maṯa 23 - ŋuɽun ŋun ŋiya ŋun ŋikaiilo elo 1966

asa 23 yecu gwumapi jalgaṯɩm na lɩbarɩsi ḏare

¹ na yecu uməḏɩjo liji lutu na calɩmis juŋun,

² nuleicɩno, jalgaṯɩm na lɩbarɩsi ləṯijiga kɩḏoɽ geḏi musa,

³ na dino wei ŋun ŋajiŋuməḏɩjo ŋanyaldɩme, dɩmiḏɩlo ŋeno na arrɩlo; naṯɩlmɩni arra ŋɩru ŋagin no, gi gwune laṯarno namɩni ŋate ŋatɩlarre no.

⁴ nalgaki dube dɩni na dɩki gi ḏapa nalŋele ŋwuɽan elo ŋweḏi liji, namɩni luŋa gi lulo lagin late ləmɩnyu nalɩndijeije elo lamon le letɩdo lagin no.

⁵ nalmɩni arre ŋɩru wei kani a liji aŋu, naluwəreni jɩḏam jagin jeḏi albeki, nalbuḏi gwəḏɩburə gweḏi jiria jagin;

⁶ naṯɩləmɩnyi gala gun giŋirano kɩmuri na jɩḏoɽ jun jiro ŋwuɽa gi lɩdunu lagin leḏi elo,

⁷ na ḏɩmɩɽəḏo gi cu, naṯiləmɩnyi liji laleico limualɩm.

⁸ namɩni nyaŋa, lo lanyalouwɩrico laɽeico limualɩm gi gwune nyaləṯi mualɩm gwetɩdo gwun gwan kɩrisṯo, na nyaŋa wei nyalro ŋɩmaga.

⁹ aṯanyaneico gwiji gwete baba kɩḏilio no, gi gwune nyaləṯi babaŋ gwetɩdo gwun gwaṯɩje kanyin.

¹⁰ na dino lo lanyalouwɩrico laɽeico lun laṯɩgwulo liji, gi gwune gwəṯanya gwetɩdo gwun gwajigwulo gwan kɩrisṯo.

¹¹ ŋu gwun gwubuṯano lagalo gwaro gaḏam galo.

¹² na gwun gwaṯɩbuḏi gwula gwuŋun gwadujini gwɩti, na gwun gwaṯɩtiene gwula gwuŋun gwabuḏane elo.

¹³ ŋɩki lagalo nyaŋa, jalgaṯɩm na lɩbarɩsi, lun ləṯi ŋuɽuna ganu ŋɩttən, gi gwune nyalaŋiṯijo liji ŋele ŋeḏi kanyin, nya late ləḏi nyaŋa no, na late lanyaouwɩrico lun lar ləḏi aləḏi no.

¹⁴ ŋɩki lagalo nyaŋa, jalgaṯɩm na lɩbarɩsi, lun ləṯi ŋuɽuna ganu ŋɩttən, gi gwune nyalaṯenya la ŋɩdio ŋagin lun liro linino, nyalaṯuməḏɩjo eloŋu gɩttən kani a liju aŋu; na ŋiro dino nyalakɩminene ḏakɩmino ḏɩbuṯano.

¹⁵ ŋɩki lagalo nyaŋa, jalgaṯɩm na lɩbarɩsi, lun ləṯi ŋuɽuna ganu ŋɩttən, nyalaṯɩwewele gi ḏɩrawe elo na kwɩnyəm kani nyabuje gwiji gwetɩdo gwun gwagujane ŋuɽuna ŋalo, na ḏa mulgwuje nyaləduji ŋaɽe ŋeḏi jenam ŋwamon ganu ŋwɩttən ŋutəno lagalo.

¹⁶ ŋɩki lagalo, nyaŋa lun lɩrimə gi jei lun laṯɩgwulo gworo, lun laṯarno, gwun gwərɩmi dunu gwe gweḏi elo gwun gwubuḏo ŋuɽun ŋate ŋəḏi no; namɩni gwun gwərɩmi ḏab ḏe ḏeḏi dunu gweḏi elo gwun gwubuḏo, ŋiro gəmɩju,

¹⁷ nyaŋa lun liro jɩɽilo na lun lɩrimə gi jei, aŋ gwɩro gwubuṯano, ḏab i ḏunu gweḏi elo gwun gwubuḏo gwun gwaṯɩpiḏi ḏab pɽul ḏi elo.

¹⁸ nanyaɽu nanyarno dino gwun gwərɩmi lobo le leḏi dunu gweḏi elo ŋuɽun ŋate ŋədi no, namɩni gwun gwərɩmi ŋɩdi ŋe ŋun ŋijɩlɩnelo ŋiro gəmɩju.

¹⁹ nyaŋa lun liro jɩɽilo na lun lɩrimə gi jei, aŋ gwiro gwubuṯano, ŋɩdi ŋun ŋigelɩnu gi lobo elo i lobo lun laṯɩpiḏi ŋɩdio pɽul ḏi elo?

²⁰ na gwun gwərɩmi lobo le, gwərɩmi ŋu gwe na wei ŋun ŋijɩlɩnelo;

²¹ na gwun gwərɩmi dunu gwe gweḏi elo gwun gwubuḏo, gwərɩmi ŋu gwe na gwun jaḏaṯa;

²² na gwun gwərɩmi kanyin gwe, ŋu gwərɩmi gɩḏoɽ gi geḏi elo, na gwun jiga.

²³ ŋɩki lagalo nyaŋa, jalgaṯɩm na lɩbarɩsi, lun ləṯi ŋuɽuna ganu ŋɩttən, gi gwune ŋaṯanyalḏəḏə eloŋu gəni gete geḏi luco, i gwijido gworo gwun gwiro di na nəni neḏi ŋɽa niro kajakaja, nanyamɩni ouwɩrico ŋuɽuna ŋun ŋɩnəno ŋun ŋigelijɩlo elo musaŋ ŋiro gi ḏakɩmiḏa ḏun ḏiro gwerkwe, na ŋino na ḏɩməṯo. arram ŋanyalduji ŋeno na ŋo ŋanyalouwɩrico ŋəwei.

²⁴ nyaŋa lun lɩrimə gi jei lun laṯɩgwulo gworo, lun laṯɩrəje gwawa ŋau elo, nalŋaḏɩni gamɩlaŋe.

²⁵ ŋɩki lagalo nyaŋa, jalgaṯɩm na libarisi, lun ləṯi ŋuɽuna ganu ŋɩttən, nyalaṯɩwei ḏoɽena na kɩɽudo gi ḏuɽo, namɩni gidəno gwe nyalenyeḏo ŋwuɽama na ḏɩbunya ḏun ḏiro jai.

²⁶ ŋa gwubarɩsi gwun gwɩrimə gi jei, wei ḏoɽena na kiɽudo gwerre ganu gidəno gwe kani ŋwuro gi ḏuɽo ḏuwono dino.

²⁷ ŋɩki lagalo nyaŋa, jalgaṯɩm na lɩbarɩsi, lun ləṯi ŋuɽuna ganu ŋɩttən, gi gwune nyalro gi nil nun niro nɩɽe, naṯaŋiḏi kɩluḏo niŋir, namɩni gidəno gwe nenyeḏo ŋwuya ŋweḏi liji lun laiyo na ŋɩdi wei ŋun ŋiro ŋɩrleḏ.

²⁸ na nyaŋa dino gi ḏuɽo gwe nyalaŋinu gi liji liŋir, namɩni gidəno gwe nyalenyeḏo ŋuɽuna ganu ŋɩttən na wei ŋun ŋɩki.

²⁹ ŋɩki lagalo nyaŋa, jalgaṯɩm na lɩbarɩsi, lun ləṯi ŋuɽuna ganu ŋɩttən, gi gwune nyalaṯɩkwuri nil neḏi nebɩŋa, na naṯɩlɩmɩdo nil ga neḏi lun liŋir;

³⁰ na nyalarno, ḏa ilɩjo kaja geḏi lɩgwumɩnyo lage, ilate laŋaŋeleḏiḏi uwə gi ḏirəjo ŋuwəno ŋeḏi nebɩŋa no.

³¹ na dino nyaŋa nyalaŋiḏi lula lalo nyalro nyaɽe nyeḏi liji lun lijinyɩḏi nebɩŋaije.

³² enyejil nyaŋa dino əlmɩḏ yeḏi ŋuɽun ŋun ŋɩki ŋeḏi lɩgwumɩnyo lalo.

³³ juŋə je, na nyaɽe nye nyeḏi juŋə, galakwe nyalmobɩḏɩni gi ḏakɩmino ḏeḏi jenam?

³⁴ na ŋiro dino, nyi gwuwəjo lagalo nebɩŋa, na lun lilɩŋiḏi ŋuɽuna ŋutu na jalgaṯɩm. na kworo lanyalɽinye, na kworo lanyalɽinye ŋwuɽi ŋwun ŋwɩmaliḏo ganu; na kworo lanyalpi gi lɩdunu lalo leḏi elo lanyanḏagɩɽini kamɩrɩgen kamɩrɩgen;

³⁵ kani ŋila lagalo ŋuwən wei ŋun ŋiŋir ŋun ŋirəḏɩnu ga kwɩnyəm, uro ŋuwən ŋeḏi abil ŋun ŋiŋir kəbe ŋuwən ŋeḏi sakaria, gwun gwiro ŋaɽe ŋeḏi baragiya gwun gwuɽinyɩḏanya kɩlɩgi ganu geḏi dunu gweḏi elo gwun gwubuḏo na lobo luŋun.

³⁶ gwerkwe ganu nyi gweiceijɩno, ŋɩdi ŋeno wei ŋaje ŋila gi liji leno leḏi gwunne.

yecu gwəri gwula gwan ḏɩkeḏa ḏeḏi urucəlim

³⁷ urucəlim, urucəlim, gwun gwaṯɩɽinye nebɩŋaije na ŋalauce nyɩdol nye lun lɩwəjɩnu lugwuŋa, ŋwamon ganu umɩnyo nyibunyu gwawəɽeice nyaɽe nyuŋa ldu lugwi gi gwune aṯan gaŋiro wəɽeice nyaɽe nyuŋun gi nɩbu ganu, ŋamɩni donye.

³⁸ eʼe duno gwalo gwun majɩwelejene gwuḏu ganu.

³⁹ na nyi gweijeicɩno, nya late linyiaŋu mɩna no kəbe nyarno, ḏɩbudia ḏaje lugwun gwun gwila jiri je jeḏi gwele gwun gwiro elo.