maṯa 15 - ŋuɽun ŋun ŋiya ŋun ŋikaiilo elo 1966

asa 15 yecu wɩrli ŋuɽuna ga ŋeḏi liji lun laṯuməḏəṯo gi liji elo lun lɩdonyo gɩmuri

¹ na lɩbarɩsi na jalgaṯɩm leḏi urucəlim nalwila di yecu, nalarno,

² gwudaro gəko na calɩmis juŋa naṯɩlki ŋuɽuna ŋeḏi liji lun luɽun gi gwune luŋa late laṯɩwone di dagin gi anaŋa gwune lar laʼe gia no?

³ nulwɩrlijo ŋuɽuna nuleicɩno, nyaŋa dino, gwudaro gəko nanyaki ŋuɽuna geḏi elo gwan ŋuɽun ŋalo ŋun ŋuɽun?

⁴ gi gwune elo gwigelo ŋuɽuna, nuarno, aṯanəji babaŋ gwuŋa na nanaŋ gwuŋa, na gwun gwaṯɩdene babaŋ i nanaŋ gwuŋun ouwirico nuai ḏaiya.

⁵ namɩni nyaŋa nyalaṯarno, gwun ŋweico babaŋ i nanaŋ gwuŋun no, ŋɩdi wei ŋun ŋəṯilo ŋun ŋəṯi ŋɩma ŋajigelejo uwə ŋiro ŋɩdi ŋeḏi elo.

⁶ gwate gwanəji babaŋ i nanaŋ gwuŋun no. na dino nyalaki ŋɩma ŋeḏi ŋuɽun ŋun ŋigelijɩlo elo musaŋ ŋuɽun ŋe ŋalo ŋun ŋuɽun.

⁷ nyaŋa lun ləṯi ŋuɽuna ganu ŋɩttən, isaia gwuməḏi ŋuɽuna muma ŋan nyaŋa, nuarno,

⁸ liji leno laṯiŋinəji ŋwinyu ŋwe, naṯimɩni dugwor dagin du ganu uro kaja.

⁹ namɩni laṯiŋiorṯeḏa jai, naṯɩlalɩmiḏe ŋuɽuna ŋeḏi liji naṯɩlarno ḏalimia ḏeḏi elo ḏiro.

¹⁰ nuəmɩḏe liji lun lutu nuleicɩno, diŋɩnɩl, nyalɩŋe.

¹¹ ŋɩdi ŋədu ŋun ŋaṯədi gi linyu leḏi gwiji ŋaṯɩduji ŋɩrleḏ no, namɩni ŋun ŋaṯɩduḏə gi linyu ŋiro ŋaṯɩduji gwiji ŋɩrleḏ.

¹² na calɩmis juŋun wila naleicɩno, ŋa gwate gwilɩŋidi lɩbarɩsi nalobɩlkejo gwune diŋɩnilo ŋuɽuna ŋeno na?

¹³ nulwɩrlijo ŋuɽuna nuleicɩno, ḏigwuḏe wei ḏun ḏate ḏikwuḏi baba gweḏi kanyin no ŋəwələḏɩni ga.

¹⁴ ouwɩricɩlo mino; luŋa lun lɩrimə gi jei nalro ləṯigwuloḏa liji lun lɩrimə ŋi jei. na ḏa gwun gwɩrimə gi jei mugwuloḏa gwun gwɩrimə gi jei, lideḏe berene gi libuɽul.

¹⁵ na buṯrus wɩrlijo ŋuɽuna nueicɩno, aŋijije ŋuɽuna ŋeno ŋun ŋɩlɩbo.

¹⁶ nal yecu eicɩno, nyaŋa dino nya lore late lilɩŋiḏanyalo na?

¹⁷ nyaŋa lore late lilɩŋiḏi ŋɩdi wei ŋun ŋaṯəḏi gi linyu ŋele kare ganu ŋədu lugwun na?

¹⁸ namɩni ŋɩdi ŋun ŋaṯɩduḏə gi linyu gila gi ḏugwor ganu na ŋiro ŋeno ŋaṯɩduji gwiji ŋɩrleḏ.

¹⁹ namɩni gi ḏugwor ganu ḏaṯɩdio ḏuməḏɩno ḏun ḏɩki, na ḏijinyɩḏa ḏɩmar, na ŋeḏor na ḏuriḏa galo dino, na ŋuɽam, na ḏugiḏio, na ḏɩḏenɩḏia.

²⁰ ŋɩdi ŋeno ŋiro ŋun ŋaṯɩduji gwiji ŋɩrleḏ, namɩni ḏiṯa di de date duwono no, ḏate ḏaṯɩduji gwiji ŋɩrleḏ no.

ḏigela muma ḏeḏi ŋaɽe ŋeḏi liji lun liro ga dino

²¹ na yecu walane kalo kono nuwele gi diɽil deḏi jɩmɩrɩgen jun jan sur na saida.

²² na gwa gweḏi kanan duḏə gi diɽil ṯeno, nuarəjo gwula nueicɩno, inəḏi gwele, ŋaɽe ŋeḏi ḏauuḏ. ŋaɽe ŋinyi ŋun ŋiro gwa ŋo ŋɩḏo gworki ḏiŋerom ḏe.

²³ numɩni ate nuuməḏɩjo ŋuɽuna ŋəḏi no. na calɩmis juŋun wila nalbunyi naleicɩno, kuwəḏi gi gwune gwarəjije gwula gi lɩbuɽi.

²⁴ nuwɩrlɩjo ŋuɽuna nueicɩno, nyi gwuwəjɩnu gi joŋol jun jɩḏuḏo jeḏi dunu gweḏi isreiyil kuwei.

²⁵ namɩni nuwila nuiḏi gi jei ganu lugwun, nueicɩno, gwele gwi, gelejɩnyi uwə.

²⁶ nuwɩrlijo ŋuɽuna nueicɩno, ŋate ŋiŋir gwiji gwaɽe gia geḏi nyaɽe nugiwinɩjo nyino no.

²⁷ na gwa eicɩno, i gwele gwi namɩni nyin nyanoṯene gwəḏibura gi jɩŋaḏ gwun gwaṯɩbɩjeṯeḏe ga gi ṯarabesa elo ḏeḏi liji luŋun.

²⁸ na ŋiro dino na yecu wɩrlɩjo ŋuɽuna nueicɩno, gwa, ga gwəṯi ḏɩməṯo ḏutu gworki; ŋaro lugwuŋa ŋun ŋɩbunyalo. na ŋaɽe ŋuŋun gelɩni muma gi sa ceno.

liji lutu lɩmiŋir nanu

²⁹ na yecu walane kalo kono nuwele kɩməmu ge ḏɩrawe ḏeḏi jalil; nuabo gi lɩrgwom elo nujiga ŋɩnəwei.

³⁰ na liji lutu wila lugwun nalapijo lun liro jɩbɩjo, na lun lɩrimə gi jei, na lun late laṯumə no, na ŋwuḏan, na lun liro kaja lutu, nalɩgele ga ŋwara ganu ŋweḏi yecu nulgele muma;

³¹ kəbe na liji obaga ṯuṯ gwune nalaŋu liji lun late laṯumə no nalumə, na lun liro ŋwuḏan nalro muma, na jɩbɩjo nalwewele, na lun lɩrimə gi jei naldaŋa ga, nalbuḏi eloŋu gweḏi isreiyil.

ḏia liji lun liro alɩb kwoɽo

³² na yecu əmɩḏa calɩmis juŋun nuleicɩno, nyi gwino liji lutu lono, gi gwune lɩmanalɩje ŋwamon ṯəɽɩl late ləṯi ŋɩdio ŋe ḏiṯa no. na nyi gwate gwəmɩnyu lilkuwa jaŋu no, gi gwune gwəṯi, lele ləḏɩmiḏɩnəne gi ṯaṯ.

³³ na calɩmis juŋun eicɩno, nigwogwe ŋɩne kiḏɩwer iləṯi gia gutu kani a liji leno lutu e wei alpe?

³⁴ nal yecu eicɩno, nyaləṯi gia umɩnyo? naleicɩno, kwoɽoṯəɽɩl na gwumi ŋwɩti.

³⁵ nuuməḏɩjo liji alijiga kwɩnyəm.

³⁶ nuape gia kwoɽoṯəɽɩl na gwumi nueico eloŋu sukran, nubɩleṯɩnya ganu nuḏəḏə calɩmis juŋun na calɩmis ḏəḏə liji.

³⁷ na liji eʼe wei nalpe, nalwəɽeice ŋɩdio ldu ŋun ŋiṯɩlɩne ganu nalenyeje jɩḏi kwoɽoṯəɽɩl.

³⁸ na lun liṯi liro alɩb kwoɽo lun liro ləmɩnyo na laṯe lɩmanḏuɽə la na nyaɽe no.

³⁹ gwune nukuwa liji nuəḏi kwu murkab ganu nuwila gi diɽil deḏi majdala.