maṯa 12 - ŋuɽun ŋun ŋiya ŋun ŋikaiilo elo 1966

asa 12 ḏidɩmino ḏeḏi lamon le sabiṯ

¹ na kaja kono na yecu wele gi lamon le sabiṯ gi dɩri ganu na calɩmis nal jaŋu e, nalakɩre ŋwona nalʼe.

² gwune na lɩbarɩsi aŋu naleicɩno, eʼe, calɩmis juŋa ŋalarre ŋun ŋɩtumuḏu gi lamon le sabiṯ.

³ nulmɩni eicɩno, nya late ləgɩri ŋuɽuna ŋun ŋarrɩlo ḏauuḏ gi gwune iti jaŋu, na liji lun lijille na?

⁴ galakwe nuəḏi kwu dunu gweḏi elo nuʼe gia gun gaṯɩlgegɩle, gun gitumuḏu lugwun na lun lijille, namɩni gaṯi jɩsis e cucun?

⁵ i nya late ləgɩri ŋuɽuna ŋun ŋigelijɩlo elo musaŋ, galakwe jɩsis kwu dunu gweḏi elo gwun gwubuḏo naṯɩlki lamon le sabiṯ namɩni late laṯarre ŋuɽuna ŋun ŋɩki na?

⁶ namɩni nyi gweiceijɩno, kalo keno gwo gwete gwubuṯano kwu kunu gweḏi elo gwun gwubuḏo.

⁷ namɩni da nyalɩŋiḏi ŋuɽuna ŋeno, nyi gwubunyu ŋino ŋədu n ŋe ḏiḏuga no, nya late lakɩmi lun late ləṯi ŋuɽuna ŋɩki no.

⁸ gi gwune ŋəɽe ŋeḏi liji ŋiro gwele gweḏi lamon le sabiṯ.

ḏɩmiḏa ḏeḏi ḏi ḏun ḏoḏeḏo elo

⁹ gwune nuwele nuəḏi kwu dunu gweḏi elo gwagin.

¹⁰ na gwəmɩnyo je gwun gwoḏeḏo di elo. kani alicigi lugwun, nalɽoṯəḏɩjo nalicɩgi naleicɩno, gwiŋir gwilmidi gi lamon leḏi sabiṯ a?

¹¹ nuleicɩno, əḏi gwiro gwete lagalo gwəṯi goŋolia geṯɩdo, na da gɩmauṯaḏe gi lɩbuɽul gi lamon le sabiṯ gate guməṯo guwala na?

¹² namɩni gwiji gwate gwinəno gworki koŋol na? na ŋiro dino giŋir ŋularre ŋun ŋiŋir gi lamon leḏi sabiṯ.

¹³ nueico gwiji no, wali ḏi ganu. nuwal ganu nuaɽuwade nuro muma gi gworo.

¹⁴ na lɩbarɩsi du, naluməḏəṯo lugwun galakwe gwalɽinye.

gaḏam gun gɩməṯɩnu

¹⁵ gwune na yecu lɩŋe ŋuɽuna nuwele ŋɩnəwei. na liji gwujane lutu, nulmidi wei.

¹⁶ nuluməḏɩjo ŋuɽuna ŋɩbɩje nuarno late gwalaŋidi no,

¹⁷ kani nalṯɩmi ŋuɽuna gun ŋuməḏɩlo nebi gwun gwan isaia, ŋarno,

¹⁸ eʼe gaḏama ginyi gun gɩməṯi, gun gəmɩnyi, na ŋiro gun gaṯɩnyiŋiri ḏugwore. nyi gwagele gwuɽɩwə gwinyi lugwun, nuaŋɩḏi ŋuɽuna ŋe ḏakɩmiḏa gi liji leḏi jɩmɩrɩgen wei;

¹⁹ ŋu gwate gwaṯarre ŋɩrəkwənəŋe i gwəri gwula no; na liji late laḏiŋɩni ŋwal ŋwuŋun gi daṯ no.

²⁰ na iṯa yun yimakɩraḏe lɽa gi ḏɩɽeḏe yate yalbanya ganu no, na lambə lun lar lai late laṯoɽa ga muma no late luɽinye no, kəbe nudio ŋuɽuna ŋe ḏakɩmiḏa gi ḏɩḏamiḏa.

²¹ na gi jiri juŋun a liji leḏi jɩmɩrɩgen wei əmɩnyi.

jesu wɩrli ŋuɽuna gu ŋun ḏapa ŋɩru ḏigeleja uwə seiṯan gwe

²² nalapijo gwiji gwete gwəṯi ḏiŋeroma gwun gwɩrimə gi jei na gwate gwaṯumə no, nugele muma, kəbe gwun gwate gwaṯumə no nuumə nudaŋa ga.

²³ na liji wei obaga ṯuṯ nalarno, kweno gwate gwiro ŋaɽe ŋeḏi ḏauuḏ na?

²⁴ namɩni gwune na lɩbarɩsi diŋɩni, nalarno, kweno gwate gwatɩḏi ḏiŋeroma namɩni bilsibul gwe gwun gwiro gwele gweḏi diŋerom.

²⁵ na yecu lɩŋe ḏuməḏɩno dagin nuleicɩno, ŋele wei ŋɩkenyɩḏiḏi ganu ŋake, na amɩrigen i liji leḏi dunu lun lɩkenyɩḏiḏi ganu late ləṯijaḏaṯa no.

²⁶ na da seiṯan maṯɩdi seiṯanŋ, ŋu gwəkenyɩḏiḏi ganu kwulo gwuŋun na galakwe ŋele ŋuŋun ŋajaḏaṯa?

²⁷ na ḏa nyi maṯɩdi diŋeroma bilsibul gwe, namɩni nyaɽe nyalo nyədi əḏi gwe? na ŋiro dino luŋa laro jaḏi jalo.

²⁸ namɩni ḏa nyi maṯɩdi diŋeroma gwuɽɩwə gwe gweḏi elo na ŋele ŋeḏi elo ŋɩmila lagalo gwerkwe.

²⁹ na galakwe gwiji gwete gwəḏi kwu dunu gweḏi gwiji gwun gwubɩɽe nanu nuape ŋɩdio ŋuŋun, ḏa gwate makaii gwiji gwun gwubɩɽe nanu gwerre no? na ḏa mukaii nuəḏi kwu dunu nuape ŋɩdio ŋuŋun.

³⁰ gwun gwate gwijanagwe no gwɩkiḏiḏianagwe, na gwun gwate gwaṯana gwiwəɽeice ldu no ŋwulwɩreiji elo.

³¹ na ŋiro dino nyi gweiceijɩno, ŋuɽun wei ŋun ŋɩki na ḏɩḏenɩḏia ŋaliḏuḏɩjo liji ganu, namɩni ḏɩḏenɩḏia kwuɽɩwə gwun gwɩpiḏo pɽul gwate gwanḏuḏɩjo liji ganu no.

³² na gwun gwuməḏəṯo ŋuɽuna ŋaɽe elo ŋeḏi liji ŋuniḏuḏɩjo ganu; namɩni gwun gwuməḏəṯo kwuɽɩwə elo gwun gwɩpiḏo pɽul, ŋate ŋaniḏuḏɩjo ganu kɩḏilio keno i gun gaje gila no.

³³ kadɩl gwaɽe gwiŋir na nyaɽe nyuŋun nyiŋir, i kadɩl gwaɽe gwɩki na nyaɽe nyuŋun nyiki. gi gwune lɩŋiḏi gwaɽe nyaɽe.

³⁴ nyaɽe nye nyeḏi juŋə, galakwe nyaləṯi ŋɩma nyalumə ŋuɽuna ŋiŋir namɩni nyaŋa lɩki? gi gwune lɩnyu laṯumə gi ḏɩbona ḏuŋun ḏun ḏutu ḏeḏi ḏugwor.

³⁵ gwiji gwun gwiŋir gwatɩḏi ŋɩdio ŋun ŋiŋir ŋun ŋaṯɩje gi dugwor ganu duŋun, na gwiji gwun gwɩki gwatɩḏi ŋɩdio ŋun ŋɩki ŋun ŋaṯɩɽe gi ḏugwor ganu ḏuŋun.

³⁶ namɩni nyi gweiceijɩno, ŋuɽun wei ŋun ŋɩki ŋiro jai ŋun ŋaṯɩŋi liji umə lakɩmini gi lamon le ḏakɩmiḏa.

³⁷ na ŋuɽun ŋuŋa ŋe ŋaŋədu, na ŋuɽun ŋuŋa ŋe ŋaŋakɩmi.

yu gwudonyo ḏiɽoṯeḏa ḏan ḏəŋinio

³⁸ na kworo lun liro jalgaṯɩm na lɩbarɩsi naluməḏɩjo naleicɩno, muəlɩm gwəri, anbunyu ənaŋu doŋinio lugwuŋa ŋun ŋɩbuḏo.

³⁹ nulmɩni wɩrlijo ŋuɽuna nuleicɩno, liji leḏi gwunne lun lɩki na late laṯɩməṯo eloŋ gwagin no, laɽoṯeḏe ḏəŋinio, nate nalinḏəḏe no namɩni ḏəŋinio ḏeḏi yunan gwun gwiro nebi.

⁴⁰ na ŋiro gi gwune yunan gwijo kare ganu geḏi lumi ŋwamon ṯəɽɩl lun libuḏo gworki, na ŋiro dino ŋaɽe ŋeḏi liji ŋaje kwɩnyəm ganu ŋwamon ṯəɽɩl.

⁴¹ na ləmɩnyo leḏi ninuwa lədiɽi gi ḏakɩmiḏa luŋale le leḏi gwunne nalakɩmiḏe, gi gwune lɩwɩrlo ga ḏuməḏɩjo ḏe ḏeḏi yunan; na eʼe, gwete gwo ŋɩne ŋwubuṯano gworki ḏi yunan.

⁴² gwele gweḏi gelio gwun gwiro gwa, gweḏiɽi gi lamon leḏi ḏakɩmiḏa liji le leḏi gwunne nalakɩmi, gi gwune gwuwiḏi kalo gwola ganu geḏi gɩḏilio gwadiŋɩni ḏilɩŋeḏa ḏeḏi suliman; na eʼe, gwere gwo ŋɩne gwubuṯano gworki di suliman.

ḏuwɩrla ga ŋuɽun ŋun ŋɩki ḏun ḏate ḏiṯɩminu no

⁴³ gwune na ḏiŋerom du kwiji ganu, nuwewele kalo gun gate gəṯi ŋau no nubunyi ḏijaga, na ḏa ḏate ḏimubuje no,

⁴⁴ gwarno, nyi gwaɽuwe kwu dunu gwi gwun gwuduḏɩne ganu. na gwune nuwila nubuje duno gwuḏu ganu, muḏinu ganu gwijiga muma.

⁴⁵ nuwele gwapa ḏiŋeroma kwoɽoṯəɽɩl diro kaja ḏɩkeno lugwun, naləḏi nalijiga ŋɩnəwei; na ŋakene kwiji kworo gweḏi uro gwerre. na ŋaro dino gi liji leḏi gwunne lun lɩki.

ŋɩmaga ŋun ŋiro gwerkwe

⁴⁶ gwune nujɩre gwuməḏɩjo liji, na nana gwuŋun na lɩmegin nalḏuḏɩni kɩluḏo nalɽoṯeḏe gwalumə.

⁴⁷ na gwete eicɩno, eʼe nanaŋ gwuŋa na lɩmagalo lo lɩḏuḏɩnu kɩludo lar lanyalumə.

⁴⁸ nuwɩrlijo ŋuɽuna nueicɩno, əḏi gwiro nana gwi na odɩŋa liro lɩmagəri?

⁴⁹ nukuwa ḏi ḏugun gi calɩmis juŋun nuarno, eʼe nanaŋ gwi na lɩmagəri.

⁵⁰ gi gwune gwun gwanduji ŋuɽuna ŋun ŋɩbunyɩlo baba gwi gwun gwaṯɩje kanyin, gu gwiro magəri gwun gwiro gwəmɩnyo na gwun gwiro gwa na nana gwi.