maṯa 21 - ŋuɽun ŋun ŋiya ŋun ŋikaiilo elo 1966

asa 21 ḏobena ḏeḏi yecu urucəlim ḏiḏamɩḏa ḏe

¹ gwune nalar lobene urucəlim nalwila beṯbəji gi lɩrgwom lun lan seitun, na yecu wəje calɩmis jɩttən,

² nuleicɩno, wiḏɩl gi lɩrgwom lono gi jei ganu lagalo, nyalabuje ŋəɽɩgə ŋun ŋɩkanano galo na ŋəɽɩgə ŋun ŋoga nyijilɩŋe. kəduḏɩl ga nyilgwuluḏijo,

³ na ḏa gwiji gwədi majɩnuməḏɩjo ŋuɽuna ŋədi nyeicɩno, nyubunyil gwele; namɩni nyaɽe nyilwəjo.

⁴ na ŋuɽun ŋeno wei ŋɩmila kani nalṯɩmi ŋuɽuna ŋun ŋarɩŋe nebi gwune nuarno,

⁵ uməḏɩjil ŋaɽe ŋun ŋiro gwa ŋeḏi siʼun, eʼe gwelɩnya gwuŋa gwila lugwuŋa gwɩtiene gwula gwuŋun, gwəbuḏi ŋəɽɩgə elo, na ŋəɽɩgə ŋun ŋoga ŋun ŋiro ŋaɽe ŋeḏi ŋəɽɩgə.

⁶ na calɩmis wele nalarre gi gwune uməḏɩjilo yecu.

⁷ nalgwuloḏa ŋəɽɩgə na ŋun ŋoga nanɩŋele jiria jagin ga nunabo elo.

⁸ na liji lutu gworki nalkɩlije jiria jagin gi ṯaṯ elo, na liro kaja nalkɩlaḏa dɩrna deḏi jaɽe nalɩŋegile ga gi ṯaṯ elo.

⁹ na liji lun lutu lun lɩdaro na lun lugwujano naləri gwula nalarno, ḏɩkədəḏɩnə ga ḏaje ŋaɽe ŋeḏi ḏauuḏ. ḏɩbuḏia ḏaje lugwun gwun gwila jiri je jeḏi gwele gwun gwiro elo. ḏɩkədəḏɩnə ga kalo gwun gwolenelo.

¹⁰ gwune nuobene urucəlim liji wei leḏi amɩrɩgen nalobaga ṯuṯ nalarno, əḏi gwiro kweno?

¹¹ na liji lijo lutu naleicɩno, kweno gwiro yecu gwun gwiro nebi gweḏi nasɩra gweḏi amɩrɩgen yun yan jalil.

ŋu gwudi ŋuɽuna ŋun ŋɩki kwu ḏunu gweḏi elo gwun gwubuḏo

¹² na yecu əḏi kwu dunu gweḏi elo gwun gwubuḏo, nulditio lun laṯeḏɩla na lun ŋaṯɩleḏɩla gɩdəno, nuwɩrli darabesa ganu deḏi liji lun laṯɩbi əlgɩrucə ganu na jɩḏoɽ jeḏi lun laṯɩlineḏɩla jɩɽidira;

¹³ nuleicɩno, ŋulinu, dunu gwinyi gwaṯɩleico dunu gwe ḏuməḏɩjo eloŋu, namɩni manyaduji gɩmu geḏi luɽam.

¹⁴ na lun lɩrimə gi jei na lun liro jɩbɩjo nalwila lugwun kwu dunu gweḏi elo gwun gwubuḏo, nulgele muma.

¹⁵ gwune na jɩsis jun jɩbuḏo na jalgaṯɩm nalaŋu ŋɩdio ŋun ŋɩbuḏo ŋun ŋidujɩlo, na nyaɽe əri gwula kwu dunu gweḏi elo gwun gwubuḏo nyarno, ḏɩkədəḏɩnə ga ḏaje ŋaɽe ŋeḏi ḏauuḏ, nalɽe ganu,

¹⁶ naleicɩno, ŋadiŋɩnalo ŋun ŋarɩŋe nyaɽe nyeno a? nal yecu eicɩno, yəti, nyaŋa laṯe ləgɩri, gi ŋwinyu ŋweḏi nyaɽe nyun nyoga na nyun nyijɩre nyiɽo ŋan ŋamape ḏorṯeḏa ḏun ḏiro muma na?

¹⁷ nunwalane nutu kamɩrɩgen nuwele gi lɩrgwom lun lan beṯiniya ki nuḏɩre ŋɩnəwei.

gwuwɩḏa gwun gwate gwəṯi nyaɽe no

¹⁸ na giləganu gwune nuaɽuwa kamɩrɩgen na jaŋu e;

¹⁹ nuaŋu gwuwɩḏa ṯaṯ kɩḏɩriḏ, nuwele lugwun nate nunbuje ŋaɽe no numɩni buje nəni neice. nueicɩno, ŋa gwate gwanɽe nyaɽe no gwunne kəbe gi gɩḏilio. na gwuwɩḏa uḏe cou.

²⁰ gwune na calɩmis aŋu nalobaga ṯuṯ nalarno, galakwe gəko na gwuwɩḏa uḏe cou dino?

²¹ nal yecu wɩrlijo ŋuɽuna nuleicɩno, gwerkwe ganu nyi gweiceijɩno, na ḏa nyalməṯi ḏɩməṯo nya late luməḏɩni gi dugwor ganu dalo no, nya late laŋarre ŋuɽuna ŋiro gi ŋeno ŋeḏi gwuwɩḏa kuwei no, namɩni dino nyaleico lɩrgwoma leno no, diɽo ga ŋubɩliḏaṯe gi ḏɩrawe, na ŋaro dino;

²² na ŋɩdi wei ŋun ŋanyalɽoṯe ḏuməḏɩjo ḏe eloŋu nanyəmɩnyi nanyalape.

ḏiɽoṯeḏa ga ḏeḏi ŋele ŋeḏi yecu

²³ gwune nuəḏi kwu dunu gweḏi elo gwun gwubuḏo, na jɩsis jun jɩbuḏo wila lugwun na liji lun luɽun naleicɩno, ŋele ŋɩrṯa ŋun ŋaṯaŋarre dino? əḏi gwiro gwun gwiḏəḏɩŋa ŋelɩnya ŋeno?

²⁴ nal yecu wɩrlijo ŋuɽuna nuleicɩno, nyi dino nyi gwajiɽoṯəḏɩjo ŋuɽun ŋe ŋete. na ḏa nyalmiwɩrlɩjo ŋuɽuna, nyi dino nyi gwajuməḏɩjo gwajeicɩno ŋele ŋɩrṯa ŋiro ŋun ŋaṯiŋarre dino.

²⁵ ḏibabṯaijɩno ḏeḏi yuwana ḏɩwiḏi ne? ḏeḏi kanyin ḏiro i ḏeḏi liji a? naluməḏəṯe laginŋu nalarno, ḏa ilmarno, ḏeḏi kanyin ḏiro, gwijeicɩno, gwudaro gəko nate nanyəmɩnyi no?

²⁶ na ḏa ilmarno, ḏeḏi liji ḏiro, ilḏonye liji, gi gwune luŋa wei laṯarno yuwana gwiro nebi.

²⁷ nalwɩrlijo yecuŋ ŋuɽuna naleicɩno, ŋate nilɩŋiḏanalo no. nuleicɩno, nyi dino nyi gwate gwajuməḏɩjo ŋele ŋɩrṯa ŋiro ŋaṯiŋarre dino no.

ŋuɽun ŋun ŋɩlɩbo ŋeḏi nyaɽe nyittən

²⁸ namɩni nyaluməḏinu nyalarau? gwiji gwete gwəṯi nyaɽe nyɩttən nyun nyiro ləmɩnyo; nuwele ŋun ŋiro lɽa nueicɩno, ŋaɽe ŋinyi, wiḏi gwunne ŋapa ŋɩru gi jɩneina jinyi jeḏi jaɽe jun jiro gi ḏuɽuṯ.

²⁹ nuwɩrlijo ŋuɽuna nueicɩno, nyi gwete gwele no. namɩni gɩdo nuuməḏɩni gi dugwor ganu nuwele.

³⁰ nuwele ŋeḏi gɩdo nuare dino. nuwɩrlijo ŋuɽuna nueicɩno, nyi gwele, gwele gwinyi, numɩni ate nuwele no.

³¹ əḏi gwiro gi nyeno nyun nyiro nyɩttən ŋun ŋɩmarre ŋuɽuna ŋun ŋɩbunyɩlo baba gwuŋun? naleicɩno, ŋun ŋiro lja. nal yecu eicɩno, gwerkwe ganu nyi gweiceijɩno, lun laṯɩmeje ṯulba na la lun limɩɽidi jei ganu lajindarane ŋele ŋeḏi elo.

³² gi gwune yuwana gwuwiḏi lagalo ṯaṯ ḏeḏi ŋuɽun ŋun ŋiŋir, namɩni nate nanyəmɩnyi no; namɩni lun laṯɩmeje ṯulba na la lun limɩɽiḏi jei ganu naləmɩnyi. na nyaŋa ḏa limanyalaŋu nate nanyawɩrla ga gɩdo ŋuɽun ŋun ŋɩki no, nanyəmɩnyi.

ŋuɽun ŋun ŋɩlɩbo ŋeḏi jɩneina

³³ na diŋɩnɩl ŋuɽuna ŋiro kaja ŋun ŋɩlɩbo. gwiji gweḏi dunu nugɩḏi jɩneina jeḏi jaɽe jun jiro gi ḏuɽuṯ, nalwaləḏɩjo, nukwuri lɩbuɽulo leḏi dɩlaḏa nyaɽe nyeḏi jaɽe gidəno, nuoḏa upiya yolelo, nuapa liji nulgelene gi jɩneina ganu ki nuwele kamɩrɩgen ŋiro kaja.

³⁴ gwune na gaja wila gɩṯo ge ḏuṯa, nuweje lɩwainya luŋun gi liji lun laṯape ŋɩru alapa nyaɽe nyeḏi jaɽe.

³⁵ na lun lapo ŋɩru nalməṯo lɩwainya; nalpi gwete, nalɽinye gwiro kaja, nalauce nyɩdol nye gwiro kaja.

³⁶ nuaɽu nuwəje lɩwainya liro kaja, lutəno kworo gweḏi gwerre, nalərri dino.

³⁷ na gɩdo ganu nuwəje ŋaɽe ŋuŋun lagin, nuarno, luŋa lanəji ŋaɽe ŋinyi.

³⁸ namɩni gwune na liji lun laṯape ŋɩru nalaŋu ŋaɽe naluməḏəṯe laginŋu, kweno gwiro gwun gwaɽenyeḏe. ilwele ilɽinye ilməṯo ḏiɽenyeḏa ḏuŋun.

³⁹ nalməṯo nalɩŋətuḏə gi jɩneina ganu nalɽinye.

⁴⁰ na dino na ḏa gwele gweḏi jɩneina jun jiro gi ḏuɽuṯ mila, gwarra gi liji leno lun laṯape ŋɩru?

⁴¹ naleicɩno, leno gi gwune nalke lɩki lulɽinye ḏaiya ḏe ḏun ḏɩki, nulḏəḏə jɩneina gi liji lun liro kaja leldɩmiḏi lun ləpijo nyaɽe kaja gun galgure.

⁴² nal yecu eicɩno, nya late ləgɩri kɩḏam geḏi elo, gɩdol gun gɩdonyɩlo lun luto gɩmaro lɽa leḏi gɩḏul; ŋeno ŋɩwiḏi ḏi gwele na ŋijobejega ṯuṯ gi jei ganu jage na?

⁴³ na dino nyi gweiceijɩno, ŋele ŋeḏi elo ŋaje ŋəbɩrini lagalo, ŋalɩḏəḏə liji lun laṯapa nyaɽe nyuŋun.

⁴⁴ na gwun gwidi kɩdol elo keno gwake, namɩni gwun gwa gɩdol auṯaje muŋawa.

⁴⁵ gwune na jɩsis jun jɩbuḏo na lɩbarɩsi diŋɩni ŋuɽuna ŋuŋun 1 ŋun ŋɩlɩbo, nallɩŋe luməḏəṯi laginŋu,

⁴⁶ nalbunyi gwalməṯo, nalmɩni ḏonye liji gi gwune laṯarno gwiro nebi.