maṯa 17 - ŋuɽun ŋun ŋiya ŋun ŋikaiilo elo 1966

asa 17 yecu gwumɩḏinu nupiḏe pɽul

¹ gwune na ŋwamon ete nyəɽɩl na yecu gwulo buṯrusŋaije yagub gwe na yuwana gwun gwiro megin nalabo gi lɩrgwom elo lun lolelo cucun.

² numɩdini gi jei ganu lagin, na gi jei ŋanu juŋun nuoɽa ga gi anyin, na jiria juŋun jiro nɩɽe gi bure.

³ nalaŋinijo musaŋaije iliya gwe lun luməḏɩle.

⁴ na buṯrus uməḏɩjo yecuŋ, nueicɩno, gwele gwəri, ŋiŋir ilo ŋɩne. ḏa ŋa məmɩnyi anoḏa jupiya ṯəɽɩl, yete yan ŋa, na yete yan musa na yete yan iliya.

⁵ na kaja ŋun gumaḏɩlge, na jəbɩɽu gwulo jun jiro gamgam nalɩkiɽɩbə nanu gɩdidɩŋilge, na ŋwal wila gi jəbɩɽu, nalarno, kweno gwiro ŋaɽe ŋinyi ŋun ŋaṯiəmɩnyi na ŋaṯinyiŋiri ḏugwore; diŋɩnəḏil.

⁶ gwune na calɩmis diŋɩni, nalidi gi jei ganu jagin naldonye gworki.

⁷ na yecu wila nulḏɩmumi nanu nuleicɩno, diɽil nyaḏonyɩḏa no.

⁸ naldiɽejo jei jagin elo nate nanaŋu gwetɩdo no, nalmɩni aŋu yecuŋ gwetɩdo.

⁹ na kaja gun gigwululge gi lɩrgwom elo, nal yecu uməḏɩjo ŋuɽuna ŋɩbɩɽe nuleicɩno, nya lo lanuməḏɩjo gwiji gwetɩdo gwan ŋuɽun ŋun ŋaŋəḏanyalo kəbe a ŋaɽe ŋeḏi liji diɽi gi daiya.

¹⁰ na calɩmis juŋun ɽoṯəḏɩjo naleicɩno, gwudaro gəko na jalgaṯɩm arno arram iliya gwila gwerre?

¹¹ nal yecu wɩrlijo ŋuɽuna nuleicɩno, iliya gwila gwerre nuwəɽeice ŋɩdio wei ldu.

¹² namɩni nyi gweiceijɩno, iliya mila, na gwate gwilɩŋɩḏil no, namɩni nalarre wei ŋun ŋɩbunyɩlo. na ŋiro dino ŋaɽe ŋeḏi liji ŋape ḏɩḏia lagin.

¹³ na calɩmis lɩŋe gwuməḏi gwan yuwana mamadan.

yecu gwuti ḏiŋeroma ŋaɽe

¹⁴ gwune nalobeḏeṯe lijiŋale lutu na gwəmɩnyo wila lugwun, nuculɩjo ga ŋwurko ŋwe nueicɩno,

¹⁵ gwele gwi, inəḏi ŋaɽe ŋinyi ŋun ŋiro gwəmɩnyo, gi gwune ŋəṯi ḏiŋeroma na ŋo ŋɩdo gworki; naṯuiḏeḏe kigo na ŋau ganu.

¹⁶ na nyi gwuloḏo gi calɩmis juŋa namɩni jate jəṯi ŋɩma nalgele muma no.

¹⁷ na yecu wɩrlijo ŋuɽuna nuecɩno, liji le leḏi gwunne lun late ləṯi ḏɩməṯo no na lun ləṯi ŋuɽuna ŋɩmanɩḏo ganu, jaḏo gwiro gwun gwar gwilgwije? na nyiməṯo ḏugwor lagalo ŋwamon umɩnyo? apɩji ŋɩne.

¹⁸ na yecu gɩreṯɩnya ḏiŋeroma, nudi, na ŋaɽe gelini muma gi sa ceno.

¹⁹ na calɩmis wila ḏi yecu ga kaja naleicɩno, gwudaro gəko nate nanəṯi ŋɩma ḏanədi no?

²⁰ nal yecu eicɩno, gi gwune nya late lɩməṯi ḏɩməṯo no; na gwerkwe ganu, nyi gweiceijɩno, ḏa nyaləṯi ḏɩməṯo ḏiro gi ŋaɽe ŋete ŋeḏi kardal, nyaleico lɩrgwoma leno no, abɩro ŋɩne ŋele ŋɩnəwei, nalele, na ŋate ŋede ŋun ŋaṯanyaləṯi ŋɩma ŋanyalarre no.

²¹ namɩni ḏiŋerom ḏun ḏiro dino ḏate ḏaṯɩdu ga dino no, namɩni ḏuməḏɩjo ḏe eloŋu na ḏɩməṯo əbuṯo.

yecu gwuwəɽeico ŋuɽuna ga ŋan daiya duŋun

²² na kaja gun gijilge jalil nal yecu eicɩno, ŋaɽe ŋeḏi liji ŋəḏəḏini gi di deḏi liji,

²³ ŋalɽinye, na gi lamon lun liro ṯəɽɩl nudiji. nalrone gworki.

yu gwugelo ṯulba kwu dunu gweḏi elo gwun gwubuḏo

²⁴ gwune nalṯɩmi kabranaum, luŋa lun laṯɩmeje ṯulba ḏeḏi dunu gweḏi elo gwun gwubuḏo nalwila ḏi buṯrus naleicɩno, mualɩm gwuŋa gwate gwaṯɩgele ṯulba na?

²⁵ nuleicɩno, i. na gwune nuəḏi kwu dunu na yecu uməḏɩjo ŋuɽuna gwerre nueicɩno, simian ga gwuməḏɩnu na ŋarau? lele leḏi gɩḏilio laṯɩmeje ṯulba di əḏɩŋa? nyaɽe nyagin i leno lun late leḏi əriḏ ŋagin no a?

²⁶ na buṯrus eicɩno, gi liji lun late leḏi əriḏ ŋagin no. na yecu eicɩno, da ŋɩmaro dino, nyaɽe nyəkədəni ga wɽi gi ṯulba.

²⁷ namɩni kani ate nalbɩlkejo no, wiḏi gi ḏɩrawe ŋəḏije lɩɽugu leḏi ŋwumi, na lun laduḏa gwerre ŋape; na ŋiḏi linyu luŋun ŋabuje kaiyari. ŋape ŋalḏəḏə gwan nyi na ŋa.