri ḏeḏi ŋuwən, uro kaja kono kəbe gwunne.

⁹ na kaja kono nalṯɩmi ŋuɽuna ŋun ŋarɩŋe irimiya gwun gwiro nebi gwune ərune, nalape əlŋɩrucə ŋiro gi kaiyiri ḏuɽi ṯəɽɩl yun yiro jili jeḏi ŋu jun jigelɩlo liji leḏi isreiyil,

¹⁰ nalḏəḏə lɩbarṯaŋe leḏi niḏi naleḏɩla ḏɩri, gi gwune uməḏɩjinyine gwele gwun gwiro elo.

yecu gwuḏuḏɩnu gi jei ganu jeḏi bilaṯus

¹¹ na yecu ḏuḏɩni gi jei ganu jeḏi mudir, na mudir ɽoṯəḏɩjo nueicɩno, ŋa gwiro gwele gweḏi liju a? na yecu eicɩno, ŋa gwame.

¹² na gaja gun gicɩgige jɩsis jun jɩbuḏo na liji lun luɽun, nate nanuməḏo ŋuɽuna ŋədi no.

¹³ na bilaṯus eicɩno, ŋa gwate gwudiŋɩnu ŋuɽuna ŋun ŋuməḏəṯaŋalɩni elo ŋutu na?

¹⁴ namɩni gwate manuməḏo ŋuɽuna ŋədi no, na dino mudir nuobaga ṯuṯ gworki.

¹⁵ na kɩmuri naṯi mudir kədə lɩbabunya galo lete lun laṯɩlbunyi.

¹⁶ na kaja ko naləṯi lɩbabunya lete lɩki gworki lun lan barabas.

¹⁷ na dino kaja gun gaɽuwaḏɩlge ldu nal bilaṯus eicɩno, əḏi gwiro gwubunyanya gwajikədəḏɩjo ga? barabas i yecu gwun gwan kɩrisṯo a?

¹⁸ gi gwune nulɩŋe gwalḏəḏə gi gwune lɩkijo yecuŋ dugwore.

¹⁹ na gwune juga kɩḏoɽ geḏi ḏakɩmiḏa na gwa gwuŋun wəje lugwun nueicɩno, ŋa gwo gwanəjico kwiji kweno gwun gwɩpiḏo pɽul ŋuɽuna ŋəḏi, gi gwune gwunanyene nyi gwəṯi ŋwuɽeḏɩnya ŋwutu ŋwume gwan ŋu.

²⁰ namɩni jɩsis jun jɩbuḏo na liji lun luɽun nalidi liji nanu gi ḏiɽoṯeḏa barabasŋ almɩnɽinye yecuŋ.

²¹ nal mudir wɩrlijo ŋuɽuna nuleicɩno, əḏɩŋa liro lun liro lɩttən gwun gwubunyanya gwajikədəḏɩjo ga? naleicɩno, barabas.

²² nal bilaṯus eicɩno, nyalar nyi gwəpijo yecuŋ aŋe gwun gwan kɩrisṯo? na wei naleicɩno, ouwɩrico ilɽɩnye gi luɽi lun lɩmalɩḏo ganu.

²³ nal mudir eicɩno, gwarra? gwapaŋe gwɩki? naləriene gwula nalarno, ouwɩrico ilɽinye gi luɽi lun lɩmalɩḏo ganu.

²⁴ gwune na bilaṯus aŋu gwate gwəṯi ŋɩma lulḏami ŋuɽun ŋe ŋədi no, nalmɩni are ŋɩrəkwənəŋe, nuapa ŋau nuwei di duŋun gi jei ganu jeḏi liji, nuleicɩno, nyi miŋir nanu ŋuwən ŋe ŋeḏi gwiji kweno gwun gwiŋir. arrɩlo nyana.

²⁵ na liji wei wɩrlijo ŋuɽuna naleicɩno, ŋuwən ŋuŋun ŋaje lagəri na nyaɽe uyəri.

²⁶ nulkədəḏɩjo barabasŋ galo na gwune nupi yecuŋ, nulḏəḏə gwalɽinye gi luɽi lun lɩmalɩḏo ganu.

ḏiɽinyɩḏa ḏeḏi yecu gi hiɽi lun lɩmalɩḏo ganu

²⁷ na ajana yeḏi mudir gwulo yecuŋ gi ḏɩgara ganu, nalwəɽeice ajana wei ldu.

²⁸ nalwala ŋɩdio wei ŋuŋun nalgaki giria gun gure;

²⁹ nalɽenyo jugi gi laḏe nalgaki gi lja elo luŋun, nalŋele iṯa gi ḏi ḏuŋun ḏun ḏiro ḏiŋir; nalculɩjo ŋwurko ŋwe nalaki jumo naleicɩno, ŋa gwiŋir ŋa gwele gweḏi liju a?

³⁰ nalgwoginya nanu, nalape iṯa nalpi kɩɽelo.

³¹ na gwune akɩlo jumo nalwala giria gun gure, nalgaki jiria juŋun, nalgwuloḏa gi ḏiɽinyɩḏa gi luɽi lun lɩmalɩḏo ganu.

³² na gaja gun gituḏɩlge nalbuje gwəmɩnyəŋe gweḏi gerawan gwun gwan simian. gwuremeṯeḏeicɩlo gi ḏapa luɽi luŋun lun lɩmalɩḏo ganu.

³³ gwune nalwila kalo gun gan juljuṯa, jun jarno, kalo geḏi gwunə,

³⁴ nalici ŋau ŋan kal ŋuɽuḏɩlo ganu mur gwe namɩni gwune nulɩŋaico ŋulmɩni donye gi ŋulyu.

³⁵ na gwune nalabuje gi luɽi elo lun lɩmalɩḏo ganu, nalgəginyeḏe jiria juŋun ganu naljimɩɽi gwumara. kani nalṯɩmi ŋuɽuna ŋun ŋarɩŋe nebi, nalgəginyə jiria jinyi ganu lagin, naljimɩɽi gwumara kalo geḏi luŋa linyi.

³⁶ naljiga naldɩme ŋɩnəwei.

³⁷ nalŋele ŋuɽuna ŋun ŋulinu luɽi nanu kɩɽelo lugwun ŋun ŋicɩgilɩŋe ŋarno, kweno gwiro yecu gwele gweḏi liju.

³⁸ nalɽinye luɽama lɩttən yecuŋale ŋwuɽi ŋwun ŋwɩmalɩḏo ganu, gwete gi ḏi ḏun ḏiro ḏiŋir, na gwete ḏi ḏun ḏiro ḏouwɩr.

³⁹ na liji lun laṯtḏara galo ŋwaṯdḏene naṯɩlirəri ŋwuɽa galo ŋwagin,

⁴⁰ naleicɩno, ŋa gwun gwara gwaki duno gweḏi elo gwun gwubuḏo namɩni arno gwowuṯe ŋwamon ṯəɽɩl, kədəḏi gwula gwuŋa ga ḏa ŋa maro ŋaɽe ŋeḏi elo, gwuləḏo ga gi luɽi lun lɩmalɩḏo ganu.

⁴¹ na dino naṯi jɩsis jun jɩbuḏo nalaki jumo jalgaṯɩmŋale na lun luɽun, naleicɩno,

⁴² gwaṯɩkədə liji liro kaja ga; namɩni gwate gwəṯi ŋɩma gwakədəḏə gwula gwuŋun ga no. ḏa ŋu maro gwele gweḏi isreiyil ouwɩrico nugwuləḏa ga gwunnɩno gi luɽi lun lɩmalɩḏo ganu na anəmɩnyi.

⁴³ nuəmɩnyi eloŋu, ouwɩrico elo kədə ga na ḏa miŋir ḏugwore lugwun, gi gwune gwarno, nyi gwiro ŋaɽe ŋeḏi elo.

⁴⁴ na luɽam dino lun lijille ŋwuɽi elo ŋwun ŋwɩmalɩḏo ganu nalaki jumo ŋuɽun ŋun ŋiro dino.

ḏaiya ḏedi yecu

⁴⁵ na uro anyino ganu na gɩḏilio rimi ganu wei kəbe na sa ro ṯəɽɩl.

⁴⁶ na gwune na sa ro ṯəɽɩl ca, na yecu əri gwula ŋwal ŋwɩbuḏo, nueicɩno, eloi, eloi, lama sabakṯani? ŋuɽun ŋeno ŋarno, elo gwi, elo gwi, gwudaro gəko nuŋinwalane?

⁴⁷ na liji kworo lun lɩḏuḏɩnu ga, gwune naldiŋɩni ŋuɽuna ŋeno, nalarno, ŋu gwo gwumiḏo iliyaŋ.

⁴⁸ na cou gwete lagin enede nuapa sawinja jun jɩməṯi ŋau, nuenyeje ŋau ŋun ŋan kal, nuəḏɩje kiṯa, nuabuje elo nuici dino.

⁴⁹ na lun lɩṯanu naleicɩno, ḏuḏɩnu ilaŋu ḏa iliya mara mila gwukədə ga.

⁵⁰ na yecu əri gwula mɩna ŋwal ŋwɩbuḏo nukuwa gwuɽɩwə gwuŋun.

⁵¹ na giria geḏi dunu gweḏi elo gwun gwubuḏo ṯɩrṯəḏɩni ganu gi ḏiɽil ḏeḏi elgwogwo ke nuobeḏe kalo gi ḏiɽil ḏun ḏijo gelio, na kwɩnyəm ubəga, na ŋwoɽi ṯɩrṯaḏe ganu,

⁵² na nil iḏini na jiŋɩno jeḏi liji lutu lun lɩpiḏo pɽul lun liḏɩro nalḏiɽi;

⁵³ naltuḏə gi nil, na gwune nuḏiɽi naləḏi kamɩrɩgen yun yɩpiḏo pɽul, nulaŋinijo lutu.

⁵⁴ na gwele gweḏi ajana yun yiro ḏuɽi di na liji lun lijille naldɩme yecuŋ, nalaŋu ḏubaga, na ŋuɽun ŋun ŋaŋinu naldonye gworki nalarno, gwerkwe ganu kweno gwiro ŋaɽe ŋeḏi elo.

⁵⁵ na la lijo lutu nalɩnŋalaḏe uro ŋɩnəwei lun lɩgwuje yecuŋ uro jalil naləpijo ŋɩru.

⁵⁶ na kworo lagin mariam majdaliya, na mariam gwun gwiro nana gweḏi yagub na yusi, na nana gweḏi nyaɽe nyeḏi jebəḏi.

ḏɩkwura ḏeḏi yecu

⁵⁷ na gwune na galo ro garage, na gwəmɩnyo wila gwun gwəṯi ŋɩdio ŋutu gweḏi rama gwun gwan yusib, na ŋu dino gwiro ṯalɩmis ḏeḏi yecu.

⁵⁸ nuwele ḏi bilaṯus nuɽoṯəḏɩjo aŋɩna yeḏi yecu. na bilaṯus uməḏɩjo gwarno gwalḏəḏə aŋɩna.

⁵⁹ gwune na yusib ape aŋɩna numɩɽi nanu giria ge gun gimɩḏe gun giŋir nanu.

⁶⁰ nuḏɩrɩ kil guŋun gun giya gun gikwurinu kɩmu ganu, nuḏeḏiɽejo gɩḏolia gun gibuḏo kouwɩr yeḏi gil, ki nuwele.

⁶¹ na mariam majdaliya na mariam gwun gwiro kaja lijiga gɩṯo kil.

⁶² na giləganu gwiro lamon lun ligwujano lamon le ḏigela ŋɩdio muma ŋeḏi sabiṯ, na jɩsis jun jɩbuḏo na lɩbarisi aɽuwaḏa ldu ḏi bilaṯus,

⁶³ naleicɩno, gwele gwəri, anaḏɩŋane iyoŋ kweno gwun gwiro gwuwɩɽɩgal gwune gwore gwumiḏo gwarno, na ḏa ŋwamon ŋwɩmete ṯəɽɩl nyi gweḏiɽi.

⁶⁴ na dino ŋaŋele ŋuɽuna alaŋiṯi gil muma kəbe na lamon ete lun liro ṯəɽɩl, i gwəṯi calɩmis juŋun wila gilio nalape ŋuɽama, naluməḏɩjo liji nalarno, madiɽi gi ḏaiya; na dino ŋuɽun ŋe ḏɩrdeijo ganu ŋeḏi gɩdo ŋakene kworo gweḏi gwerre.

⁶⁵ nal bilaṯus eicɩno, nya ləṯi ajana yun yaṯɩḏɩme. wiḏɩl nyalaŋiṯi; gi gwune əṯanya ŋɩma.

⁶⁶ nalwele nalaŋiṯi gil nalauce gɩḏolia ŋaijo ŋe, nalŋele ajana yun yaṯɩdɩme gil.