maṯa 22 - ŋuɽun ŋun ŋiya ŋun ŋikaiilo elo 1966

asa 22 ŋuɽun ŋun ŋɩlɩbo ŋeḏi gɩmuri geḏi ḏaga

¹ nal yecu aɽu nulwɩrlijo ŋuɽuna ŋun ŋɩlɩbo, nuleicɩno,

² ŋele ŋeḏi kanyin ŋiro gi gwele gwete gwugico ŋaɽe ŋuŋun ŋun ŋiro gwəmɩnyo gɩmuri ge ḏaga.

³ nuwəje lɩwainya luŋun aləmɩḏe lun ləmɩḏɩlo kalo geḏi ḏaga, nalmɩni ate naləmɩnyi lila no.

⁴ nuaɽu nuwəjo lɩwainya liro kaja nuleicɩno, eicɩl lun ləmɩḏɩlo no, eʼe, nyi maŋele ŋɩdio ŋe ḏiṯa muma, na nyɩḏri nyinyi na nyun nyiɽona nyimaɽinyini na ŋɩdi wei ŋɩmaḏaḏaṯe wɽi, wilal gi ḏaga.

⁵ nalmɩni ate nalnəji ŋuɽuna ŋuŋun no nuwele, gwete gi ḏɩri ḏuŋun, na gwiro kaja nuwele gi ḏeḏila ŋɩdio ŋuŋun.

⁶ na lun lɩṯanu nalməṯo lɩwainya luŋun nalɩnḏagiɽɩni nalɩɽinye.

⁷ gwune na gwele diŋɩni, nuɽe ganu; nuwəje ajana yuŋun alɩɽinye lun lijinyɩḏo, alnuni amɩrɩgena ŋagin.

⁸ nueico lɩwainya luŋun no, ḏaga ḏɩmaḏaḏaṯe, namɩni lun ləmɩḏɩlo late lɩdeleḏo no.

⁹ na dino nyele gi daṯ na liji wei lun lanyalbuja əmɩḏalo alwila gi ḏaga.

¹⁰ na lɩwainy leno tuḏə gi daṯ nulgwuluḏɩjo wei lun limalɩbuja, lun lɩki na lun lɩŋir; nalenyeḏe kɩmuri.

¹¹ na gwele əḏi nuŋalaḏe gi liḏo, nuaŋu ŋɩnəwei gwiji gwate gwukanu giria ge ḏaga no,

¹² nueicɩno, maḏəri, galakwe ŋa gwəḏi ŋɩne ŋa gwate gwəṯi giria ge ḏaga no? nuje nyɩkwom.

¹³ na gwele eico jaḏama no, kaiyil ŋwara na di, nyape nyagwuwini kirɩm kɩluḏo. na ŋɩnəwei ḏərio gwula ḏaje na ḏiʼino gi jɩŋaḏ;

¹⁴ gi gwune lo lutu ləmɩḏɩni, namɩni lo lɩti lɩməṯɩnu.

ŋuɽun ŋeḏi ṯulba ḏeḏi gesar

¹⁵ na lɩbarɩsi naluməḏəṯe laginŋu galakwe alumə aldiŋɩni ŋuɽuna ŋədi ŋun ŋunuməḏo ŋun ŋɩki.

¹⁶ nalwəje calɩmis jagin lugwun lijiŋale leḏi ərudus naleicɩno, mualɩm gwəri, analɩŋiḏi ŋa gwiro gwerkwe, naṯalɩmi ṯaṯ ḏe ḏeḏi elo ŋuɽun ŋe ŋun ŋiro gwerkwe na gwo gwanḏonye gwetɩdo no, na gwo gwanəmɩnyene gwete kworo.

¹⁷ na uməḏɩjije dino; ŋa gwuməḏɩnu ŋa gwarau? ŋiŋir anɩməḏɩjo gesarŋ ṯulba? ŋa gwarno ḏanouwɩrico a?

¹⁸ namɩni yecu lɩŋe ḏirdeijo ganu ḏagin nuleicɩno, gwudaro gəko ninyiliḏeije, nyaŋa lun ləṯi ŋuɽuna ganu ŋɩttən?

¹⁹ aŋijɩnyil əlŋɩrucə yeḏi ṯulba. naləpijo ruba.

²⁰ nuleicɩno, lɽa ləṯe liro na ŋwule?

²¹ naleicɩno, ŋweḏi gesar ŋwiro. nuleicɩno, ḏəḏɩl gesarŋ ŋɩdio ŋeḏi gesar, nyalmɩni ḏəḏo eloŋu ŋeḏi elo.

²² gwune naldiŋɩni ŋuɽuna ŋeno nalobaga ṯuṯ, nanwalane nalwele lagin.

ŋuɽun ŋeḏi diɽo gi ḏaiya

²³ na lamon leno nalwila lugwun kworo lun liro lisadugi lun laṯarno ḏidiɽo gi ḏaiya ḏate, nalɽoṯəḏɩjo,

²⁴ naleicɩno, mualɩm gwəri, musa gwarno, ḏa gwete gwɩmai gwate gwatɩn nyaɽe no, namɩni megin ɽenyeḏe kwa gwuŋun gwalgwilɩŋe nyaɽe jiri je jeḏi megin.

²⁵ na lijo lagəri kwoɽoṯəɽɩl lun liro ŋɩmaga. na gwun gwiro lɽa nuago gwa nuai; nate nulɩŋe nyaɽe no, na megin ɽenyeḏe kwa gwuŋun.

²⁶ na dino gwun gwiro nɩmɩro nɩttən na gwun gwiro ṯəɽɩl nyoŋon kəbe gwun gwiro kwoɽoṯəɽɩl.

²⁷ na gɩdo wɽi na gwa ai dino.

²⁸ na ŋiro dino, kaja ge ḏidiɽo gwa gwaro gwəṯe gi liji lun liro kwoɽoṯəɽɩl gi gwune gwagilo wei?

²⁹ nal yecu wɩrlijo ŋuɽuna nuleicɩno, ŋɩki lagalo gi gwune nya late lilɩŋiḏi gɩḏam na ŋɩma ŋeḏi elo no.

³⁰ gi gwune gi ḏidiɽo ḏe liji lun laiyo late lanago na lanəgini no, nalmɩni ro gi liji leḏi kanyin.

³¹ namɩni gwan ḏidiɽo ḏe liji lun laiyo, nya late ləgɩri ŋuɽuna ŋun ŋeiceijiŋe elo ŋun ŋarno,

³² nyi gwate gwiro elo gweḏi ibraim, na elo gweḏi isak na elo gweḏi yagub na? elo gwate gwiro elo gweḏi liji lun laiyo no, namɩni gweḏi liji lun lɩmiḏo.

³³ na gwune na liji ḏiŋɩni ŋeno nalobaga ṯuṯ gi ḏalɩmia ḏuŋun.

ḏiɽoṯeḏa ga ḏeḏi ŋuɽun ŋun ŋigelijɩlo elo musaŋ ŋun ŋɩnəno

³⁴ gwune na lɩbarɩsi diŋɩni galakwe maḏuḏɩni lisadugi ŋuɽun ŋe kəbe nalje nyɩkwom, nalaɽuwaḏa ldu.

³⁵ na gwete lagin nuɽoṯəḏɩjo, nuiḏeije nueicɩno,

³⁶ mualɩm gwi, ŋɩrṯa ŋiro ŋun ŋɩnəno ŋuɽun ŋun ŋigelijɩlo elo musaŋ?

³⁷ na yecu eicɩno, arram ŋa gwəmɩnyi gwelɩnya gwun gwiro elo gwuŋa ḏugwor ḏe ḏuŋa wei, na gwulo gwe gwuŋa wei, na ŋaḏɩgiɽe ŋe ŋuŋa wei.

³⁸ ŋuɽun ŋeno ŋiro ŋun ŋɩnəno na ŋun ŋiro lɽa kworo kweno.

³⁹ na ŋuɽun ŋun ŋugwujo gworo ŋiro dino, arram ŋa gwəmɩnyi gwiji gwun gwijaḏanyagwe ga gwiro gi gwune ŋanəmɩnyi gwula gwuŋa.

⁴⁰ ŋuɽun ŋeno ŋɩttən ŋəṯi ŋuɽuna wei ŋun ŋigelijɩlo elo musaŋ na ŋeḏi nebɩŋa.

ḏiɽoṯeḏa ga ḏeḏi kɩrisṯo

⁴¹ gwune na lɩbarɩsi aɽuwaḏe ldu, nal yecu ɽoṯəḏɩjo,

⁴² nuleicɩno, nyaluməḏɩnu nanyarau gwan kɩrisṯo? ŋaɽe ŋəṯe ŋiro? naleicɩno, ŋiro ŋaɽe ŋeḏi ḏauuḏ.

⁴³ nuleicɩno, na dino galakwe gəko na ḏauuḏ gwuɽɩwə gwe nueico gwele,

⁴⁴ nuarno, gwele gwun gwiro elo gweico gwelɩnya gwi no, jiga gi ḏi ḏinyi ḏun ḏiro ḏiŋir kəbe nyiŋele liji lun lɩkiḏiḏianyale ŋwara ganu ŋwuŋa?

⁴⁵ na ḏino na ḏa ŋɩma ḏauuḏ eico gwele; na galakwe gəko nuro ŋaɽe ŋuŋun?

⁴⁶ na gwatɩn gwetɩdo gwəṯi ŋɩma gwawɩrlijo ŋuɽuna ŋəḏi no, na uro kaja kono gwatɩn gwetɩdo gwubɩɽe lɽa ganu gwuɽoṯəḏɩjo ga ŋuɽun ŋe ŋəḏi no.