maṯa 25 - ŋuɽun ŋun ŋiya ŋun ŋikaiilo elo 1966

asa 25 ŋuɽun ŋun ŋɩlɩbo ŋeḏi nyera nyun nyiro di

¹ na ŋele ŋeḏi kanyin ŋiro gi nyera ḏi, nalape ŋwambə ŋwagin naltu gi ḏobeḏa gwəmɩnyəŋale gwe ḏaga.

² na ṯoḏɩne nyiro jɩɽilo, namɩni ṯoḏɩne nyəṯi ŋaḏɩgiɽenya;

³ na nyun nyiro jɩɽilo nalape ŋwambə ŋwagin, nalmɩni ate nalapane ŋila no;

⁴ namɩni nyun nyəṯi ŋaḏɩgiɽenya nalape ŋila ŋwuɽe ŋwe ŋwagin na ŋwambə ŋwagin.

⁵ na kaja ŋun ŋate ŋɩmagi gwiji gwe ḏaga wila cou no, na wei nal ŋwar e jei nalḏɩre.

⁶ na gɩlɩgina ganu naldiŋɩni gwula gwarno, eʼe, gwiji gwe ḏaga gwo gwuwiḏi; tuḏal nyalobeḏeṯe.

⁷ na nyera nyeno wei diɽi naludi ŋwambə ŋwagin.

⁸ na nyun nyiro jɩɽilo naleico nyun nyəṯi ŋaḏɩgiɽenya no, ḏəḏɩjine ŋila ŋalo gi gwune ŋwambə ŋwəri ŋwar ŋwai.

⁹ na nyun nyəṯi ŋadɩgɩɽenya nalwɩrlijo ŋuɽuna naleicɩno, ŋate ŋe ŋijiṯɩmɩjo no, wiḏɩl gi cu nyaleḏɩla ŋalo.

¹⁰ na kaja gun giwiḏɩlge gi ḏeḏila na gwiji wila gwe ḏaga, na luŋa lun lijo ga muma naləḏi gwijiŋale gwe ḏaga, nalaŋiṯi gibia.

¹¹ na gɩdo ganu na nyera wila nyun nyiṯanu dino nalarno, gwele, gwele, iḏijije.

¹² nulwɩrlijo ŋuɽuna, nuleicɩno, gwerkwe ganu nyi gweiceijɩno, nyi gwate gwilɩŋiḏaje no.

¹³ girinɩl dino, gi gwune nya late lilɩŋiḏi lamon i sa no.

ŋwɽun ŋun ŋɩlɩbo ŋeḏi jɩnei

¹⁴ gi gwune ŋiro gi gwiji gwun gwar gwele kamɩrɩgen yun yiro kaja, nuəmɩḏe lɩwainya luŋun nulḏəḏə ŋɩḏio ŋuŋun;

¹⁵ nuḏəḏə gwete jɩnei ṯoḏɩne, na gwiro kaja jɩnei jɩttən na gwiro kaja jɩnei jetɩdo, naṯuḏəḏə gwete gwete gwan ŋɩma ŋuŋun, nuwele.

¹⁶ na cou gwun gwapo jɩnei ṯoḏɩne nuwele nujɩdi ga nubaḏaica jɩnei ṯoḏɩne jun jiro kaja.

¹⁷ na dino gwun gwapo jɩnei jɩttən nujɩdi ga dino nubaḏaica jɩnei jɩttən jun jiro kaja.

¹⁸ namɩni ŋu gwun gwapo jɩnei jetɩdo nuwele nukwuri kwɩnyəm ganu nulbɩji əlŋɩrucə yeḏi gwele gwuŋun.

¹⁹ na kaja gwola ganu na gwele wila gweḏi lɩwainy ləwei nalḏuɽə əlŋɩrucə.

²⁰ nuwila gwun gwapo jɩnei ṯoḏɩne nuəpijo jɩnei ṯoḏɩne jun jiro kaja nueicɩno, gwele gwi, ŋa gwiḏəḏɩnyi jɩnei ṯoḏɩne, na eʼe, nyi mabaḏaica jɩnei ṯoḏɩne jun jiro kaja.

²¹ na gwele gwuŋun eicɩno, ŋa gwiro wainy gwiŋir gwuḏuḏɩnu ga. ŋa gwəpiji ŋɩru muma ŋɩdi ŋun ŋɩti, na nyi gwaŋaduji gwele gweḏi ŋɩdi ŋutu. əḏi gi ḏidila ganu ḏeḏi gwele gwuŋa.

²² nuwila dino gwun gwapo jɩnei jɩttən nueicɩno, gwele gwi, ŋa gwiḏəḏɩnyi jɩnei jɩttən, eʼe nyi mabaḏaica jɩnei jɩttən jiro kaja.

²³ na gwele gwuŋun eicɩno, ŋa gwiro wainy gwun gwiŋir gwuḏuḏɩnu ga, ŋa gwaṯape ŋɩru muma ŋɩdi ŋun ŋɩti; na nyi gwaŋaduji gwele gweḏi ŋɩdi ŋutu. əḏi gi ḏidila ganu ḏeḏi gwele gwuŋa.

²⁴ nuwila ḏino gwun gwapo jɩnei jetɩdo nueico gwelɩnya gwuŋun no, gwele gwi nyi gwilɩŋiḏi ŋa gwiro gwiji gwubɩɽe ŋuɽuna, ŋaṯalwone kalo ŋun ŋate gikwurəne no, na ŋalwəɽeice ldu kalo ŋun ŋate gaṯanuɽe no.

²⁵ na nyi maḏe, niwele nilbɩji jɩnei juŋa kwɩnyəm ganu. eʼe juŋa jiro.

²⁶ na gwele gwuŋun wɩrlijo ŋuɽuna nueicɩno, ŋa gwiro wainy gwun gwɩki gwiro gwuḏuna, ŋa gwilɩŋiḏi nyi ŋaṯɩlwone kalo ŋun ŋate gaṯɩnkwuri no, nilwəɽeice ldu kalo ŋun ŋate gaṯɩnuɽe no,

²⁷ ŋiŋirano ŋa gwaŋaŋele əlŋɩrucə yinyi gi tarabesa gi liji leḏi eḏɩla; na ḏa nyi mila nyibuje yinyi yimanbaḏaica gworo.

²⁸ na dino apo jɩnei lugwun ŋaḏəḏə gwun gwəṯi jɩnei di;

²⁹ gi gwune gwun ŋəṯulo ŋilbəḏəṯɩjo na ŋwuləṯi ŋutu; na gwun gwate ŋəṯulo no namɩni ŋun ŋəṯulo ŋulapa lugwun.

³⁰ winɩl wainy gwe gwun gwɩki gwiro kwɩḏon kirɩm kɩluḏo; na ŋɩnəwei ḏərio gwula ḏaje na ḏiʼino gi jɩŋaḏ.

lamon leḏi ḏakɩmiḏa

³¹ gwune na ŋaɽe ŋeḏi liji wila ḏoɽeḏa ḏe ḏuŋun lijiŋale wei leḏi kanyin, nujiga kɩḏoɽ geḏi ŋele ŋe ḏoɽeḏa ḏuŋun;

³² na liji leḏi jɩmɩrɩgen wei aɽuwaḏa ldu gi jei ganu lugwun nulkenyə ganu ŋiro gi gwaɽa nukenyə joŋolia juŋun ganu juɽo je.

³³ nugele joŋolia gi ḏi ḏuŋun ḏun ḏiro ḏiŋir, namɩni juɽo gi ḏi ḏun ḏiro ḏouwɩr.

³⁴ na gwele eico liji lun lijo gi ḏiŋir no, wilal nyaŋa lun ləṯi ḏimoreḏa ḏeḏi baba gwi, nyaɽenyeḏe ŋele ŋun ŋigilijijɩlo uro kaja gun gigelɩlge gɩḏilio,

³⁵ gi gwune jaŋu jiṯinyi ninyilḏəḏə ŋɩdio ŋe ḏiṯa; ninyi ouḏo e ninyilḏəḏə ŋau nilyu; nyi gwiro gwiḏo ninyilgwuloḏa gidəno,

³⁶ nije lɩmuɽino ninyilgaki jiria; nieḏeḏe nanu nɩnyilwilɩjo; nyi gwijo kɩrkon nanyawila lugwi.

³⁷ na liji lun liŋir wɩrlijo ŋuɽuna naleicɩno, gwele gwəri, anaŋəḏaŋa jaŋu jiṯaŋa naŋalḏəḏə ŋɩdio ŋe ḏiṯa i ouḏo iṯaŋa naŋalḏəḏə ŋau jaḏo?

³⁸ anaŋəḏaŋa ŋa gwiro gwiḏo naŋalgwuloḏa gɩḏəno, i ŋajiga lɩmuɽino naŋalgaki giria jaḏo?

³⁹ i anaŋəḏaŋa ŋa gweḏeḏo nanu, i gwijo kɩrkon naŋalwilɩjo jaḏo?

⁴⁰ nal gwele wɩrlijo ŋuɽuna nuleicɩno, gwerkwe ganu nyi gweiceijɩno, gi gwune ŋun ŋərrijanyalo gwete lun lɩtilɩti gi lɩmagəɽi leno namɩni ŋərrɩjinyilo.

⁴¹ nuleico dino lun lijo gi douwɩɽ no, nyaŋa lun liḏenɩnu, wiḏɩl lugwi, nyele kigo gi gɩḏilio yun yigelɩnu yan iblis na liji luŋun leḏi kanyin;

⁴² gi gwune jaŋu jiṯiŋi nate nuŋwilḏəḏə ŋɩdio ŋe ḏiṯa no; ninyi ouḏo e nate nilnyilḏəḏə ŋau no;

⁴³ nyi gwiro gwiḏo nate ninyilgwuloḏa gidəno no; nijiga lɩmuɽino nate ninyilgaki jiria no, nieḏeḏe nanu na nije kɩrkon nate ninyilwilɩjo no.

⁴⁴ nalwɩrlijo ŋuɽuna dino naleicɩno, gwele gwərɩ, anaŋəḏaŋa jaŋu jiṯaŋa, i ouḏo iṯaŋa, i gwiḏo i ŋajiga lɩmuɽino, i gweḏeḏo nanu, i ŋaje kɩrkon jaḏo nate naŋaləpijo ŋɩru no?

⁴⁵ nulwɩrlijo ŋuɽuna nuleicɩno, gwerkwe ganu nyi gweiceijɩno, gi gwune ŋate ŋərrijanyalo gwete lun lɩtilɩti leno no nate ninyilərrɩjo no.

⁴⁶ na luŋa lele gi ḏakɩmino gi gɩḏilio, na lun liŋir gi ḏɩmiḏa gi gɩḏilio.